?From Wanem i Nogud Yumi Stap Yumi Wan Oltaem?

“Fasin ya we tu man i stap joen wanples blong mekem wan wok, hem i moa gud . . . Sipos wan long tufala i foldaon, narawan i save givhan long hem blong i girap bakegen.”​—King Solomon

KING SOLOMON blong Isrel bifo i talem se: “Fasin ya we tu man i stap joen wanples blong mekem wan wok, hem i moa gud, i winim we wan man nomo i stap wok, from we wok i save gohed gud moa. Sipos wan long tufala i foldaon, narawan i save givhan long hem blong i girap bakegen. Be sipos wan man we i stap hem wan nomo, taem hem i foldaon, i nogud olgeta, from we i no gat man blong givhan long hem.” (Prija 4:​9, 10) Waes man ya, Solomon, i bin luklukgud fasin blong man. Taswe long toktok blong hem, hem i soemaot se yumi man i nidim kampani blong narafala mo se i nogud we yumi stap yumi wan nomo. Be, hemia i no tingting blong Solomon nomo. Tok ya we hem i raetem i kamaot long waes mo tabu spirit blong God.

I no waes blong stap yumi wan oltaem. Man i nidim narafala man. Yumi evriwan i nidim paoa mo help we narafala i save givim long yumi. Wan proveb long Baebol i talem se: “Hemia we i stap hem wan oltaem bambae i tingbaot hem wan nomo, bambae hem i agens long ol waes ya we i save givhan long hem.” (Ol Proveb 18:​1, NW ) Taswe yumi no sapraes we ol man we oli stadi long fasin blong man oli talem se i gud we man i joen long ol grup mo i intres long narafala.

Tija Robert Putnam i givim advaes blong leftemap laef blong komuniti, mo wan long ol advaes ya hemia se yumi mas “mekem se skul i gat paoa long laef blong man.” Ol Witnes blong Jeova oli soemaot gudfala eksampol long saed ya. Raonabaot long wol, oli harem gud from we oli stap sef long ol kongregesen we oli olsem famle. Oli folem tok blong aposol Pita se oli mas ‘lavem kampani blong ol brata,’ from we olgeta oli ‘onagud long God.’ (1 Pita 2:​17, NW ) I gat plante gudfala wok we oli joen wetem trufala wosip, olsem wok blong tijim trutok blong Baebol long ol man. From we ol Witnes blong Jeova oli bisi long wok ya oli blokem nogud frut we i kamaot from fasin we man i stap hem wan nomo.​—2 Timoti 2:15.

Lav Mo Kampani Blong Ol Narafala i Jenisim Laef Blong Olgeta

Ol Witnes blong Jeova oli olsem wan komuniti blong man we i joengud tugeta. Ol wanwan memba blong komuniti ya oli impoten. Eksampol, tingbaot stori blong tri man Latin-Amerika we nem blong olgeta Miguel, Froylán, mo Alma Ruth. Trifala i blong sem famle nomo. Trifala i bon wetem wan sik long bun we i mekem se bodi blong trifala i no save grugud fulwan. Trifala i stap long wiljea nomo. ?Olsem wanem fasin joen wetem ol Witnes blong Jeova i givhan long trifala?

Miguel i talem se: “Samtaem mi bin harem nogud bigwan, be taem mi stat joen wetem ol man blong Jeova, laef blong mi i jenis. I denja tumas blong stap yu wan oltaem. Fasin joen wetem ol brata  sista long ol Kristin miting, we mi mekem evri wik, i givhan bigwan long mi blong faenem trufala glad.”

Alma Ruth i talem se: “Bifo, mi stap safa bigwan from tingting we i foldaon. Mi harem nogud tumas. Be taem mi kasem save long Jeova, mi harem se mi save frengud wetem hem. Samting ya i impoten moa long laef blong mi i bitim olgeta narafala samting. Famle blong mifala i traehad bigwan blong sapotem mifala long wosip mo filing blong mifala, mo hemia i mekem famle i joengud moa.”

Wetem fasin lav, papa blong Miguel i tijim hem blong rid mo raet. Biaen Miguel i tijim Froylán mo Alma Ruth. Fasin blong rid i impoten samting we i givhan long olgeta blong gohed long saed blong spirit. Alma Ruth i talem se: “Fasin blong save rid i givhan bigwan long mitrifala from we taem mitrifala i ridim Baebol mo ol buk we oli eksplenem Baebol mitrifala i stap strong long saed blong spirit.”

Naoia, Miguel i wan Kristin elda. Froylán i ridim fulwan Baebol naen taem finis. Mo stat long 1996, Alma Ruth i mekem moa long wok blong Jeova olsem wan paenia, no wan man we i wok fultaem long wok blong talemaot Kingdom. Hem i talem se: “Mi naf blong mekem wok ya from blesing blong Jeova. Ol gudfala Kristin sista oli givhan bigwan long mi blong mi save prij mo tu blong tijim ol 11 Baebol stadi we mi bin statem.”

Wan narafala eksampol we i nambawan hemia Emilia. Emilia i bin aksiden mo i stap long wiljea from kil we hem i kasem long leg mo bak blong hem. Ol Witnes blong Jeova long Meksiko oli stadi Baebol wetem hem, mo hem i tekem baptaes long 1996. Emilia i talem se: “Bifo we mi gat save long trutok, mi mi wantem kilim mi wan i ded, mi no moa wantem stap laef. Mi filim olsem se laef blong mi i nating nomo, mo mi stap krae evri dei mo naet. Be taem mi stat blong joen wetem ol man blong Jeova, mi luk we ol Kristin brata sista oli soem lav. Oli intres long mi mo samting ya i rili leftemap tingting blong mi. Wan long ol elda i lukaot long mi olsem we hem i stret brata no papa blong mi. Hem mo sam man blong givhan oli tekem mi wetem wiljea blong mi i go long ol miting mo wok blong prij.”

José, i tekem baptaes blong kam wan Witnes blong Jeova long 1992. Hem i laef hem wan nomo. Hem i gat 70 yia finis, i ritae long wok blong hem long 1990. Bifo, José i safa from tingting we i foldaon bigwan. Be, afta we ol Witnes oli prij long hem, kwiktaem nomo hem i stat blong joen long ol Kristin miting. Hem i laekem tumas ol samting we hem i luk mo harem long ol miting ya. Eksampol, hem i luk we ol brata sista oli joengud tugeta mo hem i harem se oli gat intres long hem. Naoia ol elda wetem ol man blong givhan long kongregesen oli lukaot gud long hem. (Filipae 1:1; 1 Pita 5:2) Ol  Kristin brata ya ‘oli givhan long hem mo mekem hem i harem gud tumas.’ (Kolosi 4:11) Oli tekem hem i go luk dokta, oli visitim hem long haos, mo long fofala taem we dokta i katem hem, ol brata ya oli givhan long hem. Hem i se: “Oli rili kea long mi. Oli olsem stret famle blong mi. Mi harem gud long kampani blong olgeta.”

Man We i Stap Givim Presen i Go i Kasem Trufala Glad

Jes bifo we King Solomon i talem se “fasin ya we tu man i stap joen wanples blong mekem wan wok, hem i moa gud,” hem i bin tokbaot wan narafala fasin. Hem i talem se fasin ya blong wok strong oltaem blong hivimap plante sas samting, i blong nating nomo. (Prija 4:​7-9) Hemia nao samting we plante man tede oli stap traehad blong kasem. Mo oli traehad from ol samting ya, nating se i spolem fasin joengud wetem famle mo wetem ol man raonabaot long olgeta.

Plante man oli no gat fren from we oli gat fasin griri mo oli tingbaot olgeta wan nomo. Ol fasin ya oli mekem ol man ya oli stap kros mo oli no gat hop. Taswe, man we i letem ol fasin ya oli bos long hem, hem i no save glad mo i no save harem gud long laef. Defren nao, ol stori we yumi jes tokbaot oli soem ol gudfala frut we i kamaot from fasin blong joen wetem ol man we oli mekem wok blong Jeova mo we oli letem lav we oli gat long God mo long ol man raonabaot long olgeta i lidim olgeta. Ol stori ya oli soem se ol man ya oli naf blong winim ol nogud filing we i kamaot from fasin blong stap olgeta wan nomo, taem oli go oltaem long ol Kristin miting, taem ol Kristin brata sista oli leftemap tingting mo kea long olgeta, mo taem oli wok strong long wok blong prij​—Ol Proveb 17:17; Hibrus 10:​24, 25.

From we yumi evriwan i nidim narafala, i sua se yumi save harem gud taem yumi givhan long narafala. Albert Einstein, we wok blong hem i givhan long narafala, i talem se: “Samting we i mekem man i sas . . . hemia samting we hem i givim, i no samting we hem i save kasem.” Toktok ya i laenap wetem samting we Masta blong yumi Jisas Kraes i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) I tru se i gud taem man i soem lav long yumi, be i gud long yumi tu, taem yumi soem lav long ol narafala.

Wan elda we i goraon long ol kongregesen plante yia finis blong halpem ol man long saed blong spirit mo blong givhan blong bildim ol Haos Kingdom blong ol Kristin we oli pua, i talemaot filing blong hem se: “Glad we mi kasem taem mi givhan long ol brata blong mi mo tangkiu we mi luk long fes blong olgeta i pusum mi blong gohed blong lukaot rod blong givhan long olgeta. Samting we mi mi lanem hemia se taem mi soem intres long ol narafala mi faenem glad. Mo mi save se ol elda, oli mas stap olsem ‘sefples we man i save go haed long hem blong ronwe long hariken . . . , olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.’ ”​—Aesea 32:2.

!I Gud Tumas Taem Ol Man Blong God Oli Stap Wanples!

I sua se gudfala frut mo trufala glad i kamaot taem yumi givhan long narafala mo taem yumi kampani wetem olgeta we oli mekem wok blong Jeova. Wan man blong raetem Ol Sam i talem se: “!Olgeta! I gud tumas taem ol man blong God oli stap wanples, we oli gat wan tingting nomo.” (Ol Sam 133:1) Stori blong Miguel, Froylán, mo Alma Ruth i soemaot se i impoten tumas we famle i joengud tugeta. !Mo i wan blesing taem famle i  joengud long trufala wosip! Afta we aposol Pita i givim advaes long ol Kristin hasban mo waef, hem i raet se: “Mi wantem finisim tok ya blong mi olsem. Yufala evriwan i mas gat wan tingting nomo, mo yufala i mas gat sore long yufala. Yufala i mas lavlavem yufala olsem we yufala i wan brata nomo, mo yufala i mas mekem i gud long yufala, we tingting blong yufala i stap daon.”​—1 Pita 3:8.

Ol trufala fren oli givhan long yumi long saed blong filing mo long saed blong spirit tu. Aposol Pol i leftemap tingting blong olgeta we oli brata blong hem long saed blong bilif, i se: “Yufala i mas toktok gud blong leftemap tingting blong olgeta we oli harem nogud oltaem from we tingting blong olgeta i foldaon. Yufala i mas givhan long olgeta we oli slak. Mo yufala i mas gat longfala tingting long evriwan. . . . Oltaem, yufala i mas mekem i gud long yufala mo long ol narafala man tu.”​—1 Tesalonaeka 5:​14, 15, NW.

Taswe, yumi mas lukaot rod blong mekem i gud long ol narafala. “Yumi mas mekem i gud long olgeta man. Antap moa, yumi mas mekem olsem long olgeta ya we oli brata sista blong yumi from we olgeta tu oli bilif long Kraes.” Yes, fasin ya bambae i givim trufala mining mo glad long laef blong yu. (Galesia 6:​9, 10) Jemes, wan disaepol blong Jisas, i talem se: “?Sipos i gat ol brata mo ol sista blong yufala we oli trabol long klos mo kakae, nao wan long yufala i no givhan long olgeta, bambae olsem wanem nao? Sipos wan long yufala i talem long olgeta se, ‘God i blesem yufala. Yufala i go putum klos, blong yufala i wom, mo yufala i go kakae,’ be hem i no givim klos mo kakae long olgeta, tok ya i no save givhan nating long olgeta.” (Jemes 2:​15, 16) Yes i klia se yumi mas ‘givgivhan long yumi long laef blong yumi. I nogud wan man i stap lukaot long laef blong hem nomo.’​—Filipae 2:4.

Taem i gat bigfala nid mo long taem blong disasta, ol Witnes blong Jeova oli givgivhan long ol man long saed blong bodi. Be antap long samting ya, oli givhan long ol man long wan rod we i impoten moa​—hemia taem oli talemaot gud nius blong Kingdom blong God. (Matiu 24:14) Bitim 6,000,000 Witnes oli talemaot mesej ya we i givim hop mo i mekem ol man oli harem gud. Samting ya i pruvum se oli rili kea, oli lavem ol man mo oli intres long olgeta. Be taem oli yusum Tabu Baebol blong givhan long ol man, oli fulumap wan narafala nid tu we man i gat. ?Wanem nid ya?

Fulumap Wan Impoten Nid

Blong faenem trufala glad, yumi mas frengud wetem God. Sam man oli talem se: “Samting we i tru long saed blong man hemia se, long evri ples mo oltaem, i stat long taem we man i stap long wol kam kasem tede, man i gat wan filing we i pusum hem blong singaot help blong wan samting we hem i bilif se i hae moa mo i gat moa paoa bitim hem. Hemia i soem se man i bon wetem filing ya blong wantem wosip long wan samting mo yumi mas luksave se hemia wan trufala samting. . . . Yumi mas tinghae mo gat respek taem yumi luk we ol man long evri ples long wol oli stap lukaot, mo bilif long wan God we i hae olgeta.”​—Man Does Not Stand Alone, wan buk we A. Cressy Morrison i raetem.

Jisas Kraes i talem se: “Olgeta we oli luksave se oli nidim ol samting long saed blong spirit oli save harem gud.” (Matiu 5:​3, NW ) Ol man we oli stap olgeta wan oltaem, we oli stap longwe long ol narafala man, oli no save harem gud. Be, samting we i moa nogud hemia taem man i stap longwe long Man ya we i Wokem yumi. (Revelesen 4:11) Bigfala samting long laef blong yumi hemia blong ‘savegud God’ mo mekem save ya i wok long laef blong yumi. (Ol Proveb 2:​1-5) Yes, yumi mas gat strong tingting blong fulumap nid ya we yumi gat long saed blong spirit, from we yumi no save stap yumi wan mo yumi no save stap longwe long God. Sipos yumi wantem hapi mo karem plante blesing long laef blong yumi, yumi mas gat wan gudfala fasin fren wetem Jeova, we i “hae King blong olgeta ples long wol.”​—Ol Sam 83:18.

[Tok blong pija long pej 5]

Miguel: “Samtaem mi bin harem nogud bigwan, be taem mi stat joen wetem ol man blong Jeova, laef blong mi i jenis”

[Tok blong pija long pej 5]

Alma Ruth: “Taem mi kasem save long Jeova, mi harem se mi save frengud wetem hem”

[Tok blong pija long pej 6]

Emilia: “Bifo we mi gat save long trutok, . . . mi filim olsem se laef blong mi i nating nomo”

[Tok blong pija long pej 7]

Taem yumi joen wetem ol trufala man blong wosip yumi kasem samting we yumi nidim long saed blong spirit