Ripot Long Wok Blong Kingdom

Gudfala Frut i Kamaot Taem Yumi Soem Longfala Tingting Mo Yumi No Kam Slak

JISAS KRAES i talem se, long taem blong ol las dei, “bighaf blong ol man bambae oli no moa lavem God.” Taswe, long plante ples long wol tede, ol man oli no intres long gud nius blong Kingdom. Mo tu, i gat sam man we oli luk ol skul olsem samting we i nogud nomo.​—Matiu 24:​12, 14.

Nating se i olsem, ol man blong talemaot Kingdom oli winim traem ya from we oli holem bilif mo oli gat longfala tingting. Stori we i kam biaen i soemaot samting ya. Hem i kamaot long Ripablik blong Czech.

Tu woman we tufala i Witnes, tufala i prij long wan woman we i no wantem openem doa long tufala, be i stap lesin nomo tru long doa ya. Afta we tufala i storian smoltaem, doa ya i open smol, mo woman ya i pusum han blong hem i kamaot, i holem Wajtaoa mo Wekap! we tufala Witnes ya i stap seremaot. Tufala i harem nomo voes blong woman ya we i talem “tangkiu” nao hem i satem doa bakegen. Tufala Witnes ya i stap tingting se bambae tufala i kambak bakegen long haos ya no olsem wanem. Wan long tufala ya we i paenia (hemia i min se hem i stap spenem plante moa aoa long wok blong prij) i talem se bambae hem i kambak. Ale evri taem hem i stap kam, woman ya i mekem sem mak nomo, gogo wan yia i pas.

Paenia sista ya i tingting se ating hem i mas jenisim ol toktok blong hem. Ale, hem i prea long Jeova blong i halpem hem. Nekis taem we hem i karem ol magasin i go long woman ya, hem i askem sam kwestin blong traem fren moa wetem hem, i se: “?Olsem wanem long yu? ?Yu oraet? ?Yu laekem ol magasin ya we yu bin ridim?” Fastaem, woman ya i no ansa nating, be sista ya i mekem sem samting evri taem we hem i kam, gogo woman ya i stat blong fren lelebet. Wan taem hem i openem doa fulwan, be hem i storian hareap nomo.

I luk olsem se woman ya i fraet blong toktok wetem ol Witnes, taswe paenia sista ya i tingting se bambae hem i raetem wan leta blong talem from wanem hem i stap kam oltaem mo blong askem woman ya sipos hem i wantem stadi Baebol. Ale, afta we wan yia haf i pas, we paenia sista ya i traehad mo i soem longfala tingting, woman ya i stat blong stadi long Baebol. Paenia sista ya i sek taem woman ya i talem long hem, smoltaem biaen se: “Mi stat blong bilif long God taem yu yu karem ol faswan magasin ya i kam long mi.” Samting ya i leftemap tingting blong sista ya.

Yes, yumi glad from ol gudfala frut we i kamaot taem yumi soem longfala tingting mo fasin blong no kam slak long wok blong talemaot Kingdom mo pulum man i kam disaepol.​—Matiu 28:​19, 20.