Fasin Pua i Gat Rod Blong Finisim Trabol Ya Blong Olwe

LONG evri ples blong wol ol nogud ripot i kamaot long saed blong fasin pua. Nating se i olsem, sam man oli holem gudfala tingting oltaem se man bambae i naf yet blong finisim trabol ya. Wan eksampol, long wan stamba tok blong niuspepa ya Manila Bulletin, Divelopmen Bang blong Esia i talem se “bifo we 25 yia i pas, Esia i save finisim fasin pua.” Bang ya i talem se blong finisim fasin pua, ekonomi i mas kam antap.

Sam ogenaesesen mo gavman oli wokem wan longfala lis wetem ol advaes mo plan blong traem winim problem ya. Sam long ol samting long lis ya i gat: ol program blong insurens, moa edukesen, tekemaot kaon we ol pua kantri oli gat long ol rij kantri, jenisim sam loa blong mekem i isi long ol pua kantri blong salem ol samting blong olgeta i go long ol narafala kantri, mo wokem ol haos we oli no sas blong ol puaman oli stap long hem.

Long yia 2000, Jenerol Asembli blong Yunaeted Nesen i stanemap sam mak we oli wantem kasem bifo long yia 2015. Sam long ol mak ya hemia we oli wantem finisim fasin pua mo hanggri, mo fasin ya we sam man long kantri oli kasem bigbigfala pei mo narafala i kasem smol pei nomo. Ol mak ya oli nambawan. Be, nating se i olsem, plante man oli bilif se long wol ya we ol man blong hem oli no joengud, neva bambae oli save kasem ol mak ya.

Gudfala Advaes We i Givhan Long Ol Puaman

Ol man oli no naf blong finisim fasin pua. ?Taswe, wanem samting nao i save givhan long ol puaman? Olsem yumi tokbaot fastaem, i gat ol waes advaes i stap we i save givhan long man naoia. ?Yumi save faenem waes ya long wea? Hemia long Tok blong God, Baebol.

 ?From wanem advaes blong Baebol i defren olgeta long ol narafala advaes? Hemia from we advaes ya blong Baebol i kam long Man ya we i Hae Olgeta, hemia Man ya we i Wokem Yumi. Long Baebol, yumi faenem waes, mo yumi faenem ol rul we oli wokgud mo we oli stret long eni man, long eni ples, mo long eni taem. Taem puaman i folem ol rul ya, hem i save haremgud moa long laef blong hem naoia. I gud yumi luk sam eksampol.

Stret tingting long saed blong mane. Baebol i talem se: “Mane i save givhan blong mekem laef blong yu i gud, be waes tu i save mekem samting ya, mo hem i save go moa. Hem i save mekem we laef blong yu i stap gud olwe.” (Prija 7:12) ?Yumi lanem wanem long vas ya? Yumi lanem se i gat sam samting we oli impoten moa i winim mane. I tru se mane i save mekem laef blong man i gud. Mane i save pem sam samting we yumi nidim. Be mane i no save givim olgeta samting long yumi. I gat sam samting we oli sas moa we mane i no save pem. Taem yumi luksave samting ya, bambae yumi no tingting tumas long ol samting blong bodi olsem se oli impoten moa. Mo olsemia, bambae yumi no harem nogud olsem olgeta ya we oli spenem ful laef blong olgeta blong hivimap mane nomo. Mane i no save pem laef, be fasin waes i save lukaot gud long laef blong yumi naoia, mo tu, hem i givim janis long yumi blong kasem laef we i no save finis.

No mekem ol bigfala kaon. Maet ol samting we yumi wantem i no ol samting we yumi rili nidim. Ol samting we yumi nidim oli mas kam fastaem. I isi blong ting se yumi nidim wan samting, be maet hemia wan samting we yumi wantem nomo, be maet yumi no rili nidim samting ya. Man we i waes bambae i yusumgud mane blong hem blong pem ol stamba samting blong laef fastaem​—olsem kakae, klos, ples blong slip, mo ol narafala samting olsem. Bifo we hem i pem wan defren samting bakegen, bambae hem i tingtinggud fastaem sipos haf mane we i stap i naf blong pem samting ya. Long wan pijatok, Jisas i soem se man i mas “sidaon fastaem blong wokemaot praes blong olgeta samting blong hem, blong luk se mane blong hem bambae i naf no i no naf.”​—Luk 14:28.

Long Filipin, Eufrosina i lukaot long trifala pikinini blong hem. Hasban blong hem i lego hem sam yia bifo, taswe Eufrosina nomo i wok blong winim mane we oli nidim blong laef. Hem i mas keaful blong yusumgud smol mane blong hem. Hem i lanem ol pikinini blong hem blong luksave se i gat sam samting we famle i mas pem fastaem from we oli impoten moa. Eksampol, maet ol pikinini oli luk wan samting we oli laekem tumas. Hem i no talem no long olgeta, be hem i pulum tingting blong olgeta se: “Sipos yu rili wantem, yu save pem samting ya, be bambae yu mas jus. Yumi gat naf mane blong pem wan samting nomo. Yumi save pem samting ya we yu yu laekem, no yumi save pem sam mit mo ligim blong kakae wetem raes long wik ya. ?Weswan nao we yu wantem? I jus blong yu.” Plante taem, ol pikinini oli kwik blong kasem poen ya mo oli agri se oli laekem pem kakae i bitim narafala samting.

Harem gud long samting we yu gat. Wan rul blong Baebol i talem se: “Sipos yumi gat kakae blong yumi mo klos blong yumi, hemia i naf, yumi save harem gud.” (1 Timoti 6:8) Mane nomo i no save mekem man i hapi. I gat plante rijman we oli no hapi nating, mo i gat plante puaman we oli hapi tumas. Ol puaman ya we oli hapi oli lan blong glad long ol smosmol samting nomo we oli nidim blong laef. Jisas i talem se “ae blong man” i mas ‘klia gud’ min se i stap lukluk i go long ol samting ya nomo we oli impoten moa. (Matiu 6:​22, NW ) Taem man i mekem olsem, hem i save stap glad. Plante puaman oli harem gud from we oli gat wan gudfala fasin fren wetem God mo oli gat wan famle we i hapi​—hemia ol samting we mane i no save pem.

Hemia sam nomo long ol gudfala advaes blong Baebol we oli save givhan long olgeta we oli pua. I  gat plante narafala advaes bakegen, olsem olgeta ya: I gud blong stap longwe long fasin blong smok tabak mo plelaki, from we tufala fasin ya i westem mane nomo; yu mas luksave ol samting long laef we oli rili impoten, olsem ol samting long saed blong spirit; sipos i no isi blong faenem wok, traem mekem wan wok we narafala i nidim. (Ol Proveb 22:29; 23:21; Filipae 1:​9-11) Baebol i pulum yumi blong yusum ‘waes ya mo fasin ya blong yumi we yumi save luksave mining blong ol samting we i had’ from we “bambae tufala fasin ya i givim laef long [yumi].”​—Ol Proveb 3:​21, 22.

Nating se advaes blong Baebol i save givhan long olgeta we oli pua, be i gat sam kwestin i stap long saed blong fiuja. ?Bambae ol puaman oli stap pua blong olwe? ?Bambae man i save stretem fasin ya we sam man oli rij tumas mo narafala i pua tumas? Naoia bambae yumi tokbaot wan rod ya, we plante man oli neva tingbaot, blong finisim fasin pua.

Baebol i Givim Risen Blong Hop

Plante man oli agri we Baebol i wan gudfala buk. Be, plante man oli no luksave we Baebol i givim klia save long ol bigfala jenis we bambae oli kamaot i no longtaem.

God i wantem tekem aksin blong winim olgeta problem blong man, olsem fasin pua. Ol gavman blong man oli no naf, no oli no wantem mekem samting ya. Taswe, God bambae i karemaot olgeta long ples blong olgeta. ?Bambae hem i mekem samting ya olsem wanem? Baebol i talem stret long Daniel 2:​44 se: “Long taem blong ol king ya, God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”

Afta we God i karemaot “ol narafala king,” no gavman, Rula ya we God nomo i stanemap bambae i tekem aksin. Hem i no wan man blong wol ya be hem i wan strongfala spirit man long heven olsem God. Hem i naf blong jenisim evri samting, mo finisim fulwan, fasin blong ol man blong wol ya we oli stap mekem i gud moa long sam man i bitim narafala. God i jusum stret Pikinini blong hem blong mekem samting ya. (Ol Wok 17:31) Ol Sam 72:​12-14 i tokbaot ol samting we Rula ya bambae i mekem, i talem se: “Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem i gud tumas.” !Hemia wan nambawan fiuja ya! !Fasin pua bambae i finis! Rula ya we God i stanemap bambae i tekem aksin blong givhan long ol puaman mo olgeta we oli no gat nem.

Long taem ya, plante problem we oli kamaot from fasin pua bambae i finis. Ol Sam 72:16 i talem se: “Bambae i gat plante kakae long ples ya, we bambae ol hil oli fulap gud long hem.” Bambae i no moa gat man we i hanggri from we oli sot long kakae, no from we oli no gat mane, no from we ol man oli no mekem gud wok blong olgeta.

Ol narafala problem tu bambae oli finis. Eksampol, tede plante man long wol oli no gat prapa  haos blong olgeta. Be, God i promes se: “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem. Ol man we bambae oli stap long ples ya, oli man blong mi we mi mi jusumaot olgeta finis, mo bambae oli save stap longtaem, olsem tri we i save stap longtaem. Ol samting we olgeta oli hadwok long hem, bambae oli save harem gud long hem longtaem.” (Aesea 65:​21, 22) Evri man bambae i gat prapa haos blong hem mo bambae i harem gud long wok blong hem. God i promes blong finisim fasin pua blong olwe. Bambae i no moa gat wan haf blong ol man we oli rij mo narafala haf we i pua mo bambae i no moa gat man we i hadwok tumas jes blong kasem smol samting nomo we hem i nidim blong laef.

Maet fastaem we yu lanem ol promes ya blong Baebol, yu ting se oli no save kamtru. Be, taem yu stadigud long Baebol, bambae yu faenem we olgeta promes blong God bifo oli kamtru finis. (Aesea 55:11) Taswe yumi no nid blong askem sipos ol promes ya bambae oli kamtru. Impoten kwestin blong askem hemia se: ?Yumi mas mekem wanem blong kasem blesing taem promes ya bambae i kamtru?

?Bambae Yu Yu Stap Long Taem Ya?

From we gavman blong God bambae i rulum wol, ol man we bambae oli stap aninit long gavman ya oli mas ol man we God i agri long olgeta. God i givhan long yumi blong save wanem we yumi mas mekem blong hem i agri long yumi. Ol rul we yumi mas folem oli stap long Baebol.

Pikinini blong God, we i Rula ya we God i stanemap, hem i gat fasin we i stret gud olgeta. (Aesea 11:​3-5) Taswe, ol man we bambae oli stap aninit long gavman ya, olgeta tu oli mas gat fasin we i stret. Ol Proveb 2:​21, 22 i talem se: “Ol stret man we yu save trastem olgeta, bambae oli save stap gud long ples ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long ples ya. Hem bambae i rutumaot olgeta, olsem we man i stap rutumaot ol smosmol tri long garen.”

?I gat rod blong lanem olsem wanem blong folem ol rul ya? Yes, i gat. Taem yumi stadi Baebol mo yumi mekem samting we Baebol i talem i wok long laef blong yumi, bambae yumi save harem gud long nambawan fiuja ya. (Jon 17:3) Ol Witnes blong Jeova oli glad blong givhan long yu blong stadi Baebol. Mifala i singaot yu blong tekem janis ya blong kasem laef long wol ya we bambae i no moa gat man i pua no man we i mekem i no stret.

[Tok blong pija long pej 5]

Eufrosina: “Fasin blong yusumgud mane i givhan long famle blong mi blong gat ol samting we mifala i nidim”

[Tok blong pija long pej 6]

Mane i no save pem wan gudfala fasin fren wetem God mo wan famle we i hapi