“Hem i Fulumap Wan Emti Ples Long Hat Blong Mi”

“TANGKIU tumas long naesfala presen ya Draw Close to Jehovah. Hem i fulumap wan emti ples long hat blong mi​—hemia se, mi nidim blong haremsave se Jeova i lavem mi mo se mi mi sas long ae blong hem. Naoia, mi harem se mi klosap moa long Jeova mo gudfala Pikinini blong hem. Mi wantem talemaot buk ya long olgeta man mo givim long olgeta we mi laekem olgeta tumas.” Hemia nao tok blong wan Witnes blong Jeova long saed blong niufala buk ya we i gat 320 pej blong hem. Buk ya i kamaot long Distrik Asembli “Ol Man Blong Talemaot Kingdom We Oli Wok Strong” we ol Witnes blong Jeova oli mekem raon long wol long yia 2002/03. Bambae yumi tokbaot sam samting long niufala buk ya mo from wanem oli wokem.

Sam Samting Long Niufala Buk Ya

?Wanem i stap insaed long niufala buk ya? !Olgeta save we i stap long tufala stadi blong Wajtaoa ya​—wetem plante moa save bakegen! Buk ya i gat 31 japta blong hem, wanwan japta oli longfala olsem wan stadi blong Wajtaoa. Afta long fastok blong hem mo japta wan, tu, mo tri, buk ya i seraot long fo haf we oli tokbaot fo stamba fasin blong Jeova. Evri haf i stat wetem sam sot tok blong eksplenem wan long ol fo fasin ya blong Jeova. Nao ol japta long haf ya oli tokbaot olsem wanem Jeova i stap soemaot fasin ya. Long ol fo haf ya wanwan, i gat wan japta long saed blong Jisas. ?From wanem? From we Jisas i talem se: “Man we i luk mi, hem i luk Papa blong mi.” (Jon 14:9) Jisas i stret pija blong Jeova. From samting ya, hem i soemaot klia ol fasin blong God. Ol fo haf ya wanwan oli finis wetem wan japta we i tijim yumi olsem wanem blong folem Jeova blong soemaot fasin we haf ya i stap tokbaot. Niufala buk ya i tekem sam vas long evri buk blong Baebol, blong tokbaot ol fasin blong Jeova.

Buk ya Draw Close to Jehovah i gat sam spesel samting long hem tu. Stat long japta 2, olgeta japta oli gat wan bokis long olgeta we nem blong hem, “Tingting Dip Long Ol Kwestin Ya.” Ol vas mo kwestin long bokis ya oli no blong tingting bak long japta ya. Nogat. Oli blong pulum yu blong yusum Baebol blong tingting dip long samting we japta ya i tokbaot. I gud we yu ridim ol wanwan vas ya. Nao tingting dip long kwestin we i joen wetem, mo traem luksave olsem wanem yu save folem tok ya long laef blong yu. Fasin ya blong tingting dip i save mekem ol save ya i kasem hat blong yu, mo givhan long yu blong kam klosap moa long Jeova.​—Ol Sam 19:14.

Bifo we oli mekem ol pija long buk ya Draw Close to Jehovah oli stadi dip, nao oli wokem ol pija we oli save tijim yumi mo pulum yumi blong tekem aksin. Long ol seventin japta, i gat sam pej we naesfala pija i kavremap ful pej. Hemia ol pija blong samting we Baebol i tokbaot.

?From Wanem Oli Wokem Buk Ya?

?From wanem oli wokem buk ya Draw Close to Jehovah? Faswan risen, i blong givhan long yumi blong save Jeova moa. Olsem nao, bambae yumi wanwan i save fren moa wetem God.

?Yu yu save wan man we maet buk ya Draw Close to Jehovah bambae i givhan long hem? ?Maet wan Baebol stadi, no wan Kristin brata no sista we i no moa prij? ?Olsem wanem long yu wan? ?Yu ridim finis sam haf blong niufala buk ya? Sipos no, i gud we yu makemaot taem naoia blong stat. Tektaem blong tingting gud long ol tok we yu ridim. Mifala i hop se niufala buk ya bambae i givhan long yu blong kam klosap moa long Jeova God, nao bambae yu glad moa mo yu wok strong moa blong talemaot gud nius blong Kingdom long ol narafala.