Jeova, God Blong Trutok

“Jeova, yu yu God blong trutok, yu yu sevem mi finis.”​—OL SAM 31:​5, NW.

1. ?Heven mo wol i olsem wanem taem i no gat fasin blong giaman?

 BIFO we bifo olgeta, i no gat fasin blong giaman. Long heven, i gat ol spirit man we oli stretgud olgeta, mo oli stap mekem wok blong “God blong trutok” we i Man blong Wokem olgeta. (Ol Sam 31:​5, NW ) Long taem ya, i no gat wan man we i giaman no i trikim narafala. Oltaem Jeova i toktok long fasin we i tru long ol spirit pikinini blong hem. Hem i mekem olsem from we hem i lavem olgeta, mo from we hem i wantem mekem i gud tumas long olgeta. Long wol tu, fastaem, i no gat fasin blong giaman. Jeova i wokem faswan man mo woman, mo tru long rod we hem i jusumaot, hem i toktok long tufala oltaem long fasin we i klia, i stret, mo i tru. !Taem ya i nambawan tumas!

2. ?Hu i faswan man blong giaman, mo from wanem hem i giaman?

² Be, biaen, wan spirit pikinini blong God i girap, i putumap hem wan olsem wan god we i agensem Jeova. Enjel ya we biaen i kam Devel Setan, i wantem se ol man oli mekem wosip long hem. Ale, hem i stanemap fasin blong giaman olsem rod blong pulum narafala i kam aninit long paoa blong hem. Taem hem i mekem olsemia, hem i kam “man blong giaman” mo “stamba blong ol giaman toktok.”​—Jon 8:44.

3. ?Adam mo Iv tufala i mekem wanem taem Setan i giaman long tufala, mo wanem i kamaot from?

³ Setan i yusum wan snek blong toktok long faswan woman, Iv, nao hem i talem se, sipos Iv i brekem loa blong God mo i kakae frut we God i putum tabu long hem, bambae hem i no save ded. Hemia wan giaman toktok. Be hem i go moa yet, i talem se sipos Iv i kakae frut ya, bambae hem i kam olsem God, we i save ol samting we i gud mo ol samting we i nogud. Hemia tu i wan giaman toktok. I no gat man we i bin giaman long Iv bifo. Nating se i olsem, ating Iv i haremsave se tok blong snek ya i no laenap wetem tok we God i bin talem long man blong hem, Adam. Be Iv i jusum blong bilif long Setan, i no long Jeova. Setan i trikim gud hem, ale hem i tekem frut ya mo i kakae. Biaen, Adam tu i kakae. (Jenesis 3:​1-6) I no gat man we i bin giaman long Adam bifo tu, be hem i defren long Iv. Hem i minim nomo blong kakae frut ya, i no olsem we Setan i trikim hem. (1 Timoti 2:14) Samting we hem i mekem i soem se hem i tanem baksaed long Man we i Wokem hem. Fasin blong hem i karem bigfala trabol i kam long ol man. From we Adam i no obei long God, sin mo ded​—wetem kruked fasin mo fasin blong safa bitim mak​—i kasem olgeta pikinini blong hem.​—Rom 5:12.

4. (a) ?Wanem giaman toktok we Setan i talem long Iden? (b) ?Blong no letem Setan i lidim yumi i go krangke, yumi mas mekem wanem?

⁴ Fasin blong giaman i kasem olgeta man. Yumi mas kasem save se Setan i talem ol giaman toktok long garen blong Iden from we hem i wantem agensem Jeova hem wan, mo agensem gudfala fasin blong Jeova blong tok tru oltaem. Setan i stap talem long Adam mo Iv se God i trikim tufala, mo se i stap blokem tufala long wan samting we i gud. Tok ya i no tru nating. Taem tufala i brekem loa blong God, tufala i no kasem wan gudfala samting. Tufala i ded, stret olsem we Jeova i bin talem. Nating se i olsem, Setan i gohed blong giaman blong spolem gudnem blong Jeova. Taswe, plante handred yia biaen, tabu spirit i pulum aposol Jon blong raetem se Setan i “stap giaman long olgeta man long wol, i lidim olgeta oli go krangke.” (Revelesen 12:9) Yumi no mas letem Setan i lidim yumi i go krangke. Blong blokem hem, yumi mas bilif fulwan se Jeova mo Tok blong hem i tru oltaem. ?Olsem wanem yu save kam olsem we yu trastem Jeova fulwan? ?Mo olsem wanem yu save kam strong moa blong blokem ol trik mo giaman tok blong Bigfala Enemi blong Jeova?

Jeova i Save Trutok

5, 6. (a) ?Jeova i gat wanem save? (b) ?Save blong man i olsem wanem taem yumi skelem wetem save blong Jeova?

⁵ Plante taem Baebol i talem se Jeova i Man we i  “mekem olgeta samting.” (Efesas 3:9) Hem nao i “mekem skae mo graon mo solwota, mo evri samting we i stap long wol ya.” (Ol Wok 4:24) From we Jeova i Man we i Wokem olgeta samting, hem i save trutok long saed blong evri samting. Blong kasem save long poen ya, tingbaot wan man we i droem plan blong wan haos mo i bildim haos ya. Hem i putum evri plang mo timba mo i hamarem evri nil long haos ya. Man ya i mas savegud evri haf blong haos ya, insaed mo afsaed. Hem i gat moa save long haos ya i bitim olgeta man we oli kam lukluk nomo long haos ya. Yes, ol man oli savegud ol samting we oli droem plan long hem mo oli wokem. Long sem fasin, Man we i Wokem evri samting, hem i gat olgeta save long saed blong olgeta samting we hem i wokem.

⁶ Profet Aesea i talem ol gudfala toktok blong eksplenem olsem wanem save blong Jeova i bigwan. Hem i se: “I no gat man i save kasem solwota long han blong hem, blong makem hamas solwota i stap, mo i no gat man i save stretem han blong hem, blong makem skae se bigfala blong hem i olsem wanem. I no gat man i save fulumap graon long pankin, blong makem graon blong wol ya se hamas graon i stap, mo i no gat man i save hangem ol hil long skel, blong skelem olgeta se oli hevi olsem wanem. Mo i no gat man i save talem long Hae God, se hemia nao fasin we hem bambae i mas mekem. I no gat man i save tijim hem, no i save givim waestok long hem. I no gat man we Hae God i save go luk hem, blong kasem save long hem, no blong haremsave wan tok, no blong lanem prapa fasin blong jajem man.” (Aesea 40:​12-14) Tru ya, Jeova i “God we i save olgeta samting” mo “save blong hem i stret gud olgeta.” (1 Samuel 2:3; Job 36:​4, NW; 37:16) !Save blong yumi i nating nomo taem yumi skelem wetem save blong God! Nating se ol man oli kasem bigfala save long ol yia we oli pas, be oli kasem save long “smol haf nomo blong wok blong [God].” Yumi save talem se, save blong yumi i olsem “tok blong man we i stap tok smosmol nomo” taem yumi skelem wetem save blong Jeova we i olsem “bigfala tanda.”​—Job 26:​14, NW.

7. ?Deved i bilivim wanem long saed blong save blong Jeova, mo from samting ya, yumi mas luksave wanem?

⁷ From we Jeova i wokem yumi, i klia se hem i savegud yumi. King Deved i bilivim samting ya, taswe hem i raetem se: “Hae God. Yu yu lukluk gud long mi finis, mo yu savegud mi. Yu yu save evri samting we mi stap mekem. Yu stap longwe, be yu save olgeta tingting blong mi. Nating we mi stap wok no mi stap spel, be yu yu stap luk mi, mo yu save olgeta  samting we mi stap mekem. Nating we mi no tok yet, be yu yu save finis ol samting ya we bambae mi talem.” (Ol Sam 139:​1-4) Deved i save se ol man oli fri blong jusum rod blong olgeta​—God i mekem yumi we yumi naf blong jusum se yumi wantem obei long hem no nogat. (Dutronome 30:​19, 20; Josua 24:15) Nating se i olsem, Jeova i save yumi moa i bitim we yumi wan i save yumi. Hem i wantem se yumi gat wan nambawan laef, mo hem i naf blong lidim yumi long ol samting we yumi mekem. (Jeremaea 10:23) Yes, i no gat wan tija, wan man blong hae save, no wan man blong givim advaes, we i moagud long God blong tijim yumi long trutok mo blong soemaot rod blong yumi kam waes mo hapi.

Jeova i Tok Tru Oltaem

8. ?Olsem wanem yumi save se Jeova i tok tru oltaem?

⁸ Ating i no had tumas blong man i save wanem i tru, be maet i had blong hem i talem samting we i tru oltaem, no blong tok tru. Olsem nao, Setan i jusum blong no “holem strong long trutok.” (Jon 8:​44, NW ) Be Jeova i defren, hem i “fulap long . . . trutok.” (Eksodas 34:​6, NW ) Oltaem Baebol i soemaot se Jeova i gat fasin we i stret mo i tru. Aposol Pol i talem se “God i no save giaman.” (Hibrus 6:18; Taetas 1:2) Fasin blong God blong tok tru oltaem i wan bigfala haf blong prapa fasin blong hem. Yumi save trastem Jeova fulwan mo dipen long hem, from we hem i tok tru oltaem; neva hem i giaman long ol man we oli stap tru long hem.

9. ?Olsem wanem nem blong Jeova i joen wetem trutok?

⁹ Nem blong Jeova i soem se hem i God blong trutok. Nem ya i minim “Hem i Mekem i Kamaot.” Tok ya i soemaot se Jeova i Man we i mekem olgeta promes blong hem oli kamtru. I no gat wan narafala man we i naf blong mekem samting ya. Jeova i Hae Olgeta, taswe i no gat wan samting i save blokem hem blong mekem ol tingting blong hem oli kamtru. Antap long fasin ya blong Jeova blong tok tru oltaem, hem nomo i gat naf paoa mo waes blong mekem ol promes blong hem oli kamtru.

10. (a) ?Wanem samting we Josua i luk we i soemaot se Jeova i tok tru oltaem? (b) ?Long ol yia blong laef blong yu, wanem sam promes blong Jeova we yu yu luk se oli kamtru?

¹⁰ I gat plante man we oli luk long ae blong olgeta ol bigbigfala wok blong Jeova we i soemaot se hem i tok tru oltaem. Wan long ol man ya, hemia Josua. Josua i stap long Ijip taem Jeova i mekem ten trabol i kamaot long kantri ya. Bifo long ol wanwan trabol ya, Jeova i talemaot se bambae i mekem wan trabol i kamaot. Mo tu, Jeova i promes se bambae hem i tekemaot ol man Isrel long Ijip mo lidim olgeta oli go long Promes Lan, mo bambae hem i winim ol strong ami blong Kenan we oli kam agensem olgeta. Josua i luk we promes ya blong Jeova i kamtru. Taswe, klosap long en blong laef blong hem, hem i talem long ol elda blong Isrel se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” (Josua 23:14) I tru se yu yu no stap long taem bifo blong luk ol merikel we Josua i luk. ?Be long ol yia blong laef blong yu, yu luk we plante promes blong God oli kamtru olsem hem i talem?

Jeova i Talemaot Trutok Long Ol Narafala

11. ?Wanem i soemaot se Jeova i wantem talemaot trutok long ol man?

¹¹ Tingbaot sipos wan papa i gat bigfala save be neva hem i tektaem blong storian wetem ol pikinini blong hem, ating hem i storian sam samtaem nomo. ?Yu yu glad se Jeova i no gat fasin olsem? From we Jeova i lavem ol man, hem i toktok wetem olgeta, mo i toktok plante tu. Baebol i talem se hem i “Bigfala Tija” blong yumi. (Aesea 30:​20, NW ) Mo from we Jeova i gat lav mo kaen fasin, hem i traehad tu blong toktok wetem ol man we oli no wantem lesin long hem. Olsem nao, Hem i givim wok long Esikel blong prij long olgeta we Hem i save se bambae oli no lesin. Hem i talem long Esikel se: “Olgeta samting we mi talem long yu, yu yu mas go talemaot long ol laen blong Isrel.” Nao hem i givim woning long Esikel se: “Bambae oli no glad nating blong lesin long yu, from we oli no wantem nating blong lesin long mi. Olgeta evriwan oli stronghed, mo oli no save lesin nating.” Wok ya we Jeova i givim long Esikel i no isi. Nating se i olsem, Esikel i obei long Jeova. Taem hem i obei, hem i soemaot se hem i gat sore long ol man, olsem we Jeova i gat sore. Maet yu tu yu stap prij long wan ples we ol man oli no glad blong lesin. Be sipos yu dipen long God, yu save sua se hem bambae i mekem yu yu strong, olsem we i mekem profet Esikel i strong.​—Esikel 3:​4, 7-9.

12, 13. ?Wanem ol rod we God i yusum blong toktok wetem ol man?

 ¹² Jeova i wantem “sevem olgeta man, mo i wantem we olgeta man bambae oli save trutok blong hem.” (1 Timoti 2:4) Blong talemaot tok blong hem, hem i yusum ol profet, ol enjel, mo tu, Pikinini blong hem Jisas Kraes, we hem i laekem tumas. (Hibrus 1:​1, 2; 2:2) Jisas i talem long Paelat se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok. Mo man we i man blong holem trutok, hem i save harem ol tok blong mi.” Paelat i gat nambawan janis blong lanem trutok long saed blong rod we Jeova bambae i yusum blong sevem ol man. Pikinini blong God stret i save tijim hem long ol trutok ya. Be, Paelat i no glad blong folem trutok, taswe hem i no wantem we Jisas i tijim hem. Hem i ansa long Jisas long fasin we i soem se hem i no kea nating long trutok, i se: “?Wanem ya trutok ya?” (Jon 18:​37, 38, Nyutestamen wetem Ol Sam long Bislama) !Sore tumas we hem i gat fasin olsem! Be nating, plante narafala man oli glad blong lesin long trutok we Jisas i talemaot. Jisas i talem long ol disaepol blong hem se: “Yufala ya, yufala i save harem gud, from we yufala i save luk ol samting ya, mo yufala i save harem ol tok ya.”​—Matiu 13:16.

¹³ Tru long Baebol, Jeova i holem trutok i stap gud, mo i mekem i goaot long ol man long evri ples. Baebol i eksplenem ol samting long fasin we i tru. Hem i tokbaot ol fasin blong God, ol stamba tingting mo loa blong hem, mo i talemaot ol samting long saed blong wol ya mo ol man blong hem, stret olsem i stap hapen. Jisas i prea long Jeova se: “Tok blong yu i tru olgeta.” (Jon 17:17) From samting ya, Baebol i defren long olgeta narafala buk. God we i save evri samting, i givim ol tok blong Baebol long ol man blong oli raetemdaon. I no gat wan narafala buk nating we i olsem Baebol. (2 Timoti 3:16) Baebol i wan nambawan presen we God i givim long ol man, wan presen we ol man blong God oli tinghae tumas long hem. Yumi waes sipos yumi ridim Baebol evri dei.

Holem Strong Long Trutok

14. ?Wanem sam samting we Jeova i talem se bambae hem i mekem, mo from wanem yumi save trastem ol promes ya blong hem?

¹⁴ Yumi mas tinghevi long ol samting we Jeova i talem long yumi long Tok blong Hem. Taem hem i tokbaot ol fasin blong hem, hem i tok tru. Ol samting we hem i talem se bambae hem i mekem, be bambae hem i mekem. Taswe, yumi save trastem hem fulwan. Yumi save bilif long tok blong Jeova se bambae hem i “givim panis long olgeta we oli no save ona long [Hem], mo long olgeta we oli no save obei long gud nius blong Jisas, Masta blong yumi.” (2 Tesalonaeka 1:8) Mo tu, yumi save trastem tok blong Jeova se hem i lavem ol man we oli mekem stret fasin, mo se bambae hem i givim laef we i no save finis long olgeta we oli soemaot bilif. Mo yumi save trastem promes ya se bambae hem i tekemaot soa, krae, mo ded. Jeova i makemgud se promes ya i tru taem hem i givim oda ya long aposol Jon se: “Yu raetem tok ya, from we tok blong mi i tru, mo ol man oli save bilif long hem.”​—Revelesen 21:​4, 5; Ol Proveb 15:9; Jon 3:36.

15. ?Wanem sam giaman tingting we Setan i stap leftemap?

 ¹⁵ Setan i gat fasin we i defren olgeta long Jeova. Hem i giaman long ol man blong trikim olgeta, hem i no givim trufala save long olgeta nating. Blong pulum ol man oli stap longwe long trufala wosip, Setan i leftemap fulap giaman tingting. Olsem nao, Setan i wantem we yumi ting se God i no laekem yumi, mo se hem i stap longwe long yumi we i no kea nating long ol man we oli stap safa. Be, Baebol i soem se oltaem Jeova i stap tingbaot ol man we hem i wokem, mo hem i no laekem nating ol nogud fasin mo trabol we i mekem ol man oli safa. (Ol Wok 17:​24-30) Mo tu, Setan i wantem pulum ol man blong oli ting se oli stap westem taem sipos oli mekem wok blong God. Be, Baebol i no talem olsem. Defren olgeta, Baebol i promes se, ‘oltaem God i stap mekem i stret nomo. Mo hem i no save fogetem ol wok ya we yumi mekem. Hem bambae i stap tingbaot we yumi lavem hem.’ Mo tu, Baebol i talem klia se God i “stap mekem i gud long olgeta we oli stap traem faenem hem.”​—Hibrus 6:10; 11:6.

16. ?From wanem ol Kristin oli mas stap wekap gud mo holem strong long trutok?

¹⁶ Long saed blong Setan, aposol Pol i raetem se: “Setan we i rabis god blong wol ya hem i satem tingting blong [ol man] finis, nao oli stap long tudak. Hem i stap blokem olgeta, blong oli no luk laet ya we i stap saenaot i go long olgeta. Laet ya i kamaot long gud nius blong Jisas Kraes, we hem i gat olgeta paoa, mo hem i stret pija blong God.” (2 Korin 4:4) Samfala oli olsem Iv we Setan i trikim hem. Samfala oli olsem Adam, we i no gat man i trikim hem, be hem nomo i jusum blong brekem loa blong God. (Jud 5, 11) Taswe, i impoten tumas we ol Kristin oli stap wekap gud mo holem strong long trutok.

Jeova i No Wantem We Yumi “Gat Tu Fes Long Saed Blong Bilif”

17. ?Yumi mas mekem wanem blong Jeova i glad long yumi?

¹⁷ Jeova i tok tru oltaem mo i mekem ol samting long fasin we i tru. Taswe, hem i wantem se ol man we oli wosipim hem, olgeta tu oli mas gat fasin ya. Wan man we i raetem plante Sam i talem se: “Hae God. ?Hu man we i stret blong go long Haos Tapolen blong yu? ?Hu man we i stret blong go mekem wosip long yu long Saeon, tabu hil ya blong yu? Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret. [“Ol tok we hem i talem long hat blong hem, oli tru nomo,” NW ].” (Ol Sam 15:​1, 2) Taem ol man Jiu oli singim ol tok ya long saed blong tabu hil blong Jeova, oli tingbaot Hil ya Saeon we King Deved i stanemap haos tapolen long hem, nao i karem bokis blong kontrak i kam putum long haos tapolen ya. (2 Samuel 6:​12, 17) Oli tingbaot hil ya mo haos tapolen ya olsem ples we Jeova i stap long hem. Ol man oli save go long ples ya blong prea long God, mo blong askem long hem wetem fulhat blong olgeta blong hem i blesem olgeta.

18. (a) ?Man we i wantem fren wetem God i mas mekem wanem? (b) ?Nekis stadi bambae i tokbaot wanem?

¹⁸ Blong fren wetem Jeova, i no naf we man i tok tru wetem maot blong hem nomo. Ol tok we hem i talem “long hat blong hem” tu, oli mas tru. Ol trufala fren blong God, hat blong olgeta i stret, mo oli  “no gat tu fes long saed blong bilif.” Yes, olgeta wok mo fasin we oli tru, oli kamaot long hat blong man nomo. (1 Timoti 1:​5, NW; Matiu 12:​34, 35) Wan man we i fren wetem God i no save traem faenem wan rod blong haedem trutok, mo i no save giaman blong trikim narafala. “Ol man blong trikim man, [Jeova i] stap agens long olgeta.” (Ol Sam 5:6) Ol Witnes blong Jeova raon long wol oli traehad blong folem fasin blong God blong olgeta we i tok tru mo i mekem ol fasin we oli tru oltaem. Nekis stadi bambae i tokbaot samting ya.

?Bambae Yu Yu Ansa Olsem Wanem?

• ?From wanem Jeova i save trutok long saed blong evri samting?

• ?Wanem i soemaot se Jeova i tok tru oltaem?

• ?Olsem wanem Jeova i stap talemaot trutok long ol narafala?

• ?Long saed blong trutok, yumi mas mekem wanem?

[Kwestin]

[Tok blong pija long pej 10]

God blong trutok i save evri samting long saed blong olgeta samting we hem i wokem

[Tok blong pija long pej 13]

Olgeta promes blong Jeova bambae oli kamtru