Lav We i Kaen Gud—?Hem i Rili Impoten?

BAEBOL i talem se: “Man blong graon, sipos hem i kaen gud, bambae ol man oli laekem tumas fasin ya blong hem.” (Ol Proveb 19:22, NW ) Yes, i gud tumas blong luk kaen gud fasin we i stanap long lav. Be “lav we i kaen gud” we Baebol i tokbaot, hem i wan fasin we i kamaot from we wan man i fren finis wetem wan narafala man, mo wan long tufala ya i bin soem kaen fasin long narawan. Taswe, kaen fasin ya i gat mining blong stap tru tu.

King Joas blong Juda i no soem gudfala fasin ya. Hem i gat bigfala kaon long anti blong hem mo long Jehoeada, angkel blong hem. Taem Joas i no gat wan yia blong hem yet, rabis bubu woman blong hem i putumap hem wan olsem kwin, mo i kilim i ded olgeta brata blong Joas we oli gat raet blong kam king. Be, woman ya i no save kilim Joas i ded, from we anti mo angkel blong Joas tufala i haedem gud smol boe ya. Mo tu, oli tijim hem long Loa Blong God. Taem Joas i gat seven yia blong hem, angkel blong hem i yusum paoa blong hem olsem hae pris mo i kilim i ded rabis kwin ya, nao i putumap Joas olsem king.—2 Kronikel 22:10–23:15.

Yangfala Joas i rul olsem wan gudfala king gogo kasem taem we angkel blong hem i ded. Afta, Joas i stat wosipim ol aedol. Taswe God i sanem Sekaraea, pikinini blong Jehoeada, blong hem i givim woning long Joas from fasin ya blong apostasi. Be Joas i stonem Sekaraea i ded. !Fasin ya i nogud we i nogud, from we Joas i no stap tru nating long famle ya we i bin mekem plante gudfala samting long hem!—2 Kronikel 24:17-21.

Baebol i talem se King Joas “i no moa tingbaot ol gudfala wok ya we papa blong pris ya [Sekaraea] i bin mekem long hem, taswe i kilim hem i ded.” Taem we Sekaraea klosap i ded, hem i talem se: “Prea blong mi we Hae God bambae i luk ol samting we yufala i stap mekem naoia, mo we bambae hem i panisim yufala from.” Folem prea blong Sekaraea, Joas i kam sik bigwan mo biaen, ol prapa man blong wok blong hem oli kilim hem i ded.—2 Kronikel 24:17-25.

I nogud yumi mekem olsem Joas. Be sipos yumi folem advaes blong vas ya we i kam biaen, bambae yumi save gat wan nambawan fiuja. Vas ya i talem se: “Kaengud fasin mo fasin ya blong stap tru oltaem bambae oli no mas lego yu . . . olsem nao bambae yu save faenem kaen fasin . . . long ae blong God blong ol man.”—Ol Proveb 3:3, 4, NW.