“Tu Woman i Kilkilim Doa Blong Mifala”

“I GAT tu yia i pas finis nao we mitufala i bin harem nogud tumas taem mitufala i lusum smol gel blong mitufala.” Hemia fastok blong wan leta we i kamaot long niuspepa Le Progrès, we oli wokem long Saint-Étienne, long Franis.

“Taem Melissa i gat tri manis nomo, hem i safa long wan nogud sik, nem blong sik ya trisomy 18. Taem mi luk nogud samting ya we i hapen long bebi blong mi, mi ting se neva bambae mi save harem gud bakegen samtaem. Nating we mifala i stap long Katolik jos, mifala i tingbaot oltaem se, ‘?God sipos yu yu laef i stap, from wanem yu letem ol samting olsem oli hapen?’ ” I klia nomo se, mama we i raetem leta ya i harem nogud we i nogud. Hem i gohed blong talem se:

“Afta long samting ya we i hapen, tu woman i kilkilim doa blong mifala. Mi luksave se oli ol Witnes blong Jeova. Mi wantem talem gud long tufala blong tufala i go, be mi luk we tufala i stap holem wan smol buk we i tokbaot from wanem God i letem man i safa. So mi letem tufala i kam insaed long haos. Tingting blong mi se bambae mi pruvum we ol tok blong olgeta oli rong. Taem mi tingbaot fasin blong safa, mi luk se famle blong mi i safa bigwan finis, mo mifala i no wantem harem ol tok ya bakegen se, ‘God i givim, mo God i karembak.’ Ol Witnes ya oli stap bitim wan aoa. Oli lesin long mi wetem sore, mo taem oli aot long haos, mi harem gud mo mi glad blong oli kam luk mi bakegen. Samting ya i hapen tu yia finis, mi no kam wan Witnes blong Jeova, be mi stat blong stadi Baebol wetem olgeta, mo mi stap go long ol miting blong olgeta evri taem we mi mi gat janis blong mekem olsem.”