!Stanap Nomo Mo Luk We Jeova i Mekem Yumi Win!

“Yumi stap stanap rere nomo, yumi wet. Bambae yumi luk we Hae God i mekem yumi win.”​—2 KRONIKEL 20:17.

1, 2. ?From wanem faet we ‘Gog blong kantri ya Magog’ i mekem i no longtaem, bambae i mekem bigfala trabol moa i bitim wok blong ol teroris?

 SAM man oli talem se ol teroris oli man we oli faet agensem olgeta man long wol stret, mo oli spolem gudfala laef we wanwan man i save gat. I klia se trabol we ol teroris oli mekem i no wan smol samting. Be i gat wan narafala faet we bambae i mekem bigfala trabol moa i bitim hemia. Mo faet ya, ol man blong wol oli no tingbaot, mo oli ting nating nomo long hem. ?Wanem faet ya?

² Hemia faet blong ‘Gog blong kantri ya Magog,’ we Baebol i tokbaot long Esikel japta 38. ?I tru se faet ya bambae i mekem bigfala trabol moa i bitim trabol we ol teroris oli stap mekem long fulwol? ?Yumi bitim mak taem yumi talem olsem? Nogat, from we faet ya we Gog bambae i mekem, hem i no jes agensem ol gavman blong man nomo. !Faet ya i agensem gavman blong God long heven! Be God i no olsem ol man we oli no naf blong blokem fulwan ol enemi we oli kam agensem olgeta. Tru ya, God i wokem olgeta samting mo hem i gat paoa blong winim faet blong rabis king ya Gog.

 Wan Faet Agensem Gavman Blong God

3. ?Stat long 1914 i kam, ol king blong wol ya oli kasem toktok blong mekem wanem, mo oli obei long tok ya no nogat?

³ Stat long 1914, taem Kingdom blong God i stanap long heven, i gat faet i stap gohed bitwin long King we God i putumap mo rabis wol ya blong Setan. Long taem ya, ol rula blong wol oli kasem toktok se oli mas stap daon aninit long King ya we God i jusum. Be oli no wantem mekem olsem. Baebol i talemaot samting ya finis i se: “Ol king blong olgeta oli girap, oli putum wan tok we i agens long Hae God, mo i agens long king ya tu we hem i makemaot hem i putumap hem blong mekem wok blong hem. Oli stap talem se, ‘Yumi brekemaot ol rop ya we tufala i stap fasem yumi long hem. Yumi kamaot long han blong tufala ya blong yumi fri.’ ” (Ol Sam 2:​1-3) Taem Gog blong Magog i girap blong faet, ol king ya bambae oli soemaot fulwan se oli agensem rul blong Kingdom.

4, 5. ?Olsem wanem ol man long wol ya oli save faet agensem gavman blong God long heven we oli no save luk?

⁴ Maet yumi stap tingting se, olsem wanem nao ol man long wol ya oli save faet agensem wan gavman long heven we oli no save luk. Baebol i soemaot se long gavman ya i gat “wan handred foti fo taosen man ya we God i pemaot olgeta, i tekemaot olgeta long wol,” wetem “Smol Sipsip” ya Jisas Kraes. (Revelesen 14:​1, 3; Jon 1:29) From we niufala gavman ya i stap long heven, Baebol i tokbaot hem olsem “niufala heven” no skae, mo i tokbaot ol man we oli stap aninit long gavman ya se oli olsem “niufala wol.” (Aesea 65:17; 2 Pita 3:13) Bighaf blong ol 144,000 man ya we bambae oli rul wetem Kraes oli finisim laef blong olgeta long wol ya finis, mo oli stap tru long God gogo kasem ded. Long rod ya, oli pruvum se oli stretgud blong tekem niufala wok blong olgeta long heven.

⁵ Be wan smol haf blong ol 144,000 man ya oli stap yet long wol. Bitim 15,000,000 man oli kam  long Lodsapa long yia 2002. Long olgeta ya, i gat 8,760 man nomo we oli soemaot se oli gat hop blong stap olsem man we God i jusum blong go long heven. Sipos wan man i mekem faet agensem smol grup ya blong ol tabu man we oli blong go long Kingdom, man ya i rili stap faet agensem Kingdom blong God stret.​—Revelesen 12:17.

King We i Go Blong Winim Faet Bakegen

6. ?Wanem tingting blong Jeova mo Jisas taem ol man oli agensem ol man blong God?

⁶ Baebol i talemaot finis, wanem samting we Jeova bambae i mekem taem ol man oli girap agensem Kingdom we hem i stanemap: “Hae God, hem i King. Hem i stap sidaon long heven, i stap laf. Hem i stap laf gud long ol rabis plan blong olgeta. Mo hem i kros, i tok strong long olgeta, i talem se, ‘!Yufala i lukaot, a!’ Mo from we hem i kros olsem, olgeta oli fraet, oli seksek. Hem i talem se, ‘Mi mi putumap king blong mi finis long Saeon, tabu hil ya blong mi.’ ” (Ol Sam 2:​4-6) Taem i kam nao blong Kraes i letem Jeova i lidim hem blong ‘winim faet bakegen.’ (Revelesen 6:2) ?Jeova bambae i tingting wanem taem ol nesen oli agensem ol man blong hem long laswan faet? Taem ol nesen oli mekem olsem, tingting blong Jeova hemia se oli stap agensem hem stret mo oli agensem King ya tu we hem i putumap. Jeova i talem se: “Taem wan man i kilim yufala, i olsem we man ya i kilim ae blong mi stret.” (Sekaraea 2:8) Mo Jisas i talem klia se wanem samting we man i mekem no i no mekem long ol tabu brata blong hem, i olsem we oli mekem no oli no mekem long hem stret.​—Matiu 25:​40, 45.

7. ?From wanem Gog i kros long bigfala kampani ya we Revelesen 7:9 i tokbaot?

⁷ Gog i kros tu long olgeta man we oli stap long saed blong ol tabu man. Olgeta man ya oli gat hop blong stap long “niufala wol,” mo oli wan ‘bigfala kampani’ we oli “kamaot long olgeta kala, mo long olgeta kantri, mo long olgeta laen, mo long olgeta lanwis.” (Revelesen 7:9) Baebol i talem se oli “werem waet klos,” mo oli “stap stanap long fran blong bigfala jea blong king, mo long fes blong smol Sipsip ya.” Hemia i min se God mo Jisas Kraes, tufala tugeta i agri long olgeta. Oli stap “holem lif blong pamtri long han blong olgeta,” mo oli stap singaot blong leftemap Jeova we i gat raet blong stap olsem Hae King blong heven mo wol. Yes, Jeova i soemaot rul blong hem tru long rul blong King blong hem, Jisas Kraes, hemia “smol sipsip blong God.”​—Jon 1:​29, 36.

8. ?Taem Gog i girap blong faet, bambae Jisas Kraes i mekem wanem, mo wanem bambae i kamaot from?

⁸ Taem Gog i girap blong mekem faet, King ya we God i putumap, hem tu bambae i girap. Long taem ya nao faet blong Amagedon bambae i stat. (Revelesen 16:​14, 16) Ol man we oli no bin luksave se Jeova nomo i gat raet blong rul, bambae oli go lus blong olwe. Be ol man we oli bin kasem trabol from we oli stap tru long Kingdom blong God, bambae oli harem gud blong olwe. Aposol Pol i tokbaot samting ya i se: “Ol trabol ya we yufala i stap kasem, oli stap soemaot we fasin blong God blong jajem man i stret nomo. Naoia ol man oli mekem yufala i stap harem nogud long bodi blong yufala from we God i King blong yufala, be samting ya i blong soemaot we yufala i naf blong God i King blong yufala. Be long olgeta ya we oli stap mekem yufala i harem nogud, i stret nomo blong God i givimbak fasin ya long olgeta. Mo i stret nomo blong God i givim spel long yufala, we naoia yufala  i stap harem nogud, mo long mitrifala tu. Hem bambae i mekem olsem long taem ya we Jisas, Masta blong yumi, bambae i aot long heven, i kamtru long yumi, wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.”​—2 Tesalonaeka 1:​5-8.

9, 10. (a) ?Olsem wanem Jeova i mekem we Juda i winim faet agensem wan bigbigfala ami? (b) ?Ol Kristin tede oli mas gohed blong mekem wanem?

⁹ Long taem blong bigfala trabol we bambae i finis wetem faet blong Amagedon, Jisas Kraes bambae i faet blong finisim olkaen rabis fasin. Be ol man blong Kraes bambae oli no nid blong faet, sem mak olsem plante taosen yia bifo, taem ol man long laen blong Juda oli no nid blong faet. Faet ya i blong Jeova, mo hem nomo i mekem oli win. Stori we i stap long Baebol i talem se: “Nao taem oli stat blong singsing, Hae God i mekem ol enemi blong olgeta oli fraet tumas, nao oli lusum hed. Nao ol soldia blong Amon wetem ol soldia blong Moab oli girap, oli go mekem faet long ol soldia blong Edom we oli kilim olgeta evriwan i ded, nao ol soldia blong tufala kampani ya oli stap faet long olgeta bakegen we oli stap kilkilim olgeta. Nao taem ol soldia ya blong Juda oli go kasem wan wajhaos we i stap long draeples ya, mo oli lukluk i godaon long ol enemi ya blong olgeta, oli luk we olgeta evriwan oli ded finis, oli stap slip olbaot long graon, we i no gat wan long olgeta i ronwe.”​—2 Kronikel 20:​22-24.

¹⁰ Samting ya i kamaot stret olsem we Jeova i bin talem se: ‘Bambae yufala i no go mekem faet long olgeta.’ (2 Kronikel 20:17) Hemia wan gudfala eksampol we ol Kristin oli save folem long taem ya we Jisas Kraes bambae i kam blong ‘winim faet bakegen.’ Be bifo long taem ya, ol Kristin oli gohed blong faet agensem ol samting nogud. Oli no faet wetem ol prapa tul blong faet be oli faet wetem ol tul long saed blong spirit. Ale, from we oli ‘holemstrong ol stret fasin, oli stap winim ol rabis fasin.’​—Rom 6:13; 12:​17-21; 13:12; 2 Korin 10:​3-5.

?Hu Bambae i Lidim Faet Blong Gog?

11. (a) ?Gog bambae i yusum hu blong mekem faet blong hem? (b) ?Yumi mas mekem wanem blong stap wekap long saed blong spirit?

¹¹ Gog blong Magog hem i pija blong Devel Setan stat long 1914, taem olgeta long heven oli sakemaot hem i kamdaon long wol. From we hem i wan spirit man, hem i no save mekem faet ya hem wan agensem ol man blong God long wol. Taswe bambae hem i yusum sam grup blong man long wol ya blong mekem samting we hem i wantem. ?Hu ya ol grup blong man ya? Baebol i no givim klia save long saed ya. Be, hem i givim sam smosmol save we oli halpem yumi blong luksave hu ol man ya we bambae oli mekem samting ya. Taem ol samting long wol ya oli stap kamtru folem ol profet tok blong Baebol, bambae yumi lukluk klia moa long saed ya. Ol man blong Jeova oli lukaot blong no talemaot mining blong ol samting folem  prapa tingting blong olgeta nomo. Oli stap wekap long saed blong spirit nao oli save wajem ol samting we oli hapen insaed long politik mo insaed long ol skul tu, we i mekem ol profet tok blong Baebol oli kamtru.

12, 13. ?Profet Daniel i tokbaot wanem laswan faet we bambae i agensem ol man blong God?

¹² Profet Daniel i givim moa save long saed blong laswan faet ya agensem ol man blong God. Hem i raetem se: “Bambae hem [king blong not] i kros tumas, nao hem i faet strong, i kilim plante man i ded. Mo bambae king ya i putumap bigfala haos tapolen blong hem i stap long medel blong solwota mo hil ya we haos blong God i stap long hem.”​—Daniel 11:​44, 45.

¹³ Long taem we ol man oli raetem Baebol, “solwota” ya hemia Bigfala Solwota we tede oli kolem Mediterenian Si. Mo “hil ya” hemia Saeon, we Jeova i tokbaot se: “Mi mi putumap king blong mi finis long Saeon, tabu hil ya blong mi.” (Ol Sam 2:6; Josua 1:4) Ples ya we i stap “long medel blong solwota mo hil ya,” hem i gat wan mining long saed blong spirit. Ples ya hem i pija blong olgeta bigbigfala wok long saed blong spirit we ol tabu Kristin oli stap mekem. Olgeta ya oli aot long solwota ya, we i pija blong ol man blong wol we oli stap longwe tumas long God. Nao oli stap lukluk i go long hop we oli gat blong rul wetem Jisas Kraes long Kingdom blong heven. Taem king blong not bambae i statem rabis faet blong hem olsem profet tok blong Daniel i tokbaot, i klia se mak blong hem i blong spolem ol tabu man ya blong God, wetem ol fren blong olgeta, hemia bigfala kampani.​—Aesea 57:20; Hibrus 12:22; Revelesen 14:1.

?Ol Man Blong God Bambae Oli Mekem Wanem?

14. ?Taem faet i stat, wanem trifala samting we ol man blong God bambae oli mekem?

¹⁴ ?Ol man blong God oli mas mekem wanem taem faet ya i kamaot? Bakegen, i gud blong tingbaot eksampol we nesen blong God long taem blong Jehosafat i soem long yumi. Yumi makem se God i givim oda long olgeta blong mekem trifala samting ya: (1) stanap rere, (2) wet, mo (3) luk we Jeova i mekem yumi win. ?Olsem wanem ol man blong God tede, oli save mekem i sem mak?​—2 Kronikel 20:17.

15. ?Taem ol man blong Jeova oli stanap rere, hemia i minim wanem?

¹⁵ Stanap rere: Ol man blong God bambae oli holem strong long disisen blong olgeta blong sapotem Kingdom blong God fulwan, bambae oli no hafhaf. Bambae oli gohed blong holem disisen blong olgeta blong no joen long wol. Bambae oli ‘stanap strong oli no kam slak’ long wok blong Jeova, mo bambae oli gohed blong presem Jeova long fes blong ol man from we hem i lavem olgeta oltaem. (1 Korin 15:58; Ol Sam 118:​28, 29) Nomata wanem kaen trabol we man i mekem long olgeta naoia no long fiuja, be bambae oli no save lego disisen ya we oli tekem mo we God i agri long hem fulwan.

16. ?Long wanem fasin nao bambae ol man blong Jeova oli wet?

¹⁶ Wet: Ol man blong Jeova bambae oli no traem sevem olgeta, be bambae oli trastem Jeova fulwan. Jeova nomo i save sevem ol man blong hem long wol ya we i trabol tumas, mo hem i promes blong mekem olsem. (Aesea 43:​10, 11; 54:15; Ol Krae 3:26) Sipos yumi trastem Jeova, i minim tu se yumi trastem rod we hem i yusum plante yia finis long wol ya, blong mekem ol wok blong hem. Long taem we i kam, ol trufala Kristin bambae oli mas trastem ol Kristin brata blong olgeta moa i bitim bifo. Yes, ol Kristin brata ya hemia olgeta we Jeova mo King blong hem, tufala i givim raet long olgeta blong lidim ogenaesesen. Ol brata ya we oli strong long bilif bambae oli lidim ol man blong God. Man we i no wantem letem olgeta oli lidim hem, bambae hem i go lus nomo.​—Matiu 24:​45-47; Hibrus 13:​7, 17.

17. ?From wanem ol trufala man blong God bambae oli luk we Jeova i mekem oli win?

 ¹⁷ Luk we Jeova i mekem yumi win: Olgeta we oli no hafhaf long disisen blong olgeta blong stap olsem wan trufala Kristin mo we oli trastem se Jeova bambae i sevem olgeta, praes we bambae oli kasem hemia se bambae oli win. Gogo kasem laswan aoa bambae oli talemaot se dei blong jajmen blong Jeova i kam, stret olsem we wanwan blong olgeta oli naf blong mekem. Olgeta laef samting oli mas save se Jeova i trufala God mo oli mas save se hem i gat ol trufala man blong hem long wol ya. Bambae i neva gat wan taem bakegen we man i agiu se Jeova i no gat raet blong rul.​—Esikel 33:33; 36:23.

18, 19. (a) ?Olsem wanem singsing long Eksodas japta 15 i soemaot filing blong olgeta we bambae God i sevem olgeta long faet blong Gog? (b) ?Wanem samting we ol man blong God oli mas mekem naoia?

¹⁸ Taem ol man blong God oli go insaed long niufala wol, bambae i olsem we paoa blong olgeta i kam niuwan bakegen. Bambae oli wantem tumas blong singsing from we oli win, olsem we ol man Isrel bifo oli bin mekem taem oli pastru long Red Si. Long niufala wol, olgeta man blong God wanwan mo olsem wan grup, bambae oli tangkiu long Jeova from we hem i bin lukaot gud long olgeta. Bambae oli singaot wetem ol semfala tok ya blong bifo se: “Bambae mi mi sing blong presem Hae God, from we hem i win gud long faet ya, nao nem blong hem i go antap. . . . Hae God, hem i wan strong man blong faet. Nem blong hem, [“Jeova,” NW ]. . . . Long raethan ya blong yu, yu stap brebrekem ol enemi blong yu long ol smosmol pis. Long bigfala paoa ya blong yu, yu stap smasem olgeta we oli girap agens long yu. Mo taem yu yu kros long ol man, yu faerap, yu gohed long olgeta olsem we faea i kakae gras we i drae. . . . Mifala i man blong yu, mo oltaem yu stap lavem mifala, nao yu yu mekem mifala i fri, mo yu stap lidim mifala. Long paoa blong yu, yu stap soemaot rod, blong mifala i go long ples ya we yu yu makemaot se i tabu, i blong yu nomo. . . . Hae God. Yu yu jusumaot hil ya finis we yu yu stap long hem, mo long han blong yu nomo, yu wokem tabu ples blong yu long hem, nao bambae yu tekem mifala i go stap long hil ya blong yu. Yu bambae yu King oltaem nomo, gogo i no save finis.”​—Eksodas 15:​1-19.

¹⁹ Naoia, hop blong laef olwe i klosap moa i bitim bifo. Naoia i taem we ol man blong God oli mas soemaot se oli fasgud long Jeova. !Oli mas mekem tingting blong olgeta i strong moa blong mekem wok blong hem olsem King blong olgeta gogo i no save finis!​—1 Kronikel 29:​11-13.

?Yu Yu Save Eksplenem?

• ?From wanem Gog bambae i faet agensem ol tabu man mo ol narafala sipsip?

• ?Ol man blong God bambae oli mekem wanem blong stanap rere?

• ?I minim wanem se ol man blong God oli wet?

• ?Olsem wanem ol man blong God bambae oli luk we Jeova i mekem oli win?

[Kwestin]

[Tok blong pija long pej 18]

Jeova i mekem Jehosafat mo ol ami blong hem oli win, we oli no nid blong faet

[Tok blong pija long pej 20]

Ol tabu man mo ol narafala sipsip oli wok tugeta blong leftemap hae rul blong Jeova

[Tok blong pija long pej 22]

I no longtaem, bambae ol man blong God oli singsing from we oli win olsem ol man Isrel bifo