Lanem Fasin Blong Haremgud Long Samting We Yu Gat

Aposol Pol i leftemap tingting blong ol Kristin long Filipae taem hem i raetem wan leta i go long olgeta i se: “Mi mi lanem finis, se long wanem rod we mi stap long hem, be mi save stap gud nomo. . . . Nao long wanem rod mi pas long hem, be mi stap harem gud. Sipos mi fulap gud, no mi hanggri, sipos mi gat plante samting, no mi trabol, be nating.”​—Filipae 4:​11, 12.

?Wanem rod nao we Pol i folem blong haremgud long samting we hem i gat? From we laef blong yumi tede i sas tumas mo ekonomi i stap jenis oltaem, ating i gud we ol trufala Kristin tu oli lanem olsem wanem blong haremgud long samting we oli gat, nao oli save gohed blong mekem wok blong God fastaem.

LONG stat blong leta blong hem, Pol i tokbaot laef we hem i gat bifo we hem i kam wan Kristin i se: “Sipos i gat man we i ting se hem i save putum tingting blong hem long ol samting blong bodi blong hem, mi bambae mi save winim hem. Mi mi wan laen blong Isrel we mi kamaot long laen blong Benjamin. Mama mo papa blong mi, tufala i laen blong Isrel, mo from samting ya, mi mi laen blong Isrel stret. Taem mi mi bon, long namba eit dei blong mi, olgeta oli mekem sakomsaes long mi. Mo long saed blong Loa blong mifala, mi mi wan Farisi. Long saed blong skul blong mifala, mi mi strong long bilif blong mifala, nao mi stap mekem i nogud tumas long ol man blong jos. Mo long saed blong folem Loa ya, i no gat man nating we i gat poen agens long mi.” (Filipae 3:​4-6) From we Pol i wan man Jiu we i strong long bilif blong hem, ol jif pris long Jerusalem oli givim spesel wok long hem mo oli sapotem hem. Yes, olgeta samting ya oli save mekem we Pol i gat paoa mo gudnem long medel blong ol man Jiu​—hem i save kam wan bigman long politik, long skul, mo i save kasem plante mane tu.​—Ol Wok 26:​10, 12.

Be taem Pol i kam wan Kristin we i wok strong blong mekem wok blong God, laef blong hem i jenis bigwan. Blong sapotem gud nius, hem i rere blong lego wok blong hem wetem olgeta samting we fastaem oli impoten long lukluk blong ol man Jiu. (Filipae 3:​7, 8) ?Olsem wanem bambae hem i lukaot long hem wan long saed blong bodi? ?Bambae hem i kasem wan pei olsem man blong skul? ?Hu bambae i lukaot long ol nid blong hem?

Pol i mekem minista wok blong hem we i no kasem pei from. Nao from we Pol i no wantem mekem trabol long ol man we hem i prij long olgeta, hem i joen wetem Akwila mo Prisila long Korin long wok ya blong somap ol haos tapolen. Mo hem i mekem sam narafala wok tu blong sapotem hem wan. (Ol Wok 18:​1-3; 1 Tesalonaeka 2:9; 2 Tesalonaeka 3:​8-10) Pol i mekem tri bigfala misinari trep mo tu, hem i wokbaot i go visitim ol kongregesen we oli gat nid. Pol i bisi fulwan long wok blong God, taswe hem i no gat plante samting long saed blong bodi. Plante taem, ol brata oli lukaot long ol nid blong hem. Be samtaem tu, folem ol traem blong laef, Pol i no gat wan samting nating. (2 Korin 11:27; Filipae 4:​15-18)  Nating se i olsem, Pol i neva komplen from we i no gat plante samting mo hem i neva wantem olting we i blong narafala man. Hem i rere mo i glad tu blong wokhad mo mekem i gud long ol narafala Kristin. Pol ya nao i bin talem bakegen ol tok ya blong Jisas we yumi savegud se: “Man we i stap givim presen i go, hem i save harem gud moa, i winim man we i stap kasem presen blong hem.” !Pol i givim wan nambawan eksampol long yumi evriwan!​—Ol Wok 20:​33-35.

Haremgud Long Samting We Yumi Gat—?I Minim Wanem?

Wan bigfala samting we i givhan long Pol blong stap glad, hemia fasin blong hem blong haremgud long samting we hem i gat. ?Be fasin ya blong haremgud long samting we yumi gat, i rili minim wanem? Blong talem klia, i min se man i glad long ol smol samting we hem i gat blong laef. Long saed blong fasin ya, Pol i talem long Timoti, wan fren blong hem we hem tu i mekem wok blong prij, i se: “Yes i tru, fasin blong stap fasgud long God i wan rod blong kasem plante samting. Be yumi mas harem gud long wanem samting we yumi gat. From we taem yumi kam long wol, yumi no karem wan samting i kam, mo bambae yumi no save karem wan samting i aot long wol tu. Taswe sipos yumi gat kakae mo klos blong yumi, hemia i naf, yumi save harem gud wetem ol samting ya.”​—1 Timoti 6:​6-8, NW.

Makemgud we Pol i joenem fasin blong haremgud long samting we hem i gat, wetem fasin blong stap fasgud long God. Hem i luksave we trufala glad i kamaot from fasin blong fasgud long God. ?Hemia i minim wanem? I min se yumi putum wok blong God long fas ples long laef blong yumi, bifo long ol samting blong bodi no ol sas samting. “Kakae mo klos,” tufala samting ya i jes wan rod we Pol i yusum blong hem i save gohed blong fasgud long God. Taswe Pol luksave se, wan man i save stap glad long samting we hem i gat sipos hem i trastem Jeova, nomata wanem i hapen long laef blong hem.

Tede, plante man oli gat fulap wari mo oli no hapi from we oli no save no maet oli no wantem save fasin ya blong harem gud long samting we oli gat. Oli no wantem wokem fasin ya be oli putum tras blong olgeta long mane nomo mo ol samting we mane i  save pem. Ol kampani we oli wokem ol tok mo ol pija blong pulum man blong pem ol samting, wetem ol niuspepa mo ol program long televisin mo radio, oli talem long ol man se bambae oli hapi moa sipos oli gat ol niufala sas samting we oli flas​—mo ol kampani ya oli mekem se ol man oli wantem gat ol samting ya naoia nomo. Taswe plante man oli foldaon long trap ya blong ronem mane mo ol sas samting. Be oli no faenem glad mo oli no haremgud from. Defren olgeta, “ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta. Nao fasin ya blong wantem evri samting, hem i save mekem olgeta oli foldaon we laef blong olgeta i kam nogud olgeta.”​—1 Timoti 6:​9, 10.

Sam Man We Oli Lanem Blong Haremgud Long Samting We Oli Gat

?Long laef blong yumi tede, yumi save fasgud long God, haremgud long samting we yumi gat, mo long semtaem yumi glad? Yes. Plante milian man tede oli stap mekem samting ya. Oli lanem olsem wanem blong stap glad wetem ol samting we oli gat.  ?Hu ya ol man ya? Hemia ol Witnes blong Jeova we oli bin givim laef blong olgeta i go long God. Oli mekem wok blong God mo oli tijim stamba tingting blong Hem long ol man long evri ples.

Tingbaot olgeta ya we oli volontia mo oli kasem trening long wok blong misinari nao oli go talemaot gud nius blong Kingdom long ol narafala kantri. (Matiu 24:14) Plante taem, laef long ol kantri ya i no isi olsem laef we ol misinari oli gat long prapa kantri blong olgeta. Eksampol, taem sam misinari oli go long wan kantri blong Esia long stat blong 1947, oli kasem wan ples we wo i bin spolemgud, mo i no gat plante haos we oli gat lektrik. Long plante kantri, ol misinari oli no gat wan mesin blong wasem klos, ale oli mas go long reva mo oli wasem ol wanwan klos blong olgeta long wan pis wud no wan bigfala ston. Be ol misinari oli go long ol ples ya from we oli wantem tijim ol man long ol trutok blong Baebol, taswe oli lan blong laef folem fasin blong kantri ya, mo oli stap bisi long wok blong prij.

Sam narafala Witnes oli prij fultaem no oli muv i go long sam ples we trutok blong Baebol i no kasem ol man yet. Adulfo i wok bitim 50 yia finis olsem fultaem paenia, long plante defren ples blong Meksiko. Hem i talem se: “Folem eksampol blong aposol Pol, mi wetem waef blong mi, mitufala i lanem blong laef folem fasin blong ol manples. Eksampol, i gat wan kongregesen we mifala i visitim, we i stap longwe long ol taon mo ol maket. Long taem blong kakae, ol brata oli glad nomo blong kakae wan flat bred wetem smol gris antap long hem mo sol, mo wan kap kofe. Evri dei, ol brata ya oli kakae tri flat bred ya​—hemia nomo samting we oli gat. Taswe, mitufala i mas lanem blong laef olsem ol brata ya. Mi bin gat plante gudfala ekspiriens olsem hemia long ol 54 yia we mi bin wok fultaem blong Jeova.”

Florentino i rimemba olsem wanem hem wetem famle blong hem, oli mas lan blong laef wetem smol samting nomo. Hem i tokbaot laef blong hem taem hem i yangfala yet i se: “Papa blong mi i gat wan bisnes we i wokgud. Hem i gat fulap graon. Mi rimemba yet bigfala kaonta we i stap long stoa blong mifala. Kaonta ya i gat wan dro we dip blong hem i olsem 50 sentimita mo longfala blong hem i olsem 20 sentimita, mo i gat fo haf blong hem. Mane we mifala i kasem long stoa long wan dei, mifala i putum long dro ya nao. Ale long en blong dei, dro ya i fulapgud long ol pepa mane mo ol selen.

“Be wantaem nomo, mifala i kasem bigfala trabol long saed blong mane. Bifo, mifala i gat plante samting, be naoia mifala i no gat wan samting i stap. Mifala i lusum evri samting blong mifala, haos nomo i stap. Antap long samting ya, wan brata blong mi i gat wan aksiden we i mekem se hem i no moa save wokbaot. Evri samting i jenis bigwan. Blong sam taem, mi wok olsem man blong salem frut mo mit. Mo tu mi wok long garen blong pikimap koten, grep, mo gras ya alfalfa, mo tu mi wotarem ol garen. Sam man oli singaot mi se man blong mekem evri kaen wok. Plante taem, mama blong mi i leftemap tingting blong mifala taem hem i talem se mifala i gat trutok, mo hemia wan sas samting long saed blong spirit we plante man oli no gat. Yes, mi lanem blong laef wetem plante samting, mo mi lanem blong laef wetem smol samting nomo, mo samtaem mi no gat samting nating. Naoia i mekem 25 yia finis we mi stap mekem wok blong Jeova olsem fultaem paenia. Mi save talem se long evri dei we i pas, mi glad blong luk se mi jusum beswan fasin blong laef​—hemia blong mekem wok blong Jeova fultaem.”

Baebol i talem klia long yumi we “fasin blong wol ya i stap jenis.” Taswe, hem i givim woning ya tu long yumi se: “Olgeta we oli harem gud, oli mas kam olsem olgeta we oli no harem gud. Olgeta we oli pem sam samting, oli mas kam olsem olgeta we oli no gat wan samting. Mo olgeta we oli stap yusum wol, oli mas kam olsem olgeta we oli no stap yusum tumas wol ya.”​—1 Korin 7:​29-31, NW.

Taswe, naoia i stret taem blong yu luklukgud long fasin blong laef blong yu. Sipos yu yu pua, lukaotgud se yu no kam sore tumas from, i nogud yu kam kros no yu kam wan man we i wantem tumas blong kasem samting we narafala i gat. Mo nomata hamas samting we yu yu gat long saed blong bodi, be bambae yu waes sipos yu putum olgeta samting ya oli stap long stret ples blong olgeta, mo oli no kam olsem masta blong yu. Folem advaes blong aposol Pol se, ‘yu no mas putum tingting blong yu long mane blong yu, from we mane i no wan samting blong stap longtaem. Yu mas putum tingting blong yu i stap long God nomo, we hem i stap givim plante samting long yumi, blong yumi harem gud long hem.’ Sipos yu mekem olsem, nao yu save talem we yu rili lanem fasin blong haremgud long samting we yu gat.​—1 Timoti 6:​17-19.

[Tok blong pija long pej 9]

Pol i wok blong kasem samting we hem i nidim nao hem i no mekem trabol long ol narafala

[Tok blong pija long pej 10]

Plante taosen man oli faenem glad from we oli ‘fasgud long God mo oli harem gud long samting we oli gat’