Wan Kwestin

Bifo, yumi stap talem se ol man Jiu we oli bilif long Jisas Kraes mo oli tekem baptaes bitwin ol yia 33 K.T. kasem 36 K.T., oli no nid blong givim laef blong olgeta i go long God bifo we oli baptaes. Be Wajtaoa blong Eprel 1, 2002, pej 11, haf 7, i talem se taem ol man Jiu oli baptaes long wota long dei blong Pentekos 33 K.T., “oli soemaot se oli givim laef blong olgeta long God, tru long Kraes.” ?From wanem tijing ya i defren?

Long 1513 B.K.T., Jeova God i givim wan janis long ol man Isrel se oli save kam tabu nesen blong hem, sipos oli ‘obei long hem mo oli holemgud promes we hem i mekem wetem ol bubu blong olgeta bifo.’ Ol man Isrel oli ansa se: “Bambae mifala i mekem olgeta samting we Hae God i talem.”​—Eksodas 19:​3-8; 24:​1-8.

Taem ol man Isrel oli agri long kontrak blong Loa blong Moses, oli givim laef blong olgeta i go long God. Biaen, olgeta pikinini blong ol man Jiu oli bon long wan nesen we i givim laef blong hem finis i go long God. Be stat long dei blong Pentekos 33 K.T., baptaes blong ol man Jiu we oli stap folem Jisas Kraes i gat wan mining we i dip moa. Tru long baptaes ya, oli no jes kam long fored blong God olsem memba blong wan nesen we i blong God finis. Mining blong baptaes ya i dip moa: Hem i soem we oli givim laef blong olgeta i go long Jeova, oli gat wan niufala fasin blong fren wetem Jeova, tru long Jisas Kraes. ?Hemia i minim wanem?

Long Jerusalem, long dei blong Pentekos 33 K.T., tabu spirit i kamdaon long klosap 120 disaepol we oli hivap tugeta long wan rum. Nao biaen, aposol Pita i girap mo i stat blong prij long ol taosen man Jiu wetem ol proselaet we oli hivap long ples ya blong luk samting we i hapen. Pita i givim wan gudfala witnes long olgeta, nao i talem long ol man Jiu ya we tingting blong olgeta i jajem gud olgeta i se: “Yufala i mas tanem tingting blong yufala from ol sin blong yufala, mo yufala evriwan i mas baptaes long nem blong Jisas Kraes, blong bambae God i tekemaot ol sin blong yufala.” Afta we Pita i toktok, “olgeta we oli bilif long tok blong hem, oli baptaes. Mo long dei ya, samwe long tri taosen man oli joen long grup blong olgeta.”​—Ol Wok 2:​1-41.

?Be ol man Jiu ya we oli baptaes afta we Pita i givim tok blong hem, oli memba finis blong wan nesen we i givim laef blong hem i go long God, no? ?Oli no gat wan spesel fasin fren wetem God finis? Nogat. Aposol Pol i talem se ‘God i tekemaot ol loa mo ol rul ya, i nilim olgeta long pos we Kraes i ded long hem.’ (Kolosi 2:​14, NW ) Yes, tru long ded blong Kraes long 33 K.T., Jeova God i karemaot kontrak blong Loa​—kontrak ya nao i stamba samting we i mekem se ol man Isrel oli spesel pipol blong God. Naoia, nesen blong Isrel i sakemaot  Pikinini blong God, ale God hem wan i sakemaot olgeta tu. Olgeta ya we bifo ‘oli laen blong Isrel’ oli no moa save talem se nesen blong olgeta i nesen blong God.​—1 Korin 10:18; Matiu 21:43.

Kontrak blong Loa i finis long 33 K.T. Be spesel taem ya we God i makem blong soem gladhat blong hem long ol man Jiu, hem i no finis long taem ya. * God i gohed blong soem gladhat blong hem long ol man Jiu go kasem 36 K.T. Nao long yia ya Pita i prij long Konilias​—wan man Itali we i fraetgud long God​—long famle blong Konilias, mo long sam narafala Hiten man bakegen. (Ol Wok 10:​1-48) Stat long taem ya, Jeova i soem gladhat blong hem long ol narafala nesen tu. ?From wanem?

Daniel 9:27 (NW ) i talem se: “Bambae [Mesaea] i holem kontrak wetem plante man i stap wok yet long wan ful wik.” Kontrak ya we i stap wok yet blong seven yia, no “wan ful wik,” stat long baptaes blong Jisas mo minista wok blong Mesaea long 29 K.T., hemia kontrak we God i mekem wetem Ebraham. Sipos wan man i wantem joen long kontrak ya, hem i mas kamaot long laen blong Ebraham. Kontrak ya we God nomo i mekem i kamtru, i no min se ol man Jiu oli gat wan spesel fasin fren wetem Jeova. Taswe, ol man Jiu we oli baptaes afta long tok blong Pita long dei blong Pentekos 33 K.T., God i soem gladhat blong hem long olgeta from we oli ol man Jiu. Be nating se i olsem, oli no save talem se oli gat wan spesel fasin fren wetem God, from we kontrak blong Loa i finis finis. Taswe, olgeta man Jiu wanwan oli mas givim prapa laef blong olgeta i go long Jeova.

I gat wan narafala risen bakegen from wanem ol man Jiu mo ol proselaet we oli wantem baptaes long dei blong Pentekos 33 K.T. oli mas givim laef blong olgeta wanwan i go long Jeova. Aposol Pita i pulum ol man we oli stap lesin se oli mas tanem tingting blong olgeta mo baptaes long nem blong Jisas. Blong mekem olsem, oli mas lego fasin blong wol ya mo oli mas luksave Jisas se hem i Masta mo Mesaea, hem i Hae Pris, mo hem nao i man ya we i stap sidaon long raetsaed blong God antap long heven. Oli mas singaot long nem blong Jeova blong i sevem olgeta tru long Jisas Kraes, i min se oli mas bilif long Kraes mo oli mas luksave hem olsem Lida blong olgeta. Stamba rod blong frengud wetem God mo blong God i save fogivim ol sin blong ol man Jiu, naoia i jenis fulwan. Olgeta man Jiu wanwan, sipos oli bilif, oli mas akseptem niufala rod ya. ?Oli mekem samting ya olsem wanem? Oli mas givim laef blong olgeta i go long God, mo oli mas soem samting ya long fes blong evri man, taem oli baptaes long wota long nem blong Jisas Kraes. Baptaes long wota i wan saen se oli givim laef blong olgeta i go long God, mo i mekem olgeta oli gat wan niufala fasin fren wetem God, tru long Jisas Kraes.​—Ol Wok 2:​21, 33-36; 3:​19-23.

[Futnot]