Yumi Evriwan i Nidim Lav

NOMATA we man i yangfala no i olfala, i kamaot long wanem kantri, lanwis no laen, olgeta man evriwan oli nidim we narafala i lavem olgeta. Wan man i no rili hapi, sipos i no gat man i lavem hem. Wan man we i stadi long ol sik i talem se: “Lav mo fasin frengud i stamba blong ol samting we oli save mekem yumi sik no mekem yumi helti, mekem yumi harem nogud no mekem yumi hapi, mekem yumi safa no mekem soa i finis. Sipos i gat wan niufala meresin we i gat paoa olsem, klosap evri dokta long kantri bambae i givim meresin ya long ol sikman blong hem. Sipos wan dokta i no wantem givim meresin ya, i klia se hem i no mekemgud wok blong hem.”

Be, plante man tede, oli tinghae long mane, paoa, haenem, mo seks, i winim samting we ol man oli nidim moa, hemia blong gat ol gudfala fren we oli lavem olgeta. Yumi luk samting ya moa long ol stori long niuspepa, radio, mo televisin mo long laef blong ol bigman we plante man oli trastem mo folem fasin blong olgeta. Plante tija oli pusum ol yangfala blong kasem ol hae mak long wol mo gudfala wok. Oli ting se long rod ya nao man i save kasem gudfala frut long laef blong hem. I tru se, i impoten blong skulgud mo gat waes mo save blong mekem wok. ?Be, i stret we man i ronem ol samting ya nomo, mekem se hem i no gat taem blong joen wetem famle mo ol fren blong hem? Wan man blong bifo we i raetem ol buk mo we i stadigud long laef blong ol man i tokbaot man we i gat plante save be i no gat lav. Hem i talem se man ya i olsem ‘bigfala tamtam we i stap krae nomo, no olsem wan bel we i stap krae blong nating.’ (1 Korin 13:1) Maet man ya i kam rijman, mo maet ol man oli save hem, be neva bambae hem i rili hapi.

Jisas Kraes, i savegud ol man mo i laekem olgeta tumas. Bigfala stamba tijing blong hem, i blong lavem God mo blong lavem ol man. Hem i talem se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu. . . . Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Matiu 22:​37-39) Ol man nomo we oli obei long ol tok ya oli ol trufala man blong Jisas. Taswe, hem i talem se: “From we yufala i stap lavlavem yufala, bambae olgeta man oli luksave se yufala i man blong mi.”​—Jon 13:35.

?Be, long wol ya, olsem wanem man i save wokem fasin ya blong lavem ol narafala man? ?Mo olsem wanem papa mama i save tijim pikinini blong lavem man? Haf we i kam biaen bambae i ansarem tufala kwestin ya.

[Tok blong pija long pej 3]

I no isi nating blong wokem fasin ya blong lavem ol man long wol ya we i fulap long fasin griri