!Bambae Yumi Wokbaot Long Nem Blong Jeova Gogo i No Save Finis!

“Be yumi, bambae yumi wokbaot olwe long nem blong Jeova, God blong yumi, yes, gogo i no save finis.”​—MAEKA 4:​5, NW.

1. ?Wanem tok we yumi save ridim long Maeka japta 3 kasem 5?

 I GAT wan samting we Jeova i wantem talem long ol man blong hem, mo hem i yusum Maeka olsem profet blong hem. Stamba tingting blong God hemia blong panisim ol man we oli mekem nogud. Yes, bambae hem i panisim ol man Isrel from we oli lego trufala wosip. Be, ol man we oli wokbaot long nem blong Jeova oli save hapi from we bambae Jeova i blesem olgeta. Ol samting ya nao yumi save ridim long japta 3, 4 mo 5 blong profet tok blong Maeka.

2, 3. (a) ?Ol lida blong Isrel oli mas soemaot wanem fasin, be oli stap mekem wanem? (b) ?Long prapa tok blong yu, yu save eksplenem pijatok we i stap long Maeka 3:​2, 3?

² Profet ya blong God i talemaot se: “Ol lida blong ol laen blong Isrel, . . . yufala i lesin long tok blong mi. Yufala i lida blong ol man ya blong mi. Mo wok blong yufala i blong jajem olgeta long stret fasin.” Yes, hemia wok blong olgeta. ?Be oli stap mekem wanem? Maeka i talem se: “Be yufala i girap, yufala i tanem baksaed long stret fasin, yufala i agens long hem, nao yufala i wantem mekem ol rabis fasin nomo. Taem yufala i jajem ol man, i olsem we yufala i stap tekemaot skin blong olgeta we oli laef yet, nao yufala i stap terem mit blong olgeta i kamaot long bun blong olgeta. Yufala i stap kakae olgeta. Yufala i stap teremaot skin blong olgeta, yufala i stap brekem bun blong olgeta, mo yufala i stap katkatem olgeta long ol smosmol pis, olsem we man i stap katkatem mit blong putum i go long sospen.”​—Maeka 3:​1-3.

³ !Tru ya ol lida oli stap givim hadtaem long ol puaman we oli no gat paoa blong faet from raet blong olgeta! Long tok ya Maeka i yusum wan pijatok we ol man long taem ya oli kasem save long hem. Taem oli kilim wan sipsip blong kukum, fastaem oli karemaot skin blong hem nao oli katkatem long ol joen blong hem. Samtaem oli brekem ol bun blong hem blong mekem se wota blong bun ya i joen long wota blong supsup ya. Ale oli putum mit mo bun blong sipsip ya tugeta long wan bigbigfala sospen, olsem we Maeka i tokbaot. (Esikel 24:​3-5, 10) Pijatok ya i laenap gud wetem nogud fasin we ol rabis lida oli stap mekem long ol man long taem blong Maeka.

Jeova i Wantem Se Yumi Mekem i Stret Long Narafala

4. ?Wanem i mekem se Jeova i defren olgeta long ol lida blong Isrel?

⁴ Fasin blong ol lida blong Isrel i defren olgeta long fasin lav we Jeova, Bigfala Man ya blong Lukaot long Sipsip, i soemaot. Ol lida ya oli no mekem gud wok blong olgeta blong lukaot long ol sipsip from we oli no folem stret fasin blong jajem man. Oli tingbaot olgeta nomo mo oli yusum ol man ya we oli olsem sipsip, blong kasem samting we olgeta nomo i wantem. Oli jajem ol sipsip ya long fasin we i rabis mo oli stap “kilim man i ded” olsem Maeka 3:10 i talem. ?Yumi lanem wanem from samting ya?

5. ?Jeova i wantem se ol man we oli lidim ol man blong hem oli mekem wanem?

⁵ God i wantem se ol man ya we oli gat wok blong lidim ol man blong hem oli mas jajem man long stret fasin. Ol man blong Jeova tede oli luk se samting ya i tru long olgeta. Mo tu, samting ya i laenap wetem Aesea 32:​1, we i talem se: “!Olgeta! I gat taem i stap kam, we wan king bambae i stap rul long fasin we i stret olgeta, mo we ol haeman blong hem bambae oli stap mekem i stret nomo.” ?Be olsem wanem long taem blong Maeka? ?Yumi faenem wanem fasin i stap? Ol man we oli ‘tanem baksaed long stret fasin,’ mo ‘oli wantem mekem ol rabis fasin nomo’ oli stap gohed blong jajem narafala long kruked fasin nomo.

?God i Ansa Long Ol Prea Blong Hu?

6, 7. ?Wanem impoten poen i stap long Maeka 3:4?

⁶ ?I stret we ol rabis man long taem blong Maeka oli  wantem we Jeova i lesin long olgeta? !Nogat! Maeka 3:4 i talem se: “Bambae yufala i krae i go long Hae God blong i givhan long yufala, be bambae hem i no save ansa long yufala. Bambae hem i no save harem prea blong yufala, from we yufala i stap mekem ol fasin ya we i no stret.” Tok ya i makem wan impoten poen.

⁷ Jeova i no save ansa long prea blong yumi sipos yumi stap gohed blong mekem wan sin. Hemia i tru moa sipos yumi gat wan dabol laef, yumi haedem ol rong blong yumi mo long semtaem yumi mekem olsem se yumi stap mekem wok blong God wetem bilif. Long Ol Sam 26:​4, Deved i singsing se: “Mi mi no save go stap wetem ol man blong giaman. Mi no gat bisnes nating wetem ol man ya we oli gat tu tingting.” !Taswe i klia se Jeova i no save ansa long prea blong ol man we oli minim nomo blong agensem Tok blong hem!

Tabu Spirit Blong God i Givim Paoa

8. ?Wanem woning i goaot long ol giaman profet long taem blong Maeka?

⁸ !Sam long olgeta we oli gat wok blong lidim ol man Isrel oli gat fasin we i blong sem nomo! I gat ol giaman profet we oli stap lidim ol man oli gorong long wosip blong olgeta. Ol lida ya we oli gat griri fasin, oli stap singaot se “i gat pis,” be taem ol man oli no wantem givim kakae long olgeta, ale wantaem nomo oli wantem mekem faet. Taswe, Jeova i talem se: “Naoia klosap wok ya blong yufala, i finis. Bambae yufala i no moa save luk vison bakegen, mo bambae yufala i no moa save talemaot ol samting we bambae i hapen long fiuja, from we yufala i stap lidim ol man blong mi oli gorong. Mo sipos ol man oli luk we ol samting ya we yufala i stap talemaot oli no kamtru, bambae yufala i sem bigwan. . . . bambae yufala i harem nogud tumas [“bambae yufala i kavremap mustas blong yufala,” NW ].”​—Maeka 3:​5-7.

9, 10. ?Wanem mining blong tok ya “kavremap mustas,” mo from wanem Maeka i no nid blong mekem samting ya?

⁹ ?From wanem Maeka i talem se oli “kavremap mustas” blong olgeta? Hemia wan fasin we ol rabis man long taem blong Maeka oli mekem from we oli sem. Mo i stret nomo we ol rabis man ya oli sem. Olgeta ya oli luk se God ‘i no save ansa long olgeta.’ (Maeka 3:7) Jeova i no lesin nating long prea blong ol man we oli flas mo we fasin blong olgeta i nogud.

¹⁰ Maeka i no nid blong “kavremap mustas” blong hem. Hem i no gat samting blong sem from. Jeova i ansa long ol prea blong hem. Makem tok we i stap long Maeka 3:8. Profet ya blong God i talem se: “Oltaem Hae God i stap givim paoa long mi. Oltaem, hem i stap mekem Spirit blong hem i kam bigwan long mi, i holem mi, mo i stap mekem mi mi savegud ol stret fasin blong jajem man. Mo hem i stap mekem tingting blong mi i strong.” Maeka i glad tumas from we long longfala taem we hem i spenem long wok blong profet mo taem hem i holem strong long bilif blong hem, oltaem hem i kasem ‘paoa blong Jeova mo spirit blong hem.’ Hemia i mekem hem i strong blong “talemaot ol sin blong ol man [Isrel], stret long fes blong olgeta.”

11. ?Olsem wanem ol man long wol ya oli save kasem paoa blong talemaot tok blong God?

¹¹ Be taem Maeka i talemaot ol strong mesej blong jajmen blong God, prapa paoa blong hem i no naf. I impoten tumas we hem i kasem tabu spirit, no paoa blong Jeova. ?Olsem wanem long yumi? Yumi gat wok ya blong prij, be blong mekem wok ya yumi nidim we Jeova i givhan long yumi wetem tabu spirit blong hem. Taswe sipos yumi mekem wan sin be yumi no stretem, bambae yumi no save karem gudfala frut long wok blong prij. Tru ya, God bambae i no save ansa taem yumi prea long hem blong i givim paoa blong mekem wok blong hem. Yumi no save talemaot ol jajmen blong Papa blong yumi long heven sipos ‘spirit blong Jeova’ i no stap wetem yumi. Taem Jeova i lesin long ol prea blong yumi mo tabu spirit i halpem yumi, yumi naf blong talemaot tok blong God wetem fasin no fraet olsem we Maeka i mekem.

12. ?Wanem i givhan long ol faswan disaepol blong Jisas blong oli ‘talemaot tok blong God we tingting blong olgeta i strong’?

 ¹² Ating yu save stori we i stap long Ol Wok 4:​23-31. Tingbaot se yu yu wan long ol disaepol blong Jisas long faswan handred yia. I gat sam man i stap we oli strong long skul blong olgeta nao oli stap mekem bigfala trabol long ol disaepol blong Kraes blong traem blokem olgeta blong oli no moa prij. Be ol disaepol oli stap tru long God ale oli prea long Hae Masta ya blong olgeta, oli krae long hem se: “Plis yu makemgud ol strong tok ya we oli stap mekem agens long mifala. Mifala i man blong wok blong yu. Plis yu givhan long mifala, blong bambae mifala i talemaot ol tok blong yu, we tingting blong mifala i strong.” ?Wanem i kamaot biaen? Taem oli stap prea, haos ya we oli stap long hem, i seksek, mo tabu spirit i kam fulap long evri man insaed long haos ya mo oli stat talemaot tok blong God we oli no fraet nating. Taswe i gud we oltaem yumi lukluk i go long Jeova tru long prea mo dipen long tabu spirit blong hem blong i halpem yumi long wok blong prij.

13. ?Wanem bambae i hapen long Jerusalem mo Sameria, mo from wanem?

¹³ Tingtingbak long taem blong Maeka. Long Maeka 3:​9-12 yumi ridim se ol jaj oli letem ol man oli pem olgeta blong oli jajem man long fasin we i no stret, mo ol pris oli talemaot loa nomo blong ol man oli save pem olgeta from, mo ol giaman profet tu oli stap talemaot mining blong ol vison blong kasem mane nomo. Taswe, God i talemaot se Jerusalem, we i kaptel blong Juda, bambae i kam wan “bigfala hip blong ol ston.” Be giaman wosip mo doti fasin i plante tu long Isrel. Taswe God i putum tok long maot blong Maeka blong talemaot se Hem bambae i “brebrekem ol haos” long Sameria tu, mo “ol ston blong hem bambae i stap long ol hip olbaot long open ples.” (Maeka 1:6) Profet Maeka i laef gogo hem i luk tok ya i kamtru,  taem ol ami blong Asiria oli kam spolem Sameria long 740 B.K.T. (2 King 17:​5, 6; 25:​1-21) I klia se Maeka hem wan i no naf blong talemaot ol strongfala mesej ya agensem Jerusalem mo Sameria. Hem i nidim paoa blong Jeova.

14. ?Olsem wanem profet tok long Maeka 3:12 i kamtru, mo samting ya i mas gat paoa long yumi olsem wanem?

¹⁴ Ol man Juda oli no save ronwe long strongfala jajmen blong Jeova. Profet tok blong Maeka 3:12 bambae i kamtru se Saeon bambae i “kam olsem ples blong garen nomo.” Tede yumi save talem se profet tok ya i kamtru taem ol man Babilon oli spolem Juda mo Jerusalem long yia 607 B.K.T. Hemia plante yia afta we Maeka i bin talemaot jajmen ya, be Maeka i bilif fulwan se jajmen ya bambae i kamtru. I gud we yumi tu, yumi bilif fulwan se rabis wol ya blong naoia bambae i lus long ‘dei blong Jeova’ we Baebol i tokbaot.​—2 Pita 3:​11, 12.

Jeova i Stretem Ol Rao

15. ?Long prapa tok blong yu, talem wanem profet tok i stap long Maeka 4:​1-4?

¹⁵ Taem yumi tingting gud, yumi luk se Maeka i talemaot wan mesej blong hop tu. Ol tok blong Maeka 4:​1-4 oli leftemap tingting blong yumi. Wan haf long ol tok ya i talem se: “I gat taem i stap kam we hil ya we haos blong Hae God i stap long hem bambae i kam hae moa, i winim ol narafala hil. Mo ol man blong plante ples long wol bambae oli save wokbaot blong kam long hem. . . . Hem bambae i jajem ol trabol blong ol man blong plante ples, mo bambae i stretem ol rao blong ol kantri we oli gat paoa, nating we oli stap klosap no longwe. Long taem ya, ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet. Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.”

16, 17. ?Olsem wanem ol tok blong Maeka 4:​1-4 oli stap kamtru tede?

¹⁶ ?Hu ya “ol man blong plante ples” mo “ol kantri we oli gat paoa”? Hemia i no minim ol kantri mo gavman blong wol tede. Nogat. Profet tok ya i tokbaot ol wanwan man ya we oli kamaot long olgeta kantri blong wol, nao oli joen wanples long trufala wosip blong Jeova long hil blong hem.

¹⁷ I no longtaem, profet tok blong Maeka bambae i kamtru fulwan from we ol man long fulwol bambae oli folem klin wosip blong Jeova. Tede, “olgeta we oli stret blong kasem laef blong olwe,” oli stap lanem ol samting we Jeova i wantem olgeta blong mekem. (Ol Wok 13:​48, NW ) Taem ol man oli bilif mo stanap long saed blong Kingdom, Jeova i jajem mo i stretem trabol we olgeta ya oli gat long saed blong spirit. Ol man ya oli haf blong “bigfala kampani” ya we bambae i laef tru long “bigfala trabol.” (Revelesen 7:​9, 14, NW ) Stat tede finis, ol man ya oli stap long pis wetem ol Kristin brata sista blong olgeta we oli Witnes blong Jeova mo wetem ol narafala man tu, from we oli kilim ol naef blong faet blong olgeta oli kam ol tul blong wokem garen. !I gud tumas blong stap kampani wetem ol man olsem!

Oli Gat Strong Tingting Blong Wokbaot Long Nem Blong Jeova

18. ?Tok ya se ol man bambae oli stap gud ‘long ol plantesen blong grep blong olgeta, mo sidaon aninit long ol figtri blong olgeta’ i pija blong wanem?

¹⁸ Tede ol man blong wol oli laef wetem fraet, be yumi glad from we plante long olgeta ya oli stap lanem ol samting we Jeova i wantem olgeta blong mekem. Yumi wantem tumas blong luk taem ya we ol man ya we oli lavem God bambae oli no moa faet be bambae oli stap gud long plantesen blong grep blong olgeta mo sidaon aninit long figtri blong olgeta. Plante taem, ol man oli planem figtri long ol plantesen blong grep. (Luk 13:6) Tok ya se man i stap gud long plantesen blong grep blong hem mo sidaon aninit long figtri blong hem i min se man i stap long pis, mo i gat plante samting, mo i harem sef. Stat naoia finis, fasin fren we yumi gat wetem Jeova i givim pis long tingting blong yumi mo i mekem yumi harem sef long saed blong spirit. Taem Kingdom bambae i rulum wol mo bambae yumi rili sidaon aninit long figtri blong yumi, bambae yumi no moa fraet mo yumi harem sef oltaem.

19. ?Sipos yumi wokbaot long nem blong Jeova i min se yumi mekem wanem?

¹⁹ Sipos yumi wantem se God i glad long yumi mo i blesem yumi, yumi mas wokbaot long nem blong Jeova. Samting ya i kamaot klia long Maeka 4:5 (NW ) we profet i talem se: “Olgeta pipol, bambae oli  wokbaot long nem blong god blong olgeta. Be yumi, bambae yumi wokbaot olwe long nem blong Jeova, God blong yumi, yes, gogo i no save finis.” Wokbaot long nem blong Jeova i no minim nomo se yumi talemaot long ol man se Jeova nao hem i God blong yumi. I gat narafala samting tu blong mekem. I no naf blong kam long ol Kristin miting mo joen long wok blong talemaot Kingdom. Ol samting ya oli gud be oli no naf. Sipos yumi wokbaot long nem blong Jeova, i min se ful laef blong yumi i blong hem mo yumi stap traehad blong mekem wanem we hem i wantem from we yumi lavem hem long olgeta laef blong yumi. (Matiu 22:37) Yes, yumi wosipim Jeova, taswe tingting blong yumi i mas strong blong wokbaot long nem blong God ya blong yumi gogo i no save finis.

20. ?Maeka 4:​6-13 i talemaot wanem?

²⁰ Naoia i gud blong tingbaot ol profet tok ya blong Maeka 4:​6-13. “Jerusalem,” we i olsem pikinini gel blong Saeon, bambae i go kalabus “long Babilonia.” Yes, hemia i hapen long ol man Jerusalem long 607 B.K.T. Nating se i olsem, profet tok blong Maeka i talemaot se bambae i gat wan smol grup blong olgeta ya we i gobak long Juda. Ale, taem Saeon i stanap bakegen, Jeova bambae i meksua se ol enemi blong hem oli lus olgeta.

21, 22. ?Olsem wanem Maeka 5:2 i kamtru?

²¹ I gat sam narafala bigbigfala samting yet we Maeka japta 5 i talemaot. Wan long ol samting ya i stap long Maeka 5:​2-4. Maeka i tokbaot wan Rula we God bambae i putumap​—“laef blong man ya i stat longlongtaem bifo, (NW ). Hem i talem se rula ya bambae i bon long Betlehem. Bambae hem i rul “long paoa ya we Hae God bambae i givim long hem.” Rula ya hem i gat paoa, i no long Isrel nomo be long “olgeta man olbaot long wol.” Ating bighaf blong ol man long wol oli no save se hu ya rula ya, be hemia i no wan tokhaed long yumi.

²² ?Long olgeta man we oli bon long Betlehem, hu ya i bigman moa? ?Mo hu man we “olgeta man olbaot long wol bambae oli luksave we hem i gat paoa”? !Hemia Mesaea ya, Jisas Kraes! Taem King Herod i askem ol jif pris wetem ol tija blong Loa se Mesaea ya bambae i bon long weples, olgeta oli ansa se: “Bambae hem i bon long Judia, long taon ya Betlehem.” Mo oli yusum ol tok we oli kamaot stret long Maeka 5:2. (Matiu 2:​3-6) Sam narafala man we oli no ol pris no ol tija blong Loa, be oli save long samting ya tu. Jon 7:42 i tokbaot se sam long olgeta ya oli talem se: “Baebol i talem se Mesaea bambae i kamaot long laen blong King Deved, mo long taon ya Betlehem we King Deved i kamaot long hem.”

Samting We i Mekem Ol Man Oli Rili Harem Gud

23. ?Wanem i stap hapen naoia blong mekem Maeka 5:7 i kamtru?

²³ Maeka 5:​5-15 i tokbaot ol ami blong Asiria we bambae oli traem tekem graon blong ol man blong God, be bambae oli no save win. Vas ya i soem tu se God bambae i jajem olgeta nesen we oli no wantem obei long hem. Maeka 5:7 i mekem promes se ol man Jiu we oli tanem tingting from sin blong olgeta bambae oli save gobak long hom blong olgeta. Be ol tok ya oli kamtru tu tede. Maeka i talemaot se: “Ol laen ya blong yumi we bambae oli stap laef yet long ol kantri ya, bambae oli stap givhan gud long ol man raonabaot long olgeta. Bambae oli olsem wota blong naet, no smosmol ren, we Hae God i stap sanem i kam blong mekem kakae i gru gud.” Hemia wan naesfala pijatok blong soemaot se smol haf blong ol man Isrel long saed blong spirit, bambae oli olsem wan blesing we God i givim i go long ol man. “Ol narafala sipsip” blong Jisas, we oli gat hop blong laef long wol, oli glad tumas blong wok wanples wetem smol grup ya blong “Isrel blong God” tede. Oli stap wok tugeta blong mekem ol man oli harem gud long saed blong spirit. (Jon 10:16; Galesia 6:16; Sefanaea 3:9) I gat wan impoten poen blong tingbaot long saed ya. From we yumi evriwan yumi ol man blong talemaot Kingdom, yumi mas tinghae long blesing ya we yumi gat blong mekem ol man oli harem gud tru.

24. ?Wanem sam poen long Maeka japta 3 kasem japta 5 we oli makem tingting blong yu?

²⁴ ?Wanem samting we yu yu lanem long japta 3  kasem japta 5 long profet tok blong Maeka? Maet yu lanem ol poen ya: (1) Taem God i givim wok long sam man blong oli lidim ol man blong hem, hem i wantem we oli mekem long stret fasin. (2) Jeova i no save ansarem prea blong yumi sipos yumi stap haedem wan sin mo yumi no traem blong stretem sin ya. (3) Wok blong prij we yumi mas mekem, yumi save mekem nomo sipos God i givim paoa long yumi tru long tabu spirit blong hem. (4) Sipos yumi wantem we God i glad long yumi, yumi mas wokbaot long nem blong Jeova. (5) From we yumi ol man blong talemaot Kingdom, yumi mas tinghae long blesing ya we yumi gat blong mekem ol man oli harem gud tru, long saed blong spirit. Ating i gat sam narafala poen moa we oli makem tingting blong yu. ?I gat sam samting bakegen we yumi save lanem long buk ya blong Baebol we i holem ol profet tok? Nekis stadi bambae i halpem yumi blong lanem sam narafala samting bakegen long tufala laswan japta blong profet tok blong Maeka we i mekem bilif blong yumi i strong.

?Bambae Yu Yu Ansa Olsem Wanem?

• ?Taem God i givim wok long sam man blong lidim ol man blong hem, hem i wantem we oli mekem wok ya olsem wanem?

• ?Taem yumi mekem wok blong Jeova, from wanem prea mo tabu spirit oli impoten samting?

• ?Olsem wanem man i save ‘wokbaot long nem blong Jeova’?

[Kwestin]

[Tok blong pija long pej 15]

?Yu yu save talem mining blong bigfala sospen ya we Maeka i tokbaot?

[Tok blong pija long pej 16]

Yumi mas gat strong tingting mo no fraet blong prij, olsem Maeka