Laef Stori

Safa Blong Mi i Godaon Taem Mi Givhan Long Narafala

JULIÁN ARIAS I TALEM STORI YA

Long 1988, taem mi gat 40 yia blong mi, i luk olsem se fiuja blong mi long saed blong wok i oraet nomo. Long taem ya mi mi wok olsem lokol daerekta blong wan bigfala kampani we i gat ol branj ofis blong hem long fulwol. Kampani ya i givim long mi wan trak we i flas gud, wan gudfala pei, mo wan bigfala ofis long medel blong Madrid, Spen. Mo tu kampani ya i talem long mi se bambae oli save putumap mi olsem nasnal daerekta. Long taem ya, mi no save se laef blong mi bambae i jenis olgeta.

WAN dei long 1988, dokta blong mi i talem long mi se mi gat sik ya multiple sclerosis, we i no gat meresin blong hem. Tingting blong mi i foldaon bigwan. Biaen, taem mi ridim wan buk we i eksplenem ol trabol we man i kasem from multiple sclerosis, mi harem se mi fraet. * I luk olsem se stat long taem ya, mi harem se mi laef nomo wetem fraet se wan nogud samting i save hapen long mi eni taem. ?Olsem wanem bambae mi save lukaot long waef blong mi, Milagros, mo long pikinini boe blong mi we i gat tri yia blong hem, nem blong hem Ismael? ?Olsem wanem bambae mifala i laef wetem trabol ya? Mi no save yet ansa long ol kwestin ya, be wan narafala problem i kasem mi.

Samwe wan manis afta we dokta i talem long mi se mi gat sik ya, bos blong mi i singaot mi long ofis blong hem. Hem i talem long mi se kampani i nidim ol man we oli givim wan “gudfala pija” long kampani. Mo i talem se wan man we i gat wan sik we i spolem bodi blong hem​—nating se sik ya i stat nomo​—hem i no save givim wan gudfala pija. Taswe long  sem taem ya, bos blong mi i sakem mi long wok. !Wantaem nomo, mi lusum wok blong mi!

Taem mi stap wetem famle blong mi, mi traem blong mekem olsem se mi mi strong. Be mi wantem tumas blong stap mi wan nomo, blong mi save tingbaot olgeta samting ya we oli kamaot long laef blong mi, mo tingting dip long fiuja blong mi. Mi traem blong faet agensem nogud filing ya we i kam antap mo i mekem tingting blong mi i foldaon. Samting we i mekem mi mi harem nogud moa, hemia se wantaem nomo kampani blong mi i ting nating long mi.

Mi Sik Be Mi Kasem Paoa

Mi tangkiu we, taem mi fesem ol traem ya, i gat defdefren samting we oli givim paoa long mi. Samwe 20 yia bifo, mi kam wan Witnes blong Jeova. Taswe taem mi kasem ol traem ya, mi prea long Jeova wetem fulhat blong mi blong tokbaot ol filing mo ol wari blong mi long saed blong fiuja. Waef blong mi, we i wan Witnes tu, i stap oltaem blong givim strong tingting long mi mo sam gudfala fren blong mi oli sapotem mi taem oli soem kaen fasin mo fasin sore long mi.​—Ol Proveb 17:17.

Filing ya se mi gat sam wok blong mekem blong givhan long ol narafala i halpem mi tu. Mi wantem lukaot gud long boe blong mi, tijim hem, plei wetem hem, mo trenem hem long wok blong prij. Taswe mi no save letem tingting blong mi i foldaon olgeta. Antap long samting ya, mi mi wan elda long wan kongregesen blong ol Witnes blong Jeova, mo ol Kristin brata sista blong mi oli nidim help blong mi. ?Olsem wanem bambae mi givim wan gudfala eksampol long olgeta, sipos mi letem ol trabol blong mi i spolem bilif blong mi?

Bodi blong mi i jenis, mo laef blong mi tu long saed blong mane i jenis​—sam samting oli kam moawas, be sam narafala samting oli kam moa gud. Wan dei mi harem wan dokta we i talem se: “Sik i no spolem wan man be i jenisim man.” Mi lanem we sam long ol jenis ya oli gud.

Faswan samting, ‘nil aranis ya we i stikim mi’ i halpem mi blong kasem save gud ol trabol blong ol narafala sikman mo mi haremsave ol filing blong olgeta. (2 Korin 12:7) Naoia mi save gud mining blong ol tok ya long Ol Proveb 3:5 we i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu.” Be samting we i moa impoten se ol traem ya oli tijim mi long samting we i rili impoten long laef, wanem samting i mekem man i haremgud, mo i soem se laef blong mi i no blong nating. Mi save mekem plante samting yet long ogenaesesen blong Jeova. Mi luksave mining blong ol tok ya blong Jisas se: “Man we i stap givim presen i go, hem i save harem gud moa, i winim man we i stap kasem presen blong hem.”​—Ol Wok 20:35.

Wan Niufala Laef

Smoltaem afta we ol dokta oli faenemaot sik blong mi, ol Witnes oli ogenaesem wan miting long Madrid, mo oli singaot sam Kristin volontia, wetem mi tu, blong oli tijim mifala long fasin blong wokgud bitwin ol dokta mo ol Witnes we oli sik. Biaen, oli ogenaesem grup blong ol volontia ya i kam pat blong Komiti We i Toktok Wetem Ol Dokta. Miting ya i kam long stret taem blong hem. Mi faenem wan wok we i moagud, wan wok we i mekem mi mi haremgud moa bitim eni wok blong bisnesman.

Long miting ya, mifala i lanem se ol niufala Komiti We Oli Toktok Wetem Ol Dokta oli mas go visitim ol hospital, askem ol kwestin long ol dokta, mo eksplenem sam samting long ol man we oli wok long hospital, blong wokem rod blong ol dokta oli save wokgud wetem mifala mo blong blokem ol problem we oli save kamaot samtaem. Ol komiti ya oli givhan long ol Witnes blong oli faenem ol dokta we oli rere blong katem man be oli no yusum blad. Be mi mi no gat save long meresin, taswe mi mas lanem plante samting olsem ol teknikol tok we ol dokta oli yusum, ol rul blong ol dokta, mo olsem wanem wok i gohed insaed long wan hospital. Afta long miting ya, mi kamhom olsem wan niufala man we i gat olgeta tul we hem i nidim blong mekem wan niufala wok we i nambawan.

 Mi Glad Blong Visitim Ol Dokta Long Hospital

Nating se sloslo sik blong mi i spolemgud bodi blong mi, ol wok blong mi olsem wan memba blong Komiti We i Toktok Wetem Ol Dokta oli kam antap. From we mi sik bigwan, mi no save wok blong winim mane, mo gavman i stap givim mane long mi evri manis. Samting ya i mekem se mi gat taem blong go toktok wetem ol dokta long ol hospital. Nating se wanwan taem, storian we mi gat wetem ol dokta ya i mekem mi mi harem nogud, be plante taem mi faenem i isi blong mekem ol visit ya, mo oli karem gudfala frut. I tru se naoia mi mas stap oltaem long wan wiljea, be samting ya i no blokem mi. Wan narafala memba blong komiti i kam wetem mi oltaem. Mo antap long samting ya, ol dokta oli stap toktok oltaem long ol man we oli stap long wiljea, mo i luk olsem se samtaem, oli lesin long mi wetem moa respek from we oli luksave ol traehad we mi mekem blong kam visitim olgeta.

Long ol ten yia we oli pas finis, mi bin visitim plante handred dokta. Sam dokta oli bin rere blong givhan long mifala stat long faswan visit blong mifala. Dr. Juan Duarte, i wan dokta blong katem hat we i stap long Madrid, hem i rere oltaem blong respektem posisen blong man we hem i mas katem. Hem i wan long olgeta ya we oli rere wantaem nomo blong wok wetem mifala. Stat long taem ya, hem i operetem bitim 200 Witnes we oli kamaot long defren ples blong Spen, mo hem i no yusum blad. Taem ol yia oli pas, plante moa dokta oli stat blong operetem man be oli no yusum blad. Ol visit we mifala i mekem oltaem long ol dokta i givhan blong kasem gudfala risal ya. Be wan narafala samting we i givhan tu, se save we ol dokta oli gat long wok blong olgeta i kam antap mo oli gat gudfala risal taem oli operetem man be oli no yusum blad. Mo mifala i save we Jeova i bin blesem ol traehad blong mifala.

Wan samting i leftemap tingting blong mi, hemia fasin blong wok blong sam dokta blong hat we oli wok moa blong tritim ol pikinini. Blong tu yia, mifala i visitim wan tim blong tu dokta blong katem hat wetem ol man we oli wok wetem olgeta, hemia olgeta we oli stap mekem man i slip long taem blong operesen. Mifala i givim long olgeta sam buk we oli eksplenem olsem wanem sam narafala dokta oli wok. Ol traehad blong mifala oli kasem mak blong olgeta long 1999, taem oli holem wan Medikol Konfrens ya we oli kolem Rod Blong Operetem Hat Long Pikinini. Tufala dokta ya​—wetem wan narafala dokta blong Inglan we hem tu i rere blong no yusum blad long operesen—oli mekem wan operesen we i no isi nating. Oli mas katem wan smol paep we i mekem blad i ron i goaot long hat blong wan bebi, we papa mama blong hem oli Witnes blong Jeova. * Mi serem glad blong papa mama blong bebi ya taem wan long ol dokta ya i kamaot long rum we oli katem bebi, i talem se operesen i finis gud, mo oli bin respektem tingting blong famle we oli no wantem blad. Naoia, tufala dokta ya oli agri blong katem ol Witnes we oli sik, long evri ples long Spen.

Samting we i rili mekem mi mi haremgud taem ol samting olsem oli hapen, hemia se mi luksave we mi halpem ol Kristin brata blong mi. Plante taem ol brata oli singaot Komiti We i Toktok Wetem Ol Dokta long wan hospital, from we oli fesem wan bigbigfala traem long laef blong olgeta. Ol dokta we oli mas katem olgeta long ol lokol hospital oli no wantem no maet oli no save katem olgeta, sipos oli no yusum blad. Be taem ol brata oli save se i gat sam dokta long Madrid we oli save katem man be oli no yusum blad, nao ol brata oli harem gud tumas. Mi luk finis wan  brata we fes blong hem i jenis olgeta, fastaem hem i wari bigwan, be biaen hem i kam kwaet, jes from we mifala i stap wetem hem long hospital.

Ol Jaj Mo Ol Rul Blong Ol Dokta

Long ol yia we oli jes pas, ol memba blong Komiti We i Toktok Wetem Ol Dokta oli visitim ol jaj tu. Taem mifala i visitim ol jaj, mifala i givim wan buk long olgeta, nem blong hem Family Care and Medical Management for Jehovah’s Witnesses. Buk ya i blong eksplenem long ol haeman from wanem mifala i no tekem blad, mo ol defren rod we i stap finis blong hilim ol Witnes we oli sik be oli no wantem tekem blad. I impoten tumas blong mekem ol visit ya, from we bifo, ol jaj long Spen oli stap givim raet long ol dokta blong oli save givim blad long ol sikman, nating se ol sikman ya oli no wantem.

Ol ofis blong ol jaj oli bigbigwan, mo taem mi mekem faswan visit blong mi longwe mi harem olsem se mi mi nating nomo, taem mi pas long ol bigfala ples ya long wiljea blong mi. Mo samting we i mekem mi mi harem nogud moa, hemia taem mi gat wan smol aksiden, nao wiljea blong mi i kafsaed mo mi foldaon long tufala ni blong mi. Sam jaj mo sam loea we oli luk samting we i hapen oli kam givhan long mi wetem kaen fasin, be mi harem se mi sem bigwan long fored blong olgeta.

Ol jaj oli no savegud from wanem mifala i kam visitim olgeta, be nating se i olsem, bighaf blong olgeta oli lesingud long mifala. Faswan jaj we mi visitim, hem i bin tingbaot posisen blong mifala long saed blong blad, mo hem i wantem toktok longtaem moa wetem mifala. Long nekis visit blong mifala, hem wan i pusum mi long wiljea blong mi i go long ofis blong hem, mo i lesingud long mifala. Ol gudfala risal we i kamaot from faswan visit ya oli pulum mi mo ol brata, blong winim fraet we mifala i gat fastaem, mo sot taem biaen sam gudfala frut oli kamaot bakegen.

Long semfala yia ya, mifala i givim buk ya Family Care long wan narafala jaj, we i welkamem gud mifala mo i mekem promes se bambae hem i ridim buk ya. Mi givim telefon namba blong mi long hem, sipos wan dei hem i nidim blong singaot mifala kwiktaem. Tu wik biaen, hem i ring blong talem long mifala se wan dokta i askem hem blong i givim raet long hem blong givim blad long wan Witnes we hem i mas katem. Jaj i talem long mifala se hem i wantem we mifala i halpem dokta ya, blong hem i faenem wan narafala rod blong katem Witnes ya, be tu blong hem i respektem tingting blong Witnes ya we i no wantem tekem blad. Mifala i no hadwok tumas blong faenem wan narafala hospital, mo ol dokta oli katem gud Witnes ya, oli no yusum blad. Jaj ya i glad tumas taem hem i harem nius blong operesen, mo i promes long mifala se sipos hem i gat wan narafala kes olsemia long fiuja, bambae hem i traem folem sem rod ya.

 Taem mi visitim ol dokta, plante taem mifala i tokbaot ol rul we ol dokta oli folem blong tritim wan sikman, from we mifala i wantem we ol dokta oli tingbaot ol raet mo tingting blong ol sikman taem oli tritim olgeta. Wan hospital long Madrid we i rere blong wok wetem mifala, i invaetem mi blong joen long wan kos we oli givim long saed blong ol rul blong ol dokta. Long kos ya, mi eksplenem posisen blong mifala we i stanap long Baebol long plante dokta we oli gat gud save long saed ya. Mo kos ya i givhan long mi blong mi kasem save se ol dokta oli mas tekem sam disisen we oli no isi nating.

Profesa Diego Gracia, wan long ol tija blong kos ya, hem i stap ogenaesem ol kos oltaem blong tijim ol dokta long Spen long saed blong ol rul blong dokta. Mo hem i sapotem fulwan se mifala i gat raet blong save mo jusum sipos mifala i wantem tekem blad no nogat. * Mifala i stap toktok oltaem wetem Profesa Gracia, mo hem i invaetem sam memba blong branj ofis blong ol Witnes blong Jeova long Spen, blong oli kam eksplenem posisen blong mifala long sam studen blong hem, we plante man oli ting se ol studen ya oli ol beswan dokta blong kantri.

Mi Mas Fesem Ol Trabol Blong Mi

I tru se nambawan wok ya we mi mekem blong givhan long ol brata sista blong mi, i no stretem ol prapa trabol blong mi. Sik blong mi i gohed blong spolem bodi blong mi. Nating se i olsem, mi glad we tingting blong mi i stap gud yet. Waef blong mi wetem boe blong mi, tufala i givhan long mi blong mi save gohed long ol wok blong mi. Sipos tufala i no sapotem mi, bambae mi no save mekem olsem. Mi no naf blong fasem ol baten blong traoses blong mi, no blong putum wan kot. Mi glad tumas blong prij evri Sarede wetem boe blong mi, Ismael, we i stap pusum wiljea blong mi, mekem se mi save toktok wetem ol man we oli stap long haos blong olgeta. Mo mi gohed yet blong lukaot long wok blong mi olsem wan elda long kongregesen.

Mi bin fesem sam hadtaem long ol 12 yia we oli jes pas. Samtaem, taem mi luk hadwok we sik blong mi i mekem long famle blong mi, mo filing ya i mekem mi mi soa moa i bitim soa blong sik hem wan. Mi save finis we famle blong mi i safa, nating se oli no talem wan samting. Sam taem bifo, mama blong waef blong mi i ded mo papa blong mi tu i ded, long sem yia nomo. Mo long semfala yia ya, mi no moa naf blong wokbaot, mi nidim wan wiljea. Papa blong mi, we i bin laef long haos wetem mifala, hem tu i gat wan narafala sik we i spolem bodi sloslo, gogo hem i ded. Milagros i bin lukaotgud long hem, mo hem i harem nogud from we i olsem se hem i stap lukluk samting we bambae i hapen long mi long fiuja.

Wan gudfala samting, se famle blong mifala i stap strong tugeta blong fesem ol traem ya. Mi lego jea blong daerekta long wan bigfala kampani blong stap long wan wiljea, be nating. Laef blong mi naoia i moagud, from we mi yusumgud laef ya blong givhan long ol narafala. Fasin blong givhan long ol narafala i save kwaetem soa, mo oltaem Jeova i holem promes blong hem blong givim paoa long yumi taem yumi nidim. Olsem Pol, mi save talem se: “Mi mi naf blong mekem evri samting long paoa blong Hemia we i stap givim paoa long mi.”​—Filipae 4:​13, NW.

[Ol Futnot]

[Bokis blong pija long pej 24]

Tingting Blong Boe Blong Hem

Papa blong mi i stanap strong mo hem i tingbaot ol gudfala samting, taswe hem i givim wan nambawan eksampol long mi, mo mi harem se mi mekem wan gudfala samting taem mi pusum hem long wiljea blong hem. Mi save se mi no save mekem olgeta samting we mi wantem mekem. Naoia mi mi wan yangfala nomo, be taem bambae mi gruap mi wantem wok olsem wan memba blong Komiti We i Toktok Wetem Ol Dokta. Mi savegud promes blong Baebol we i talem se fasin blong safa bambae i lus wan dei, mo mi save we plante brata sista oli safa moa i bitim mifala.

[Bokis blong pija long pej 24]

Tingting Blong Waef Blong Hem

Olsem wan waef, i no isi blong laef wetem wan man we i gat multiple sclerosis​—i no isi long saed blong tingting, filing, mo bodi tu. Mi mas skelgud long ol samting we mi plan blong mekem mo mi mas strong blong no letem tingting blong mi i wari tumas blong nating nomo long saed blong fiuja. (Matiu 6:34) Nating se i olsem, taem yu laef evri dei wetem wan man we i safa, samting ya i save mekem ol gudfala fasin blong yu oli kam antap. Mared blong mitufala i strong moa bitim bifo, mo mi kam klosap moa long Jeova. Ol laef stori blong sam narafala brata sista we oli fesem ol semfala traem oli leftemap tingting blong mi bigwan. Mi serem glad blong Julián long nambawan wok we hem i stap mekem blong givhan long ol brata, mo mi luksave we Jeova i neva lego mifala, nating se evri dei mifala i fesem sam niufala traem.

[Tok blong pija long pej 22]

Waef blong mi i givim paoa long mi

[Tok blong pija long pej 23]

Mi stap toktok wetem Dr. Juan Duarte, wan dokta blong katem man

[Tok blong pija long pej 25]

Mi wetem boe blong mi, mitufala i glad blong prij tugeta