Mifala i Glad Blong Singaot Yu

LASWAN Sapa we Masta Jisas Kraes i stanemap samwe long 2,000 yia bifo, i no jes wan stori long saed blong histri. Lodsapa ya i gat paoa long laef blong ol man kam kasem tede. Samting we ol man oli ridim long Gospel long saed blong sapa ya i tajem hat blong olgeta. Ale, plante long olgeta oli mekem defdefren samting blong tingbaot Lodsapa.

Mo yumi no sapraes long samting ya, from we Jisas Kraes hem wan i talem long ol man blong hem se oli mas rimemba naet ya. Yes, hem i talem stret long olgeta se: “Oltaem yufala i mas mekem samting ya blong tingbaot mi bakegen.”—Luk 22:19; 1 Korin 11:23-25.

Be sipos wan man i wantem selebretem Lodsapa long wan fasin we i stret mo we i save haremgud from, fastaem hem i mas kasem stret mining blong Lodsapa, we mining ya i stap long Tok Blong God, Baebol. Antap long samting ya, hem i mas save wanem we Baebol i talem long saed blong taem mo fasin blong selebretem Lodsapa.

Ol Witnes Blong Jeova oli obei long Tok Blong God, mo long Wenesde, Eprel 16, 2003, raon long wol bambae oli joen tugeta blong tingbaot ded long Kraes. Long taem ya bambae oli gat janis blong ridim Tok Blong God mo mekem bilif mo lav blong olgeta i kam strong moa long Masta blong yumi Jisas Kraes. Masta ya i bin talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Mifala i glad blong singaot yu blong joen wetem mifala long naet ya, blong mekem bilif mo lav blong yu i kam strong moa long Jisas Kraes mo long Papa blong hem we i stap long heven, Jeova God.