Kraes i Toktok Long Ol Kongregesen
Kraes i Toktok Long Ol Kongregesen
“Yu mas raetemdaon tok blong mi, . . . ‘Mi mi stap holem ol seven sta long raethan blong mi.’ ”—REVELESEN 2:1.
1, 2. ?From wanem yumi gat intres long tok we Kraes i talem long seven kongregesen long Esia Maena?
JISAS KRAES, stret Pikinini blong Jeova, hem nao i Hed blong Kristin kongregesen. Blong mekem se kongregesen blong ol tabu man i stap klin gud, hed blong olgeta, Kraes, i talem ol tok blong presem olgeta mo blong stretem olgeta. (Efesas 5:21-27) Yumi luk ol tok olsem long Revelesen japta 2 mo 3. Ol tok ya we Jisas i sanem i go long seven kongregesen long Esia Maena, oli gat paoa mo oli soem lav.
2 Bifo we aposol Jon i harem ol tok we Jisas i talem long ol seven kongregesen ya, hem i luk wan vison blong ‘dei blong Masta.’ (Revelesen 1:10) “Dei” ya i stat long 1914, taem Kingdom blong Mesaea i stanap. Taswe, ol tok we Kraes i talem long ol kongregesen ya i impoten long yumi we yumi stap laef long ol las dei ya. Tok ya blong leftemap tingting blong olgeta mo blong stretem olgeta i save givhan long yumi tu, blong yumi winim ol trabol long taem ya we laef i strong tumas.—2 Timoti 3:1-5.
3. ?Wanem mining blong ol “sta,” “ol enjel,” mo “seven ples ya blong putum laet” we aposol Jon i luk?
3 Jon i luk vison blong Jisas Kraes we i stap long heven finis. Kraes i “stap wokbaot long medel blong ol seven ples ya blong putum laet, we oli wokem olgeta long gol,” hemia ol kongregesen. Mo hem i “holem ol seven sta long raethan” blong hem. ‘Ol sta ya,’ hemia ‘ol enjel blong ol seven kongregesen ya.’ (Revelesen 1:20; 2:1) Sam samtaem, Baebol i yusum ol sta blong minim ol enjel. Be i klia se sipos Kraes i wantem givim toktok long ol spirit man long heven, bambae hem i no save talem long wan man long wol blong raetemdaon ol tok ya. From samting ya, i stret we ‘ol sta ya’ oli minim ol man we tabu spirit i putumap olgeta blong lukaot long ol kongregesen, hemia ol elda. Tok ya “enjel” i blong soemaot wok blong olgeta olsem ol man blong karem tok i go long ol kongregesen. From we kampani blong ol man blong God long wol i stap kam bigwan moa oltaem, “slef we i stret” i putumap plante man blong “ol narafala sipsip” blong Jisas, blong olgeta tu oli lukaot long ol kongregesen.—Luk 12:42-44, NW; Jon 10:16.
4. ?Taem ol elda oli lesin gud long tok we Kraes i talem long ol kongregesen, oli kasem wanem gudfala samting from?
4 Ol “sta” ya oli stap long raethan blong Jisas. Hemia i min se oli stap aninit long paoa blong hem, hem i bos long olgeta, i lavem olgeta, mo i protektem olgeta. From samting ya, oli mas talemaot long hem se oli mekem wok blong olgeta olsem wanem. Taem ol elda tede oli lesin gud long ol tok we Kraes i talem long wanwan long ol seven kongregesen, oli luksave rod we oli mas folem blong winim ol semkaen trabol long kongregesen blong olgeta. Be i tru, i no olgeta nomo we oli mas lesin gud. Olgeta Kristin evriwan oli nidim blong lesin gud long Pikinini blong God. (Mak 9:7) ?Ale, yumi lanem wanem taem yumi lesin gud long tok we Kraes i talem long ol kongregesen?
Long Enjel Blong Kongregesen Blong Efesas
5. ?Efesas i wanem kaen taon?
5 Jisas i talem sam toktok blong presem kongregesen blong Efesas, mo sam toktok blong stretem olgeta tu. (Ridim Revelesen 2:1-7.) Taon ya we i stap long wes kos blong Esia Maena, i wan rij taon. Hem i fulap long ol big bisnes mo ol haos wosip. I gat wan bigbigfala tempol long taon ya, we oli wokem blong mekem wosip long woman god ya Atemis. Efesas i fulap long fasin blong slip olbaot, ol giaman skul, mo ol man blong wokem majik. Nating se i olsem, God i blesem wok blong aposol Pol mo sam narafala we oli prij long taon ya.—Ol Wok, japta 19.
6. ?Olsem wanem ol Kristin tede we oli stap tru long God oli olsem ol Kristin long Efesas bifo?
6 Kraes i talem ol toktok blong presem kongregesen blong Efesas, i se: “Mi mi save finis fasin blong yufala long Efesas. Mi save we yufala i stap hadwok tumas, mo yufala i mekem tingting blong yufala i longfala. Mi save we yufala i no save glad nating long ol man nogud, mo mi save we yufala i luklukgud finis long olgeta ya we oli stap talem se oli aposol, be yufala i faenemaot se oli stap giaman nomo, oli no aposol.” Tede, ol kongregesen blong ol trufala man blong Jisas, olgeta tu oli mekem ol gudfala wok, oli hadwok tumas, mo oli mekem tingting blong olgeta i longfala. Oli no save letem ol giaman brata oli spolem kongregesen, olsem olgeta we oli tanem fasin blong olgeta blong mekem ol man oli luk olgeta olsem ol prapa aposol blong Kraes. (2 Korin 11:13, 26) Ol Kristin tede we oli stap tru long God, oli gat fasin olsem ol Kristin long Efesas, we oli “no save glad nating long ol man nogud.” Taswe, blong mekem se wosip blong Jeova i stap klin mo blong protektem kongregesen, oli no joen nating wetem ol Kristin we oli lego trufala wosip mo oli stap leftemap ol giaman tijing blong apostasi.—Galesia 2:4, 5; 2 Jon 8-11.
7, 8. ?Wanem bigfala slak fasin blong kongregesen long Efesas, mo olsem wanem yumi save winim fasin ya?
7 Be, ol Kristin long Efesas oli gat wan bigfala slak fasin. Jisas i talem se: “I gat wan fasin we yufala i mekem we i no stret long fes blong mi. Yufala i no moa lavem mi olsem we yufala i lavem mi fastaem.” Olgeta long kongregesen ya oli mas mekem lav blong olgeta long Jeova i kam strong bakegen, olsem fastaem. (Mak 12:28-30; Efesas 2:4; 5:1, 2) Yumi evriwan i mas lukaot blong no lusum lav we yumi gat long God fastaem. (3 Jon 3) ?Ale, olsem wanem sipos yumi stat blong wantem kam rijman no yumi stat blong ronem ol pleplei gogo, ol samting ya oli stap kam bigfala samting long laef blong yumi? (1 Timoti 4:8; 6:9, 10) Ale, yumi mas prea long God wetem fulhat blong yumi. Yumi mas askem long hem blong halpem yumi blong tekemaot ol samting ya long hat blong yumi. Long ples blong olgeta, yumi mas putum bigfala lav mo tangkiu from ol samting we Jeova mo Pikinini blong hem tufala i bin mekem long yumi.—1 Jon 4:10, 16.
8 Kraes i talem long ol Kristin long Efesas se: “Yufala i mas tingbaot bakegen ples ya we yufala i stap long hem fastaem, taem yufala i no foldaon yet. Mo yufala i mas tanem tingting blong yufala from ol sin blong yufala, mo yufala i mas mekem fasin ya bakegen we yufala i mekem fastaem.” ?Olsem wanem sipos oli no mekem olsemia? Jisas i se: “Sipos yufala i no mekem olsem, bambae mi mi kam long yufala, mi tekemaot ples blong putum laet blong yufala.” Sipos olgeta sipsip ya oli lusum lav we oli gat fastaem long God, “ples blong putum laet,” no kongregesen, bambae i no moa stap. From samting ya, yumi ol Kristin we yumi wok strong, yumi mas traehad blong mekem se kongregesen i stap gohed blong saenaot olsem wan laet long saed blong spirit.—Matiu 5:14-16.
9. ?Wanem stret tingting long saed blong ol grup we oli stanap blong folem wan man?
9 Wan gudfala samting long saed blong kongregesen long Efesas, se oli ‘no laekem fasin blong grup blong Nikolas, oli agensem olgeta.’ Yumi no save stret olsem wanem grup ya i stat, mo wanem ol tijing blong hem mo ol fasin blong hem. Yumi save nomo samting we Revelesen i talem. Be, Jisas i tok agensem fasin ya blong folem wan man. Taswe, yumi tu, yumi mas gohed blong agensem fasin ya blong setemap wan grup we i folem man, olsem we ol Kristin long Efesas oli agensem fasin ya.—Matiu 23:10.
10. ?Wanem bambae i hapen long olgeta we oli lesin long ol tok we tabu spirit i stap talem?
10 Jisas i talem se: “Man we i gat sora, hem i mas lesin gud long tok we Tabu Spirit i stap talem long ol [kongregesen].” Taem Jisas i stap long wol, tabu spirit blong God i gat paoa long ol toktok blong hem. (Aesea 61:1; Luk 4:16-21) Taswe, yumi mas lesin gud long ol tok blong hem, we God i yusum tabu spirit blong givim long hem. Tabu spirit i pulum Jisas blong mekem promes ya se: “Man we i win long faet ya, mi bambae mi givim raet long hem blong i kakae frut blong tri blong laef we i stap gru long Garen blong God.” Ol tabu man we oli lesin gud long tok we tabu spirit i stap talem, bambae oli kasem laef long “Garen blong God,” hemia stret long ples we God i stap long hem. Gudfala laef ya long heven i no save lus samtaem. “Bigfala kampani,” we olgeta tu oli lesin long tok we tabu spirit i stap talem, bambae oli harem gud blong laef long paradaes long wol. Long ples ya, bambae oli dring long ‘wan bigfala reva we i wota blong laef.’ Mo “lif blong ol tri” we oli gru long tufala saed blong reva ya, bambae oli tekemaot sik blong olgeta.—Revelesen 7:9, NW; 22:1, 2; Luk 23:43.
11. ?Olsem wanem yumi save givhan long ol narafala blong lavem Jeova moa?
11 Ol Kristin long Efesas oli no moa lavem God olsem we oli lavem hem fastaem. ?Olsem wanem sipos samting ya i hapen long kongregesen tede? Yumi wanwan i save mekem lav blong Jeova i kam strong moa, taem yumi tokbaot ol samting we hem i mekem wetem lav. Yumi save talemaot bigfala tangkiu we yumi gat long God from lav we hem i soemaot taem hem i givim Pikinini blong hem olsem wan ransom blong pemaot yumi. (Jon 3:16; Rom 5:8) Taem yumi givim wan ansa no wan tok long miting, yumi save joenem smol toktok insaed long hem, long saed blong lav we God i stap soemaot. Mo yumi save soem bigfala lav we yumi gat long Jeova taem yumi presem nem blong hem long Kristin wok blong prij. (Ol Sam 145:10-13) Yes, ol toktok mo fasin blong yumi oli save givhan bigwan blong kongregesen i kasembak strong lav we hem i gat fastaem.
Long Enjel Blong Kongregesen Blong Smana
12. ?Ol stori blong histri, oli talem wanem long saed blong Smana mo wosip blong ol man long ples ya?
12 Long saed blong kongregesen long Smana, Kraes, we hem i ‘Faswan mo bambae i Laswan, mo bifo hem i ded, be naoia hem i laef bakegen,’ i talem ol gudfala toktok blong presem kongregesen ya. (Ridim Revelesen 2:8-11.) Taon ya Smana (naoia Izmir, long kantri blong Turkey) i stap long wes kos blong Esia Maena. Ol man Gris oli wokem taon ya, be long yia 580 B.K.T. ol man Lidia oli spolem. Afta long rul blong Bigfala Aleksanda, sam rula oli bildim Smana bakegen long wan narafala ples, mo hem i kam haf blong Esia we Rom i rul long hem. Taon ya i bisi oltaem from ol big bisnes blong hem, mo i gat plante naesfala bilding long taon ya. I gat wan tempol blong Taebirius Sisa tu, we i mekem se taon ya i wan bigfala ples blong wosip long empera. Blong wosip long empera, ol man oli mas bonem wan smosmol drop insens mo oli mas talem se, “Sisa i Masta blong mi.” Ol Kristin oli no save mekem samting ya, from we oli bilif se “Jisas i Masta” blong olgeta. Taswe, ol man oli mekem i nogud long olgeta.—Rom 10:9, NW.
13. ?Long wanem fasin ol Kristin long Smana we oli puaman, oli rili rijman?
13 Antap long trabol ya, ol Kristin long Smana oli puaman tu. Maet ol man oli wantem mekem i had long ol Kristin ya blong kasem mane, from we oli luk se ol Kristin oli no mekem wosip long empera. Tede tu, ol man blong Jeova oli stap kasem ol traem olsem. (Revelesen 13:16, 17) Be ol Kristin we oli puaman olsem olgeta ya long Smana, oli no rili puaman. Oli rijman long saed blong spirit. !Mo hemia nao samting we i impoten!—Ol Proveb 10:22; 3 Jon 2.
14, 15. ?Wanem tok blong Revelesen 2:10 we ol tabu man oli save harem gud long hem?
14 Bighaf blong ol man Jiu long Smana oli holemtaet ol kastom we Baebol i agensem, mo oli sakemaot Pikinini blong God, mo oli tok nogud long ol tabu man blong Jisas. Taswe, olgeta ya oli “memba blong grup blong Setan stret.” (Rom 2:28, 29) !Be ol tabu man oli save harem gud long nekis tok blong Kraes! Hem i se: “I nogud yufala i stap fraet long ol samting we bambae i kam long yufala. Setan bambae i putum sam long grup blong yufala i go long kalabus blong traem yufala. Nao bambae yufala i gat trabol ten dei. Be yufala i mas stanap strong gogo yufala i ded, nao bambae mi givim niufala laef long yufala, blong ona long yufala, olsem praes we oli givim long man we i win long resis.”—Revelesen 2:10.
15 Jisas i no fraet sipos ol man oli kilim hem i ded from we hem i stanap long saed blong Jeova we i hae rula blong heven mo wol. (Filipae 2:5-8) Naoia, Setan i stap faet agensem smol grup blong ol tabu man blong Kraes we oli stap yet long wol. Be grup ya tu i no fraet long ol samting we i save kam long olgeta, olsem taem ol man oli mekem trabol long olgeta, sakem olgeta long kalabus, no kilim olgeta i ded. (Revelesen 12:17) Bambae oli winim wol ya. Bambae oli no kasem wan praes we i blong smoltaem nomo, olsem ol hiten man long taem bifo we oli win long resis. Olgeta ya, oli kasem wan flas hat we ol man oli wokem long ol flaoa nomo. Be Kraes i promes se ol tabu man we oli laef bakegen bambae oli kasem ‘niufala laef olsem praes blong olgeta.’ Hemia laef long heven we i no save lus samtaem. !Tru ya, presen ya i sas bitim mak!
16. ?Sipos yumi stap long wan kongregesen we i olsem Smana, yumi mas putum tingting blong yumi i stap oltaem long wanem samting?
16 ?Nating sipos yumi go long heven no yumi stap long wol long fiuja, be olsem wanem sipos naoia yumi stap long wan kongregesen we i olsem Smana bifo? Yumi mas givhan long ol Kristin brata mo sista blong yumi blong oli tingbaot bigfala risen from wanem God i letem ol man oli mekem trabol long yumi—hemia blong ansa long kwestin ya se hu nao i hae rula blong heven mo wol. Evri Witnes we oli holemstrong long Jeova oli stap pruvum se Setan i man blong giaman. Mo oli stap soemaot se nating we oli sinman nomo mo ol man oli stap mekem i nogud long olgeta, be oli naf blong stanap strong olwe long saed blong God, mo blong sapotem raet blong hem blong rul olsem Haefala Masta blong Heven mo Wol. (Ol Proveb 27:11) Yumi mas leftemap tingting blong ol narafala Kristin blong oli stanap strong taem ol man oli mekem trabol long olgeta. Sipos yumi evriwan i mekem olsem, ‘oltaem long laef blong yumi yumi save mekem wok blong Jeova we yumi no fraet, mo yumi tabu, mo we fasin blong yumi i stret oltaem long fes blong hem’—yes, gogo i no save finis.—Luk 1:68, 69, 74, 75.
Long Enjel Blong Kongregesen Blong Pegamam
17, 18. ?Pegamam i fulap long wanem kaen wosip, mo wanem i save hapen long wan man long taon ya we i no wantem joen long wosip blong ol aedol?
17 Kongregesen blong Pegamam i kasem ol tok blong presem olgeta wetem ol tok blong stretem olgeta tu. (Ridim Revelesen 2:12-17.) Taon ya Pegamam i stap 80 kilometa longwe long Smana, long saed i go long not. Pegamam i fulap long ol hiten skul. I luk olsem we plante kleva blong Koldia (ol man blong lukluk sta blong talemaot fiuja), oli ronwe long Babilon oli kam long Pegamam. I gat wan tempol long taon ya we oli kolem tempol blong Asclepius, hemia giaman god blong meresin we oli talem se hem i save hilim ol man. Taswe, fulap sikman oli stap kam blong mekem wosip long tempol ya. Long Pegamam, i gat tempol we ol man oli yusum blong mekem wosip long Sisa Ogastas. From samting ya, plante man oli talem se taon ya i “stamba ples blong grup long taem bifo we oli mekem wosip long empera.”—Encyclopædia Britannica, 1959, Buk 17, pej 507.
18 Long Pegamam, i gat wan olta we oli dediketem i go long god ya Sus. Mo tu, Setan i pulum ol man blong taon ya blong folem fasin blong putumap ol man olsem ol god mo mekem wosip long olgeta. !Yumi luksave from wanem Jisas i talem se kongregesen ya i stap long wan taon we i olsem ‘hedkwota blong Setan’! Olgeta long taon ya oli save kilim i ded eniman we i stanap strong long saed blong Jeova mo rul blong hem mo we i no wantem bodaon long empera. Tede, wol i stap yet long paoa blong Setan, mo ol man oli stap leftemap saen blong kantri blong olgeta olsem wan aedol. (1 Jon 5:19) Stat long faswan handred yia kam kasem tede, plante gudfala Kristin oli lusum laef blong olgeta from bilif blong olgeta. Kraes i tokbaot wan long olgeta ya, hemia ‘man ya Antipas, we oltaem hem i stanap strong blong talemaot tok blong Kraes, mo we olgeta oli kilim hem i ded long taon ya.’ Yes, Jeova God mo Jisas Kraes tufala i no save fogetem ol man olsem, we oli stap tru long tufala.—1 Jon 5:21.
19. ?Balam i mekem wanem, mo olgeta Kristin oli mas lukaot long wanem samting?
19 Kraes i tokbaot sam man we oli “stap folem tok blong Profet Balam ya bifo.” From we giaman profet ya i griri mo i wantem mane tumas, hem i traem blong talemaot wan tok panis agensem Isrel blong spolem olgeta. Be God i jenisim tok panis ya i kam wan blesing. Ale Balam i girap i go joen wetem King Balak blong Moab, nao tufala i pulum plante man Isrel blong foldaon long wosip blong ol aedol mo fasin blong slip olbaot. Ol Kristin elda tede oli mas strong blong leftemap stret fasin, olsem Finehas, we i tekem aksin agensem ol rabis wok blong Balam. (Namba 22:1–25:15; 2 Pita 2:15, 16; Jud 11) Tru ya, olgeta Kristin evriwan oli mas lukaot blong no letem wosip blong ol aedol mo fasin slip olbaot i kam insaed long kongregesen.—Jud 3, 4.
20. ?Sipos wan Kristin i stat tingting olsem ol man blong apostasi, hem i mas mekem wanem?
20 Kongregesen long Pegamam i stap long bigfala denja from we samfala long kongregesen ya oli “stap folem tok blong grup blong Nikolas.” Kraes i talem long kongregesen ya se: “Yufala evriwan i mas tanem tingting blong yufala from ol sin blong yufala. Sipos no, bambae mi mi kam long yufala i no longtaem, nao bambae mi faet long olgeta ya, mi katem olgeta long naef ya blong faet we i stap kamaot long maot blong mi.” Ol man we oli stanemap ol grup blong folem wan man nomo, oli wantem spolem ol Kristin long saed blong spirit. Mo olgeta we oli leftemap fasin blong seseraot long ol smosmol grup mo folem wan man, bambae oli no save go insaed long Kingdom blong God. (Rom 16:17, 18; 1 Korin 1:10; Galesia 5:19-21) !Sipos wan Kristin i stat tingting olsem ol man blong apostasi mo i wantem pulum ol narafala tu blong tingting olsem, hem i mas lesin long woning ya blong Kraes! Sipos hem i no wantem kasem bigfala trabol, hem i mas tanem tingting blong hem, mo i mas askem ol elda long kongregesen blong givhan long hem long saed blong spirit. (Jemes 5:13-18) I impoten we hem i hareap blong mekem samting ya, from we i no longtaem, Jisas bambae i kam blong jajem ol man.
21, 22. ?Hu nao oli kakae “mana ya we i stap haed,” mo mana ya i saen blong wanem samting?
21 Ol trufala tabu Kristin mo ol fren blong olgeta we oli stap tru long God, oli no nid blong fraet long jajmen we i stap kam. Olgeta we oli harem advaes blong Jisas we i kamaot long tabu spirit blong God, bambae oli kasem blesing. Olsem nao, Jisas bambae i singaot ol tabu man ya we oli winim wol ya, blong oli kakae “mana ya we i stap haed.” Mo bambae hem i givim “gudfala ston we i waet” long olgeta, we i gat ‘niufala nem blong olgeta’ i stap long hem.
22 Taem ol man Isrel oli stap wokbaot long draeples blong 40 yia, God i givim mana long olgeta blong oli kakae. Sam long ol “kakae ya” oli fulumap long wan botel we oli wokem long gol, nao oli putum i stap insaed long Bokis we i Saen blong Promes blong God. Taswe kakae ya i haed long Rum we i Tabu we i Tabu long haos tapolen. Long ples ya, i gat wan laet i saen olsem merikel, blong soemaot se Jeova i stap. (Eksodas 16:14, 15, 23, 26, 33; 26:34; Hibrus 9:3, 4) I no gat wan man we i gat raet blong kakae mana ya we i haed. Be, ol tabu man blong Jisas we oli laef bakegen long ded, bambae oli kakae “mana ya we i stap haed,” taem oli kasem gudfala laef long heven we i no moa save lus bakegen samtaem.—1 Korin 15:53-57.
23. ?“Gudfala ston we i waet” mo “niufala nem” i minim wanem?
23 Long ol kot long Rom, sipos oli givim wan blak ston long man we i pas long kot, hemia i min se oli jajem hem se i mas panis. Be sipos oli givim wan waet ston long hem, hemia i min se hem i fri. Jisas i givim “gudfala ston we i waet” long ol tabu Kristin we oli win long faet blong olgeta. Hemia i min se, hem i no faenem fol long olgeta, hem i faenem we oli tabu mo oli klin. Long Rom bifo, oli yusum ol ston tu olsem ol tikit blong pastru long get blong ol bigfala stadium, blong oli wajem wan impoten samting. Taswe, “gudfala ston we i waet” i save soem tu se ol tabu man oli gat raet blong gotru long heven, blong tekem ples blong olgeta long mared blong Smol Sipsip. (Revelesen 19:7-9) “Niufala nem” i minim blesing blong joen wetem Jisas blong rul long Kingdom blong heven. !Tru ya, ol samting ya i mas rili leftemap tingting blong ol tabu man ya, mo ol fren we oli mekem wok blong Jeova wetem olgeta we bambae oli laef long paradaes long wol ya!
24. ?Wanem tingting mo fasin we yumi mas gat long saed blong apostasi?
24 I waes blong rimemba se kongregesen blong Pegamam i stap long bigfala denja from ol man blong apostasi. Sipos samting olsem i stap hapen long kongregesen tede we i save spolem kongregesen long saed blong spirit, yumi mas agensem fulwan ol tingting blong apostasi, mo yumi mas gohed blong wokbaot long rod blong trutok. (Jon 8:32, 44; 3 Jon 4) Wan giaman tija no wan man we i stat blong gat tingting blong apostasi, i save spolem ful kongregesen. Taswe, yumi mas strong blong agensem apostasi. Yumi mas neva letem wan rabis tingting olsem i pulum yumi no i blokem yumi blong yumi no moa obei long trutok.—Galesia 5:7-12; 2 Jon 8-11.
25. ?Long nekis stadi, bambae yumi lukluk long ol tok we Kraes i talem long wanem kongregesen?
25 Hemia nao ol tok we Jisas Kraes long heven i talem blong presem mo blong stretem tri long ol seven kongregesen long Esia Maena. !Ol tok ya i rili wekemap tingting blong yumi! Be, tabu spirit i pulum hem tu blong talem plante moa tok long fo narafala kongregesen. Ol tok ya we i go long kongregesen blong Tuatira, Sadis, Filadelfia, mo Laodisia, bambae yumi lukluk long hem long nekis stadi.
?Bambae Yu Yu Ansa Olsem Wanem?
• ?From wanem yumi mas lesin gud long tok we Kraes i talem long ol kongregesen?
• ?Yumi save mekem wanem blong givhan long kongregesen blong oli lavem Jeova bakegen olsem we oli lavem hem fastaem?
• ?From wanem yumi save talem se ol Kristin long Smana we oli puaman, oli no rili puaman, be oli rijman?
• ?Samting we i hapen long kongregesen blong Pegamam i soem se yumi mas mekem wanem taem i gat tingting blong apostasi i stap?
[Kwestin]
[Map blong pija long pej 10]
(Lukluk niuspepa)
GRIS
ESIA MAENA
Efesas
Smana
Pegamam
Tuatira
Sadis
Filadelfia
Laodisia
[Tok blong pija long pej 12]
“Bigfala kampani” bambae i harem gud blong laef long paradaes long wol
[Tok blong pija long pej 13]
Ol Kristin we ol man oli mekem i nogud long olgeta, oli winim wol ya