!Lesin Gud Long Tok We Tabu Spirit i Talem!

“Man we i gat sora, hem i mas lesin gud long tok we Tabu Spirit i stap talem long ol [kongregesen].”​—REVELESEN 3:22.

1, 2. ?Wanem advaes blong Jisas we i go long wanwan long ol seven kongregesen long Revelesen?

 OL MAN blong Jeova oli mas lesin gud long tok we tabu spirit i pulum Jisas Kraes blong talem long ol seven kongregesen we nem blong olgeta i stap long buk blong Revelesen long Baebol. Yes, advaes we i go long wanwan long ol kongregesen ya hemia: “Man we i gat sora, hem i mas lesin gud long tok we Tabu Spirit i stap talem long ol [kongregesen].”​—Revelesen 2:​7, 11, 17, 29; 3:​6, 13, 22.

² Yumi tokbaot finis ol tok we Jisas i talem long ol enjel, no ol man blong lukaot long kongregesen, blong Efesas, Smana, mo Pegamam. ?Olsem wanem tok we tabu spirit i talem long fo narafala kongregesen i save givhan long yumi?

Long Enjel Blong Kongregesen Blong Tuatira

3. ?Taon ya Tuatira i stap wea, mo wanem bigfala samting we oli wokem long taon ya?

³ “Pikinini blong God” i talem ol tok blong presem mo blong stretem kongregesen blong Tuatira. (Ridim Revelesen 2:​18-29.) Tuatira (naoia Akhisar) i stap klosap long wan smol reva we i olsem wan han blong bigfala reva ya Gediz (bifo, Hermus Reva) long wes blong Esia Maena. Ol man long taon ya oli wokem plante naesfala samting long han blong olgeta. I gat wan kaen pen we oli wokem long taon ya, we ol man oli yusum blong pentem kaliko i kam pepol. Oli wokem pen ya long rus blong wan flaoa we nem blong hem madder. Lidia we hem i kam wan Kristin taem Pol i visitim Filipae long Gris, “hem i woman Tuatira, . . . [mo] hem i gat stoa blong  hem blong salem kaliko ya we i pepol.”​—Ol Wok 16:​12-15.

4. ?From wanem kongregesen blong Tuatira i kasem ol gudfala toktok?

⁴ Jisas i talem gudfala toktok long kongregesen ya blong Tuatira from ol gudfala wok blong olgeta, mo from lav, bilif, mo longfala tingting we oli soemaot, mo from wok blong prij we oli mekem. Mo tu, ‘wok blong olgeta i moa gud naoia long wok we oli mekem fastaem.’ Be, nating se yumi bin mekem plante gudfala wok long ol yia we oli pas, yumi mas lukaot blong no kam slak blong mekem ol klin mo gudfala fasin.

5-7. (a) ?Hu ya “woman ya Jesebel,” mo oli mas mekem wanem long hem? (b) ?Tok ya we Kraes i talem long kongregesen blong Tuatira i givhan long ol woman we oli onagud long God blong oli mekem wanem?

⁵ Be kongregesen blong Tuatira i letem wosip blong aedol, giaman tijing, mo fasin slip olbaot i stap long hem. I gat “woman ya Jesebel” i stap​—maet hemia wan grup blong ol woman we oli gat sem fasin olsem rabis Kwin Jesebel we i rul long ol ten laen blong Isrel bifo. Sam man blong hae save oli ting se ‘ol woman profet’ blong Tuatira oli traem pulum ol Kristin blong mekem wosip long ol man mo woman god we ol bisnesman nomo oli wokem. Mo tu, oli traem pulum ol Kristin blong joen long ol lafet blong kakae ol samting we oli givim finis olsem wan sakrefaes long ol aedol. !Tede, i neva mas gat wan woman we i stanap olsem wan profet long Kristin kongregesen, mo i traem blong tanem tingting blong ol narafala!

⁶ Kraes i rere naoia nomo blong ‘givim bigfala sik long woman ya Jesebel, mo blong sakem hem i godaon long bed wetem ol man we oli stap mekem i krangke wetem hem, sipos ol man ya oli no tanem tingting blong olgeta from rabis fasin ya.’ Ol man we oli lukaot long kongregesen oli neva mas letem ol rabis tijing olsem oli gat paoa long olgeta. Olgeta Kristin oli save finis se samting “we oli kolem gudfala tokhaed blong Setan,” i rabis olgeta. I no nid blong oli mekem i krangke long saed blong spirit mo bodi, mo mekem wosip long ol aedol, blong oli luksave se samting ya i nogud. Sipos yumi harem woning blong Jisas, bambae yumi ‘holemstrong ol fasin we yumi gat,’ nao sin bambae i no save kam bos long yumi. From we ol tabu man oli sakemaot finis ol fasin we God i no laekem, wetem ol fasin we bodi nomo i wantem mo ol tingting blong wok from ol samting ya, ale taem we oli laef bakegen long ded, bambae oli kasem ‘paoa blong rul long ol man blong ol narafala kantri.’ Bambae oli joen wetem Kraes blong brekem bodi blong ol man ya olsem graonpot nomo. Tede, i gat samting olsem ol sta long ol kongregesen. Mo taem ol tabu man oli laef bakegen long heven, bambae oli kasem “moningsta ya we i stap saen gud,” hemia Man we bambae i Mared, Jisas Kraes.​—Revelesen 22:16.

⁷ Kongregesen blong Tuatira i kasem woning se oli no mas letem ol woman oli stap we oli mekem rabis fasin ya blong apostasi. Tok ya we tabu spirit i pulum Kraes blong talem long kongregesen ya, i givhan long ol woman we oli onagud long God tede, blong oli stap long stret ples blong olgeta olsem we God i wantem. Oli no mas traem bos long ol man, mo oli no mas traem pulum ol brata blong mekem i krangke long saed blong spirit no bodi. (1 Timoti 2:12) Defren olgeta, ol woman ya oli mas givim eksampol long saed blong ol gudfala wok mo fasin we i presem God. (Ol Sam 68:11; 1 Pita 3:​1-6) Sipos kongregesen i holemstrong ol fasin we hem i gat finis​—olsem trufala tijing, ol gudfala klin fasin, mo wok blong Kingdom—​Kraes bambae i kam blong givim bigfala pei, i no blong givim panis.

Long Enjel Blong Kongregesen Blong Sadis

8. (a) ?Taon ya Sadis i stap wea, mo wanem sam samting long saed blong taon ya? (b) ?From wanem kongregesen blong Sadis i nidim help?

⁸ Kongregesen blong Sadis i nidim help kwiktaem, from we hem i ded long saed blong spirit. (Ridim Revelesen 3:​1-6.) Sadis i wan bisi taon we i stap 50 kilometa longwe long Tuatira, long saed i go long saot. Long taem bifo, i gat 50,000 man oli stap long taon ya. Hem i wan rij taon from we i gat plante big bisnes long hem, graon blong hem i gud mo ol man oli stap wokem ol kaliko mo mat long hea blong sipsip. Man ya blong raetem histri, Josephus, i talem se long faswan handred yia B.K.T., i gat plante man Isrel oli stap long Sadis. Tede, ol man we oli digim ol ston long ples we taon ya i bin stap long hem, oli faenem se i bin gat wan haos prea mo wan tempol long taon ya we i blong mekem wosip long woman god blong ol man Efesas, nem blong hem Atemis.

9. ?Yumi mas mekem wanem sipos yumi no stap mekem wok blong God long fasin we i kamaot long hat?

⁹ Kraes i talem long enjel blong kongregesen blong Sadis se: “Mi mi save finis fasin blong yufala long Sadis. Mi save we ol man oli stap talem se yufala i laef, be yufala  i ded.” ?Olsem wanem sipos ol man oli stap talem se yumi wekap long saed blong spirit, be rili, yumi stap slip, no yumi slak long ol nambawan Kristin wok we yumi mas mekem? ?Olsem wanem sipos yumi no stap mekem wok blong God long fasin we i kamaot long hat, mo ‘klosap yumi lus’ long saed blong spirit? Ale, yumi mas ‘stap tingbaot toktok we olgeta oli tijim yumi long hem bifo, we yumi harem finis’ long saed blong Kingdom. Mo yumi mas traehad blong wok strong bakegen long ol tabu wok. I sua se yumi mas joen wetem fulhat blong yumi long olgeta Kristin miting. (Hibrus 10:​24, 25) Kraes i givim woning long kongregesen blong Sadis se: “Sipos yufala i no wekap bakegen, bambae mi mi kam long yufala olsem we man blong stil i kam, we bambae yufala i no save long wanem taem bambae mi kamtru long yufala.” ?Woning ya i stret long yumi tede tu? Yes, i no longtaem bambae yumi mas talemaot ol fasin blong yumi long fes blong God.

10. ?Nating se wan kongregesen tede i olsem hemia long Sadis, maet sam Kristin insaed long hem oli olsem wanem?

¹⁰ Nating sipos wan kongregesen tede i olsem hemia long Sadis, be maet i gat sam man insaed long hem we ‘oli no mekem rabis fasin. Olgeta ya oli putum waet klos mo oli wokbaot wetem Kraes, mo i stret nomo blong oli mekem olsem, from we oli mekem gudfala wok.’ Yes, long saed blong olgeta ya, ol narafala man oli save lukluk klia yet se oli ol trufala Kristin. Oli no mekem rabis fasin, oli no letem sam doti fasin no bilif blong wol ya i spolem olgeta. (Jemes 1:27) Taswe, Jisas ‘i no save tekemaot nem blong olgeta long buk ya we nem blong ol man we oli gat laef i stap long hem. Mo long fes blong Papa mo ol enjel, bambae hem i talemaot i klia we oli man blong hem.’ Grup blong ol tabu man we oli olsem woman blong Kraes, oli stret blong wokbaot wetem Kraes. Oli putum finis ol gudfala klos we oli klin gud mo oli saen. Ol klos ya, hemia ol gudfala fasin we ol tabu man blong God oli mekem. (Revelesen 19:8) Taem oli tingbaot ol nambawan wok we oli gat janis blong kasem long heven, samting ya i pulum olgeta blong gohed strong blong winim wol. Ol man we bambae oli laef olwe long wol ya, olgeta tu bambae oli kasem ol blesing. Nem blong olgeta tu bambae i stap long buk blong laef.

11. ?Yumi mas mekem wanem sipos yumi stat wantem slip long saed blong spirit?

¹¹ I no gat wan long yumi we i wantem kam nogud long saed blong spirit, olsem i bin hapen long kongregesen blong Sadis. ?Be olsem wanem sipos yumi haremsave se yumi stap wantem slip long saed blong spirit? Yumi mas tekem aksin kwiktaem, blong yumi no kasem trabol. Maet yumi stap letem sam fasin we God i no laekem oli pulum yumi, no maet yumi slak blong go long ol miting no long wok blong prij. Ale, yumi mas prea wetem fulhat blong yumi mo askem Jeova blong givhan long yumi. (Filipae 4:​6, 7, 13) Blong halpem yumi blong wekapgud long saed blong spirit, yumi mas ridim Baebol evri dei mo stadi oltaem long Baebol mo ol buk we “slef we i stret” i wokem. (Luk 12:​42-44, NW ) Nao bambae yumi save kam olsem olgeta long Sadis we Kraes i glad long olgeta. Mo bambae yumi givhan gud long ol Kristin brata mo sista blong yumi.

Long Enjel Blong Kongregesen Blong Filadelfia

12. Eksplenem wosip blong ol man Filadelfia bifo.

¹² Jisas i talem ol gudfala toktok long kongregesen blong Filadelfia. (Ridim Revelesen 3:​7-13.) Filadelfia (naoia Alasehir) i wan rij taon long medel blong wan eria long wes Esia Maena we ol man oli stap planem grep blong wokem waen long hem. Bigfala god blong ples ya, hemia Dionysus, god blong waen. I luk olsem we ol man Jiu long Filadelfia oli traem blong pulum ol Kristin Jiu blong holemtaet no blong gobak bakegen long sam fasin blong Loa blong Moses. Be oli no save pulum olgeta.

13. ?Olsem wanem Kraes i yusum “ki ya we fastaem i blong King Deved bifo”?

¹³ Kraes i gat “ki ya we fastaem i blong King Deved bifo.” Taswe, olgeta samting long saed blong Kingdom mo wok blong lukaot long ol man blong bilif, i stap long han blong hem. (Aesea 22:22; Luk 1:32) Jisas i yusum ki ya blong openem wan doa long ol Kristin blong Filadelfia mo blong sam narafala ples bifo. Hemia i min se hem i givim janis long olgeta blong kasem ol gudfala wok mo blesing long saed blong Kingdom. Long saed blong wok blong talemaot Kingdom, stat long 1919, hem i openem wan “doa” long fored blong “slef we i stret.” I no gat wan man blong agens we i save satem doa ya bakegen. (1 Korin 16:9; Kolosi 4:​2-4) I tru, doa i sat long ol “memba blong grup blong Setan.” Olgeta ya oli no save kasem ol nambawan wok blong Kingdom, from we oli no man Isrel long saed blong spirit.

14. (a) ?Jisas i mekem wanem promes long kongregesen blong Filadelfia? (b) ?Yumi mas mekem wanem blong yumi no foldaon taem trabol i kam “blong traem olgeta man blong wol”?

¹⁴ Jisas i mekem wan promes long ol Kristin long Filadelfia, i se: “Yufala i stap holemgud tok ya blong mi we mi talem se yufala i mas mekem tingting blong yufala i longfala. From samting ya, taem trabol ya i kamtru we bambae i kam blong traem olgeta man blong wol, be bambae mi mi lukaot gud long yufala, blong trabol ya i no kam spolem yufala.” Blong gohed long wok blong prij, yumi nidim blong mekem tingting blong yumi i longfala olsem Jisas i bin mekem. Hem i neva letem ol enemi oli stopem hem, be hem i gohed nomo blong mekem wok blong Papa blong hem. From samting ya,  God i mekem hem i laef bakegen long gudfala laef blong heven we i no save lus samtaem. Sipos yumi holemstrong long disisen blong yumi blong mekem wosip long Jeova mo yumi gohed blong talemaot gud nius blong Kingdom, bambae yumi no save foldaon taem trabol i kam “blong traem olgeta man blong wol,” hemia long taem ya we yumi stap long hem naoia. Bambae yumi traehad blong mekem wok blong Kingdom i kam bigwan moa, mo long rod ya, bambae yumi ‘holemgud ol samting we yumi kasem finis’ long Kraes. From samting ya, ol tabu man bambae oli kasem nambawan wok blong king long heven, mo ol gudfala fren blong olgeta bambae oli kasem laef we i no save finis long wol ya.

15. ?Olgeta we oli wantem kam ‘ol pos long haos blong God’ oli mas mekem wanem?

¹⁵ Kraes i gohed moa i se: “Man we bambae i win long faet, bambae mi mekem hem i olsem wan pos blong haos blong God . . . bambae mi mi raetem nem blong God blong mi, mo nem blong taon blong God blong mi, i stap long hem. Taon ya, hemia niufala Jerusalem ya we God blong mi bambae i sanem i aot long heven, i kamdaon long wol. Mo bambae mi raetem niufala nem blong mi tu i stap long man ya.” Ol tabu man blong lukaot long kongregesen blong God oli mas sapotem gud trufala wosip. Oli mas gohed blong talemaot Kingdom blong God mo stap klin long saed blong spirit. Olsem nao, bambae oli holemtaet janis we oli gat blong kam ol memba blong “niufala Jerusalem.” Oli mas mekem olsem sipos oli wantem kam ol pos long haos blong God long heven, mo sipos oli wantem stap long taon blong God long heven mo gat nem blong taon ya i stap long olgeta, mo sipos oli wantem se nem blong Kraes we bambae oli mared long hem i stap long  olgeta. Mo tu, oli mas sua se sora blong olgeta i ‘lesin gud long tok we tabu spirit i stap talem long ol kongregesen.’

Long Enjel Blong Kongregesen Blong Laodisia

16. ?Wanem sam samting long saed blong taon ya Laodisia?

¹⁶ Kraes i stretem kongregesen blong Laodisia from we oli gat fasin blong no kea. (Ridim Revelesen 3:​14-22.) Taon blong Laodisia i stap 150 kilometa longwe long Efesas, long saed i go long is. Plante rod we ol bisnesman oli folem taem oli pem mo salem ol samting, oli pastru long Laodisia, we i stap long ol rij graon klosap long Lycus Reva. Taon ya i wan rij taon, i fulap long ol faktri we oli wokem plante samting, mo i gat plante bang long hem tu. Ol man long ol narafala ples oli savegud long ol klos we oli wokem long ples ya long blak hea blong sipsip. Mo tu, i gat wan bigfala haeskul long taon ya we ol man oli kam long hem blong stadi long saed blong meresin. Taswe, ating long Laodisia nao oli wokem wan meresin blong ae we oli kolem Phrygian paoda. God blong meresin, Asclepius, i wan bigfala god blong ples ya. I luk olsem we i gat plante man Jiu oli stap long Laodisia, mo sam long olgeta oli rijman.

17. ?From wanem Jisas i tok strong long ol Kristin long Laodisia?

¹⁷ Jisas i givim toktok long “enjel” blong kongregesen blong Laodisia, blong pasem i go long kongregesen ya. Jisas i “tru witnes ya we i no save tanem tok blong hem. Hem i faswan long olgeta samting we God i wokem.” (NW ) Taswe, tok blong hem i gat paoa. (Kolosi 1:​13-16) Hem i tok strong long ol Kristin long Laodisia from we long saed blong spirit, ‘oli no hot, mo oli no kol tu.’ From we oli hafhaf olsemia, Kraes bambae i sakemaot olgeta, olsem we man i traot long kakae we i no stret. I no had long ol Kristin ya blong kasem save long tok ya. Long wan ples klosap long Laodisia we nem blong hem Hierapolis, i gat hot springwota. Mo long Kolosi, i gat kol wota. Be blong kasem Laodisia, oli mas pulum wota ya blong longwe i kam long paep. Taswe, taem wota i kasem Laodisia, ating i no moa hot, mo i no moa kol tu. Fastaem, wota ya i mas pastru long wan tanel. Ale, taem wota ya i kam klosap long Laodisia, hem i mas pastru long ol ston we oli joenem wetem simen mo oli katem wan hol long medel blong olgeta olsem wan paep.

18, 19. ?Olsem wanem blong givhan long sam Kristin tede we oli kam olsem ol Kristin long Laodisia bifo?

¹⁸ Tede ol man we oli olsem ol Kristin long Laodisia, oli no olsem hot wota, we i mekem man i smat mo i gat paoa, mo oli no olsem kol wota, we i mekem man i harem gud. !Oli hafhaf nomo, taswe Jisas bambae i sakemaot olgeta olsem kakae we man i traot long hem! Jisas i no wantem olgeta blong karem tok blong hem, olsem ol tabu “ambasada blong Kraes.” (2 Korin 5:20, NW ) Sipos oli no tanem tingting blong olgeta from ol sin blong olgeta, bambae oli lusum wok ya we i olsem wan blesing, hemia wok blong talemaot Kingdom. Olgeta blong Laodisia ya oli traehad blong kasem mane mo kam rijman, be ‘oli no save se oli puaman we oli trabol gud, we olgeta man oli sore tumas long olgeta, mo ae blong olgeta i blaen mo oli neked.’ Tede, olgeta we oli olsem ol man Laodisia, we long saed blong spirit oli puaman, oli blaen mo oli neked, oli mas pem sam samting long Kraes. Oli mas pem ‘gol we oli bonem finis long faea,’ hemia bilif we i kasem plante traem be i no kam slak. Oli mas pem ‘waet klos blong werem,’ hemia stret fasin. Mo oli mas pem ‘meresin blong putum long ae’ blong mekem se oli no moa blaen long saed blong spirit. Ol man we oli gat wok blong lukaot long kongregesen, oli glad blong givhan long ol Kristin ya blong oli luksave bakegen se oli nidim ol samting long saed blong spirit. Long rod ya, bambae oli save kam “rijman long fasin blong bilif.” (Jemes 2:5; Matiu 5:3) Mo tu, ol brata we oli lukaot long kongregesen, oli mas givhan long olgeta ya blong oli putum ‘meresin long ae blong olgeta,’ hemia blong harem mo folem ol tijing blong Jisas, ol advaes blong hem, eksampol blong hem, mo tingting we hem i gat. Samting ya bambae i mekem olgeta oli kamgud bakegen, nao bambae oli no moa wantem tumas ‘ol rabis samting we tingting blong olgeta i wantem mo ol samting we ae blong olgeta i luk, mo bambae oli no moa flas tumas long ol samting we oli gat.’​—1 Jon 2:​15-17.

¹⁹ Jisas i tok strong mo givim panis long ol man we hem i lavem olgeta. Ol man blong lukaot long kongregesen we oli stap long han blong Jisas oli mas mekem sem samting ya wetem kaen fasin. (Ol Wok 20:​28, 29) Ol Kristin long Laodisia oli mas ‘traehad blong tanem tingting blong olgeta from ol sin blong olgeta.’ Oli mas jenisim tingting blong olgeta mo fasin blong laef blong olgeta. ?Olsem wanem long yumi tede? Maet sam long yumi i lan finis long wan fasin blong laef we yumi stap mekem smol nomo long ol tabu wok blong God, olsem we wok ya i no impoten nating. Sipos i olsem, yumi mas ‘pem meresin blong ae long Jisas,’ we bambae i givhan long yumi blong luksave se i impoten blong wok strong blong lukaot Kingdom fastaem long laef blong yumi.​—Matiu 6:33.

20, 21. ?Hu olgeta tede we oli harem mo oli openem doa taem Jisas i “kilkilim,” mo oli gat janis blong kasem wanem long fiuja?

²⁰ Kraes i talem se: “Yufala i luk. Mi mi stap stanap  long doa, mi stap kilkilim doa. Sipos wan man i harem tok blong mi, i openem doa, mi bambae mi kam insaed long haos blong hem, mi kakae wetem hem, mo hem bambae i kakae wetem mi.” Plante taem, Jisas i tijim ol man taem hem i stap kakae wetem olgeta. (Luk 5:​29-39; 7:​36-50; 14:​1-24) Naoia, hem i stap kilkilim doa blong ol kongregesen we oli olsem Laodisia. ?Olsem wanem? ?Olgeta long ol kongregesen ya, bambae oli openem doa, lavem hem bakegen, tekem hem i kam insaed long haos blong olgeta, mo letem hem i tijim olgeta? Sipos oli mekem olsem, Kraes bambae i kakae wetem olgeta, mo bambae hem i givhan bigwan long olgeta long saed blong spirit.

²¹ Tede, i olsem we “ol narafala sipsip” oli stap tekem Jisas i kam insaed long haos blong olgeta, mo fasin ya bambae i lidim olgeta blong kasem laef we i no save finis. (Jon 10:16; Matiu 25:​34-40, 46) Jisas i ‘win long faet blong hem finis, nao i stap sidaon wetem Papa blong hem blong joen long hem long haenem blong hem.’ Mo long sem fasin, Kraes bambae i givim blesing long ol wanwan tabu man we oli win long faet blong olgeta, blong ‘oli kam sidaon wetem hem, blong joen long hem long haenem blong hem.’ Yes, Jisas i promes blong givim bigfala pei long ol tabu man we oli win long faet blong olgeta. Bambae oli sidaon long jea blong king wetem hem, long raetsaed blong Papa blong hem long heven. Mo ol narafala sipsip we oli win long faet blong olgeta, oli stap wet blong kasem wan nambawan ples long wol ya aninit long rul blong Kingdom.

Ol Lesen Blong Yumi Evriwan

22, 23. (a) ?Olsem wanem ol tok we Jisas i givim long ol seven kongregesen ya oli save mekem i gud long olgeta Kristin? (b) ?Yumi mas gat strong tingting blong mekem wanem?

²² Tru ya, ol tok we Jisas i talem long ol seven kongregesen long Esia Maena oli save givhan bigwan long olgeta Kristin evriwan. Ol Kristin elda bambae oli makemgud we Kraes i talem gudfala toktok blong presem kongregesen taem hem i luk se i stret blong mekem olsem. Samting ya bambae i pulum ol elda blong talem ol gudfala toktok wetem lav, long ol wanwan Kristin mo kongregesen we oli stap wok gud long saed blong spirit. Ol Kristin we oli gat sam slak fasin, ol elda bambae oli halpem olgeta blong folem tok blong Baebol blong stretem ol fasin ya. Yumi no mas wet, yumi mas prea long saed blong advaes ya we Kraes i givim long ol seven kongregesen ya, mo hareap blong folem long laef blong yumi. Olsem nao, yumi evriwan i save kasem gudfala samting from ol tok ya blong Kraes. *

²³ Ol las dei ya we yumi stap long olgeta, oli no wan taem blong gat fasin blong no kea, no blong ronem ol sas samting, no blong mekem wan narafala fasin we i save daonem wok blong God i kam olsem wan smol samting nomo long laef blong yumi. I gud we ol kongregesen oli gohed blong saenaot olsem ol ples blong putum laet long hem, we Jisas i glad blong letem olgeta oli holem ples blong olgeta. Yumi ol Kristin we i holemstrong long God, oltaem yumi mas gat strong tingting blong lesin gud taem Kraes i toktok, mo blong lesin gud long ol tok we tabu spirit i talem. Olsem nao, bambae glad we yumi kasem taem yumi mekem laet i saenaot bambae i stap olwe, mo bambae yumi leftemap nem blong Jeova.

[Futnot]

?Bambae Yu Yu Ansa Olsem Wanem?

• ?Hu ya “woman ya Jesebel,” mo from wanem ol woman we oli onagud long God oli no mas folem fasin blong Jesebel?

• ?Kongregesen blong Sadis i olsem wanem, mo wanem samting we yumi save mekem blong yumi no kam olsem plante Kristin long taon ya?

• ?Wanem ol promes we Jisas i talem long kongregesen blong Filadelfia, mo olsem wanem oli stret long kongregesen tede?

• ?From wanem ol Kristin long Laodisia oli kasem ol strong tok, be ol Kristin we oli wok strong oli gat janis blong kasem wanem long fiuja?

[Kwestin]

[Tok blong pija long pej 16]

I no mas gat ol rabis fasin blong “woman ya Jesebel” oli stap

[Tok blong pija long pej 18]

Jisas i openem “wan bigfala doa” long ol man blong hem, blong oli save mekem ol nambawan wok blong Kingdom

[Tok blong pija long pej 20]

?Yu yu tekem Jisas i kam insaed long haos blong yu mo yu lesin gud long hem?