Stap Stanap Strong, Mo Kasem Praes Blong Laef

?SIPOS yu mas tekem bot i go long narafala aelan be solwota i raf tumas, bambae yu glad blong stap long wanem kaen bot? ?Bambae yu wantem stap long wan smol kenu no yu wantem stap long wan bigfala sip we i strong? Ating bambae yu laekem moa blong stap long wan sip, we i strong naf blong pastru long ol bigbigfala wef.

Yumi stap long wan wol we i raf mo i denja tumas. Long wol ya, yumi fesem plante traem we oli mekem yumi harem nogud. Eksampol, maet ol yangfala oli konfius mo oli harem se oli no sefgud long wol ya we oltaem, i stap jenisim tingting mo fasin blong hem. Ol man we oli joen wetem Kristin kongregesen i no longtaem, maet oli no sua yet se bambae oli stap olsem Kristin no nogat. No maet i gat sam man we oli stanap strong plante yia finis long wok blong God. Be naoia oli faenem i had, from we oli no luk ol samting we oli stap wet long hem.

Ol filing ya oli no niu. Sam man we oli bin stap tru long Jeova, olsem Moses, Job, mo Deved, olgeta tu oli bin harem ol kaen filing olsem. (Namba 11:​14, 15; Job 3:​1-4; Ol Sam 55:4) Be nomata long ol filing ya, oli stap stanap strong mo oli fasgud long God long ful laef blong olgeta. Gudfala eksampol blong ol man ya i pulum yumi blong stanap strong tu. Be Setan i wantem pulum yumi blong lego rod ya we i lidim yumi i go long laef we i no save finis. (Luk 22:31) ?Taswe, olsem wanem nao yumi save stap “stanap strong long bilif”? (1 Pita 5:9) ?Mo olsem wanem yumi save halpem ol narafala man blong God blong oli stap stanap strong tu?

Jeova i Wantem We Yumi Stanap Strong

Sipos yumi stap tru long Jeova, bambae hem i givhan long yumi oltaem blong yumi stanap strong. Deved, we i man blong raetem Sam, hem i fesem plante traem. Be tingting blong Deved i stap strong long Jeova, taswe hem i save singim se: “[Jeova] i pulumaot mi long hol we i nogud we i nogud, i tekemaot mi long swom we i fulap long sofmad. Hem i putum mi antap long wan bigfala ston, nao mi mi stap gud long sefples we i strong.”​—Ol Sam 40:2.

Jeova i givim paoa long yumi blong yumi “faet long gudfala faet ya blong bilif,” olsem nao bambae yumi save “holemtaet laef ya we i no save finis.” (1 Timoti 6:​12, NW ) Mo tu, hem i givim evri samting long yumi blong yumi save stanap strong mo winim faet ya long saed blong spirit. Aposol Pol i talem long ol Kristin se: “Yufala i mas joen long Masta blong yumi blong kasem paoa. Hem i gat olgeta paoa, mo yufala i mas kam strong long paoa blong hem.” Afta hem i ademap se: “Yufala i mas kasem paoa blong God, we i olsem olgeta samting blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong.” (Efesas 6:​10-17) ?Be wanem samting nao i save mekem we yumi kam slak? ?Mo olsem wanem yumi save agensem ol nogud samting ya?

Lukaot Long Ol Samting We Oli Save Mekem Man i Foldaon

Bambae yumi waes sipos yumi rimemba impoten poen ya se: Ol disisen we yumi tekem oli save givhan long yumi blong stanap strong long saed blong spirit no oli save mekem yumi foldaon. Ol yangfala oli mas tekem plante bigfala disisen. Oli mas tingbaot wanem kaen wok we oli wantem mekem, sipos bambae oli go  moa long edukesen blong olgeta afta long haeskul, mo sipos bambae oli mared no olsem wanem. Maet ol bigman oli mas tekem ol disisen ya se bambae oli muv i go long wan narafala ples, no oli holem tu defren wok wantaem. Evri dei yumi mas tekem sam disisen long fasin blong yusum taem blong yumi, no long plante defren samting bakegen. ?Wanem bambae i halpem yumi blong tekem ol waes disisen, ol disisen we bambae oli givhan long yumi ol man blong God, blong yumi stanap strong? Wan sista we i Kristin longtaem finis, i talem se: “Mi mi askem help blong Jeova taem mi tekem disisen. Mi ting se i impoten blong akseptem mo folem ol advaes we yumi kasem tru long Baebol, ol Kristin miting, ol elda, mo ol buk we oli stanap long Baebol.”

Taem yumi tekem disisen, i gud blong askem ol kwestin ya long yumi wan se: ‘?Long faef no ten yia taem, bambae mi glad yet long ol disisen we mi stap tekem tede, no bambae mi harem nogud from? ?Mi rili traehad blong meksua se ol disisen we mi tekem, bambae oli no mekem mi mi foldaon be oli halpem mi blong gohed long saed blong spirit?’​—Filipae 3:16.

Sam man we oli baptaes finis oli no stanap strong longtaem from we oli letem ol traem oli winim olgeta, no maet oli stap mekem ol samting we klosap nomo i brekem loa blong God. Sam long olgeta we oli no wantem tanem tingting blong olgeta, kongregesen i bin putumaot olgeta. Ale oli wok had blong kambak long Kristin kongregesen. Be biaen​—samtaem, smol taem nomo afta we oli kambak—​kongregesen i mas putumaot olgeta bakegen, from we oli mekem ol semfala sin. Ating oli mestem bakegen from we oli no prea long God blong Hem i givhan long olgeta blong ‘oli agens long ol rabis fasin, mo oli holemstrong ol gudfala fasin.’ (Rom 12:9; Ol Sam 97:10) Yumi evriwan yumi “mas wokbaot long gudfala rod nomo.” (Hibrus 12:13) Taswe, i gud yumi tingbaot sam poen we oli save halpem yumi blong stanap strong long saed blong spirit.

Kristin Wok i Givhan Blong Stanap Strong

Sipos yumi stap bisi oltaem long wok blong prij, bambae yumi stanap strong long resis blong yumi blong kasem laef. Yes, wok blong prij i givhan bigwan blong mekem hat mo tingting blong yumi i stap fulwan long wil blong God mo long praes ya, hemia laef we i no save finis. Pol i talem long ol man Korin se: “Ol gudgudfala brata mo sista. Yufala i mas stanap strong. Yufala i no mas slak. Oltaem yufala i mas wok strong long ol wok ya blong Masta blong yumi, from we yufala i save finis, se taem yufala i wok blong Masta ya blong yumi, be wok ya bambae i mas gat frut blong hem.” (1 Korin 15:58) Tok ya “stanap strong” i minim se man i fas strong we i no save muv long ples blong hem. Grik tok ya we oli tanem i kam “no mas slak” i save minim se ‘no lego rop blong angka ya we i stap holem yu.’ Taswe, fasin blong stap bisi long wok blong prij i save givhan long yumi blong gohed olwe long Kristin resis blong yumi. Taem yumi halpem ol narafala blong oli save Jeova, nao laef blong yumi i gat mining mo yumi haremgud.​—Ol Wok 20:35.

Pauline i wan Kristin we i spenem bitim 30 yia long wok blong misinari mo long fultaem wok blong prij. Hem i talem se: “Wok blong prij i protektem mi from we taem mi prij long ol narafala, mi pruvum long mi bakegen se mi rili faenem trutok.” Filing ya se yumi faenem trutok, i save kamaot from sam narafala Kristin wok tu, olsem taem yumi go long ol miting blong wosipim God, mo taem yumi wanwan yumi stadigud long Baebol.

Lav Blong Ol Brata Sista i Mekem Yumi Stanap Strong

Yumi haf blong wan ogenaesesen we i stap wosipim God long fulwol. Samting ya i save givhan plante long yumi blong yumi stanap strong. !I gud tumas blong stap joen wetem ol brata sista we oli gat lav! (1 Pita 2:17) Mo yumi tu yumi save mekem ol narafala man blong God oli stanap strong.

Tingbaot ol gudfala wok blong stret man ya, Job. Elifas i daonemgud tingting blong Job. Be nating se i olsem, hem i mas agri we Job i mekem sam gudfala wok i se: “Taem man i taed, i slak, mo i foldaon, ol tok blong yu i stap leftemap tingting blong hem, i stap mekem hem i stanap strong bakegen.” (Job 4:4) ?Olsem wanem long yumi? ?Yumi mekem ol narafala oli stanap strong bakegen? Yumi evriwan i gat responsabiliti ya blong halpem ol brata sista blong yumi, blong oli stanap strong longtaem long wok blong God. Taem yumi stap tugeta wetem ol brata sista blong yumi, yumi save folem advaes ya se: “Ol man we han blong olgeta i taed finis, oli no moa save leftemap, yufala i mas mekem han blong olgeta i strong bakegen. Mo olgeta we ni blong olgeta i stap seksek, oli no moa save nildaon, yufala i mas mekem ni blong olgeta i strong bakegen.” (Aesea 35:3) ?Olsem wanem? ?Maet yu save putum mak ya se evri taem we yu joen wetem ol brata sista, yu save leftemap tingting blong wan no tu Kristin, mo mekem tingting blong olgeta i strong? (Hibrus 10:​24, 25) I gud blong leftemap  tingting blong ol brata sista, presem gudfala wok blong olgeta, mo talem tangkiu long olgeta from ol traehad we oli mekem blong mekem God i glad. Sipos yu mekem olsem, bambae yu halpem ol brata sista blong yu blong oli stanap strong mo oli traehad blong kasem praes blong laef.

Ol Kristin elda oli save givhan plante sipos oli leftemap tingting blong ol niuwan. Maet oli save givim sam gudfala advaes we oli kamaot long Baebol, no joen wetem olgeta long wok blong prij. Oltaem, aposol Pol i tekem janis blong mekem ol narafala oli kam strong. Hem i wantem tumas blong luk ol Kristin blong Rom, blong givhan long olgeta long saed blong spirit. (Rom 1:11) Hem i lavem tumas ol brata sista blong hem long Filipae, mo i tokbaot olgeta se: “Yufala i stap mekem mi mi harem gud, mo mi glad tumas long yufala.” Pol i leftemap tingting blong olgeta se oli mas “stanap strong long paoa blong Masta.” (Filipae 4:1) Taem Pol i harem nius blong ol bigfala traem we ol brata blong hem long Tesalonaeka oli stap kasem, hem i sanem Timoti i go blong i ‘leftemap tingting blong olgeta, i mekem olgeta oli stanap strong, blong bambae i no gat sam long olgeta oli gobak long olfala laef blong olgeta bakegen.’​—1 Tesalonaeka 3:​1-3.

Aposol Pol mo aposol Pita, tufala i luksave se ol narafala brata blong olgeta oli traehad oltaem blong stap strong long bilif blong olgeta. Mo tufala i tinghae long ol traehad ya. (Kolosi 2:5; 1 Tesalonaeka 3:​7, 8; 2 Pita 1:12) I gud yumi folem eksampol blong tufala, mo yumi no luk i go long ol slak fasin blong ol brata blong yumi. I moa gud yumi luk ol gudfala fasin blong olgeta, mo olsem wanem oli stap faet blong stanap strong mo givim ona long Jeova.

Maet yumi stap tingting nogud oltaem mo yumi stap faenem poen long ol narafala. Fasin ya i nogud. From we nating se yumi no minim, be nogud fasin ya i save spolem tingting blong sam brata sista, we bambae oli faenem i had moa blong stanap strong long bilif blong olgeta. !Yumi mas tingbaot we ol brata blong yumi ‘oli trabol tumas mo oli no moa gat paoa’ long rabis wol ya! (Matiu 9:36) Oli wantem haremgud insaed long Kristin kongregesen, oli wantem harem ol tok we oli leftemap tingting blong olgeta. Mo hemia i stret nomo. Taswe yumi evriwan, i gud yumi mekem bes blong yumi blong leftemap tingting blong ol brata sista blong yumi, mo halpem olgeta blong oli stap stanap strong.

Maet samtaem, sam brata oli gat sam fasin we oli save slakem strong tingting blong yumi. ?Be olsem wanem? ?Bambae yumi letem wan nogud tok no wan nogud fasin i mekem yumi kam slak long wok blong Jeova? !Nogat! !Yumi neva mas letem eni man i blokem fasin blong yumi blong stanap strong!​—2 Pita 3:17.

Ol Promes Blong God —Oli Givhan Blong Stanap Strong

God i promes long yumi se bambae yumi save gat wan nambawan fiuja aninit long rul blong Kingdom. Promes ya i givim hop long yumi mo i halpem yumi blong stanap strong. (Hibrus 6:19) Mo from we yumi save se God i holem ol promes blong hem oltaem, nao yumi gat strong tingting blong ‘no slip mo stanap strong long bilif blong yumi.’ (1 Korin 16:13; Hibrus 3:6) Maet yumi harem olsem se God i tektaem lelebet blong mekem sam promes blong hem oli kamtru. Mo filing ya i save traem bilif blong yumi. Taswe, i impoten tumas blong stap longwe long ol giaman tijing we oli save spolem hop blong yumi.​—Kolosi 1:23; Hibrus 13:9.

Ol man Isrel oli ded from we oli no bilif fulwan long ol promes blong Jeova. Eksampol blong olgeta i mas stap olsem wan woning long yumi. (Ol Sam 78:37) I nogud yumi folem eksampol blong olgeta ya. Yumi, yumi mas stanap strong. Long ol lasdei, yumi mas mekem wok blong God wetem tingting ya se en i klosap nomo. Wan elda we i gat plante ekspiriens i  talem se: “Mi laef evri dei wetem tingting ya se bigfala dei blong Jeova bambae i kam tumora.”​—Joel 1:15.

Yes, bigfala dei blong Jeova i klosap nomo. Sipos yumi stap klosap long God, i no gat wan samting i save mekem yumi fraet. !Sipos yumi holemstrong ol loa blong hem mo yumi stap stanap strong, nao yumi save winim resis blong kasem praes ya blong laef we i no save finis!​—Ol Proveb 11:19; 1 Timoti 6:​12, 17-19.

[Tok blong pija long pej 23]

?Yu yu mekem bes blong yu blong givhan long ol narafala Kristin, blong oli stap stanap strong?

[Foto Credit Line blong pija long pej 21]

The Complete Encyclopedia of Illustration/J. G. Heck