?Ol Man Oli Faenem Pruf Se Jisas i Bin Laef Long Wol Ya?

“HANRAET Long Ston i Pruvum Se Jisas i Wan Trufala Man.” Tok ya i stap long fas pej blong niuspepa ya Biblical Archaeology Review (Novemba/Disemba 2002). Pija long fas pej ya, i soem wan bokis we oli wokem long laemston. Bokis ya oli faenem long Isrel. Bitwin ol yia wan handred B.K.T. * mo 70 K.T., * ol man Jiu oli bin yusum ol bokis olsem blong putum bun blong dedman insaed long hem. Samting we i mekem se bokis ya i rili spesel, hemia wan tok long lanwis Aramaik we oli raetem long wan saed blong hem. Ol man blong hae save oli agri we tok ya i talem se: “Jemes, pikinini blong Josef, brata blong Jisas.”

Baebol i talem se, man Nasaret ya Jisas, i gat wan brata we nem blong hem Jemes, we i pikinini blong Josef, hasban blong Meri. Taem Jisas Kraes i prij long ol manples blong hem, ol man ya oli sapraes long ol tok blong hem mo oli talem se: “Man ya, yumi savegud hem. Hem i pikinini blong man ya blong wokem haos, mo mama blong hem, Meri. Ol brata blong hem, Jemes, mo Josef, mo Saemon, mo Judas. Mo ol sista blong hem tu oli stap wetem yumi.”​—Matiu 13:​54-56; Luk 4:22; Jon 6:42.

Yes, tok we i stap long bokis ya i laenap stret wetem man Nasaret ya, Jisas. André Lemaire, we i savegud long ol olfala hanraet mo we i raetem stori long niuspepa ya Biblical Archaeology Review we yumi tokbaot antap, i talem strong se sipos man ya, Jemes, i haf brata blong Jisas Kraes, hemia i min se bokis ya “i olfala moa long olgeta samting we oli faenem blong pruvum se Jisas i rili bin laef [long wol ya], mo pruf ya i no kamaot long Baebol.” Hershel Shanks, maneja blong niuspepa ya, i talem se bokis ya i “wan gudfala pruf we man i save luk, mo we i kamaot long taem blong Man ya we i impoten moa i bitim ol narafala man we oli bin laef long wol ya.”

Be, long faswan handred yia, plante man oli karem ol semfala nem olsem trifala nem long bokis ya. Antap long famle blong Jisas, maet i gat sam narafala famle bakegen we oli gat tri man we nem blong trifala Jemes, Josef, mo Jisas. Andre Lemaire i wokemaot se: “Sipos yumi kaontem olgeta man we oli laef long Jerusalem jes bifo long 70 K.T., wetem ol pikinini blong olgeta, i gat . . . samwe long 20 man we maet oli save karem nem olsem se ‘Jemes [no Jekob] pikinini blong Josef brata blong Jisas.’ ” Nating se i olsem, Masta Lemaire i bilif se i gat bigfala janis (90-pesen) se nem ya Jemes we i stap long bokis ya i nem blong haf brata blong Jisas Kraes.

I gat wan narafala risen we i mekem plante man oli bilif se nem ya hem i nem blong Jemes haf brata blong Jisas Kraes. Plante taem ol man oli raetem nem blong papa blong dedman long ol bokis ya, be klosap neva oli raetem nem blong brata blong hem. Taswe, sam man blong hae save  oli ting se nem ya Jisas, hem i nem blong wan man we i impoten. Yes, oli bilif se hem i Jisas Kraes, man ya we i statem Kristin Skul.

?Bokis Ya i Giaman No i Tru?

?Oli yusum ol bokis ya blong mekem wanem? Afta we ol man oli berem dedman long wan kef mo bodi blong hem i rotin finis, oli putum bun blong hem i stap long wan bokis. Long Jerusalem, plante long ol bokis ya oli lus finis from we man i stilim olgeta long ples we oli berem dedman. Bokis ya we nem blong Jemes i stap long hem, oli no faenem taem oli digim graon, be oli karem long wan maket we i salem ol olfala samting blong bifo. Oli talem se man we i bin holem bokis ya, i bin pem bokis ya samwe long yia 1970, long smol mane nomo. Taswe, ol man oli no save se bokis ya i kamaot weples stret. Tija Bruce Chilton blong Bard Kolej, Niu Yok i talem se: “Sipos yu no save weples stret oli faenem wan olfala samting blong bifo, mo weples samting ya i bin stap blong klosap 2,000 yia, yu no save talem sua se samting ya i blong man ya we maet nem blong hem i stap long hem.”

I no gat pruf we ol man blong digim graon oli faenem bokis ya. Taswe, André Lemaire i sanem bokis ya i go long dipatmen long Isrel we i stadi long ol ston we oli faenem long graon (Geological Survey). Long ples ya, ol man blong stadi oli faenem se bokis ya oli wokem long laemston we i stap long graon long ol yia bitwin yia 1 mo yia 300 K.T. Oli talem se “i no gat wan saen blong soem se oli wokem [bokis ya] wetem ol niufala tul blong tede.” Nating se i olsem, taem niuspepa ya The New York Times i askem kwestin long sam man blong stadi Baebol, ol man ya oli talem se, “i tru, maet pruf i strong se [bokis ya] i laenap wetem Jisas, be pruf ya i no klia.”

Magasin ya, Time, i talem se, “tede klosap olgeta man we oli go long skul oli bilif se Jisas i bin laef [long wol ya].” Nating se i olsem, plante man oli ting se i mas gat pruf antap long samting we Baebol i talem, we i soem se Jisas i bin laef long wol ya. ?Bilif blong yumi long Jisas Kraes i mas stanap long ol samting we ol man blong digim graon oli faenem? ?Wanem samting i stap we i olsem pruf se man ya i rili “impoten moa i bitim ol narafala man we oli bin laef long wol ya”?

[Ol Futnot]

[Foto Credit Lines blong pija long pej 3]

Left, James Ossuary: AFP PHOTO/J.P. Moczulski; right, inscription: AFP PHOTO/HO