Trufala Wosip i Joenemgud Wan Famle

MARIA i gat 13 yia blong hem taem hem wetem Lucy, smol sista blong hem, tufala i harem wan famle blong tufala i stap tokbaot Jeova. Man ya i eksplenem se ol man oli gat hop blong laef long wan Paradaes long wol. Tufala gel i intres tumas long toktok blong hem, taswe tufala i go wetem hem long wan miting blong ol Witnes blong Jeova. Tufala i sapraes tumas long nambawan tijing we oli kasem long ples ya. !Miting ya i defren olgeta long ol sevis blong jos, we oli stap singsing nomo! I no longtaem biaen, tufala gel ya tufala i stadi Baebol wetem wan Witnes blong Jeova.

Bigfala brata blong tufala, nem blong hem Hugo, hem i intres long waes blong man mo long evolusen. Hem i stap talem se hem i wan man we i no bilif long God. Be taem hem i stap long ami, hem i ridim buk ya Life​—How Did It Get Here? By Evolution or by Creation? * Long buk ya hem i faenem ol ansa we ol narafala skul oli no save givim long hem. Taem Hugo i aot long ami, hem i wantem se bilif blong hem i kam strong moa long God, taswe hem i stat blong stadi long Baebol mo i go long ol miting wetem tufala sista blong hem. Maria mo Lucy, tufala i baptaes long 1992, hemia 2 yia afta we tufala i bin harem trutok, mo brata blong tufala i baptaes 2 yia biaen.

Long sem taem, papa mama blong olgeta, we tufala i strong Katolik, tufala i no intres long trutok. Tufala i tingting se ol Witnes blong Jeova oli man blong hambag nomo. Nating se i olsem, tufala i glad tu blong luk ol gudfala fasin blong ol yangfala Kristin we ol pikinini blong tufala i stap invaetem i kam long haos. Oli luk se ol yangfala ya oli werem ol klos we i stret. Mo tu, long taem blong kakae, taem ol pikinini oli stap tokbaot ol samting we oli bin lanem long miting, tufala papa mama i intres long storian blong olgeta.

Nating se i olsem, papa mama ya tufala i intres long majik tu. Papa blong olgeta i wan man blong drong we i stap kilim mama blong olgeta. Klosap famle ya i seraot. Biaen, papa blong olgeta i kalabus tu wik from we hem i bin draevem wan trak be i drong. Taem hem i stap long kalabus, hem i stat ridim Baebol. Mo taem hem i ridim Baebol, hem i makemgud tok ya blong Jisas long saed blong saen blong ol las dei. Hem wetem waef blong hem, tufala i konfius, ale tufala i go long wan miting long Haos Kingdom mo tufala i agri blong stadi long Baebol. Taem tufala i lanem trutok, tufala i sakemaot ol buk blong tufala long saed blong majik. Samting ya i mekem se ol rabis spirit oli no moa spolem tufala from we tufala i stap singaot nem blong Jeova. Tufala i stat blong mekem ol bigbigfala jenis long laef blong tufala.

!Tingbaot bigfala glad blong Maria mo Lucy, taem tufala i luk Hugo i baptaesem papa mo mama blong olgeta long wan distrik asembli long Bolivia long 1999! Stat long faswan taem ya we Maria mo Lucy, tufala i harem man ya i tokbaot Jeova mo ol promes blong hem, kam kasem taem ya we papa mama blong tufala i baptaes, klosap naen yia i pas. Tede, Maria, Lucy mo Hugo, trifala i joen long fultaem wok blong prij. !Oli glad tumas we trufala wosip i joenemgud famle blong olgeta!

[Futnot]