Gilead Skul 60 Yia Blong Trenem Ol Misinari

“MIFALA i stadi dip long Baebol, taswe mifala i kam klosap moa long Jeova mo mifala i lanem plante moa samting long saed blong ogenaesesen blong hem. Samting ya i mekem mifala i rere blong laef long ol kantri we bambae mifala i go prij long olgeta.” Tok ya i kamaot long wan sista we i kasem setifiket blong hem long faswan klas we oli holem long Wajtaoa Baebol Skul blong Gilead. Stat long taem ya we oli stanemap Gilead Skul 60 yia bifo, skul ya i bin sanem plante misinari. Long Maj 8, 2003, oli givim ol setifiket long ol studen blong klas namba 114, long Watchtower Educational Center long Patterson, New York. Ol 6,404 man we oli hivap long bigfala rum ya mo long sam narafala ples tu oli lesingud long program, we i gat ol tok, ol kwestin we oli askem long man, mo sam storian.

Theodore Jaracz, wan memba blong Hed Kampani, hem nao i jeaman. Fastok blong hem i pulum tingting blong man long fasin ya se ol man we oli stap lesin oli kamaot long ol defdefren kantri. Sam oli blong Esia, ol aelan blong Karibin, Sentrol mo Saot Amerika, mo Yurop. Tok blong Brata Jaracz i stanap long 2 Timoti 4:​5, mo hem i makemgud we stamba wok blong wan misinari we i bin go long Gilead, i blong “mekem wok ya blong talemaot gud nius.” Ol misinari oli givim witnes long trutok taem oli tijim Baebol long ol narafala man.

Ol Studen Oli Kasem Ol Laswan Advaes

Brata John Larson, wan memba blong Branj Komiti blong Yunaeted Stet, hem nao i givim faswan tok. Tok blong hem i blong mekem bilif blong olgeta i kam strong moa, mo taetel blong hem se “God i Stap Wetem Yumi, Mo i No Gat Man Nating We i Strong Moa, We Bambae i Save Agens Long Yumi.” (Rom 8:31) Brata Larson i eksplenem long ol studen we, folem Baebol, oli save trastem Jeova fulwan se hem nao i gat paoa blong halpem olgeta blong winim ol traem we bambae oli fesem long niufala teritori blong olgeta. Brata Larson i yusum Rom 8:​38, 39 mo i talem long ol studen se: “Yufala i stop smoltaem mo tingbaot paoa ya we Jeova i stap yusum blong halpem yufala. Rimemba se i no gat wan samting we i save karemaot spesel lav ya we Jeova i soem long yufala evriwan.”

Brata Guy Pierce, wan memba blong Hed Kampani, hem nao i givim nekis tok. Hem i jusum stamba tok ya “!Stap Haremgud Oltaem!” (Luk 10:23) Hem i eksplenem we man i kasem trufala glad sipos hem i gat save long Jeova mo long stamba tingting blong Hem, mo sipos hem i luk ol profet tok blong Baebol oli kamtru. Nomata weples we ol studen oli go long hem, be oli save holem trufala glad sipos oli stap luk ol samting ya we oli save mekem olgeta oli haremgud oltaem. Brata Pierce i leftemap tingting blong ol studen se oli mas tingting dip long kaen fasin blong Jeova, mo oli mas putum tingting mo hat blong olgeta i stap nomo long wok we Jeova i givim long olgeta blong oli mekem. (Ol Sam 77:12) Sipos ol misinari oli holem stret tingting oltaem, bambae oli save winim eni problem.

Biaen, tu brata we oli bin tijim ol studen ya evri dei oli leftemap tingting blong olgeta wetem ol tok ya blong talem tata. Brata Lawrence Bowen i givim tok ya we taetel blong hem i wan kwestin se: “?Yu Yu Stap Lukaot Glori?” Bighaf blong ol man taem oli tingbaot glori, oli tingbaot fasin blong presem, givim ona, mo leftemap olgeta wan. Be Asaf, wan man blong raetem  Sam, hem i kasem save mining blong trufala glori​—hemia gudfala fasin fren wetem Jeova, wan fasin we i sas tumas. (Ol Sam 73:​24, 25) Tufala brata ya oli leftemap tingting blong ol studen we oli kasem setifiket blong olgeta, blong oli gohed blong frengud wetem Jeova tru long wan dip stadi blong Baebol. Ol enjel “oli wantem save” olsem wanem bambae stamba tingting blong God i kamtru, tru long Jisas Kraes. (1 Pita 1:12) Oli wantem save plante samting long saed blong Papa blong olgeta, blong oli save folem eksampol blong Hem. Biaen, Brata Bowen i pulum tingting blong ol studen blong oli presem Jeova long niufala teritori blong olgeta, taem oli halpem ol narafala blong faenem sas presen ya, hemia fasin fren wetem Jeova.

Brata Wallace Liverance, we i rejistarem ol studen long skul ya, hem i givim laswan blong ol tok ya we taetel blong hem se, “Talemaot Waestok Blong God We Fastaem Hem i Haedem.” (1 Korin 2:7) ?Wanem ya waes blong God we aposol Pol i stap tokbaot hem taem hem i misinari? Hemia waes mo paoa we Jeova i stap yusum blong karem pis mo fasin joengud i kam long heven mo wol. Jisas Kraes hem i stamba man we i soemaot waes ya. Pol i no prijimaot Kristin fasin blong mekem nomo se laef blong man i kam moagud, be hem i halpem ol man blong oli luksave olsem wanem bambae God i karemaot ol nogud frut we oli kamaot from sin blong Adam. (Efesas 3:​8, 9) Brata Liverance i talem long ol man we oli lesin se: “Yusumgud janis  we yu gat mo folem eksampol blong Pol, from we hem i luk misinari wok blong hem olsem wan janis blong halpem ol man blong kasem save olsem wanem Jeova bambae i mekem stamba tingting blong hem i kamtru.”

Biaen, Brata Mark Noumair, we hem tu i wan tija blong Gilead Skul, i mekem wan gudfala storian wetem plante studen blong klas ya. Stamba tok blong hem se “Ol Man We Oli Stadi Long Tok Blong God Oli Gat Strong Tingting Blong Prij,” i stanap long tok blong Pol long Rom 10:10. Ol studen blong klas ya oli talem plante stori we oli hapen long olgeta long wok blong prij, taem oli stap folem kos ya. Ekspiriens blong olgeta i pruvum se taem yumi stadi mo yumi tingting dip long Tok blong God, ol nambawan nius long saed blong God mo Kingdom blong hem oli fulumap hat blong yumi nao yumi tokbaot ol samting ya long ol narafala. Long ol faef manis ya we ol studen oli stap long Watchtower Educational Center, ol studen oli statem bitim 30 Baebol stadi wetem ol man we oli intres long ol teritori ya we ol kongregesen oli stap prij plante long olgeta.

Ol Olfala We Oli Gat Ekspiriens Oli Givim Advaes

Taem oli folem kos ya, ol studen oli glad blong joen wetem ol memba blong Betel famle blong Yunaeted Stet. Brata Robert Ciranko wetem Brata Robert P. Johnson, we tufala i wok long branj ofis long Yunaeted Stet, tufala i askem ol kwestin long plante brata we oli wok longtaem finis blong Jeova, wetem sam seket elda tu we oli stap folem wan trening long Watchtower Educational Center. Olgeta brata ya oli bin kasem setifiket blong olgeta long Gilead tu, mo oli bin wok olsem misinari. Ol studen wetem famle blong olgeta tu oli haremgud tumas taem oli harem ol waestok blong ol olfala ya we oli gat ekspiriens mo oli strong long saed blong spirit.

Hemia nao sam advaes blong olgeta: “Yu mas stap bisi plante long wok blong prij mo long kongregesen.” “Yu no mas tinghae tumas long yu wan. Oltaem yu mas rimemba from wanem yu wok olsem misinari, mo mekem niufala teritori blong yu i kam olsem hom blong yu.” Sam narafala toktok oli soem olsem wanem Gilead Skul i trenem ol man blong oli mekem gud wok blong olgeta, nomata weples we oli go long hem. Hemia sam long ol toktok ya: “Mifala i lanem blong wokgud tugeta.” “Skul ya i halpem mifala blong akseptem ol niufala kalja.” “Oli tijim mifala long wan fasin blong yusum Baebol we mifala i neva tingbaot bifo.”

Brata John E. Barr, wan brata we i memba blong Hed Kampani longtaem finis, hem i givim stamba tok blong program. Taetel blong tok ya we i stanap long Baebol se, “Tok Blong Olgeta i Goaot Finis Long Olgeta Ples Long Wol.” (Rom 10:18) Hem i askem kwestin ya se: ?Ol man blong God oli prij long olgeta ples long wol tede? !Yes! Stat long 1881, kwestin ya i stap finis long ol Wajtaoa se: “?Yu yu stap prij?” Biaen, Brata Barr i talem bakegen nambawan tok ya we oli bin givim long 1922 long asembli long Cedar Point, Ohio, Yunaeted Stet se: “!Talemaot King ya mo Kingdom blong hem!” Taem i pas, strong tingting blong ol trufala man blong God i pusum olgeta blong talemaot ol nambawan trutok blong Kingdom long olgeta nesen. Tru long ol buk mo long tok blong man, gud nius blong Kingdom i kasem ol laswan ples blong wol​—mo hemia i blong givim ona mo presem Jeova nomo. Long lastok blong hem, Brata Barr i leftemap tingting blong ol studen blong oli luklukgud olgeta blesing we oli kasem, i se: “Evri dei, taem yu prea long Jeova long niufala teritori blong yufala, talem tangkiu long hem wetem fulhat blong yufala, from janis ya we yufala i gat blong tekpat long wok ya we i mekem tok ya i kamtru se, ‘Tok blong olgeta i goaot finis long olgeta ples long wol.’ ”

Afta long tok ya, oli talemaot ol lav we ol brata oli sanem i kam, mo jeaman i givim wan setifiket long evri studen. Biaen, wan studen we i tok long nem blong ful klas i ridim wan leta, mo ol filing blong hem oli hafhaf from we long wan saed hem i glad, be long wan saed hem i sore blong lego gudfala skul ya. Hem i ridimaot leta ya long Hed Kampani mo long Betel famle, wan leta we i soemaot strong tingting we ol studen oli gat blong presem Jeova “i stat naoia gogo i no save finis.”​—Ol Sam 115:18.

Yumi prea long God se bambae ol studen ya oli lanem blong laef long niufala teritori blong olgeta mo oli givhan blong mekem wok blong prij i gohed long fulwol, olsem ol narafala misinari we oli bin mekem wok ya finis long ol 60 yia we oli pas.

[Bokis blong pija long pej 23]

KAONTEM KLAS YA

Oli kamaot long hamas kantri: 12

Oli go wok long hamas kantri: 16

Hamas studen: 48

Oli gat hamas yia: 34.4

Hamas yia long trutok: 17.6

Hamas yia finis oli prij fultaem: 13.5

[Tok blong pija long pej 24]

Klas Namba 114 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go raetsaed.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martinez, L.; Millar, D.; Festré, Y.; Nutter, S. (3) Martinez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.