?Fasin Blong Laef Blong Yu Bambae i Givim Gudnem Long Yu?

?YU YU ridim ol ded mesej long niuspepa samtaem, no ol stori we oli tokbaot ol gudfala wok blong man we i jes ded? Maet yu askem long yu wan se, ‘?Taem mi mi ded, bambae ol man oli talem wanem long saed blong mi?’ Plante man oli neva tingbaot olsem wanem ol man bambae oli tingbaot olgeta taem oli ded. Taswe, i gud blong tingbaot ol kwestin ya se: ?Sipos mi bin ded yestede, ol man bambae oli talem wanem long saed blong mi tede? ?Yu yu gat gudnem no badnem long fes blong ol man? ?Yu yu wantem se ol man, mo God tu, oli rimemba yu olsem wanem?

Wan waes man we i raetem buk blong Prija long Baebol i talem se: “Sipos yu yu gat gud nem long fes blong ol man, hemia i gud moa long yu, i winim we yu putum gudfala senta ya we praes blong hem i antap tumas. Nao dei ya we bambae yu yu ded long hem, bambae hem i bigfala dei moa blong yu, i winim dei ya we yu yu bon long hem.” (Prija 7:1) ?From wanem dei ya we man i ded long hem i bigfala dei moa i winim dei ya we man i bon long hem? Hemia from we taem man i bon hem i no wokem wan gudnem yet. Hem i no mekem wan samting yet long laef blong hem. Man i kasem wan gudnem no wan badnem, tru long ol samting we hem i mekem long laef blong hem. Olgeta we oli wokem wan gudnem long ol yia we oli pas, dei ya we oli ded long hem bambae i moa gud i winim dei ya we oli bon long hem.

Taswe i jus blong yumi. Yes, nem ya we bambae yumi gat long dei blong ded blong yumi, mo fasin we God bambae i tingbaot yumi, i dipen long ol jus we yumi mekem evri dei. Semfala waes man ya, we i wan man Hibru, i talem se: “Sipos wan stret man i ded, bambae oli stap tingbaot hem longtaem mo hem i save kasem blesing from. Be nem blong ol rabis man bambae i kam olsem wan samting we i sting.” (Ol Proveb 10:​7, NW ) !Hemia wan bigfala ona ya! God i stap tingbaot ol gudfala man, blong bambae hem i blesem olgeta.

Sipos yumi waes, bambae yumi traehad blong folem ol loa blong God, blong mekem se hem i glad long yumi. Hemia i min se bambae yumi obei long tufala stamba loa ya we Jisas Kraes i tokbaot se: “ ‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ Tufala loa ya i stamba blong Loa we God i givim long Moses, wetem ol tok blong ol profet tu.”​—Matiu 22:​37-40.

Sam man oli bin yusum mane blong olgeta blong givhan long ol puaman, sam oli wok blong givhan long ol man we oli safa, mo sam oli faet from raet blong wanwan man. Sam narafala bakegen oli mekem ol bigfala wok long saed blong bisnes, sayens, meresin, no sam narafala wok bakegen. Plante man oli tingbaot ol man ya from ol samting ya. ?Be, olsem wanem long yu? ?Yu yu wantem we ol man oli tingbaot yu olsem wanem?

 Robert Burns, wan man Skotlan we i man blong raetem ol naesfala tok, (1759-​1796) i talem se i gud sipos wan paoa (olsem God) i givhan long yumi man blong luk yumi wan olsem we ol narafala oli luk yumi. ?Taem yu luk mo skelem fasin blong yu wan, yu yu save talem se yu gat gudnem long fes blong ol narafala man mo God? Taem ol yia oli pas, bambae yumi luksave se fasin fren we yumi gat wetem ol narafala i impoten moa i winim eni bigbigfala samting we yumi mekem long bisnes no spot, from we ol samting ya oli blong smoltaem nomo. Taswe yumi save askem se: ?Taem mi mi kampani wetem ol narafala​—ol storian blong mi, ol fasin blong mi, mo wei we mi soemaot filing blong mi​—i gat paoa mo i pulum tingting blong ol narafala olsem wanem? ?Ol man oli glad no oli fraet blong kam klosap long mi? ?Oli ting se mi gat kaen fasin no mi mekem i strong tumas? ?Mi rere blong jenisim tingting lelebet no mi strong oltaem blong narafala i folem tingting blong mi? ?Mi frengud mo mi sore long man no mi no gat filing mo mi no kea long narafala? ?Ol toktok blong mi i agensem mo i daonem man no i leftemap tingting? Bambae yumi tokbaot sam eksampol blong bifo mo blong naoia mo luk wanem we yumi save lanem from ol eksampol ya.

[Tok blong pija long pej 3]

Robert Burns i talem se i gud sipos wan paoa i givhan long yumi man blong luk yumi wan olsem we ol narafala oli luk yumi

[Credit Line]

From the book A History of England