Fasin Blong Givim Presen We God i Glad Long Hem

JISAS mo ol disaepol blong hem oli stap kakae gud long Betani wetem sam gudfala fren. I gat Meri mo Mata tu i stap, wetem Lasaros we i no longtaem, Jisas i bin mekem hem i laef bakegen. Nao Meri i girap, i tekem samwe long haf lita oel we i sas tumas, mo i ravem leg blong Jisas long hem. Judas Iskariot i kam kros. Hem i tok from samting ya, i se: “?From wanem hem i no salem senta ya blong kasem mane blong givim long ol puaman? !Hemia i naf blong kasem tri handred taosen vatu ya [pei blong wan man blong wan fulyia]!” Sam narafala tu oli tok from samting ya.​—Jon 12:​1-6; Mak 14:​3-5.

Be, Jisas i ansa long olgeta i se: “!Ei! !Yufala i livim woman ya! . . . Ol puaman bambae oli stap oltaem wetem yufala. Mo sipos yufala i wantem, oltaem yufala i save mekem i gud long olgeta. Be mi, bambae mi no save stap oltaem wetem yufala.” (Mak 14:​6-9) Ol lida blong skul blong ol man Jiu, oli tijim ol man se sipos oli givim mane blong halpem ol puaman, fasin ya i gud tumas, mo antap moa, i save tekemaot sin blong olgeta. Be Jisas i soemaot klia se fasin blong givim presen we God i glad long hem, i no blong givim mane blong halpem ol puaman nomo.

I gud we yumi tekem smoltaem blong luk olsem wanem ol faswan Kristin oli givim presen. Eksampol blong olgeta i save soemaot sam rod long yumi blong halpem mo tingbaot ol man. Sipos yumi folem ol rod ya, God i save glad long fasin blong yumi blong givim presen. Mo tu, eksampol ya bambae i soem wan spesel fasin blong givim presen, we i mekem i moa gud long ol man.

‘Givim Mane Long Ol Puaman’

Plante taem, Jisas i pulum ol disaepol blong hem blong ‘givim mane long ol puaman.’ Sam Baebol oli talem se, “givim presen” no “givim mane olsem presen.” (Luk 12:33; New English Bible; A Translation in the Language of the People, we Charles B. Williams i raetem) Be Jisas i givim woning se, man i no mas givim presen blong soem hem wan nomo no blong pulum ol man blong ona long hem i bitim we oli ona long God. Hem i se: “Sipos yu givim samting long puaman blong givhan long hem, i nogud yu stap tokbaot long fes blong ol man, olsem we olgeta ya we oli gat tu fes oli stap mekem. Olgeta ya oli stap talemaot ol gudfala wok blong olgeta insaed long ol haos blong prea, mo afsaed long ol big rod, blong mekem ol man oli ona long olgeta.” (Matiu 6:​1-4) Ol faswan Kristin oli folem advaes ya. Taswe, oli no mekem olsem ol lida blong skul long taem blong olgeta. Ol lida blong skul oli tokbaot ol gudfala wok blong olgeta long fes blong ol man, blong traem soemaot se oli stret man. Be taem ol Kristin oli halpem ol man we oli trabol, oli givhan long ol man ya wanwan, mo oli givim presen  taem man i stap hem wan, i no long fes blong ol man.

Blong luk samting ya, yumi save ridim Luk 8:​1-3. Ol vas ya oli talem se Meri we oli kolem woman Magdela, wetem Joana, Susana, mo sam narafala, oli yusum “mane blong olgeta” blong givhan long Jisas mo ol aposol blong hem. Be oli no tokbaot samting ya long fes blong ol man. I no se Jisas mo ol aposol oli no gat wan samting nating, nogat. Be olgeta ya oli bin lego wok we oli save winim mane from, blong spenem taem blong olgeta long wok blong prij. (Matiu 4:​18-22; Luk 5:​27, 28) Taem ol woman oli givhan long olgeta blong gohed long wok blong God, i olsem we oli ona long God. Mo God i soemaot se hem i glad long olgeta taem hem i pulum ol man blong raetem stori blong olgeta long Baebol. Ale olgeta man biaen oli save ridim stori ya mo luk we ol woman ya oli gat bigfala sore mo gladhat blong givim presen.​—Ol Proveb 19:17; Hibrus 6:10.

Dokas tu i wan woman we i kaen. “Oltaem hem i stap mekem ol gudfala wok, mo i stap givhan long ol puaman.” Hem i stap klosap long solwota long taon ya Jopa, mo hem i stap somap klos blong ol widowoman we oli pua. Yumi no save sipos hem i pem ol kaliko blong olgeta tu, no sipos hem i jes somap nomo. Nating se i olsem wanem, gudfala wok blong hem i mekem se ol woman we hem i halpem olgeta oli laekem hem tumas. Mo God tu i laekem hem, i sore long hem, mo i givim blesing long hem from gladhat blong hem blong givhan long ol narafala.​—Ol Wok 9:​36-41.

I Impoten Blong Gat Stret Tingting Taem Yumi Givim Presen

?Wanem tingting i pulum ol man ya blong givim presen? ?Oli givim presen from we ol man we oli trabol oli krae long olgeta nao oli sore long olgeta? I no hemia nomo. Olgeta ya oli harem se i stret mo i wok blong olgeta blong mekem wanem we oli naf blong mekem evri dei blong halpem ol man we oli pua, oli trabol, oli sik, no oli fesem wan hadtaem. (Ol Proveb 3:​27, 28; Jemes 2:​15, 16) Hemia nao fasin blong givim presen we God i glad long hem. Faswan samting we i pulum wan man blong mekem fasin ya, hemia bigfala lav we hem i gat long God, mo tingting blong wantem folem fasin blong God we hem i gat sore mo i stap givim presen oltaem.​—Matiu 5:​44, 45; Jemes 1:17.

Aposol Jon i makem gud fasin ya we i mas pulum yumi blong givim presen, taem hem i se: “?Sipos yu gat plante samting, mo yu luk wan Kristin brata no sista blong yu we i sot long sam samting, be yu no givhan long hem, olsem wanem yu save talem se yu yu lavem God?” (1 Jon 3:17) Ansa blong kwestin ya i klia. Sipos man i lavem God, lav ya bambae i pulum hem blong givim presen long ol puaman. God i gat gladhat blong givim presen long ol narafala, mo hem i glad long ol man we oli folem fasin ya blong hem, i givim blesing long olgeta. (Ol Proveb 22:9; 2 Korin 9:​6-11) ?I gat sam man tede we oli soem se oli gat gladhat blong givim presen? Tingbaot samting we i hapen i no longtaem i pas, long wan kongregesen blong ol Witnes blong Jeova.

Haos blong wan olfala Kristin woman i brobrok, mo i nidim we samfala oli fiksimap. Woman ya i stap hem wan, mo hem i no gat famle we oli save givhan long hem. Blong plante yia, hem i letem haos blong hem blong ol Kristin oli mekem miting blong olgeta long hem. Mo hem i stap tekem ol narafala oli kam kakae long haos blong hem. (Ol Wok 16:​14, 15, 40) Ale, samfala long kongregesen oli luksave trabol blong hem, mo oli mekem plan blong halpem hem. Samfala oli givim mane, samfala oli glad blong wok. Ale, oli wok evri wiken gogo oli putum wan niufala ruf long haos blong hem, oli wokem wan niufala rum blong swim, oli pentem ol rum we  oli stap antap long faswan stori blong haos ya, mo oli wokem ol niufala kabod long kijin. Wok ya i no jes givim samting we woman ya i nidim, be i mekem se olgeta long kongregesen oli joengud moa. Mo ol man raonabaot tu oli sapraes long gudfala wok ya we i soemaot trufala Kristin fasin blong givim presen.

I gat plante samting we yumi wanwan i save mekem blong halpem ol narafala. ?Maet yu save spenem taem blong givhan long wan boe no gel we i no gat papa blong hem? ?Maet yu save go pem sam samting long stoa blong givhan long wan olfala widowoman, no somap wan klos blong hem? ?Maet yu save kukum wan kakae blong wan man we i no gat mane, no givhan long hem blong pem wan samting? I no min se yumi mas rij man blong halpem narafala. Aposol Pol i raetem se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.” (2 Korin 8:12) ?Be olsem wanem? ?Fasin ya we yu wan yu givim samting i go stret long narafala, hemia nomo fasin blong givim presen we God i glad long hem? No, i gat narafala rod tu.

?Olsem Wanem Sipos Plante Man Oli Joen Wanples Blong Halpem Narafala?

Sam samtaem, samting we yumi wan i givim, i no naf blong halpem ol narafala. Jisas mo ol aposol blong hem oli holem wan basket, nao evriwan oli save sakem mane i go long basket ya blong halpem ol puaman. Mo tu, taem ol man we oli prij long olgeta oli givim presen mane long kaen fasin, oli glad blong akseptem. (Jon 12:​6; 13:29) Folem fasin ya blong Jisas mo ol aposol, ol kongregesen long faswan handred yia oli sakem kleksin taem i gat nid, mo sam samtaem oli joen blong mekem wok blong givhan long narafala olsem wan grup.​—Ol Wok 2:​44, 45; 6:​1-3; 1 Timoti 5:​9, 10.

Wan taem we oli mekem samting ya, hemia klosap long yia 55 K.T. * Ol man long ol kongregesen blong Judia oli sot long plante samting. Maet hemia from we, jes bifo long samting ya, olgeta man long wol oli gat hadtaem blong kasem kakae. (Ol Wok 11:​27-30) Aposol Pol, we oltaem i tingbaot ol puaman, i askem long ol kongregesen go kasem Masedonia, sipos oli save halpem ol kongregesen long Judia. Hem wan i mekem plan se olgeta we oli glad blong givim presen mane, oli saksakem mane wanples, nao hem i putumap sam man long kongregesen blong oli seraot ol mane ya i go long olgeta we oli nidim. (1 Korin 16:​1-4; Galesia 2:10) Hem mo ol narafala we oli mekem wok ya, oli no kasem pei nating from wok blong olgeta.​—2 Korin 8:​20, 21.

Tede tu, ol Witnes blong Jeova oli rere oltaem blong halpem olgeta we oli kasem trabol taem wan disasta i kamaot. Long hot taem blong yia 2001, long taon blong Houston, Texas, Yunaeted Stet, bigfala ren i mekem wota i ron gogo i kavremap plante ples. I gat 723 haos blong ol Witnes we oli brok, plante oli brobrok nogud. Wantaem nomo, ol Witnes oli putumap wan komiti blong ol Kristin elda blong oli mekem plan blong givhan long olgeta we oli trabol. Oli lukluk nid blong ol wanwan man, mo oli seraot ol presen mane blong givhan long ol Witnes blong pem ol samting we oli nidim mo blong mekem gud haos blong olgeta bakegen. Plante Witnes long ol kongregesen raonabaot oli glad blong wok we oli no kasem pei from. Wan Witnes woman we i gat bigfala tangkiu from help we hem i kasem, i mekem wan gudfala samting.  Taem insurens i givim mane long hem from haos blong hem we i brobrok, wantaem nomo hem i givim mane ya i go olsem presen blong halpem ol narafala we oli gat nid.

Be, long saed blong ol grup we oli wok blong halpem ol puaman, yumi mas waes mo skelemgud, from we i gat plante grup we oli stap asaskem mane long ol man. Sam grup oli yusum bigfala mane blong pem ol man we oli lukaot long ol grup ya, mo blong mekem fanresing, nao i gat smol mane nomo i stap blong rili givhan long ol man we oli trabol. Ol Proveb 14:15 i talem se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.” Taswe, i waes blong skelem gud olgeta samting fastaem.

Beswan Fasin Blong Givim Presen

I gat wan fasin blong givim presen we i moa impoten i bitim we yumi givim mane long wan grup we i wok blong halpem ol puaman. Jisas i tokbaot impoten fasin ya taem wan yangfala haeman we i rij i askem long hem wanem we hem i mas mekem blong kasem laef we i no save finis. Jisas i talem long hem se: “Yu go, yu salemaot olgeta samting blong yu, yu tekem mane blong hem, yu go givim long ol puaman, nao bambae yu yu gat plante samting blong yu long heven. Mo yu kam, yu biaen long mi, yu man blong mi.” (Matiu 19:​16-22) Makem gud we Jisas i no talem nomo se, ‘Givim ol samting blong yu long ol puaman, nao bambae yu kasem laef.’ Nogat. Hem i go moa i se: “Yu kam, yu biaen long mi, yu man blong mi.” Taswe, nating se i gud mo i halpem narafala taem yumi givim presen mane, be wan disaepol blong Kraes i mas mekem moa.

Bigfala tingting blong Jisas i blong halpem ol man long saed blong spirit. Jes bifo we Jisas i ded, hem i talem long Paelat se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok.” (Jon 18:​37, Nyutesteman wetem Ol Sam long Bislama) I tru se Jisas i mekem bigfala wok blong halpem ol puaman, hilim ol sikman, mo givim kakae long ol man we oli hanggri. Be faswan wok blong Jisas i blong tijim ol disaepol blong hem blong oli save prij. (Matiu 10:​7, 8) Yes, long ol laswan advaes we hem i givim long olgeta, hem i talem se: “Yufala i mas go long ol man long olgeta ples long wol, blong pulum olgeta oli kam man blong mi.”​—Matiu 28:​19, 20.

I tru, wok blong prij bambae i no stretem ol trabol long wol. Be taem yumi talemaot gud nius blong Kingdom blong God long olgeta man, yumi leftemap nem blong God. Hemia from we God i wantem se yumi prij, mo wok ya i openem rod blong ol man we oli harem tok blong God, blong oli kasem ol blesing we oli no save finis samtaem. (Jon 17:3; 1 Timoti 2:​3, 4) I gud we yu lesin long ol Witnes blong Jeova nekis taem oli kam long haos blong yu. Oli stap karem wan presen long saed blong spirit i kam long yu. Mo oli save se hemia nao beswan presen we oli save givim long yu.

[Futnot]

[Tok blong pija long pej 6]

I gat plante rod blong soem se yumi tingbaot narafala

[Tok blong pija long pej 7]

Taem yumi talemaot gud nius long ol narafala, yumi mekem God i glad mo yumi openem rod blong ol man oli kasem ol blesing we oli no save finis