Ol Yangfala—?Yufala i Stap Gohed Long Saed Blong Spirit?

HIDEO i tokbaot yangtaem blong hem, taem hem i gat bitwin 13 mo 16 yia, i se: “Nating se mi stap go long ol Kristin miting, mi no gat strong tingting blong mekem wok blong Jeova.” Hem i gohed se: “Plante taem mi pijarem mi wan se ol narafala long skul oli laekem mi tumas, mo mi wantem tumas blong wokbaot long rod wetem wan gelfren mo mekem flas blong mi. Mi no save yet wanem samting we mi wantem mekem long laef blong mi, mo mi no intres blong gohed long saed blong spirit.” Olsem Hideo, plante yangfala oli stap nomo, oli no gat mak we oli wantem kasem long laef blong olgeta mo oli no traem blong gru long saed blong spirit.

Sipos yu yu wan yangfala, ating yu glad tumas taem yu plei spot no yu mekem wan samting we yu laekem. Be, sipos yu mas joen long ol wok long saed blong spirit, ating glad blong yu i lus nao. ?Olsem wanem? ?Yu ting se ol samting long saed blong spirit oli save mekem yu yu glad? Traem ridim tok ya blong man we i raetem Sam i se: “Ol tok we Hae God i putum, yumi save bilif long hem, mo i stap givim waes long olgeta we oli no waes. . . . Ol tok we hem i putum oli stret gud, mo oli stap givim save long yumi [no, “i mekem ae blong yumi i saen,” NW ].” (Ol Sam 19:7, 8) Tok Blong God i save givim waes long “olgeta we oli no waes” mo i save ‘mekem ae blong olgeta i saen.’ Yes, ol wok long saed blong spirit oli save mekem yu yu glad we yu glad tumas. ?Be yu mas mekem wanem blong haremgud olsem? ?Wanem samting we yu mas mekem fastaem?

Yu Mas Wantem Blong Mekem Wok Blong God

Fastaem, yu mas wantem blong mekem wok blong God. Traem tingbaot yangfala King Josaea blong Juda. Taem oli faenem buk blong Loa blong Jeova long tempol, wan man i ridim Loa ya long Josaea mo samting ya i rili tajem hat blong hem. Afta we Josaea i harem Loa ya, hem i “brebrekem olgeta aedol blong ol narafala god we oli stap long ol ples ya.” (2 Kronikel 34:14-21, 33) Riding blong Tok Blong God i pusum Josaea blong wantem wokhad moa blong leftemap klin wosip.

Yu tu yu save gat intres long wok blong Jeova sipos yu stap ridim Baebol oltaem mo yu tingting dip long hem. Hemia nao samting we i pulum Hideo blong wantem mekem wok blong God. Hem i stat fren gud wetem wan paenia, wan Witnes Blong Jeova we i prij fultaem. Hideo i yangfala moa long paenia ya we i stap stadi long Baebol oltaem mo i traehad blong mekem tijing blong Baebol i wok long laef blong hem. Eksampol blong paenia ya i leftemap tingting blong Hideo, nao hem i stat mekem olsem paenia ya, mo sloslo, tingting blong hem i kam strong moa blong mekem wok blong Jeova mo halpem ol narafala man. Hideo i gohed gud long saed blong spirit, mo naoia, laef blong hem i gat mining.

Fasin blong ridim Baebol evri dei i save pulum ol yangfala blong wantem mekem wok blong God. Takahiro i eksplenem se: “Evritaem, sipos mi go long bed mo mi tingbaot se mi no ridim Baebol yet, ale mi mas  girap mo ridim Baebol. From we mi stap mekem olsem, mi harem se Jeova i stap lidim mi. Fasin ya blong ridim Baebol evri dei, i givhan bigwan long mi blong mi gohed gud long saed blong spirit. From we mi mi wantem tumas blong mekem moa long wok blong Jeova, jes afta we mi kasem setifiket blong mi long hae skul mi joen long wok blong fultaem paenia. Mo mi glad tumas blong gohed long wok ya.”

?Antap long Baebol riding, wanem samting bakegen i save givhan long yu blong wantem moa blong presem Jeova? Tingbaot eksampol blong Tomohiro, we mama blong hem nao i tijim ol trutok blong Baebol long hem. Tomohiro i talem se: “Taem mi gat 19 yia blong mi, mi stadi dip long buk ya Life Does Have a Purpose. Long taem ya nomo, mi rili harem se lav blong Jeova mo ransom sakrefaes blong Jisas i tajem hat blong mi. Mo tangkiu we mi gat long lav we God i soem long yumi i pusum mi blong wantem mekem moa long wok blong Jeova.” (2 Korin 5:14, 15) Olsem Tomohiro, fasin blong stadi dip long Baebol i pulum plante yangfala blong gohed gud long saed blong spirit.

?Olsem wanem nao sipos yu mekem samting ya finis, be yu no harem yet long hat blong yu se yu wantem mekem wok blong Jeova? ?Wanem i save givhan long yu? Aposol Pol i raetem se: “Oltaem God i stap wok . . . blong givim paoa long yufala blong yufala i save [“mo i wantem,” NW ] mekem ol samting we hem i wantem.” (Filipae 2:13) Sipos yu prea long Jeova blong i halpem yu, bambae hem i glad nomo blong givim tabu spirit blong hem i go long yu, mo samting ya bambae i givim paoa long yu blong yu “mekem” be tu yu ‘wantem mekem’ ol samting we hem i wantem. Tok ya i min se tabu spirit bambae i gat paoa long tingting blong yu, i mekem we yu yu wantem givim bes blong yu long wok blong Jeova, mo i halpem yu blong gru long saed blong spirit. !Oltaem, yu mas trastem paoa blong Jeova mo mekem hat blong yu i kam strong moa!

Putum Ol Mak We Yu Save Kasem

Taem yu gat strong tingting blong mekem wok blong Jeova fulwan, naoia yu mas putum ol mak we yu save kasem blong gohed long saed blong spirit. Mana, wan yangfala Kristin gel, i talem se: “Taem mi bin putum sam mak we mi save kasem long laef blong mi, samting ya i givhan bigwan long mi. Mi no moa gobak long ol samting blong bifo, mi gat strong tingting blong gohed gud oltaem. Mi save ol mak we mi wantem kasem, mo mi prea dip long Jeova blong i lidim mi. Nao mi naf blong gohed gud long saed blong spirit mo mi no letem wan samting i pulum mi mi gowe long mak blong mi.”

Yu mas putum ol mak we yu naf blong kasem. Wan mak we i no had tumas blong kasem i blong ridim wan japta blong Baebol evri dei. Maet yu save lukaot moa save long wan samting we yu ridim no wan trutok. Eksampol, sipos yu save rid Inglis (no Franis), maet yu save stadi long ol gudfala fasin blong Jeova. Wan lis blong ol fasin blong Jeova i stap long buk ya Watch Tower Publications Index, long haf ya “Jehovah,” mo aninit long smol haf ya “Qualities by Name” (long Franis: “ Qualités par leur nom ” ). I gat klosap 40 gudfala fasin we yu save stadi long hem. I sua we ol traehad we yu mekem blong save moa long ol fasin ya bambae oli pulum yu yu kam klosap moa long Jeova mo mekem yu yu wantem wokhad moa blong Hem. I gat sam narafala mak we yu save kasem, olsem givim wan ansa long evri Kristin miting taem i gat wan tok wetem kwestin mo ansa, traehad blong storian wetem wan defren memba blong kongregesen long evri miting, mo neva foget blong prea long Jeova evri dei mo tokbaot hem long ol narafala.

Sipos yu no joen yet long Tiokratik Ministri Skul, ating hemia wan mak we yu save kasem tu. ?Yu yu stat prij finis? Sipos no, maet yu wantem traehad blong kam wan pablisa we i no baptaes yet. Taem yu tingting dip long fasin fren blong yu wetem Jeova, bambae yu wantem tekem nekis step ya blong givim laef blong yu i go long Hem. Plante yangfala oli wantem holem promes we oli bin mekem long Jeova taem oli tekem baptaes, taswe oli traehad blong kam fultaem paenia.

I gud blong putum sam mak we yu wantem kasem long laef blong yu, be yu mas lukaot long fasin blong mekem kompetisin. Bambae yu harem gud moa long samting we yu stap mekem, sipos yu no skelem wok blong yu wetem wok blong narafala.—Galesia 5:26; 6:4.

 Maet yu harem se yu no gat naf ekspiriens mo yu faenem i had blong putum ol mak blong kasem. Sipos i olsem, traem folem advaes ya blong Baebol we i se: “I gud yu lesin gud . . . long ol tok we ol waes man oli stap talem.” (Ol Proveb 22:17) Askem help long papa mama blong yu no long sam narafala Kristin we oli bigman long saed blong spirit. Wan samting nomo se, ol papa mama mo ol narafala Kristin oli mas skelgud mo meksua se ol advaes we oli stap givim oli rili leftemap tingting blong ol yangfala. Sipos wan yangfala i harem se hem i mas traehad tumas blong kasem wan mak we sam narafala oli bin putum blong hem, hem i save harem nogud, nao i save mestem stamba risen from wanem i gud blong putum ol mak olsem. Hemia nao samting we i bin hapen long wan yangfala gel, we i talem se: “Oltaem, papa mama blong mi i stap putum ol mak we mi mas kasem long laef blong mi. Tufala nao i talem long mi se mas joen long Tiokratik Ministri Skul, joen wok blong prij, tekem baptaes, mo kam wan paenia. Mi traehad we mi traehad blong kasem evri mak ya. Taem mi kasem wan mak, ale, papa mama blong mi oli no givim gudfala toktok long mi, be oli putum wan narafala mak we mi mas traehad blong kasem bakegen. Taswe mi harem se tufala i stap fosem mi blong mi kasem ol mak. Mi taed we mi taed tumas, mo mi harem se mi no bin mekem wan gudfala samting we mi save haremgud from.” ?From wanem hem i harem nogud olsem? Ol mak we hem i mas kasem oli gud nomo, be i no gel ya hem wan we i bin putum ol mak long laef blong hem. !Sipos yu wantem haremgud, yu wan yu mas wantem blong tekem aksin mo putum ol mak we yu wan yu save kasem long laef blong yu!

Tingbaot Jisas Kraes. Taem hem i kam long wol, hem i save finis ol samting we Papa blong hem, Jeova, i wantem hem blong mekem. Be long tingting blong Jisas, ol samting ya we God i wantem hem blong mekem i no jes wan mak we hem i mas kasem, be i olsem wan impoten wok we hem i mas finisim. ?Jisas i talem wanem long saed blong wok ya? Hem i se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Jisas i mekem olgeta samting we Papa blong hem i wantem mo i mekem Papa blong hem i haremgud tumas. Long tingting blong Jisas, wok ya i olsem wan kakae—hem i glad blong mekem wok ya mo taem hem i finisim wok we Papa blong hem i wantem hem blong mekem, hem i harem se i bin mekem wan gudfala samting. (Hibrus 10:5-10) Yu tu yu save haremgud tumas sipos papa mama blong yu tufala i leftemap tingting blong yu long wan stret fasin, mo sipos yu yu gat strong tingting blong folem advaes blong olgeta.

No Kam Slak Blong Mekem Ol Gudfala Fasin

Taem yu putum wan mak long laef blong yu, yu mas wokhad blong kasem mak ya. Galesia 6:9 i talem se: “Bambae yumi no kam slak blong mekem ol gudfala fasin, from we sipos yumi mekem olsem, bambae long stret taem blong hem, yumi save kasem kakae from ol hadwok ya blong yumi.” I nogud yu trastem prapa paoa no save blong yu. Bambae yu fesem sam traem, mo blong smol taem maet bambae yu harem se yu no naf blong kasem ol mak we yu bin putum. Be Baebol i talem klia long yumi se: “Long olgeta samting we yu stap mekem, yu mas tingbaot [God] oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:6) Jeova bambae i sapotem yu long ol hadwok blong yu blong kasem ol mak we yu putum long saed blong spirit.

Yes, sipos yu wokem filing ya blong wantem mekem wok blong Jeova mo yu traehad blong kasem ol gudfala mak long saed blong spirit, bambae “olgeta man oli save luk we yu stap gohed gud long laef blong yu mo long wok blong yu.” (1 Timoti 4:15) Nao bambae yu haremgud mo laef blong yu i gat mining from we yu stap mekem wok blong God.

[Tok blong pija long pej 9]

Fasin blong ridim Baebol mo tingting dip long hem i save halpem yu blong wantem mekem wok blong Jeova

[Tok blong pija long pej 10]

Jisas i finisim ol wok we Papa blong hem i wantem hem blong mekem