Wan Kwestin

?Setan i naf blong lukluk insaed long tingting blong man?

Yumi no savegud, be i luk olsem se Setan mo ol rabis enjel blong hem oli no naf blong lukluk insaed long tingting blong yumi.

Tingbaot mining blong ol nem we Baebol i putum long Setan. I gat nem ya Setan (Man Blong Agens), Devel (Man We i Giaman Blong Spolem Nem Blong Narafala), Snek (sem mak long Man Blong Trikim Man), Man Blong Traem Man, mo Man Blong Giaman. (Job 1:6; Matiu 4:3; Jon 8:44; 2 Korin 11:3; Revelesen 12:9) Long olgeta nem ya, i no gat wan we i soemaot se Setan i naf blong lukluk insaed long tingting blong yumi.

Be long saed blong Jeova God, Baebol i talem se hem i ‘save faenemaot tingting blong man.’ (Ol Proveb 17:3; 1 Samuel 16:7; 1 Kronikel 29:17) Hibrus 4:13 i talem se: “I no gat wan samting nating long wol ya we [Jeova] i mekem, we i save haed long fes blong hem. Olgeta samting oli stap long klia ples nomo, stret long fes blong hem. Mo long fes blong hem nomo, yumi evriwan i mas talemaot ol fasin blong laef blong yumi.” Yumi no sapraes we Jeova i givim paoa long Pikinini blong hem Jisas, blong hem tu i naf blong lukluk insaed long tingting blong man. Afta we Jisas i laef bakegen, hem i talem se: “Mi mi save tingting blong olgeta man, mo wanem samting olgeta oli wantem. Bambae mi mi givim pei long yufala evriwan wanwan, stret long mak blong fasin blong yufala.”​—Revelesen 2:23.

Baebol i no talem se Setan i naf blong lukluk insaed long hat mo tingting blong man. Poen ya i impoten, from we aposol Pol i talem se ol Kristin oli “savegud ol plan blong Setan.” (2 Korin 2:11) Taswe, yumi no nid blong wari se Setan i gat wan spesel paoa we yumi no save long hem.

Be, samting ya i no minim se Enemi blong yumi i no save luksave ol slak fasin blong yumi mo ol samting we hem i save yusum blong mekem yumi foldaon. Blong plante handred yia, Setan i bin wajem gud fasin blong ol man. Nomata se hem i no naf blong lukluk insaed long tingting blong yumi, be hem i save luk ol aksin mo fasin blong yumi, wanem pleplei mo sinema we yumi laekem, hem i save lesin long ol samting we yumi tokbaot, mo sam moa samting olsem. Fes mo bodi blong yumi tu i save soemaot tingting mo filing blong yumi.

Be klosap oltaem, Setan i stap yusum ol semfala rod we hem i yusum long garen blong Iden​—hem i giaman, i trikim man, mo i givim save we i no stret. (Jenesis 3:​1-5) Taswe, nating se ol Kristin oli no nid blong wari se Setan bambae i lukluk insaed long tingting blong olgeta, be oli mas wari long ol save we Setan bambae i traem putum long tingting blong olgeta. Hem i wantem mekem “we tingting blong [ol Kristin] i no stret, mo oli no save wanem samting oli stap tokbaot.” (1 Timoti 6:5) From samting ya, yumi no sapraes se wol ya we Setan i bos long hem i stap givimaot fulap save mo mekem fulap sinema bitim mak we oli blong spolem tingting blong ol man nomo. Blong no foldaon long trik ya blong hem, ol Kristin oli mas protektem tingting blong olgeta. Oli mas putum “hat blong faet” we i olsem save ya se ‘God bambae i sevem olgeta.’ (Efesas 6:17) Oli mekem olsem taem oli fulumap tingting blong olgeta wetem ol trutok blong Baebol, mo taem oli no joen tumas long wol ya blong Setan we i rabis nomo.

Setan i wan enemi we i gat bigfala paoa. Be yumi no nid blong fraet bitim mak long hem mo long ol rabis enjel blong hem. Jemes 4:7 i promes long yumi se: “Yufala i mas blokem Setan, nao hem bambae i ronwe long yufala.” Sipos yumi folem advaes ya, bambae yumi save talem sem tok we Jisas i bin talem, se Setan i no gat paoa blong mekem wan samting long yumi.​—Jon 14:30.