Wanem We Ol Pijin Oli Stap Tijim Yumi Long Hem

“YUFALA i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i gud moa i winim ol pijin.” (Matiu 6:26) Plante man oli save gud ol tok ya we Jisas i talem taem hem i stap long saed blong wan bigfala hil, klosap long Solwota blong Galili. I no ol man blong Jisas nomo we oli stap lesin long toktok ya. Wan bigfala hip blong ol man we oli kamaot long ol ples raonabaot, olgeta tu oli kam blong lesin. Olgeta ya oli gat janis tu blong kam disaepol blong Jisas. Plante long ol man ya oli pua man we oli karem olgeta we oli sik oli kam long Jisas blong hem i mekem sik blong olgeta i kam gud.​—Matiu 4:​23–5:2; Luk 6:​17-20.

Afta we Jisas i mekem sik blong olgeta i kam gud, hem i stat nao blong tokbaot ol nid long saed blong spirit we i impoten moa. Wan long ol lesen we Jisas i tokbaot hemia nao we i stap antap.

Ol pijin long skae oli stap longtaem finis. Sam long olgeta oli stap kakae ol bebet, sam narafala oli kakae ol frut mo ol sid. Sipos God i givim fulap kakae long ol pijin, yumi sua se hem i naf blong givhan long ol man blong hem we oli wosip long hem, blong oli gat kakae blong evridei. Hem i save mekem olsemia, taem hem i halpem olgeta blong faenem wok blong kasem mane blong pem kakae. No hem i save mekem se bambae oli gat plante frut long garen we oli stap planem. Taem wan bigfala trabol i hapen, God hem i save pusum tingting blong ol man raonabaot, no ol fren, we oli gat kaen fasin, blong oli serem kakae wetem olgeta we oli gat nid.

Yumi save lanem plante moa samting taem yumi rili tingbaot ol samting we ol pijin oli save mekem. God i wokem ol pijin long wan fasin we oli save finis olsem wanem blong wokem ol nes blong olgeta mo lukaot gud long ol smolsmol pijin blong olgeta. Lukluk tufala nes ya we tufala i defren olgeta. Long lefsaed i gat nes blong pijin ya we oli kolem rock martin blong Afrika. Hem i wokem ol nes blong hem long wan bigfala ston no long wol blong wan haos. Ruf blong nes ya, i wan ston we i hang nomo, no olsem yu luk long pija ya, i save stap tu, long saed ruf blong wan haos. Floa blong nes ya oli wokem long ol smolsmol pis sofmad mo ol doti we oli fas tugeta, mo oli mekem blong i raon gud. Man pijin mo woman pijin, tufala tugeta i wok strong blong hivimap tugeta ol smolsmol sofmad mo ol doti ya we oli fas tugeta blong wokem ol nes olsem, we oli save finisim long wan manis nomo. Afta oli kavremap floa ya wetem ol gras mo gras blong pijin. Tufala tugeta i givhan long tufala blong fidim ol smolsmol pijin blong tufala. Pija we i stap daon i soem nes blong wan man pijin we oli kolem hem masked weaver. Pijin ya blong Afrika we i gat save blong wok, i yusum ol lif blong gras mo stik blong ol narafala gras blong wokem nes blong hem. !Hem i naf blong flatem wan nes long wan dei nomo, mo hem i save wokem bitim 30 long ol nes ya, long wan taem blong yia we oli stap wokem ol samting ya!

?Wanem samting we yumi lanem from? Sipos God i givim save long ol pijin blong mekem samting, mo hem i givim plante samting blong wokem ol nes blong olgeta, yumi sua se hem i save givhan long olgeta we oli wosip long hem blong oli gat ples blong slip. Be, Jisas i soemaot se i gat wan samting we i impoten moa blong mekem, sipos yumi wantem we Jeova God i givhan long yumi blong kasem ol samting we yumi nidim long saed blong bodi. “Taswe, yufala i mas gohed blong lukaot kingdom mo stret fasin blong hem fastaem. Nao bambae hem i givim olgeta narafala samting ya tu long yufala.” Hemia wan promes we Jisas i givim. (Matiu 6:​33, NW ) Maet yu gat tingting se, ?Wanem mining blong tok ya se gohed blong lukaot Kingdom blong God fastaem? Ol Witnes blong Jeova, we oli stap givimaot ol magasin ya, oli glad blong givim ansa long kwestin ya.