“God Hem i Lav”

“Man we i no gat lav, hem i no save God yet, from we God hem i lav.”​—1 JON 4:​8, NW.

1-3. (a) ?Baebol i talem wanem long saed blong fasin lav blong Jeova, mo olsem wanem tok ya i defren long tok we Baebol i talem long saed blong ol narafala fasin blong hem? (b) ?From wanem Baebol i talem se “God hem i lav”?

 OLGETA fasin blong Jeova oli nambawan, oli stretgud olgeta, mo oli tajem hat blong yumi. Be fasin blong hem we i pulum yumi moa, hemia lav blong hem. I no gat wan narafala fasin we i gat paoa blong pulum yumi i kam klosap long Jeova, i bitim lav blong hem. Yumi glad tu se lav i faswan bigfala fasin blong Jeova. ?Olsem wanem yumi save samting ya?

² Baebol i talem ol tok long saed blong lav blong Jeova we i no talem long saed blong ol narafala stamba fasin blong hem. Baebol i no talem se God hem i paoa no God hem i stret fasin, no God hem i fasin waes. Nogat. I tru se hem i gat trifala fasin ya mo hem i stamba blong olgeta. Be, long saed blong lav, Baebol i talem samting we i dip moa. Long 1 Jon 4:8 (NW ) hem i talem se: “God hem i lav.” Yes, Jeova i fulap long lav. Lav hem i faswan fasin blong hem, no prapa fasin blong hem. Blong kasem save moa long saed ya, tingbaot samting ya: Paoa blong Jeova i mekem se hem i naf blong tekem aksin. Stret fasin mo waes blong hem oli lidim hem blong tekem aksin long stret rod. Be, lav blong Jeova i pulum hem blong tekem aksin. Oltaem  lav i gat paoa long samting we hem i mekem blong soemaot ol narafala fasin ya.

³ Plante taem yumi harem tok ya se Jeova i soemaot lav long fasin we i stret gud olgeta. Taswe, sipos yumi wantem lanem moa long saed blong lav, yumi mas lanem moa long saed blong Jeova. Oraet, naoia bambae yumi lukluk gud long sam samting we oli soemaot bigbigfala lav blong Jeova.

Bigfala Samting We i Soem Lav Blong Hem

4, 5. (a) ?Wanem samting we i soemaot bigfala lav i bitim ol narafala samting long histri blong man? (b) ?From wanem yumi save talem se Jeova mo Pikinini blong hem tufala i lavlavem tufala long fasin we i strong moa i bitim lav we ol narafala man oli gat samtaem?

⁴ Jeova i mekem plante samting blong soemaot lav blong hem. Be i gat wan samting we i bigwan moa long ol narafala samting we hem i mekem. ?Wanem samting ya? Hem i sanem Pikinini blong hem, we i safa mo i ded from yumi. I stret nomo blong talem se, i no gat wan narafala man samtaem we i bin soem bigfala lav olsem. ?From wanem yumi talem olsem?

⁵ Baebol i talem se Jisas i “fasbon long ol samting we God i wokem.” (Kolosi 1:​15, NW ) Tingbaot​—Pikinini blong Jeova i laef bifo we skae mo wol i stap. ?Papa mo Pikinini blong hem, tufala i stap tugeta hamas yia? Long saed blong skae mo wol, ol sayentis oli talem se maet oli stap 13 bilian yia finis. !Sipos tok ya i stret, be i no naf yet blong soemaot hamas yia fasbon Pikinini blong Jeova i bin laef! ?Hem i mekem wanem wok long ol yia ya? Pikinini ya i glad tumas blong stap olsem “nambawan man blong wok” blong Papa blong hem. (Ol Proveb 8:​30, NW; Jon 1:3) Jeova mo Pikinini blong hem tufala i wok tugeta blong mekem olgeta narafala samting. !Tufala i gat plante bigfala gladtaem tugeta, tufala i hapi tumas! ?Hu long yumi i rili kasem save long bigbigfala lav we tufala i mas gat long tufala afta we tufala i stap tugeta blong wan longlongfala taem olsem? I klia se Jeova God mo Pikinini blong hem tufala i lavlavem tufala long fasin we i strong moa i bitim lav we ol narafala man oli gat samtaem.

6. ?Taem Jisas i tekem baptaes, olsem wanem Jeova i soemaot filing we hem i gat long Pikinini blong Hem?

⁶ Nating se i olsem, Jeova i sanem Pikinini blong hem i kam long wol ya nao hem i bon olsem wan bebi. Yes, blong bitim 30 yia, Jeova i mas lego Pikinini ya we hem i lavem tumas. Hemia i min se tufala i no moa save stap tugeta oltaem olsem bifo. Jeova i stap long heven, Jisas i stap long wol. Jeova i wajem gud Jisas, i intres tumas long hem taem i stap gruap i kam wan man we i stret gud olgeta. Taem Jisas i gat 30 yia, hem i  tekem baptaes. Long taem ya, voes blong Papa blong hem stret i kamaot long heven i se: “Hemia pikinini blong mi, we mi lavem hem tumas. Mi mi glad tumas long hem.” (Matiu 3:17) !Wetem strong bilif, Jisas i mekem olgeta samting we ol profet oli bin talem, olgeta samting we Papa blong hem i askem long hem blong mekem! !Yumi save se Papa blong hem i mas glad tumas long hem!​—Jon 5:36; 17:4.

7, 8. (a) ?Wanem ol nogud samting we oli hapen long Jisas long Nisan 14, 33 K.T., mo ol samting ya oli mekem wanem long Papa blong hem we i stap long heven? (b) ?From wanem Jeova i letem Pikinini blong hem i safa mo i ded?

⁷ Be, long Nisan 14, 33 K.T., * wan giaman fren blong Jisas i putum hem long han blong ol enemi blong hem, nao wan bigfala hip blong ol man we oli kros tumas oli kam holem Jisas. ?Wanem filing blong Jeova taem hem i luk samting ya? ?Jeova i harem olsem wanem, taem oli jikim Jisas, oli spet long hem, mo oli faetem hem? ?Taem oli wipim Jisas gogo ol skin long baksaed blong hem i brobrok mo blad i ron, yu ting se samting ya i mekem wanem long filing blong Jeova? ?Taem oli nilim han mo leg blong hem long wan pos, mo oli letem hem i hang long ples ya we ol man oli tok nogud long hem, Jeova i harem olsem wanem? ?Wanem filing blong Papa taem hem i harem Pikinini ya we hem i lavem tumas, i kraeaot long hem from we i harem i soa bitim mak? ?Wanem filing blong Jeova taem Jisas i pulum laswan win blong hem, nao Pikinini ya we Hem i wokem faswan, we i sas tumas long Hem, mo we i bin stap longlongtaem wetem hem, i no moa stap?​—Matiu 26:​14-16, 46, 47, 56, 59, 67; 27:​26, 38-44, 46; Jon 19:1.

⁸ Jeova i gat filing. Taswe, i no gat tok we i naf blong eksplenem olsem wanem Jeova i harem nogud taem Pikinini blong hem i ded. Be i gat tok blong soem wanem samting i pulum Jeova blong letem trabol ya i kam long Jisas. ?From wanem Papa ya i rere blong letem Pikinini blong hem i ded, nating se samting ya i mekem Jeova i harem nogud tumas? Jeova i soemaot wan nambawan risen long Jon 3:16. Vas ya blong Baebol i impoten tumas, taswe plante man oli singaotem vas ya se wan smol Gospel. Hem i se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Taswe, samting we i pulum God hemia lav nomo. I no gat wan man samtaem we i bin soemaot bigfala lav olsem.

?Olsem Wanem Jeova i Mekem Yumi Sua Long Lav Blong Hem?

9. ?Setan i traehad blong mekem yumi ting se Jeova i gat wanem tingting long yumi, be Jeova i mekem wanem promes long yumi?

⁹ Be, i gat wan impoten kwestin i stanap: ?God i lavem yumi wanwan? Samfala oli agri se God i lavem olgeta man, olsem Jon 3:16 i talem. Be oli ting se, ‘God i no save lavem mi.’ Yes, Setan i stap traehad blong mekem yumi bilif se Jeova i no lavem yumi mo yumi no sas long ae blong hem. Be, nomata sipos yu ting se i no gat man we i save lavem yu mo yu yu gud blong nating nomo, Jeova i promes long ol man we oli stap tru long hem se wanwan long olgeta oli sas long ae blong hem.

10, 11. ?Olsem wanem pijatok blong Jisas long saed blong ol smosmol pijin, i soemaot se yumi sas long ae blong Jeova?

¹⁰ Yumi luk samting ya long tok blong Jisas long Matiu 10:​29-31. Hem i tokbaot olsem wanem ol disaepol blong hem oli sas, i se: “Ol smosmol pijin ya we man i stap salem sikisti vatu long tu, be sipos Papa blong yufala i no letem, i no gat wan long olgeta we i save foldaon long graon. Yufala i luk. Ol hea blong hed blong yufala, be hem i kaontem evriwan. From samting ya, yufala i no fraet. Long fes blong hem, yufala i gud moa, i winim plante smolfala pijin ya.” Tingbaot mining blong ol tok ya blong Jisas long tingting blong ol man we oli stap lesin long hem, long faswan handred yia.

¹¹ Long taem bifo, praes blong smol pijin ya we Jisas i tokbaot i daon moa long praes blong ol narafala pijin we oli salem blong man i kakae. Blong sikiste vatu nomo, man i save pem tu smol pijin ya. Be Luk 12:​6, 7 i talem se, biaen, Jisas i gohed moa, i talem se sipos wan  man i pem wan handred twanti vatu, hem i save karem faef pijin, i no fo. Namba faef pijin, oli givim nomo long ol man, olsem we i no gat praes nating. Maet ol pijin ya oli nating nomo long ae blong ol man. ?Be olsem wanem long ae blong Man we i Wokem olgeta? Jisas i talem se: “I no gat wan long olgeta we God i fogetem samtaem.” Yes, namba faef pijin ya we oli givim nomo, be God i no fogetem hem tu. Naoia, maet yu stat blong kasem save long bigfala poen we Jisas i stap tokbaot. ?Sipos wan smosmol pijin i sas long ae blong Jeova, olsem wanem long wan man? !Hem i mas sas moa! Jisas i talem se, Jeova i save evri samting long saed blong yumi. !Yes, olgeta hea long hed blong yumi, be hem i kaontem evriwan!

12. ?From wanem yumi sua se Jisas i no bitim mak long tok blong hem taem hem i talem se God i stap kaontem ol hea long hed blong yumi?

¹² Maet samfala oli talem se Jisas i bitim mak long tok blong hem long ples ya. Be, traem tingbaot laef bakegen long ded. !Blong wokem yumi bakegen, Jeova i mas save evri smosmol samting long saed blong yumi! Hem i rimemba ol smosmol samting ya from we yumi sas long ae blong hem. Mo hem i rimemba tu ol fasin we yumi gat taem yumi bon we oli mekem se yumi defren long ol narafala man, wetem ol samting we oli stap long memori blong yumi mo we oli hapen long olgeta yia blong laef blong yumi. Taem yumi skelem bigfala wok ya wetem wok blong kaontem ol hea long hed blong yumi, ating kaontem ol hea i isi lelebet, nating se yumi gat samwe long 100,000 hea evriwan long hed blong yumi. !Tru ya, ol tok blong Jisas oli nambawan blong mekem yumi sua se Jeova i rili kea long yumi wanwan!

13. ?Olsem wanem stori blong King Jehosafat i soemaot se nating we yumi mestem plante taem, Jeova i stap lukaot ol gudfala fasin blong yumi?

¹³ Baebol i talemaot wan samting moa we i mekem yumi sua se Jeova i lavem yumi. Hem i lukaot ol gudfala fasin blong yumi mo i tinghae long olgeta. Traem tingbaot gudfala King Jehosafat. Wan taem, king ya i mekem wan krangke samting, nao profet blong Jeova i talem long hem se: “!Ol samting ya we yu yu mekem i mekem Hae God i kros tumas long yu!” !King ya i mas fraet taem i harem tok ya! Be, mesej blong Jeova i no finis yet. Hem i gohed se: “Be i gud we i gat samfala samting we yu stap mekem we oli gud.” (2 Kronikel 19:​1-3) Yes, Jeova i kros long man ya mo i stret tu we hem i kros, be kros blong hem i no mekem se hem i no moa save luk ‘samfala samting we oli gud’ long Jehosafat. ?Yu yu harem gud blong save se, nating we yu mestem plante taem, be God i stap lukaot ol gudfala fasin blong yu?

Wan God We i “Fogivim” Man

14. ?Taem yumi mekem wan sin, yumi harem olsem wanem, be olsem wanem yumi save kasem fogif blong Jeova?

¹⁴ Taem yumi mekem wan sin, yumi harem nogud, yumi sem, mo tingting blong yumi i save foldaon. From samting ya, maet yumi ting se neva bambae yumi naf blong mekem wok blong Jeova. Be yumi mas tingbaot se, Jeova i save “fogivim” man we i mekem sin. (Ol Sam 86:5) Yes, sipos yumi tanem tingting blong yumi from sin blong yumi mo yumi traehad blong no mekem sin ya bakegen, yumi save kasem fogif blong Jeova. Traem luk olsem wanem Baebol i tokbaot nambawan fasin ya we i joen wetem lav blong Jeova.

15. ?Jeova i stap tekemaot ol sin blong yumi oli go longwe olsem wanem?

¹⁵ Long wan Sam, Deved i talem wan klia pijatok blong eksplenem fasin blong Jeova blong fogivim man. Hem i se: “Ol sin ya blong yumi, hem i stap tekemaot olgeta i go longwe we longwe long yumi, olsem we saed long is i stap longwe long saed long wes.” (Mifala nomo i putum narafala raeting ya; Ol Sam 103:12) ?Saed long is i longwe olsem wanem long saed long wes? Oltaem saed long is i ples we i farawe moa long saed long wes, neva tufala saed ya i save joen wanples. Wan man we i stap stadi long Baebol i talem mining blong vas ya se “longwe we i longwe, olsem laswan ples we yumi save tingbaot.” Tok ya we God i pulum Deved blong raetem, i stap talem se taem Jeova i fogivim yumi, hem i tekemaot ol sin blong yumi oli go longwe long yumi, long laswan ples we yumi save tingbaot.

16. ?Taem Jeova i fogivim yumi from ol sin blong yumi, from wanem yumi save sua se, biaen hem i luk yumi olsem wan klin man?

¹⁶ ?Samtaem yu bin traem blong brasemaot wan mak long wan waet klos? Nating se yu brasem gud blong longtaem, ating yu save luk mak ya smol yet. Be, makem gud olsem wanem Jeova i tokbaot fasin fogif blong hem. Hem i se: ‘Sipos ol sin blong yufala oli red we i red, be bambae oli save kam waet olsem sno. Sipos oli red we i pepol lelebet, be bambae oli save kam waet olsem hea blong sipsip.’ (Aesea 1:​18, NW ) Tok ya “red we i red” i soem wan kala we i strong. * Tok ya ‘red we i pepol lelebet’ i soem wan dak kala we oli yusum blong pentem kaliko long taem bifo. Nating se yumi traehad  fulwan, yumi neva save tekemaot mak ya blong sin long yumi. Be Jeova i save tekemaot ol sin we oli red we i red no oli red we i pepol lelebet, mo i save mekem oli kam waet olsem sno no olsem hea blong sipsip we oli no pentem. Taswe, taem Jeova i fogivim yumi from sin blong yumi, yumi no nid blong harem se mak blong sin ya bambae i stap long yumi go kasem we yumi ded.

17. ?Long wanem fasin Jeova i sakem ol sin blong yumi oli gobak biaen long baksaed blong hem?

¹⁷ Long taem bifo, Jeova i tekemaot wan sik blong Hesekia we klosap hem i ded from. Nao Hesekia i mekem wan gudfala singsing blong talem tangkiu long Jeova. Hem i se: “Yu tekemaot ol sin blong mi, yu sakem olgeta oli gobak biaen long baksaed blong yu.” (Aesea 38:​17, NW ) Vas ya i talem se taem wan man i tanem tingting blong hem from sin we hem i mekem, Jeova i tekem ol sin blong man ya, i sakem olgeta oli gobak biaen long baksaed blong Hem. Long ples ya, Hem i no moa save luk ol sin ya, mo i no moa tingbaot olgeta tu. Wan buk blong eksplenem Baebol i talem bigfala tingting insaed long vas ya se: “Yu yu mekem [ol sin blong mi] olsem we oli no bin hapen.” ?Yu yu harem gud blong save samting ya?

18. ?Olsem wanem profet Maeka i soem se taem Jeova i fogivim yumi, hem i tekemaot blong olwe sin we yumi bin mekem?

¹⁸ Taem profet Maeka i stap talemaot promes ya se ol samting bambae oli kamgud bakegen, hem i soemaot strong bilif se Jeova bambae i fogivim ol man blong hem we oli tanem tingting blong olgeta from ol sin blong olgeta. Hem i se: “Hae God. I no gat wan narafala god we i olsem yu. Bambae yu save fogivim olgeta we oli stap kamaot biaen long mifala, . . . yu sakem [sin blong mifala] i godaon olgeta long medel solwota.” (Maeka 7:​18, 19) Traem tingbaot wanem i stap long tingting blong ol man we oli ridim tok ya long taem bifo. ?Long taem we oli raetem Baebol, i gat janis se ol man oli save faenem bakegen samting we oli sakem i go “long medel solwota”? Nogat. Taswe, ol tok blong Maeka oli soemaot se taem Jeova i fogivim man, hem i tekemaot blong olwe, sin we hem i bin mekem.

‘God i Kaen Tumas Mo i Sore Long Yumi’

19, 20. (a) ?Wanem mining blong Hibru tok ya we oli tanem i kam “fasin sore”? (b) ?Olsem wanem Baebol i tokbaot filing we wan mama i gat long bebi blong hem blong tijim yumi long saed blong fasin sore blong Jeova?

¹⁹ Fasin sore i wan narafala fasin we i joen wetem lav blong Jeova. ?Wanem ya fasin sore? Long Baebol, plante tok long lanwis Hibru mo Grik oli givim tingting ya blong sore. Eksampol, Hibru tok ya, ra·chamʹ, we Jeova i yusum blong tokbaot hem wan, i klosap sem mak long tok we i minim “basket blong pikinini,” mo i givim tingting long saed blong “sore we wan mama i gat long pikinini blong hem.”

²⁰ Blong tijim yumi long fasin sore blong Jeova, Baebol i tokbaot filing we wan mama i gat long pikinini blong hem. Aesea 49:15 i talem se: “?Yufala i ting se wan woman i save fogetem pikinini blong hem we i stap titi yet? ?Yufala i ting se hem i no save gat sore [ra·chamʹ ] long pikinini we hem nomo i bonem? Maet i gat woman we i save mekem olsem, be mi bambae mi no save fogetem yufala samtaem.” (The Amplified Bible) I had blong bilivim se wan mama i save fogetem blong givim titi long bebi blong hem mo lukaotgud long hem. Wan bebi i no save mekem wan samting hem wan. Long dei mo long naet, hem i nidim we mama blong hem i lukaot long hem. Be, sore tumas, i  gat sam mama we oli tanem baksaed long pikinini blong olgeta, antap moa, long taem blong yumi we ‘laef i strong tumas.’ (2 Timoti 3:​1, 3) Be, Jeova i talem se, “Mi no save fogetem yufala samtaem.” Kaen fasin mo sore we Jeova i gat long ol man blong hem, i bigwan tumas, i bitim sore we wan mama i gat long bebi blong hem​—wan fasin we yumi ting se i kaen moa i winim ol narafala fasin.

21, 22. ?Laef blong ol man Isrel i olsem wanem long Ijip, mo Jeova i mekem wanem taem oli krae long hem?

²¹ ?Olsem wanem Jeova i stap soemaot sore, olsem wan mama we i lavem bebi blong hem tumas? Fasin ya i kamaot klia long ol samting we Jeova i mekem long ol man Isrel bifo. Long en blong ol yia 1500 B.K.T., * plante milian man Isrel oli stap wok slef long Ijip. Ol man Ijip oli mekem i strong tumas long olgeta. (Eksodas 1:​11, 14) Taem trabol ya i mekem ol man Isrel oli harem nogud tumas, oli krae long Jeova. ?God ya we i gat bigfala sore hem i mekem wanem?

²² Ol krae blong olgeta oli tajem hat blong Jeova. Hem i se: “Mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta ya we oli stap long Ijip, . . . mi mi save finis we oli harem nogud tumas mo, oltaem mi stap tingting long olgeta.” (Eksodas 3:7) Taem Jeova i lukluk ol hadtaem we ol man blong hem oli kasem, mo i harem krae blong olgeta, samting ya i tajem filing blong hem, mo hem i sore long olgeta. Jeova i wan God we i harem save filing blong narafala. Mo fasin ya​—blong harem save soa we narafala i gat​—i klosap nomo long fasin sore. Be, Jeova i no harem nomo se hem i sore long ol man blong hem. Sore ya i pulum hem blong mekem wan samting blong givhan long olgeta. Aesea 63:9 i talem se: “Yu yu lavem mifala, mo yu gat sore long mifala, nao yu kam sevem mifala.” Hem i yusum “strong han” blong hem blong sevem ol man Isrel oli aot long Ijip. (Dutronome 4:34, NW ) Biaen, hem i mekem wan merikel blong givim kakae long olgeta, mo i karem olgeta oli go long wan gudfala kantri we i kam kantri blong olgeta.

23. (a) ?Olsem wanem tok blong Ol Sam i mekem yumi sua se Jeova i stap tingbaot yumi wanwan? (b) ?Jeova i mekem wanem blong givhan long yumi?

²³ Jeova i soem sore long ol man blong hem olsem wan grup. Be i no hemia nomo. God blong yumi we i gat bigfala lav, hem i tingbaot yumi wanwan. Hem i save gud ol samting we oli mekem yumi harem nogud. Man blong raetem Ol Sam i talem se: “Hae God i stap lukluk long ol stret man, i stap lesin blong harem krae blong olgeta. Hem i stap klosap long ol man we tingting blong olgeta i kam nogud, i stap sevem ol man we tingting blong olgeta i foldaon olgeta.” (Ol Sam 34:​15, 18) ?Olsem wanem Jeova i stap givhan long yumi wanwan? Maet hem i no tekemaot trabol we i stap mekem yumi harem nogud. Be hem i mekemrere plante samting blong givhan long ol man we oli krae long hem. Tok blong hem, Baebol, i givim ol waes advaes we i save givhan bigwan long yumi. Hem i putumap ol man we oli bigman long saed blong spirit, blong oli lukaot long kongregesen. Olgeta ya oli traehad blong soemaot sore blong God, taem oli givhan long ol narafala. (Jemes 5:​14, 15) Jeova, hem i “stap ansa long ol prea,” mo hem i givim “Tabu Spirit long ol man we oli askem long hem.” (Ol Sam 65:2; Luk 11:13) Olgeta samting ya oli soemaot se “God blong yumi, hem i kaen tumas mo hem i gat sore long yumi.”​—Luk 1:78.

24. ?From we Jeova i lavem yu, bambae yu yu mekem wanem long hem?

²⁴ ?Yu yu harem gud tumas taem yu tingting dip long lav we Papa blong yumi long heven i gat long yumi? Long faswan stadi, yumi bin tokbaot we Jeova i soemaot paoa, stret fasin, mo waes blong hem long ol rod we oli soem lav mo oli mekem i gud long yumi. Long stadi ya, yumi luk se Jeova i soemaot lav blong hem stret long ol man​—mo long yumi wanwan​—long plante nambawan rod. Naoia, i gud we yumi wanwan i tingting long kwestin ya: ‘?From we Jeova i lavem mi, bambae mi mi mekem wanem long hem?’ I gud we yu yu lavem hem long olgeta hat, olgeta tingting, olgeta laef, mo olgeta paoa blong yu. (Mak 12:​29, 30) I gud we fasin blong laef blong yu evri dei i soemaot se yu wantem tumas blong kam klosap moa long Jeova. !Nao Jeova, God ya we hem i lav, bambae i kam stap klosap long yu​—gogo i no save finis!​—Jemes 4:8.

[Ol Futnot]

?Yu Yu Tingbaot?

• ?Olsem wanem yumi save se fasin lav hem i faswan bigfala fasin blong Jeova?

• ?From wanem yumi save talem se taem Jeova i sanem Pikinini blong hem i kam blong safa mo blong ded from yumi, hemia i soemaot moa lav i bitim eni narafala samting we wan man i bin mekem samtaem?

• ?Olsem wanem Jeova i mekem yumi sua se hem i lavem yumi wanwan?

• ?Baebol i talem wanem klia tok blong eksplenem fasin blong Jeova blong fogivim man?

[Kwestin]

[Tok blong pija long pej 15]

“God . . . i givim stret Pikinini blong hem”

[Tok blong pija long pej 16]

“Yufala i gud moa, i winim plante smolfala pijin ya”

[Credit Line]

© J. Heidecker/VIREO

[Tok blong pija long pej 18]

Filing we wan mama i gat long bebi blong hem i save tijim yumi long fasin sore blong Jeova