Wan Kwestin

?I rong blong kilim i ded wan anamol we yu gat long haos we i sik tumas no i olfala?

Plante man oli intres mo laekem plante defdefren anamol. Sam long ol anamol we yumi gat long haos oli save kam gud fren blong yumi. Wan eksampol, yumi save se ol dog oli save obei fulwan mo soemaot se oli laekem tumas masta blong olgeta. From samting ya, yumi kasem save se ol man tu oli save laekem tumas ol anamol we oli gat long haos, mo i tru moa taem oli stap wetem anamol ya blong plante yia finis.

Be plante anamol we oli stap long haos oli no save stap laef blong longfala taem. Ol dog oli stap laef blong ten no feftin yia nomo, mo i sem mak long ol puskat, i dipen long wanem kaen dog no puskat. Taem wan anamol i kam olfala maet hem i stap safa from we hem i sik mo i kam handikap, samting ya i save mekem olgeta we oli gat ol anamol olsem oli harem nogud, from we oli stap tingbaot ol yia we i pas finis taem ol anamol ya oli yang mo oli strong. ?Taswe yu ting se i stret blong kilim anamol ya i ded blong givhan long hem blong no moa safa?

Wan Kristin bambae i wantem mekem samting we i laenap wetem tingting blong God long saed long ol anamol. Man we i mekem anamol i safa, hem i agensem tingting blong God, from we Tok blong hem i talem se: “Gudfala man, hem i stap lukaot gud long ol anamol blong hem.” (Ol Proveb 12:10) Be, hemia i no minim se tingting we God i gat long saed blong ol anamol i sem mak long tingting we hem i gat long ol man. Taem God i wokem man, hem i soemaot klia nomo se man i defren olgeta long ol anamol. Wan eksampol, hem i putum wan laef we i no save finis olsem hop we ol man i save gat long fiuja. Be neva hem i talemaot hop ya long ol anamol. (Rom 6:23; 2 Pita 2:12) From we hem i Man We i Wokem olgeta samting, hem i gat raet blong makemaot wanem fasin fren i mas stap bitwin man mo ol anamol.

Jenesis 1:28 i talem long yumi olsem wanem long fasin fren ya. God i talem long faswan man mo woman se: “Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.” Mo tu, Ol Sam 8:​6-8 i talem se: “[Yu God] yu putumap hem [man] blong i rul long olgeta samting we yu yu mekem, yu mekem hem i bos long olgeta samting ya. Ol sipsip mo ol buluk mo ol wael anamol, mo ol pijin mo ol fis mo olgeta samting insaed long solwota, be hem i bos long olgeta evriwan.”

God i talemaot klia prapa rod we ol man oli save yusum anamol no kilim ol anamol i ded. Wan eksampol, man i save yusum ol skin blong anamol olsem klos. Mo tu, afta we Bigfala Wota i ron long taem blong Noa, God i letem ol man oli kakae mit blong ol anamol. Hemia blong givim moa samting we bodi i nidim, antap long ol ligim we God i givim long olgeta fastaem, blong oli kakae.​—Jenesis 3:21; 4:4; 9:3.

Hemia i no minim se wan man i gat raet blong kilim ol anamol olbaot, blong pleplei nomo. Long Jenesis 10:9 (NW ), Baebol i tokbaot rabis man ya Nimrod olsem “wan strong man blong ronem anamol blong kilim olgeta.” Be vas ya i talem tu se man ya “i agensem Jeova.”

Taswe, taem wan man i stap bos long ol anamol, hem i no mas bos long ol anamol long wan fasin blong spolem olgeta. Nogat. Hem i mas bos long olgeta long wan fasin we i laenap wetem ol rul long Tok blong God. Samting ya maet i minim se i nogud blong letem anamol ya we yu gat long haos, i stap safa from we hem i kam olfala tumas, no i gat soa long bodi, no wan sik we hem i save ded from. Long ol taem olsem, hem i wok blong wan Kristin nao blong jusum wanem blong mekem. Sipos wetem fasin sore hem i jusum blong no letem anamol ya i stap safa from we hem i luksave se anamol i no gat janis blong kam gud bakegen, maet hem i jus blong kilim anamol ya i ded.