Ol Yangfala—!Jeova i No Save Fogetem Wok Blong Yufala!

“Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”—HIBRUS 6:10.

1. ?Olsem wanem buk blong Hibrus mo Malakae i soem se Jeova i tinghae long wok blong yumi?

 ?SAMTAEM yu bin mekem wan gudfala samting long wan fren be hem i neva talem no soem tangkiu from? Ating yumi harem nogud taem narafala i no kea nating, no maet i fogetem gudfala samting we yumi mekem long hem. !Be, hemia i defren olgeta long fasin blong Jeova taem yumi mekem wok blong hem wetem fulhat blong yumi! Baebol i talem se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap  tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.” (Hibrus 6:10) Tingbaot mining blong tok ya. Long lukluk blong Jeova, i no stret nating—no i olsem wan sin—sipos hem i fogetem ol wok we yu bin mekem mo we yu stap mekem yet. !Tru ya, Jeova i rili tinghae mo gat tangkiu from wok blong yumi!—Malakae 3:10.

2. ?From wanem i wan spesel janis blong mekem wok blong Jeova?

² Yu yu gat wan spesel janis blong wosip mo mekem wok blong gudfala God ya. Hemia i rili wan spesel janis ya, taem yu skelem se long olgeta sikis bilian man long wol, i gat raonabaot sikis milian man nomo we oli gat janis ya. Mo tu, from we yu lesin mo yu folem tok blong gud nius, hemia wan pruf se Jeova i intres long yu. Yes, Jisas i talem se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:44) Yes, Jeova i halpem ol man wanwan blong oli kasem blesing blong sakrefaes blong Kraes.

Soem Tangkiu From Spesel Janis Ya

3. ?Olsem wanem ol pikinini blong Kora oli talemaot tangkiu from janis ya we oli gat blong mekem wok blong Jeova?

³ Faswan stadi i soemaot se yu yu gat nambawan janis blong mekem hat blong Jeova i glad. (Ol Proveb 27:11) Hemia wan samting we yu neva mas ting nating long hem. Tabu spirit i pulum ol pikinini blong Kora blong raetem plante Sam. Long wan long ol Sam ya oli talemaot tangkiu from janis we oli gat blong mekem wok blong Jeova. Yumi ridim tok blong olgeta se: “Yu yu God blong mi. Sipos mi stap wan dei nomo long haos blong yu, be hemia i gud moa, i winim we mi stap wan taosen dei long ol narafala ples. Nating sipos mi stap wok nomo long doa blong haos blong yu, be hemia i moa gud, i winim we mi stap insaed olgeta long haos blong ol man nogud.”—Ol Sam 84:10.

4. (a) ?From wanem samfala maet oli ting se wosip blong Jeova i blokem olgeta tumas? (b) ?Olsem wanem Jeova i soem se hem i lukaot rod blong mekem i gud long ol man blong hem?

⁴ ?Hemia nao filing we yu yu gat long janis blong yu blong mekem wok long Papa blong yu long heven? I tru se samtaem maet i luk olsem se wosip blong Jeova i blokem yu tumas. Mo tu, blong laef folem ol rul blong Baebol yu mas lego plante samting we yu nomo yu wantem. Be long taem we i kam bambae yu luksave se olgeta samting we Jeova i askem yu blong mekem i karem gudfala frut. (Ol Sam 1:1-3) Antap long hemia, Jeova i luk ol traehad we yu yu mekem mo hem i soemaot se hem i glad long fasin blong yu blong holem strong long bilif. Yes, Pol i raetem se Jeova i “stap mekem i gud long olgeta we oli stap traem faenem hem.” (Hibrus 11:6) Jeova i lukaot janis blong mekem olsem. Wan profet long Isrel bifo i talem se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”—2 Kronikel 16:9.

5. (a) ?Wanem beswan rod we yu save soem se hat blong yu i fulwan long Jeova? (b) ?From wanem maet yu faenem i had blong tokbaot bilif blong yu long narafala?

⁵ Beswan rod blong soem se hat blong yu i fulwan long Jeova, hemia blong tokbaot hem long ol narafala. ?Yu yu gat janis finis blong talemaot bilif blong yu long ol fren blong yu long skul? Fastaem  maet tingting ya i mekem yu yu wari lelebet mo yu fraet. Maet yu askem se: ‘?Olsem wanem sipos oli laf long mi? ?Olsem wanem sipos oli talem se skul blong mi i narakaen?’ Jisas i talem se i no olgeta man evriwan we bambae oli laekem gud nius blong Kingdom. (Jon 15:20) Be hemia i no min se long ful laef blong yu bambae yu stap safa from ol tok jik mo bambae yu no gat fren. Nogat. Plante yangfala Witnes oli faenem samfala we oli lesin long olgeta, mo taem oli toktok long saed blong bilif blong olgeta, oli winim respek blong plante fren blong olgeta.

“Bambae Jeova i Halpem Yu”

6, 7. (a) ?Olsem wanem wan gel we i gat 17 yia i tekem janis blong prij long ol fren long klas blong hem? (b) ?Yu yu lanem wanem long stori blong Jennifer?

⁶ ?Olsem wanem yu save mekem tingting blong yu i strong blong tokbaot bilif blong yu? Taem narafala i askem kwestin long yu long saed blong skul blong yu, i gud blong talem stret se yu yu wan Witnes Blong Jeova. Tingbaot stori blong Jennifer we i gat 17 yia. Hem i se: “Mi stap kakae long medel dei wetem sam fren long skul. Ale, ol gel we oli sidaon long tebol wetem mi oli stat storebaot ol jos mo wan long olgeta i askem mi se mi blong wanem skul.” ?Jennifer i fraet blong ansa? Hem i se: “Yes, mi fraet lelebet from we mi no save se bambae oli talem wanem.” ?Ale Jennifer i mekem wanem? Hem i gohed se: “Mi talem long ol gel ya se mi mi wan Witnes Blong Jeova. Fastaem mi luk se oli sapraes lelebet. I luk olsem se oli gat tingting ya se ol Witnes Blong Jeova oli ol narakaen man. Ale, oli stat askem sam kwestin long mi, mo mi mi gat janis blong kliarem sam rong tingting we oli gat. Stat long taem ya, sam long ol gel ya oli stap kam luk mi, wanwan taem, blong askem kwestin long mi.”

⁷ ?Jennifer i sore we hem i bin tekem janis blong talemaot bilif blong hem? !Nogat! Hem i se: “Taem mifala i finis blong kakae mo mifala i gobak long klas, mi harem i gud tumas. Naoia, ol gel ya oli save tru se ol Witnes Blong Jeova oli hu.” Advaes blong Jennifer i isi nomo se: “Sipos yu faenem i had blong prij long ol fren long klas blong yu no long ol tija, mekem wan sotfala prea i go long Jeova. Bambae Jeova i halpem yu. Sipos yu tekem janis we yu gat blong prij long narafala, bambae yu yu glad tumas from we yu no westem taem blong yu olbaot.”—1 Pita 3:15.

8. (a) ?Olsem wanem prea i halpem Nehemaea taem hem i fraet mo i no save wanem blong talem? (b) ?Long skul, long wanem taem maet yu nidim blong prea kwiktaem long tingting blong yu?

⁸ Makem advaes blong Jennifer se i gud blong mekem wan ‘sotfala prea i go long Jeova’ taem wan janis i kam blong yu talemaot bilif blong yu long narafala. Hemia nao samting we Nehemaea i bin mekem long wan taem we hem i fraet mo i no save wanem blong talem. Nehemaea hem i man blong karem waen blong King Ataksekses blong Pesia. Wan dei, Nehemaea i harem nius se ol man Jiu oli stap long trabol mo bigfala stonwol blong Jerusalem wetem ol doa blong bigfala stonwol ya oli brokdaon olgeta. Ol man oli luksave klia nomo long fes blong Nehemaea se hem i stap harem nogud. King tu i luksave se tingting blong Nehemaea i stap trabol. Ale, King i askem long Nehemaea se wanem nao i mekem hem i harem nogud. Bifo we Nehemaea i ansa, hem i prea long Jeova blong i lidim hem. Nao hem i no fraet blong askem king blong letem hem i gobak long Jerusalem mo halpem ol manples blong hem blong bildim bak taon blong olgeta. King Ataksekses i agri blong letem Nehemaea i go. (Nehemaea 2:1-8) ?Yu yu lanem wanem long stori ya? Sipos yu yu kasem wan janis blong yu talemaot bilif blong yu long narafala, be yu harem se yu fraet lelebet, no fogetem janis we yu gat blong prea long tingting blong yu. Pita i raetem se: “Yufala we i stap wari tumas, yufala i mas putum ol trabol blong yufala long han blong [Jeova], from we oltaem hem i stap tingbaot yufala.”—1 Pita 5:7; Ol Sam 55:22.

“Rere Blong Givim Ansa”

9. ?Olsem wanem Leah we i gat 13 yia nomo, i givimaot 23 kopi blong buk ya Young People Ask?

⁹ Tingbaot narafala stori ya. Leah, we i gat 13 yia, i stap long skul, mo long medel dei hem i stap ridim buk ya Questions Young People Ask—Answers That Work. * Hem i se: “Ol narafala studen oli stap wajem mi mo sloslo plante long olgeta oli kam hivap raon long mi. Oli stat askem long mi se wanem buk ya we mi stap ridim.” Long dei ya, fo gel oli askem Leah sipos hem i save givim buk ya long olgeta. Biaen, fofala gel ya oli serem buk blong olgeta wetem ol narafala studen, nao ol narafala studen ya tu oli wantem buk ya. Long ol wik we oli kam  biaen, Leah i givimaot 23 kopi blong buk ya long ol studen long klas blong hem mo long ol fren blong olgeta. ?Leah i ting se i isi nomo blong toktok taem ol studen ya oli bin kam raon long hem fastaem, mo askem hem wanem buk we hem i stap ridim? !No, i no isi! Hem i luksave samting ya i se: “Fastaem, hat blong mi i pam. Be mi prea, mo mi save se Jeova i stap wetem mi.”

10, 11. ?Olsem wanem smol gel ya blong Isrel i naf blong halpem wan komanda blong soldia blong Siria blong save Jeova, mo wanem ol jenis we man ya i mekem biaen?

¹⁰ Ating stori blong Leah i mekem yu yu tingbaot smol gel ya blong Isrel we i wok slef long Siria. Neman i wan komanda blong ol soldia blong king, be hem i gat rabis sik ya leprosi. Maet woman blong Neman i talem sam samting we biaen i pulum smol gel ya blong tokbaot bilif blong hem. Hem i se: “Misis, mi mi wantem tumas sipos masta i save go luk profet ya we i stap long Sameria. Man ya bambae i save tekemaot sik ya, i mekem hem i kam gud bakegen.”—2 King 5:1-3.

¹¹ From we smol gel ya i no fraet blong toktok, Neman i kasem save se ‘i no gat narafala god we i tru, be God ya blong Isrel, hem nomo i God.’ Hem i tekem disisen tu se ‘bambae hem i no moa mekem sakrefaes samtaem long ol narafala god, bambae i stap mekem ol sakrefaes long Hae God nomo.’ (2 King 5:15, 17) I sua se Jeova i blesem smol gel ya from strong tingting mo fasin blong  hem blong no fraet. Jeova i gat paoa, mo i wantem tu, blong blesem traehad blong ol yangfala tede. Leah i luksave samting ya. Smol taem i pas nao ol fren blong hem long skul oli kam long hem mo oli talem se buk ya Young People Ask i stap givhan long olgeta blong kam gud moa long fasin blong olgeta. Leah i talem se: “Mi rili glad from we mi save se mi stap halpem olgeta blong oli save Jeova mo mi halpem olgeta tu blong jenisim laef blong olgeta.”

12. ?Olsem wanem yu save mekem tingting blong yu i strong blong tokbaot bilif blong yu?

¹² Yu tu yu save karem ol gudfala frut olsem we Jennifer mo Leah tufala i karem. Traem folem advaes we Pita i givim. Hem i raetem toktok ya se yumi wanwan we yumi Kristin yumi mas “rere blong givim ansa” long eni man we ‘oli askem long yumi from wanem yumi putum tingting blong yumi i stap long Kraes.’ (1 Pita 3:15) ?Olsem wanem yu yu save folem advaes ya? I gud yu folem fasin blong ol faswan Kristin we oli prea long Jeova blong i halpem olgeta blong prij ‘we tingting blong olgeta i strong.’ (Ol Wok 4:29) Ale, yu no mas fraet blong tokbaot bilif blong yu long narafala. Maet bambae yu sapraes long frut we i kamaot from. Antap long hemia, bambae yu mekem hat blong Jeova i glad.

Kaset Video Mo Ol Spesel Projek

13. ?Sam yangfala oli yusum wanem janis blong givim witnes long narafala? (Lukluk tufala bokis long pej 20 mo 21.)

¹³ Plante yangfala oli talemaot bilif blong olgeta long ol narafala studen mo long ol tija blong olgeta, taem oli yusum ol video kaset. Samtaem i gat sam projek we ol yangfala oli mas mekem long skul, mo hemia i givim janis long ol yangfala witnes blong oli presem Jeova. Eksampol, tu yangfala Witnes Blong Jeova we tufala i gat 15 yia, tufala i gat wan projek blong mekem long klas blong histri. Projek ya i blong raetem ripot long saed blong wan long ol skul blong wol. Tufala yang boe ya tufala i mekem plan blong wok tugeta blong raetem wan ripot long saed blong ol Witnes Blong Jeova. Tufala i yusum buk ya Jehovah’s Witnesses—Proclaimers of God’s Kingdom blong kasem ol save we oli nidim. * Long projek ya olgeta studen wanwan oli mas givim wan smol toktok blong faef  menet. Afta long smol toktok blong tufala ya, tija mo ol studen oli gat plante kwestin blong askem, mekem se tufala i mas stanap 20 menet moa, fored long klas, blong ansarem olgeta kwestin ya. !Plante wik afta, ol studen long klas blong tufala oli gohed yet blong askem kwestin long saed blong ol Witnes Blong Jeova!

14, 15. (a) ?From wanem fasin blong fraet long narafala i wan trap? (b) ?From wanem yu no mas fraet blong serem bilif blong yu wetem narafala?

¹⁴ Olgeta stori ya we yumi tokbaot finis oli soemaot klia se bigfala blesing i save kamaot taem yumi talemaot bilif blong yumi olsem Witnes Blong Jeova long narafala. I nogud yu letem fasin blong fraet long man i mekem we yu mestem janis mo glad we i save kamaot taem yu halpem wan man blong save Jeova. Baebol i talem se: “Fasin ya we man i fraet tumas long ol narafala man, hem i olsem trap nomo, mo i nogud yu yu foldaon long hem. Sipos yu stap trastem Hae God, bambae yu save stap gud oltaem.”—Ol Proveb 29:25.

¹⁵ Neva fogetem samting ya: Yu yu wan yangfala Kristin mo yu gat wan samting we ol fren blong yu oli nidim tumas—hemia beswan laef we man i save gat long wol tede mo hop blong laef olwe long fiuja. (1 Timoti 4:8) Long Yunaeted Stet—wan ples we maet yu ting se bighaf blong ol man oli no intres long God mo oli laekem ol samting blong wol nomo—wan ripot i soemaot we klosap stret haf blong olgeta yangfala oli tinghae long jos blong olgeta. Mo klosap 30 pesen blong olgeta oli talem se samting we i gat “moa paoa” long laef blong olgeta hemia bilif blong jos. Ating hemia i tru tu long plante narafala kantri blong wol. From samting ya, ating bambae yu sapraes we plante yangfala long skul blong yu oli glad blong lesin long samting we yu yu wantem talem long saed blong Baebol.

Yu Yangfala, Kam Klosap Long Jeova

16. ?Blong mekem Jeova i glad i nidim wanem moa i bitim we yumi tokbaot hem long narafala?

¹⁶ I tru se blong mekem hat blong Jeova i glad, i no naf blong tokbaot hem long narafala. Yu mas traehad tu blong mekem laef blong yu i laenap wetem ol rul blong hem. Aposol Jon i raetem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” (1 Jon 5:3) Bambae yu luk we tok ya i kamtru long yu sipos yu kam klosap moa long Jeova. ?Be yu save mekem samting ya olsem wanem?

17. ?Olsem wanem yu save kam klosap moa long Jeova?

¹⁷ Tektaem blong ridim Baebol mo ol buk we oli eksplenem Baebol. Moa we yu save Jeova, moa we bambae i isi long yu blong obei long hem mo tokbaot hem long ol narafala. Jisas i talem se: “Gudfala man we i fulap long ol gudfala tingting, hem i save mekem ol gudfala fasin . . . from we taem man i tok, hem i stap talemaot ol samting we tingting blong hem i fulap long hem.” (Luk 6:45) Taswe, i gud yu fulumap hat blong yu wetem ol gudfala samting. ?I gat sam mak we yu save kasem long saed ya? Maet yu save kamgud moa long fasin blong yu blong rerem miting, maet yu save stat blong mekem samting ya long miting blong nekis wik. Wan narafala mak we yu save kasem hemia blong givim wan smol ansa long prapa tok blong yu long miting. Be i impoten tu se yu mas mekem ol samting we yu lanem i wok long laef blong yu.—Filipae 4:9.

18. ?Nating se yu harem nogud from we man i agensem yu, yu save sua long wanem samting?

¹⁸ Ol blesing we oli kamaot taem yumi mekem wok blong Jeova oli stap olwe—oli no save finis. I tru, wanwan taem bambae yu faenem we sam man oli agensem yu no oli jikim yu from we yu wan Witnes Blong Jeova. Long taem olsem, i gud yu tingbaot Moses. Baebol i talem se “oltaem hem i stap luk long pei we God bambae i givim long hem.” (Hibrus 11:24-26) Yu tu yu save sua se Jeova bambae i blesem yu from ol traehad we yu mekem blong savegud hem mo blong tokbaot hem. Yes, bambae hem i ‘no save fogetem ol wok ya we yu yu mekem bambae i stap tingbaot we yu yu lavem hem.’—Hibrus 6:10.

[Ol Futnot]

?Yu Yu Tingbaot?

• ?From wanem yu yu sua se Jeova i stap tinghae long wok blong yu?

• ?Wanem sam rod blong prij long skul we sam yangfala oli faenem se i wokgud?

• ?Wanem i save mekem tingting blong yu i strong blong prij long ol studen long klas blong yu?

• ?Olsem wanem yu yu save kam klosap moa long Jeova?

[Kwestin]

[Bokis/Foto blong pija long pej 20]

!Ol Pikinini Tu Oli Save Presem Jeova!

Ol pikinini tu oli bin givim gudfala witnes long skul. Tingbaot sam long ol stori ya.

Amber i gat ten yia blong hem. Hem i stap long klas faef, mo klas blong hem i stap ridim wan buk we i tokbaot trabol we ol Nasi oli mekem long ol man Jiu long taem blong Wol Wo Tu. Amber i tingbaot blong karem video kaset ya Purple Triangles i go long tija blong hem. Tija ya i sapraes blong luk se ol Nasi oli bin mekem bigfala trabol long ol Witnes Blong Jeova tu. Tija ya i soem video kaset ya long olgeta pikinini long klas.

Alexa i gat eit yia nomo. Hem i raetem wan leta i go long klas blong hem blong talem from wanem hem i no save joen long lafet blong Krismas. Tija blong hem i sapraes gud long toktok blong Alexa ale hem i talem long Alexa blong ridimaot leta blong hem long fored blong klas blong hem mo long tu narafala klas bakegen. Long en blong leta ya, Alexa i talem se: “Tijing we mi mi kasem i tijim mi blong soem respek long olgeta we bilif blong olgeta i defren long bilif blong mi mo mi mi tangkiu long yufala tu from we yufala i respektem disisen blong mi blong no selebretem Krismas.”

Smoltaem afta we Eric i stat long klas wan, hem i tekem buk ya My Book of Bible Stories i go long skul mo i askem tija sipos hem i save soem buk ya long ol narafala pikinini. Tija blong hem i talem se: “Mi mi gat wan tingting we i moagud. ?Olsem wanem sipos yu ridim wan stori blong buk ya long ful klas?” Ale Eric i ridim wan stori. Taem hem i finis, hem i talem se sipos i gat sam we oli wantem buk ya oli save leftemap han blong olgeta. !Eitin pikinini evriwan—wetem tija tu—oli leftemap han! Naoia Eric i glad tumas from we hem i gat prapa teritori blong hem blong prij long hem, hemia skul blong hem.

Whitney i gat naen yia blong hem. Hem i glad tumas long gudfala smol buk ya Jehovah’s Witnesses and Education. * Hem i se: “Evri yia, Mama nao i stap givim buk ya long ol tija blong mi. Be long yia ya, mi nomo mi givim. From buk ya nao, tija blong mi i jusum mi olsem ‘studen blong wik.’ ”

[Futnot]

[Bokis/Foto blong pija long pej 21]

Janis We Samfala Oli Tekem Blong Prij Long Skul

Sam yangfala we oli gat wan ripot no projek blong mekem long skul, oli jusum wan sabjek we i givim janis long olgeta blong witnes long ol narafala

Plante yangfala oli givim wan video kaset no buk long tija blong olgeta sipos i gat wan we i laenap wetem sabjek we oli tokbaot long klas

Sam yangfala we oli ridim Baebol no wan buk we i tokbaot Baebol long taem blong spel, oli bin gat janis blong storebaot trutok wetem sam yangfala we oli kam askem kwestin long olgeta

[Tok blong pija long pej 18]

Olgeta we oli gat ekspiriens oli save trenem ol yangfala blong mekem wok blong Jeova