Wan Kwestin

?From wanem Hibrus 2:14 (NW ) i tokbaot Setan olsem “hemia we i gat paoa blong mekem man i ded”?

Pol i minim se Setan, hem wan no tru long ol man we oli wok blong hem, i save mekem man i ded long saed blong bodi. Folem tingting ya, Jisas i tokbaot Setan i se: “Fasin blong hem we i stat bifo olgeta, hem i man blong kilim man.”​—Jon 8:44.

Be sam man oli mestem long mining blong Hibrus 2:​14, from we sam Baebol oli tanem tok ya i defren, oli talem se Setan i gat “paoa long ded” no i “holem paoa blong ded.” (King James Version; Revised Standard; New International Version; Jerusalem Bible; Baebol long Bislama) Wan translesen olsem i save minim se Setan i gat olgeta paoa blong kilim i ded eni man we hem i wantem. Be, i klia se samting ya i no tru. Sipos Setan i holem paoa blong ded, ating i no save gat wan man blong Jeova i laef tede from we Setan bambae i kilim olgeta evriwan oli ded longtaem finis.​—Jenesis 3:15.

Grik tok ya we oli tanem i kam “paoa long ded” long sam Baebol mo “paoa blong mekem man i ded” long New World Translation hem i “kraʹtos tou tha·naʹtou.” Tok ya tou tha·naʹtou i wan fasin blong talem “ded.” Stamba mining blong tok ya kraʹtos i minim “paoa.” Folem buk ya Theological Dictionary of the New Testament, tok ya i minim “wan paoa we [maet wan man] i gat, be i no minim se [man ya] i save yusum paoa ya.” Taswe, long Hibrus 2:​14, Pol i no talem se Setan i gat olgeta paoa long ded. Nogat. Be hem i soem we Setan i save, no hem i naf, blong mekem man i ded.

?Olsem wanem nao Setan i stap yusum paoa we hem i gat “blong mekem man i ded”? Long buk blong Job, yumi ridim wan stori we i no gat plante olsemia long Baebol. Stori ya i talem se Setan i yusum wan bigfala win blong kilim ol pikinini blong Job “oli ded.” Be makemgud we Setan i save mekem samting ya from we God i givim raet long hem blong mekem olsem, mo God i givim raet ya from we Hem i mas ansa long kwestin we Setan i stanemap. (Job 1:​12, 18, 19) Mo makemgud we Setan i no naf blong kilim Job. God i no givim raet long hem blong i mekem olsem. (Job 2:6) Samting ya i soem we, nating se sam samtaem Setan i naf blong mekem sam man blong God i ded, be yumi no mas fraet se bambae hem i kilim i ded yumi evriwan jes from we hem i wantem.

Setan i yusum sam man tu blong kilim narafala man i ded. Yes, plante Kristin oli ded from bilif blong olgeta. Sam brata oli ded from we sam grup blong man oli kros bitim mak mo oli kilim olgeta i ded, mo sam narafala brata oli kasem jajmen blong ded, folem oda blong sam haeman blong gavman no blong sam jaj we oli gat kruked fasin.​—Revelesen 2:13.

Mo tu samtaem Setan i mekem man i ded from we i pulum olgeta blong folem ol rabis tingting blong olgeta. Long taem blong Isrel bifo, profet ya Balam i givim advaes long ol man Moab blong oli pulum ol man Isrel blong “oli gowe long Hae God.” (Namba 31:16) From samting ya, bitim 23,000 man Isrel oli ded. (Namba 25:9; 1 Korin 10:8) Tede tu, sam Kristin oli foldaon long ol “giaman trik” blong Setan mo oli mekem ol rabis samting long saed blong seks no oli mekem wan samting we i agensem ol loa blong God. (Efesas 6:11) I tru se ol man olsem oli no lusum laef blong olgeta wantaem nomo. Be oli save lusum laef we i no save finis, nao long rod ya i olsem we Setan i mekem olgeta oli ded.

Nating se Setan i save mekem man i ded, yumi no mas wari bitim mak. Taem Pol i talem se Setan i gat paoa blong mekem man i ded, hem i talem tu se Kraes i ded blong “brekem paoa blong Setan . . . From we ol man oli fraet long ded, Setan i stap holemtaet olgeta oltaem long laef blong olgeta, olsem we oli slef nomo. Be Jisas i ded blong i tekemaot ol man ya oli no moa slef, oli fri.” (Hibrus 2:​14, 15) Yes, Jisas i pem ransom blong yumi mo i mekem ol man oli fri long sin mo ded.​—2 Timoti 1:10.

I tru se yumi harem nogud blong save we Setan i gat paoa blong mekem man i ded. Be yumi trastem Jeova, se Hem nao i gat paoa blong karemaot olgeta rabis samting we Setan mo ol man blong hem oli mekem. Jeova i promes long yumi we Jisas ya we i laef bakegen, hem bambae i “brekemdaon ol wok we Setan i mekem.“ (1 Jon 3:8) Wetem paoa blong Jeova, bambae Jisas i mekem ol dedman oli laef bakegen mo samting ya i kanselem paoa blong ded. (Jon 5:​28, 29) Biaen bambae Jisas i soemaot klia we paoa blong Setan i smol nomo taem i sakem hem long kalabus. Yes, Setan i kasem panis blong go lus blong olwe.​—Revelesen 20:​1-10.