‘Solomon i No Flas Olsem Ol Flaoa Ya’

OL FLAOA we oli gru olbaot long bus, olsem we yu luk long ples ya, ol man long saot Afrika nao oli save luk oltaem nomo taem oli wokbaot long rod. Ol flaoa ya oli kolem cosmos mo oli kam long ol eria blong Amerika we i hot. Ol flaoa ya we oli naes we i naes i mekem yumi tingbaot wan lesen we Jisas i tijim long ol man long taem blong hem we yumi save lanem samting from. Plante man we oli stap lesin long Jisas, oli no gat plante samting mo oli stap wari long ol samting long saed blong bodi, olsem kakae mo klos.

Jisas i askem se: “?From wanem yufala i stap tingting tumas from klos blong yufala? Yufala i traem tingbaot ol flaoa ya we oli stap gru olbaot. Olgeta oli no wok, mo oli no somap klos blong olgeta. Mi mi talem long yufala, se King Solomon ya bifo we hem i rij we i rij, be klos blong hem i no flas olsem ol flaoa ya.”​—Matiu 6:​28, 29.

Plante man oli talemaot tingting blong olgeta long saed blong wanem flaoa ya we Jisas i stap tokbaot. Be, Jisas i yusum flaoa ya olsem pija blong evri kaen flaoa we man i stap luk evri dei taem hem i se: “Ol flaoa ya i blong wan dei nomo, tumora bambae ol man oli bonem long faea, be God i stap flasem gud olgeta. ?Yufala i ting se bambae hem i no save givim klos long yufala? !Man, bilif blong yufala i smol tumas!”​—Matiu 6:30.

Nating se ol flaoa ya we oli kolem cosmos oli no wan flaoa we ol man Isrel oli save gud long hem, be oli laenap gud wetem lesen ya we Jisas i stap tijim. Nomata we yumi lukluk flaoa ya longwe no klosap, be hem i naes tumas. Olgeta we oli stap tekem foto mo olgeta we stap dro ol pija oli laekem tumas blong tekem foto mo dro pija blong ol flaoa ya. Taswe i tru nomo se Jisas i no bitim mak taem hem i se “King Solomon ya bifo we i rij we i rij, be klos blong hem i no flas olsem ol flaoa ya.”

?Tede yumi save lanem wanem from lesen ya we Jisas i tijim? Olgeta man we oli wosip long Jeova oli save sua se hem bambae i givhan long olgeta blong kasem ol samting we oli nidim, nating se i gat hadtaem long laef. Jisas i eksplenem se: “Yufala i mas gohed oltaem blong lukaot kingdom blong [God] nao bambae hem i save givim olgeta narafala samting [olsem kakae mo klos] ya tu long yufala.” (Luk 12:​31, NW ) Yes yumi save karem ol gudfala samting taem yumi gohed oltaem blong lukaot Kingdom blong God. ?Be yu save wanem ya Kingdom blong God mo wanem we bambae i mekem blong olgeta man long wol? Ol Witnes blong Jeova bambae oli glad blong givhan long yu blong faenem ol ansa we i stap long Baebol.