Wok Wetem Wan Grup We i Toktok Wan Spesel Lanwis Long Koria

LONG hot taem blong 1997, wan grup blong man we i glad tumas be i kwaet tu, i joen tugeta long wan distrik asembli blong ol Witnes blong Jeova. Hemia faswan taem long Koria, we oli holem wan asembli blong ol man we sora blong olgeta i fas. I gat 1,174 man oli kam long asembli ya. Ful program​—wetem ol tok, ol kwestin we oli askem long man, mo wan drama​—oli mekem long Saen Lanwis blong ol man Koria. Mo oli putum wan bigfala video, mekem se olgeta man long Haos Asembli oli save luk ol tok ya. Asembli ya i wan gudfala frut we i kamaot from hadwok blong plante volontia we oli bin wok strong blong plante yia.

I gat wan taem i stap kam we bambae long paradaes long wol, “olgeta we sora blong olgeta i fas, sora blong olgeta bambae i open bakegen.” (Aesea 35:5) Blong kasem laef long Paradaes ya, olgeta man, wetem olgeta we sora blong olgeta i fas tu, oli mas kam long paradaes long saed blong spirit fastaem, hemia gudfala laef we ol man blong God oli gat long saed blong spirit. Oli mas givim laef blong olgeta i go long God mo oli mas baptaes blong kam ol Witnes blong Jeova we hem i stap tijim olgeta.​—Maeka 4:​1-4.

Taem Grup i Stat

Long ol yia 1960, oli stat prij long ol man we sora blong olgeta i fas. Be long ol yia 1970 nomo, sam blong olgeta oli stat blong go long ol miting blong ol Witnes blong Jeova long Seoul, hemia kaptel blong Koria. Wan Kristin brata we i spid blong raet i stap yusum wan blakbod blong makem ol stamba poen blong ol tok, wetem ol vas blong Baebol tu.

Long 1971 long taon ya Taejon, wan brata we i gat wan boe we sora blong hem i fas i stat talemaot gud nius blong Kingdom long boe blong hem mo long ol fren blong boe ya, we sora blong olgeta tu i fas. Plante man we oli stat blong stadi Baebol wetem grup ya, tede oli olsem ol pos we oli sapotem ol kongregesen blong man we oli toktok saen lanwis.​—Sekaraea 4:10.

Ol Yangfala Oli Rere Blong Lanem Saen Lanwis

Sipos sam man we sora blong olgeta i fas oli wantem kasem save long Jeova mo Jisas, mo kasem laef we i no save finis, nao bambae i nidim moa man we oli rere blong mekem wok ya blong halpem olgeta. (Jon 17:3) Taswe sam Witnes blong Jeova oli bin  lanem saen lanwis mo oli kasem plante blesing from.

Wan yangfala boe we i gat 15 yia blong hem, nem blong hem Park In-Sun, i putum mak ya se hem i mas lanem blong toktok saen lanwis. Ale, hem i wok long wan faktri wetem wan grup blong 20 man we sora blong olgeta i fas. Blong eit manis, hem i wok wetem ol man ya we sora blong olgeta i fas, blong lanem lanwis mo fasin blong tingting blong olgeta. Long yia we i kam biaen, Park In-Sun i kam wan fultaem paenia, no wan man we i talemaot gud nius blong Kingdom fultaem, mo hem i givhan long wan grup blong man we sora blong olgeta i fas, we oli intres long trutok blong Baebol. Namba blong man long grup ya i kam antap, mo kwiktaem nomo i gat bitim 35 man i stap kam long miting long Sande.​—Ol Sam 110:3.

Biaen, oli mekem plan blong holem ol Kristin miting long saen lanwis nomo, mo hemia fastaem we oli mekem samting ya long Seoul. Long taem ya brata Park In-Sun i wok olsem spesel paenia long grup ya we i stap kam bigwan, mo hem i toktok gud saen lanwis. Blong sam manis, hem i mekem 28 Baebol stadi wetem ol man we sora blong olgeta i fas. Plante long ol man ya oli gohedgud mo oli kam ol Witnes blong Jeova.

Nambawan wok blong ol volontia ya i karem gudfala frut, from we long Oktoba 1976 oli stanemap faswan kongregesen blong ol man we sora blong olgeta i fas. Kongregesen ya i gat 40 pablisa mo 2 fultaem paenia. Samting ya i pusum plante moa Witnes long sam narafala taon blong Koria, blong oli prij long ol man we sora blong olgeta i fas. Plante man we sora blong olgeta i fas oli wantem tumas blong save gud nius, mo oli stap wet se sam man oli kam visitim olgeta.

Givhan Long Ol Man We Sora Blong Olgeta i Fas

Ating yu wantem save olsem wanem ol brata oli faenem ol man we sora blong olgeta i fas. Plante taem, oli faenem olgeta tru long sam fren blong olgeta we sora blong olgeta tu i fas. Mo tu, oli go luk ol ona blong ol stoa we oli salem raes, ale ol man ya oli givim ol nem wetem ol adres blong ol man we sora blong olgeta i fas. Sam ofis blong gavman tu oli givhan blong givim ol infomesen olsem. Ol brata oli meksua se oli prij fulwan long evri teritori we i gat ol man we sora blong olgeta i fas, mekem se biaen oli stanemap fo kongregesen we oli toktok saen lanwis. Oli leftemap tingting blong plante yangfala Kristin blong oli lanem saen lanwis.

Branj ofis blong ol Witnes blong Jeova i sanem sam spesel paenia we oli bin lanem saen lanwis blong oli go wok wetem ol kongregesen ya. Mo i no longtaem i pas, oli bin sanem sam brata we oli kasem setifiket blong Ministeriol Trening Skul oli go long ol kongregesen ya mo oli halpem ol kongregesen blong kam strong moa long saed spirit.

I gat sam samting we i no isi blong mekem long wan teritori olsem. Yu mas traehad blong kasem save long fasin blong tingting mo fasin blong laef blong ol man we sora blong olgeta i fas. Olgeta ya oli man we oli no sem blong talemaot tingting blong olgeta, mo taem oli wok oli laekem we ol samting oli stretgud i no hafhaf. Samtaem, fasin ya i save mekem man i sek, no i konfius. Antap long samting ya, taem ol Witnes oli stadi wetem ol man we sora blong olgeta i fas, oli mas halpem olgeta blong oli toktok gud moa long prapa lanwis blong olgeta, mo oli mas leftemap tingting blong olgeta blong oli rid mo oli stadi moa.

Long laef blong evri dei, ol man we sora blong olgeta i fas oli stap fesem sam trabol we ol narafala man oli no tingbaot. I hadwok long olgeta blong kasem save mo toktok wetem ol man taem oli mas go long ofis blong gavman, long hospital, no taem oli mekem bisnes. Be long Kristin kongregesen, ol  man we sora blong olgeta i fas oli kasem help blong ol brata, from we ol Witnes we oli stap long ol kongregesen raonabaot oli givhan long olgeta wetem lav.​—Jon 13:​34, 35.

Oli Tekem Olgeta Janis Blong Prij Mo Oli Kasem Frut

Long Pusan, wan bigfala taon we ol bot oli kam long hem long saot blong Koria, wan Witnes i mitim tu man we sora blong olgeta i fas, we oli bin raetem long wan pis pepa se: “Mitufala i laekem Paradaes. Mitufala i wantem save ol vas ya we oli tokbaot laef we i no save finis.” Brata i raetemdaon adres blong tufala man ya mo i mekem plan blong visitim tufala bakegen. Taem hem i gobak blong visitim tufala, haos i fulap long ol man we sora blong olgeta i fas, oli stap wet blong harem gud nius blong Kingdom. Ekspiriens ya i pusum brata ya blong lanem saen lanwis. Smoltaem biaen oli stanemap wan kongregesen we i toktok saen lanwis long Pusan.

Wan brata blong kongregesen ya i luk tu man we sora blong tufala i fas, tufala i stap mekem saen lanwis long tufala. Ale brata ya i go toktok wetem tufala. Tufala man ya oli jes kamaot long wan sevis blong jos, nao brata i invaetem tufala blong oli kam long wan miting long Haos Kingdom long tu klok, long semfala dei. Tufala man i kam, mo oli stat stadi long Baebol. Smoltaem biaen, tufala man ya i kam long wan asembli wetem 20 fren blong tufala we sora blong olgeta tu i fas. Long grup ya, plante oli givim laef blong olgeta finis i go long God. Tu long olgeta oli kam elda mo wan i kam man blong  givhan, mo oli stap wok long ol kongregesen blong ol man we sora blong olgeta i fas.

Hem i Kasem Blesing From Strong Tingting Blong Hem

Sam man we sora blong olgeta i fas oli laef longwe lelebet long ol kongregesen we oli toktok saen lanwis. Taswe ol brata oli mas traehad mo oli mas gat strong tingting blong givim kakae long olgeta long saed blong spirit. Eksampol, wan man we i gat 31 yia blong hem i laef long wan aelan we long ples ya hem i stap pulum fis blong salem mo winim mane long hem. Hem i harem mesej blong Baebol tru long yangfala brata blong hem, we ol Witnes oli bin prij long hem. Man ya blong pulum fis, we sora blong hem i fas, i traehad blong kasem kakae long saed blong spirit. Ale hem i tekem bot blong hem i mekem wan trip blong 16 kilometa go kasem Tongyoung City, long saot blong Koria. Hem i mekem trip ya blong mitim wan spesel paenia we i blong kongregesen blong olgeta we sora blong olgeta i fas long Masan City. Evri Mande, spesel paenia ya i wokbaot 65 kilometa jes blong stadi long Baebol wetem man ya blong pulum fis, we sora blong hem i fas.

Blong go long miting long Sande long Masan City, Baebol studen ya we sora blong hem i fas i mas wokbaot long bot blong 16 kilometa, mo biaen hem i mas tekem wan bas blong mekem wan trip blong 65 kilometa bakegen. Hem i kasem blesing from strong tingting blong hem. Sam manis i pas, nao hem i kam moa gud long fasin blong toktok saen lanwis, i lanem sam moa alfabet long lanwis Koria, mo​—samting we i moa impoten​—hem i lanem olsem wanem blong kam wan fren blong Jeova. Hem i luksave we i impoten blong go long ol miting mo prij oltaem, taswe hem i muv i go stap long teritori blong saen lanwis kongregesen. ?Yu ting se i bin isi blong mekem samting ya? Nogat. Blong muv i go, hem i mas lego wok blong hem blong pulum fis, nating se wetem wok ya hem i stap kasem 450,000 vatu long wan manis. Be nating, hem i kasem blesing from strong tingting blong hem. Hem i gohedgud long trutok gogo i tekem baptaes, mo tede hem i glad blong wok blong Jeova wetem famle blong hem.

Tanem Tok i Go Long Lanwis Blong Ol Man We Sora Blong Olgeta i Fas

Plante taem yumi serem gud nius blong Kingdom taem yumi toktok nomo. Be, sipos yumi wantem eksplenem gud mesej blong Tok blong God, i impoten tumas blong prentem ol tijing ya blong Baebol. Taswe, long ol faswan handred yia, sam olfala man we oli gat ekspiriens oli bin raetem sam buk mo sam leta. (Ol Wok 15:​22-31; Efesas 3:4; Kolosi 1:2; 4:16) Long taem blong yumi, yumi kasem fulap kakae long saed spirit tru long ol buk we oli tokbaot Baebol. Ol buk ya, ol Witnes oli tanem olgeta i go long plante handred lanwis, wetem sam defren saen lanwis tu. Long branj ofis blong Koria, i gat wan dipatmen we i lukaot long wok blong tanem ol buk i go long saen lanwis. Wan dipatmen we i wokem ol video kaset, i stap wokem ol video kaset we i soem ol man we oli toktok saen lanwis. From samting ya, long olgeta kongregesen long Koria, ol pablisa mo ol man we oli intres, we sora blong olgeta i fas, oli save kasem kakae long saed blong spirit.

Nating se plante man oli toktok gud saen lanwis mo oli bin givhan blong wokem ol video, be ol beswan man blong tanem tok, hemia ol pikinini blong ol papa mama we sora blong olgeta i fas. Oli lanem blong toktok saen lanwis taem oli pikinini yet. Fasin blong olgeta blong toktok wetem han i stret, be antap long samting ya oli save givim mining mo oli save makem ol impoten tijing, tru long ol fasin blong olgeta blong yusum han mo fes blong olgeta. Oli save kasem tingting mo hat blong man tu.

Olsem yumi talem finis, naoia i gat ol asembli long saen lanwis oltaem long Koria. I nidim plante wok, mane, mo traehad, blong mekem samting ya. Be olgeta we oli kam long ol asembli ya oli gat tangkiu long ol traehad ya. Long en blong ol asembli olsem, plante man oli stap long ples we oli mekem asembli, oli wantem stap tugeta mo tingtingbak long ol gudfala kakae we oli bin kasem long saed blong spirit. Yes, i no isi blong wok long wan spesel grup olsemia, be ol blesing we oli kamaot from oli nambawan.

[Tok blong pija long pej 10]

Ol video kaset we oli wokem long saen lanwis long Koria: “?Wanem Samting We God i Wanem Yumi Blong Mekem?,” “Gat Tangkiu From Presen We Yumi Kasem Long Saed Blong Spirit,” “Ol Eksampol We Oli Givim Woning Blong Yumi Tede,” mo “Respektem Hae Rul Blong God”

[Tok blong pija long pej 10]

Stat daon i go long raetsaed: Oli stap wokem wan video long saen lanwis long branj ofis long Koria; oli rerem ol saen we oli stret wetem ol tiokratik tok; translesen tim blong saen lanwis; help we oli givim long man we i stap mekem saen lanwis long video