Tingting Stret Mo Wok Wetem Waes Fasin

PIJAREM stori ya: Jisas Kraes i stap eksplenem olsem wanem bambae ol enemi blong hem long Jerusalem oli mekem i nogud long hem mo oli kilim hem i ded. Aposol Pita, wan gudfala fren blong Jisas, hem i no wantem we samting ya i hapen. Ale, hem i tekem Jisas i go long saed blong rod, mo i stat blong tok strong blong blokem hem. I klia se, Pita i rili laekem Jisas mo hem i wari long Masta blong hem. ?Be Jisas i ting wanem long fasin blong Pita? Jisas i talem long hem se: “Setan. Yu gowe long mi. Yu yu stap traem blong blokem mi nomo. Tingting blong yu i no tingting blong God, i tingting blong man nomo.”​—Matiu 16:​21-23.

!Ating Pita i sek taem i harem tok ya! Hem i wantem halpem Masta blong hem we hem i laekem tumas, be nao Masta i talem se hem i stap ‘blokem hem nomo.’ ?Olsem wanem samting ya i hapen? Ating Pita i foldaon long trap ya we plante man oli foldaon long hem​—hemia se hem i bilif nomo long samting we hem i wantem bilivim.

I Nogud Yu Trastem Yu Wan Bitim Mak

Wan samting we i save spolem fasin blong yumi blong tingting stret, hemia fasin blong trastem yumi wan bitim mak. Aposol Pol i givim wan woning long ol Kristin blong Korin bifo se: “Man we i ting se i stap stanap strong, hem i mas lukaot gud, blong bambae i no foldaon bakegen.” (1 Korin 10:12) ?From wanem Pol i givim woning ya? Ating hem i savegud se i isi nomo blong twistim tingting blong man​—ol Kristin tu oli save letem tingting blong olgeta i ‘gorong nao oli lego gudfala fasin ya blong olgeta, we olgeta oli stap lavem Kraes tumas long fasin we i stret mo i klin gud.’​—2 Korin 11:3.

Samting ya nao i hapen long ol bubu blong Pol bifo. Long taem ya, Jeova i talem long olgeta se: “Tingting blong mi i no olsem tingting blong yufala, mo fasin blong mi i no olsem fasin blong yufala.” (Aesea 55:8) Oli ‘ting se oli waes,’ be waes blong olgeta i karem rabis frut nomo. (Aesea 5:21) Taswe ating i stret nomo blong save olsem wanem yumi save holem wan tingting we i stret, blong blokem ol rabis frut olsem.

Lukaot Long Tingting Blong Wol

Sam Kristin long Korin oli letem tingting blong wol i gat paoa long olgeta. (1 Korin 3:​1-3) Oli tinghae moa long waes blong man i bitim waes blong Tok blong God. I sua se ol waes man blong Gris oli gat hed. Be long lukluk blong God, ol man ya oli krangke nomo. Pol i talem se: “Baebol i talem se, ‘Waes blong ol man we oli gat waes bambae mi mekem i lus olgeta. Mo save blong olgeta we oli gat save bambae mi mekem i kam nating nomo.’ ?Wehem ol man we oli gat waes? ?Wehem ol man we oli gat save? ?Wehem ol man we oli stap toktok oltaem long ol bisnes blong wol? !Oli no gat! God i mekem finis we ol waestok blong man i kam olsem krangke tok nomo.” (1 Korin 1:​19, 20) Ol man blong hae save ya oli letem “spirit we i kamaot long wol” i lidim olgeta,  be i no spirit blong God. (1 Korin 2:12) Ol dip tingting blong olgeta oli no laenap nating wetem tingting blong Jeova.

Man ya we hem i stamba blong tingting ya blong wol, hemia Devel Setan we i bin yusum wan snek blong switim Iv. (Jenesis 3:​1-6; 2 Korin 11:3) ?Setan i wan denja long yumi tede yet? !Yes! Baebol i talem se Setan “i satem tingting” blong ol man gogo naoia hem i ‘lidim olgeta man long wol oli go krangke.’ (2 Korin 4:4; Revelesen 12:9) !I impoten tumas blong savegud ol plan blong hem!​—2 Korin 2:11.

Lukaot Long ‘Ol Man We Oli Save Wokem Ol Trik’

Pol i givim woning long saed blong ‘ol man we oli save wokem ol trik.’ (Efesas 4:14) Hem i mitim ol man we “oli stap giaman blong talem ol wok blong olgeta,” oli talem se oli tijim trutok be oli stap giaman nomo. (2 Korin 11:​12-15) Blong kasem mak blong olgeta, ol man olsem oli jusum ol pruf we i save sapotem tingting blong olgeta nomo, oli toktok long wan fasin we i tajem filing blong man, oli talem ol tok we oli no tru fulwan, ol tok we oli mekem tingting blong man i hafhaf, mo ol tok we oli giaman stret.

Plante taem, ol man we oli toktok blong leftemap prapa tingting blong olgeta oli traem spolem ol narafala taem oli yusum tok ya “wan krangke kampani we i biaenem wan man nomo.” Wan advaes we i kamaot long miting ya Parliamentary Assembly of the Council of Europe i talem se taem ol man blong gavman oli stap lukluk long wok blong sam niufala skul, “i moagud oli no yusum tok ya.” ?From wanem? From we oli talem se tok ya “krangke kampani we i biaenem wan man” i givim wan rong tingting long ol man. Sem samting ya nao i bin hapen long taem blong Pol bifo. Ol man Gris we oli man blong bigsave oli talem se aposol Pol hem i wan man blong “pikimap tok olbaot nomo.” Oli minim se Pol i wan man blong tok krangke nomo, i stap pikimap ol smosmol save olbaot long narafala man mo i stap talem bakegen ol save ya. Be tru, “Pol i stap tokbaot Jisas, mo i stap talemaot we hem i ded be God i mekem hem i laef bakegen.”​—Ol Wok 17:18.

?Olsem wanem long wok ya blong ol man we oli stap toktok blong leftemap prapa tingting blong olgeta? ?Wok blong olgeta i karem frut? Yes. Olgeta nao oli stamba blong plante bigbigfala faet we oli kamaot bitwin ol man blong defren laen no skul, from we oli twistim tingting blong ol man long saed blong ol narafala nesen no jos. Plante man oli yusum olgeta ya we oli toktok olsem from we oli wantem daonem sam grup blong man we bighaf blong populesen i no laekem olgeta. Adolf Hitler i yusum fasin ya taem hem i tokbaot ol man Jiu mo sam narafala grup tu se oli “daon moa long narafala,” oli “rabis,” mo oli wan “denja” long Gavman. Yu no mas letem olkaen trik olsem i spolem gudfala tingting blong yu.​—Ol Wok 28:​19-22.

Yu No Mas Giaman Long Yu Wan

I isi nomo blong giaman long yumi wan. Samtaem i had blong lego no blong kwestinim sam tingting we yumi laekem tumas. ?From wanem? From we hat blong yumi i sapotem ol tingting blong yumi. Ale maet yumi save giaman long yumi wan mo traem faenem eskius blong sapotem ol tingting blong yumi, nating se ol tingting ya oli rong mo oli save lidim yumi i go rong.

Samting ya nao i hapen long sam Kristin blong ol faswan handred yia. Oli save finis Tok blong God, be oli no letem hem i bos long tingting blong olgeta. Ale, oli “giaman nomo long [olgeta].” (Jemes 1:​22, 26) Wan samting we i soem se maet yumi foldaon finis long trap ya blong giaman long yumi wan, hemia sipos yumi kam kros taem wan i agensem tingting blong yumi. I nogud yumi kam kros, be i moa gud yumi rere blong lesin long tingting blong narafala mo yumi tingtinggud long wanem we oli talem​—nating se yumi sua se tingting blong yumi i stret.​—Ol Proveb 18:17.

Digim Blong ‘Savegud God’

?Yumi save mekem wanem blong holem wan tingting we i stret? I gat plante samting we i save givhan long yumi, be yumi mas wantem blong kasem help ya. Waes King Solomon i talem se: “Pikinini blong mi. Yu mas lanem ol samting ya we mi stap tijim yu long hem, mo yu no mas fogetem ol fasin ya we mi stap talem long yu se yu mas mekem. Yu mas lesin long ol waestok ya, mo yu mas traehad blong haremsave olgeta. Yes, yu mas askem strong long Hae God, blong i mekem yu yu gat save, mo yu mas askem long hem oltaem, blong yu save haremsave mining blong ol strong samting. Oltaem yu mas traehad blong kasem waes ya, olsem we yu save traehad blong faenem silva, no wan narafala samting olsem, we man i bin berem. Sipos yu stap mekem olsem,  bambae yu save kasem mining blong tok ya we i talem se, ‘Yu mas tinghevi long Hae God, mo yu mas ona gud long hem.’ Nao bambae yu save fasin blong hem moa, blong yu savegud hem.” (Ol Proveb 2:​1-5) Tru, sipos yumi wanwan i traehad blong fulumap tingting mo hat blong yumi wetem Trutok blong God, bambae yumi kasem trufala waes, dip save, mo fasin luksave. Yes, bambae yumi digimaot samting we i sas moa bitim silva no eni narafala sas samting.​—Ol Proveb 3:​13-15.

Waes mo save oli impoten tumas blong yumi gat stret tingting. Tok blong God i talem se: “Nao bambae yu save kam waes, mo waes ya blong yu bambae i save mekem yu yu harem gud. Fasin ya we yu luksave ol samting mo we yu savegud ol mining blong hem, hem bambae i stap lukaot long yu, mo bambae i stap blokemgud yu, blong yu no mekem ol fasin nogud. Mo bambae i mekem we yu stap longwe long ol man we toktok blong olgeta i blong statem trabol nomo. Ol man olsem oli lego stret laef finis, oli stap long fasin blong tudak nomo.”​—Ol Proveb 2:​10-13.

I impoten tumas blong letem ol tingting blong God oli lidim tingting blong yumi, speseli taem yumi fesem sam traem no yumi stap long denja. Ol strong filing olsem fasin kros no fraet, oli save mekem i had blong yumi tingting stret. Solomon i talem se: “Nating se man i waes, fasin blong daonem hem oltaem i save pusum hem blong mekem ol krangke samting.” (Prija 7:​7, NW ) Mo tu, fasin ya i save lidim yumi blong “agensem Jeova wetem hat blong [yumi].” (Ol Proveb 19:​3, NW ) ?Olsem wanem yumi agensem Jeova? Yumi agensem Jeova taem yumi blemem hem from ol problem blong yumi mo yumi yusum ol problem ya blong faenem eskius long ol nogud fasin blong yumi we oli agensem ol rul mo ol stamba trutok blong God. I nogud yumi ting oltaem se yumi nao yumi savegud evri samting. Be i moa gud yumi gat tingting daon mo yumi lesingud long ol advaes blong olgeta we oli gat waes we oli traem halpem yumi wetem Baebol. Mo sipos i nidim, yumi mas rere blong lego ol strong tingting we yumi gat taem yumi luksave klia se ol tingting ya oli rong nomo.​—Ol Proveb 1:​1-5; 15:22.

“Stap Askem Long God Oltaem”

Yumi laef long wan taem we i denja mo i mekem tingting blong man i konfius. I impoten tumas blong prea long Jeova oltaem blong i lidim yumi, sipos yumi wantem skelemgud ol samting mo soem waes fasin. Pol i talem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:​6, 7) Nao sipos yumi no waes inaf blong dil wetem sam problem we oli had tumas, yumi mas “stap askem long God oltaem, from we God i stap givim fulap long ol man long gladhat blong hem, mo hem i no save tok nogud long man we i askem samting long hem.”​—Jemes 1:​5-8, NW.

Aposol Pita i save we ol Kristin oli mas waes, taswe hem i traem ‘wekemap olgeta, blong mekem tingting blong olgeta i stret.’ Pita i wantem we ol Kristin ya oli “tingbaot bakegen, ol tok we ol tabu profet oli talem bifo, mo tok blong Masta mo Sevia blong [olgeta],” Jisas Kraes. (2 Pita 3:​1, 2) Sipos yumi mekem olsem mo yumi meksua se tingting blong yumi i laenap wetem tingting blong God, bambae yumi tingting stret mo yumi wok wetem waes fasin.

[Tok blong pija long pej 21]

Ol faswan Kristin oli letem waes blong God, be i no waes blong man, i lidim tingting blong olgeta

[Credit Lines]

Philosophers left to right: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Tok blong pija long pej 23]

I impoten tumas blong prea mo stadi long Tok blong God