Leftemap Tingting Blong Olgeta We Oli Stap Krae

BAEBOL i no wan buk long saed blong helt. Be, hem i leftemap tingting mo givhan long yumi blong stap glad long laef, nating we yumi fesem fulap trabol. Baebol i talem tru nomo se: “Man we i bon long woman, laef blong hem i sot nomo, mo i fulap long ol trabol.” (Job 14:​1, NW ) Yumi sinman, taswe samtaem, ol traem we yumi kasem oli kamaot from yumi nomo. ?Be hu i stamba blong fasin safa we i kasem ol man?

Baebol i soemaot se wan rabis spirit, we oli singaot hem Devel mo Setan, hem nao i stamba blong fasin safa. Hem i stap “giaman long olgeta man long wol, i lidim olgeta oli go krangke” mo i mekem fulap trabol we ol man oli stap fesem naoia. Be, Baebol i talem tu se, hem i gat smol taem nomo blong hem i stap. (Revelesen 12:​9, 12) I no longtaem, bambae God i tekem aksin blong finisim ol trabol we Setan i mekem long wol ya. Mo olsem Baebol i talem, God i promes blong mekem wan niufala wol we stret fasin nomo i stap long hem. Niufala wol ya bambae i finisim olgeta fasin ya we man i no gat hop mo tingting i foldaon.​—2 Pita 3:13.

!Yumi harem gud taem yumi save se fasin safa i blong smol taem nomo! Aninit long rul blong Kingdom blong God long heven, we Jisas Kraes bambae i king long hem, fasin safa mo fasin ya blong no mekem i stret long narafala bambae i finis. Baebol i tokbaot King ya we God i makemaot finis, i se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”​—Ol Sam 72:​12-14.

Ol profet tok ya bambae oli kamtru i no longtaem. Nao bambae yumi save harem gud tumas blong laef olwe long wan paradaes wol we i nambawan. (Luk 23:43; Jon 17:3) Save long saed blong ol vas blong Baebol we oli givim ol promes olsem, i givim hop mo i leftemap tingting blong olgeta we oli krae mo oli nidim help.

[Foto Credit Line blong pija long pej 32]

Depressed girl: Photo ILO/J. Maillard