“Yufala i Kasem i Fri, Mo Yufala i Mas Givim i Fri Nomo”

“YUFALA i kasem i fri, mo yufala i mas givim i fri nomo.” (Matiu 10:​8, NW ) Jisas i givim oda ya long ol aposol blong hem taem hem i sanem olgeta oli go talemaot gud nius. ?Ol aposol oli obei long oda ya? Yes, mo biaen oli gohed blong obei long oda ya nating se Jisas i no moa stap long wol.

Eksampol, taem man ya Saemon we hem i wan kleva bifo, i luk we aposol Pita mo Jon tufala i gat paoa blong mekem merikel, hem i wantem pem tufala blong oli givim paoa ya long hem. Be Pita i tok strong long Saemon i se: “!Mane ya blong yu bambae i go lus wetem yu . . . ! ?Yu ting se yu save pem samting ya we God i stap givim fri nomo i go long ol man?”​—Ol Wok 8:​18-20.

Aposol Pol tu i gat semfala tingting olsem Pita. Sipos Pol i wantem, hem i save letem ol Kristin brata blong Korin oli lukaot long ol nid blong hem long saed blong bodi. Be hem i no mekem olsem. Hem i wok long prapa han blong hem blong kasem ol samting we hem i nidim long laef. (Ol Wok 18:​1-3) Taswe Pol i naf blong talem se, hem i bin talemaot gud nius ya long ol man Korin long wan fasin we “i fri nomo long olgeta, oli no pem.”​—1 Korin 4:12; 9:18

Be sore tumas, plante man we oli talem se oli stap folem eksampol blong Kraes, oli no rere blong “givim i fri nomo.” Defren olgeta, plante lida blong Krisendom “oli save talemaot mining blong ol loa blong God, long ol man nomo we oli save pem olgeta from.” (Maeka 3:11) Sam lida blong jos oli kam rij from ol kleksen we ol man oli stap givim i go long jos blong olgeta. Long 1989, kot i jajem wan prija blong Amerika blong i go kalabus 45 yia. ?From wanem? From we hem i “trikim ol sapota blong hem, i stilim plante milian dola long olgeta mo i yusum mane ya blong pem ol haos, ol trak, go spel, mo tu hem i pem wan haos blong dog we i gat ekondisen long hem.”​—People’s Daily Graphic, Oktoba 7, 1989.

Niuspepa ya Ghanaian Times blong Maj 31, 1990, i talem se long Ghana, wan Katolik pris i tekem mane blong kleksen we oli kasem long sevis blong jos, nao i sakem mane ya i gobak long ol man insaed long jos. Niuspepa i talem se pris ya i mekem samting ya “from we, long tingting blong pris, ol man ya oli bigman finis, taswe oli mas givim pepa mane.” Yumi no sapraes we plante jos oli pulum ol man blong olgeta blong oli kam griri, taem oli leftemap fasin blong plelaki no sam narafala fasin bakegen blong resemap moa mane blong jos.

Defren olgeta, ol Witnes blong Jeova oli traehad blong folem eksampol blong Jisas mo ol faswan disaepol blong hem. Oli no gat wan grup blong ol lida blong skul we olgeta nomo i wok mo ol narafala oli pem olgeta. Nogat. Evri Witnes i wan minista we wok blong hem i blong talemaot “gud nius ya blong Kingdom” long ol narafala. (Matiu 24:​14, NW ) Taswe long fulwol i gat bitim 6 milian Witnes we oli stap givimaot “wota ya blong laef” i fri nomo long ol man. (Revelesen 22:17) Long rod ya, olgeta ya we oli “no gat mane” tu oli save haremgud long mesej blong Baebol. (Aesea 55:1) Nating se wok blong ol Witnes long fulwol i stanap long presen mane nomo, oli neva asaskem mane olbaot. Ol Witnes oli trufala minista blong God, taswe oli no “yusum tok blong God olsem rod blong winim  mane,” be ‘God i putumap olgeta, mo oli stap talemaot ol trutok nomo.’​—2 Korin 2:17.

?Nao from wanem ol Witnes blong Jeova oli rere blong halpem ol narafala, nating se oli mas yusum prapa mane blong olgeta? ?Wanem tingting i pulum olgeta blong mekem olsem? ?Taem yumi talem se oli stap givim i fri nomo, i min se oli no kasem wan samting nating from ol traehad blong olgeta?

Oli Ansa Long Kwestin We Setan i Stanemap

Faswan samting we i pulum ol trufala Kristin blong wok blong Jeova tede, hemia se oli wantem mekem Jeova i glad​—oli no intres blong kam rij. Long rod ya oli givim ansa long kwestin ya we Devel Setan i stanemap plante handred yia bifo. Setan i stap lukluk wan stret man we nem blong hem Job, nao i askem kwestin ya long Jeova se: “?Yu ting se i blong nating nomo we Job i fraetgud long God?” Setan i talem se Job i stap wok blong God from we Hem i stap blokemgud Job. !Setan i ademap se, sipos Job i lusum olting blong hem long saed blong bodi, bambae hem i tok nogud long God stret long fes blong Hem!​—Job 1:​7-11, NW.

Blong ansarem kwestin ya, God i letem Setan i traem Job, i talem long hem se: “Oraet, evri samting we hem i gat, naoia i stap long han blong yu.” (Job 1:12) ?Wanem i hapen? Job i pruvum we Setan i man blong giaman. Nomata wanem kaen traem we Job i fesem, be hem i stap tru long Jeova. Hem i talem se: “Oltaem bambae mi mi strong blong talem se mi mi no mekem wan samting nogud, gogo kasem we mi mi ded.”​—Job 27:​5, 6.

Tede, ol trufala man blong wosipim God oli folem eksampol blong Job. Oli no mekem wok blong Jeova blong kasem plante samting long saed blong bodi.

Wan Presen We God i Givim Long Gladhat Blong Hem

Wan narafala risen from wanem ol Kristin oli rere blong “givim i fri nomo,” hemia from we i gat sam samting tu we oli “kasem i fri,” we God i givim. Ol man oli stap aninit long paoa blong sin mo ded from we bubu blong yumi Adam i bin mekem sin. (Rom 5:12) Wetem lav, Jeova i wokem rod blong Pikinini blong hem i givim laef blong hem olsem wan sakrefaes​—wan sakrefaes we i sas tumas long ae blong God. Ol man oli no gud inaf blong kasem wan sakrefaes olsem. Taswe, hem i wan presen we God i givim.​—Rom 4:4; 5:8; 6:23.

Long Rom 3:​23, 24, Pol i talem long ol tabu Kristin se: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God. Be long gladhat blong God, hem i stap givhan long olgeta. Hem i stap mekem olgeta oli stret man long fes blong hem, from we oli joen long Jisas Kraes we i pem rod finis, blong olgeta oli go fri.” Olgeta we oli gat hop blong laef foreva long wol, olgeta tu oli kasem wan presen we i kamaot “long gladhat blong God.” Presen ya i hemia se oli save kam stret man, olsem fren blong Jeova.​—Jemes 2:23; Revelesen 7:14.

Ransom sakrefaes blong Kraes i openem rod long ol Kristin blong oli save wok olsem ol minista blong God. Aposol Pol i raetem se: “God i wok long paoa blong hem nomo, nao hem i givhan long mi long gladhat blong hem. Long fasin ya, hem i mekem mi mi man blong wok blong gud nius blong Kraes.” (Efesas 3:​4-7) Yes, ol trufala minista blong God oli kasem wok ya olsem wan presen we God  nomo i givim long olgeta long gladhat blong Hem. Taswe, i no stret nating we oli kasem wan pei taem oli talemaot gud nius ya long ol narafala.

Laef We i No Save Finis​—?Hop Ya i Pulum Man Blong Tingbaot Hem Wan?

?Olsem wanem? ?God i wantem we ol Kristin oli wok blong hem, be oli no gat hop blong kasem wan blesing nating? Si, bambae oli kasem blesing. Aposol Pol i talem long ol Kristin brata blong hem se: “Oltaem God i stap mekem i stret nomo. Mo hem i no save fogetem ol wok ya we yufala i mekem.” (Hibrus 6:10) Fasin blong Jeova i stret olwe nomo. (Dutronome 32:4) Yes, Jeova “i stap mekem i gud long olgeta we oli stap traem faenem hem.” (Hibrus 11:6) ?Be olsem wanem long promes ya blong laef long olwe long Paradaes? ?Hop ya i pulum man blong tingbaot hem wan?​—Luk 23:​43, NW.

Nogat. Tingting ya blong laef blong olwe long Paradaes long wol, God nomo i stamba blong hem. Hem nao i givim hop ya long faswan man mo woman. (Jenesis 1:28; 2:​15-17) Antap long samting ya, taem Adam mo Iv tufala i lusum hop ya, Jeova i mekem rod blong ol pikinini blong Adam mo Iv oli holem hop ya i stap. Taswe God i mekem promes ya long Tok blong hem se “God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:21) Taswe i stret nomo we ol Kristin tede, olsem Moses bifo, oli stap “luk long pei we God bambae i givim” long olgeta. (Hibrus 11:26) God i no givim blesing ya long man olsem wan doti mane. Hem i givim laef we i no save finis long ol man blong hem from we hem i lavem olgeta. (2 Tesalonaeka 2:​16, 17) Nao yumi tu, “yumi stap lavem God . . . from we God i lavem yumi fastaem.”​—1 Jon 4:19.

Stret Risen We i Pulum Yumi Blong Wok Blong God

Nating se i olsem, ol Kristin tede oli mas jekemap oltaem ol risen we i pulum olgeta blong mekem wok blong God. Long Jon 6:​10-13, yumi ridim olsem wanem Jisas i mekem wan merikel mo i fidim bitim faef taosen man. Afta long merikel ya sam man oli stat blong folem Jisas from we oli wantem kasem sam samting nomo. Jisas i talem long olgeta se: “Yufala i stap lukaot mi . . . from we yufala i kakae bred ya olsem we yufala i wantem.” (Jon 6:26) Plante yia biaen, sam Kristin oli stap mekem sem mak nomo taem oli wok blong God be “oli no mekem long gudfala tingting.” (Filipae 1:17) Sam man we ‘oli no wantem ol trutok we Jisas Kraes i talemaot’ oli traem yusum fasin frengud blong olgeta wetem ol brata sista blong winim mane.​—1 Timoti 6:​3-5.

Tede, wan Kristin we i wok blong God jes from we hem i wantem laef foreva long Paradaes, hem tu i stap tingbaot hem wan nomo. Sloslo, man ya bambae i save foldaon long saed blong spirit. Taem man ya i luk we taem i pas be wol blong Setan i stap yet, maet hem i save “kam slak” from we hem i harem se en i stap longwe tumas yet. (Galesia 6:9) Maet hem i save harem nogud tu from ol samting blong bodi we hem i bin lego blong mekem wok blong God. Jisas i talem bakegen long yumi se: “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:37) Yes, sipos lav nao hem i stamba risen we i pulum wan man blong mekem wok blong God, man ya bambae i no kaontem hamas taem we hem i save spenem long wok ya. Nogat. !Man ya bambae i gat strong tingting blong mekem wok blong Jeova blong olwe! (Maeka 4:5) Hem i no sore long ol samting we hem i bin lego blong i save mekem wok blong God. (Hibrus 13:​15, 16) Lav we man ya i gat long God i pulum hem blong putum wok blong God i stap fasples long laef blong hem.​—Matiu 6:33.

Tede, bitim sikis milian man “oli glad blong kam joen” long wok blong Jeova. (Ol Sam 110:3) ?Yu yu wan long ol man ya? Sipos no, i gud yu tingting dip long ol samting ya we Jeova i save givim i fri nomo long yu: wan klin save blong trutok; (Jon 17:3) kam fri long ol tijing blong ol giaman skul; (Jon 8:32) mo hop ya blong laef blong olwe. (Revelesen 21:​3, 4) Ol Witnes blong Jeova oli save halpem yu blong yu lanem olsem wanem Jeova i save givim olgeta samting ya long yu​—mo oli mekem i fri nomo.

[Tok blong makem poen long pej 22]

Faswan samting we i pulum ol trufala Kristin blong wok blong Jeova tede, hemia se oli wantem mekem Jeova i glad​—oli no intres blong kam rij

[Tok blong pija long pej 21]

God i givim ransom sakrefaes i fri nomo, taswe ol Kristin oli wantem serem gud nius i fri nomo