?Yu Yu Stap Traehad Blong Faenem Jeova?

WAN Kristin man i wantem tumas blong tokbaot Baebol wetem ol narafala man we oli stap karem tren evri dei wetem hem. (Mak 13:10) Be hem i fraet we i fraet tumas. ?Olsem wanem? ?Hem i lego nomo, i no moa wantem prij? No, hem i prea wetem fulhat blong hem blong winim fraet blong hem mo i wokhad blong lanem olsem wanem blong statem wan storian. Jeova God i ansa long prea blong man ya mo i givim paoa long hem blong i save prij long narafala.

Fasin traehad olsem i impoten tumas taem yumi traem faenem Jeova mo kasem ol blesing blong hem. Aposol Pol i talem se: “Man we i wantem kam klosap long God, hem i mas bilif we God i stap, mo we hem bambae i givim gudfala pei long ol man we oli stap traehad blong faenem hem.” (Hibrus 11:​6, NW ) Be i no naf blong traehad blong faenem Jeova. Grik tok ya we oli tanem i kam “traehad blong faenem,” oli raetem hem long wan fasin we i minim se yu rili wokhad mo yu putum ful paoa blong yu long samting ya. I min se yu putum olgeta hat, olgeta tingting, olgeta laef, mo olgeta paoa blong yu blong mekem samting ya. Sipos yumi stap traehad blong faenem Jeova, bambae yumi no wok hafhaf, we tingting blong yumi i no strong, mo bambae yumi no les. Defren olgeta, yumi wok strong blong traem faenem hem.​—Ol Wok 15:17.

Ol Man Blong Bifo We Oli Traehad Blong Faenem Jeova

Baebol i givim eksampol blong plante man we oli yusum ful paoa blong olgeta blong faenem Jeova. Wan man olsem, hemia Jekob. Hem i resling ful naet go kasem brok delaet wetem wan enjel blong God we i jenisim bodi blong hem i kam olsem man. From samting ya, Jekob i kasem nem ya Isrel (Man blong faet agens long God) from we hem i “faet agens” long God, we narafala mining blong hem se hem i no wantem lego, hem i yusum ful paoa blong hem, no i gat strong tingting blong faet. Enjel ya i blesem Jekob from bigfala traehad blong hem.​—Jenesis 32:​24-30.

Mo tu i gat eksampol blong woman Galili ya, we yumi no save nem blong hem. Hem i gat sik blong woman we sik ya i stap long hem oltaem gogo kasem 12 yia finis, we i no save stop, mo i mekem hem i “stap harem nogud tumas.” Loa i talem se ol woman we oli gat sik ya, oli no mas tajem ol narafala man. Nating se i olsem, woman ya i gat strong tingting blong go luk Jisas. Hem i stap talem se: “Sipos mi save tajem klos blong hem nomo, bambae sik blong mi i finis ya.” Tingbaot woman ya taem hem i traehad blong faenem rod blong hem long medel blong ‘ol man we oli plante tumas, oli stap paspas long olgeta nomo raon long [Jisas].’ Taem hem i tajem klos blong Jisas, hem i harem se “wantaem nomo, blad blong hem i no moa ron”​—!sik blong hem i finis nao! Taem Jisas i askem se, “?Hu i tajem klos blong mi?” woman ya i fraet lelebet. Be Jisas i soem kaen fasin long woman ya i talem long hem se: “Dota blong mi. Bilif blong yu i mekem yu yu gud bakegen. Yu go, yu no moa wari bakegen. Sik blong yu i finis nao.” Woman ya i kasem  blesing from ol traehad blong hem.​—Mak 5:​24-34; Levitikas 15:​25-27.

Long wan narafala taem, wan woman Kenan i askem plante taem long Jisas sipos hem i save hilim dota blong hem. Jisas i ansa, i talem long hem se i no stret blong sakem kakae blong ol pikinini i go long ol smol dog. Jisas i minim se hem i no save lego ol man Jiu blong go lukaot long ol man we oli no man blong Isrel. Woman ya i kasem mining blong pijatok, be nating se i olsem hem i krae long Jisas se: “Masta, i tru, be ol dog tu, oli save kakae ol hafkakae we i folfoldaon aninit long tebol blong masta blong olgeta.” Bilif blong hem i strong mo hem i toktok wetem hat blong hem, mo fasin ya i pulum Jisas blong talem se: “Woman, bilif blong yu i strong tumas. Bambae i kamtru long yu, stret olsem we yu yu bilif.”​—Matiu 15:​22-28.

?Wanem bambae i hapen long ol man ya sipos oli no bin gohed long traehad blong olgeta? ?Bambae oli kasem ol blesing sipos oli bin lego nomo taem oli fesem faswan traem blong olgeta no taem man i sakemaot olgeta fastaem? !Nogat! Ol eksampol ya oli makemgud poen ya we Jisas i tijim se fasin blong ‘askem plante taem’ hemia i stret nomo, mo yumi nidim blong gat fasin ya taem yumi traem faenem Jeova.​—Luk 11:​5-13.

Stret Long Ol Samting We Hem i Wantem

?Long olgeta stori we yumi talem antap, from wanem Jeova i mekem wan merikel blong mekem ol man ya oli kamgud bakegen? ?From we ol man ya oli soem fasin traehad, hemia nomo? No, Jeova i mekem ol merikel ya from we ol samting we ol man ya oli askem oli laenap wetem tingting blong Hem tu. Paoa ya we Jisas i kasem blong mekem ol merikel, hem i blong pruvum we Jisas i Pikinini blong God, Mesaea ya we God i promes blong sanem i kam. (Jon 6:14; 9:33; Ol Wok 2:22) Antap long samting ya, ol merikel blong Jisas oli olsem wan pija blong ol blesing we bambae Jeova i givim long ol man long Taosen Yia Rul blong Kraes.​—Revelesen 21:4; 22:2.

Naoia, God i no moa wantem we ol man we oli wosipim hem oli gat paoa blong mekem ol merikel, olsem paoa blong hilim man no paoa blong tok long narafala lanwis. (1 Korin 13:​8, 13) Tede, God i wantem we gud nius blong Kingdom i go long evri ples long wol ‘blong olkaen man oli sef mo oli kasem stret save long trutok.’ (1 Timoti 2:​4, NW; Matiu 24:14; 28:​19, 20) Ol man blong God oli gat raet blong ting se bambae Jeova i lesin mo i ansa long ol strong prea blong olgeta, sipos ol traehad blong olgeta oli laenap wetem samting we God i wantem.

Maet sam man oli askem long olgeta wan se, ‘?From wanem yumi mas traehad sipos yumi save finis we bambae stamba tingting blong God i mas kamtru?’ I tru we bambae Jeova i mekem stamba tingting blong hem i kamtru, nomata long ol traehad blong ol man. Be nating se i olsem Jeova i glad we ol man oli wok wetem hem, blong mekem samting we hem i wantem. Yumi save talem we Jeova i olsem wan man we i bildim wan haos. Man ya i gat plan blong hem finis blong wokem haos ya, be blong bildim haos ya hem i yusum ol tul mo ol  samting we oli stap nomo long kantri ya we hem i bildim haos ya long hem. Long sem fasin, Jeova i gat wan plan we i mas kamtru tede, mo hem i glad blong yusum ol man blong hem, we oli glad blong wok wetem hem.​—Ol Sam 110:3; 1 Korin 9:​16, 17.

Tingbaot ekspiriens blong yangfala ya, nem blong hem Toshio. Taem Toshio i go long hae skul, hem i wantem mekem bes blong hem blong prij long spesel teritori ya. Oltaem, hem i rere blong yusum Baebol blong hem mo i traehad blong soemaot ol gudfala Kristin fasin. Klosap long en blong faswan yia blong hem long hae skul, Toshio i gat janis blong givim wan tok long fored blong klas. Hem i prea long Jeova blong kasem help, mo hem i glad blong luk we ful klas i stap lesingud long tok blong hem, we taetel blong tok ya se “Mi Wantem Mekem Wok Blong Paenia Long Ful Laef Blong Mi.” Hem i eksplenem we hem i wantem kam wan fultaem minista blong ol Witnes blong Jeova. Wan long ol studen i agri blong stadi long Baebol wetem Toshio, mo studen ya i gohed gud gogo i tekem baptaes. Toshio i kasem bigfala blesing from ol traehad blong hem we oli laenap wetem ol prea blong hem.

?Yu Yu Traehad Olsem Wanem?

Yu save soem long plante defren fasin we yu stap traehad blong faenem Jeova mo kasem ol blesing blong hem. Fastaem, i gat sam isi samting we yu save mekem, olsem reregud ol Kristin miting. Taem yu reregud ol ansa blong yu, yu givim ol tok we oli pulum man, mo yu mekem ol gudfala pleplei, hemia nao ol samting we oli soem we yu traehad blong faenem Jeova. Mo tu, yu save pruvum we yu traehad blong faenem Jeova taem yu traem kam gud moa long fasin blong prij. ?Maet yu save wokem fasin ya blong frengud moa wetem ol man taem yu prij, mo yusum ol fastok we oli stret long teritori blong yu? (Kolosi 3:23) Wan Kristin we i wokhad wetem fulhat blong hem, i save kasem sam wok insaed long kongregesen, maet hem i save wok olsem man blong givhan no olsem elda. (1 Timoti 3:​1, 2, 12, 13) Sipos yu rere blong mekem ol wok olsem, yu save haremgud from we yu givim samting i go long narafala.Maet yu save askem sipos yu save joen long wok blong bildim ol branj ofis, no askem blong wok long wan branj ofis blong ol Witnes blong Jeova. Sipos yu yu wan yangfala brata we i nafgud, maet yu wantem joen long Ministeriol Trening Skul, wan skul we i givhan long ol man we oli strong finis long saed blong spirit blong oli kam ol gudfala man blong lukaot long sipsip. Sipos yu mared, maet yu save tingbaot wok blong misinari olsem wan rod blong soem we yu yu traehad blong mekem moa long wok blong Jeova. Maet yu save muv i go long wan ples we i nidim plante moa man blong talemaot Kingdom.​—1 Korin 16:9.

Be, samting we i impoten moa, hemia tingting blong yu taem yu mekem wan wok. Nomata wanem wok we yu gat, yu mas traehad blong givim  bes blong yu taem yu mekem wok ya, wetem ful paoa blong yu, mo wetem “gudfala hat.“ (Ol Wok 2:​46, NW; Rom 12:8) Yu mas traehad blong lukluk evri wok blong yu olsem wan janis blong pruvum se yu wantem tumas blong presem Jeova. Yu mas prea oltaem blong kasem help blong Jeova, mo givim bes blong yu. Bambae yu kasem ol bigbigfala blesing.

God i Blesem Ol Traehad

?Yu rimemba Kristin man ya we i prea blong winim fraet blong hem, blong i save prij long ol narafala man we oli stap karem tren evri dei wetem hem? Jeova i blesem gudfala tingting blong hem. Brata ya i wokhad blong statem storian blong hem wetem wan naesfala fastok mo i mekem rere plante defren samting blong tokbaot wetem ol man. Hem i gat janis blong yusumgud Baebol mo prij long wan man we i harem nogud from we hem i faenem i had blong fren wetem ol man. Brata ya i visitim hem plante taem long tren, mo biaen hem i stadi long Baebol wetem man ya long haos blong hem. !Yes, Jeova i blesem ol traehad blong brata ya!

Long sem fasin, yu yu save kasem plante blesing sipos yu gohed long traehad blong yu blong faenem Jeova. Sipos yu wok wetem strong tingting mo tingting daon, mo sipos yu putum fulhat blong yu long eni wok we yu mas mekem blong God, bambae Jeova i yusum yu long wan fasin we i laenap wetem stamba tingting blong hem, mo bambae Hem i blesem yu bigwan.

[Tok blong pija long pej 26]

?Sipos woman ya i no bin gohed blong askem plante taem, bambae hem i kasem samting we hem i wantem?

[Tok blong pija long pej 27]

?Yu yu stap gohed blong askem oltaem long Jeova blong i blesem yu?

[Tok blong pija long pej 28]

?Olsem wanem yu save soem we yu stap traehad blong faenem Jeova?