I Gat Wan Trufala Kristin Skul Nomo

JISAS KRAES i stanemap wan jos, no kongregesen nomo. Kongregesen ya i olsem wan bodi, no famle long saed blong spirit. Hem i wan grup blong ol man we tabu spirit blong God i jusumaot olgeta​—mo God i lukluk olgeta evriwan olsem ol “pikinini” blong hem.​—Rom 8:​16, 17; Galesia 3:26.

Jisas i tijim we God i yusum wan rod nomo blong lidim ol man oli kam long trutok mo kasem laef. Blong soemaot impoten trutok ya, Jisas i talem se rod blong go kasem laef we i no save finis, i olsem wan get we man i mas pastru long hem. Hem i se: “Yufala i mas pas long get ya we i smol nomo blong go insaed. From we get ya we i bigwan, mo rod ya we i isi nomo, hemia i blong go lus. Mo plante man oli stap folem rod ya. Be get ya we i smol nomo, mo rod we i strong, hemia i blong go kasem laef. Mo smol man nomo oli faenem.”​—Matiu 7:​13, 14; Jon 14:6; Ol Wok 4:​11, 12.

Wan Kongregesen We i Joengud

Wan buk (The New Dictionary of Theology) i talem se yumi no mas tingbaot kongregesen ya blong ol faswan handred yia olsem “wan bigfala grup blong ol man, we oli stap long evri ples long wol, mo we oli wok folem sam kaen rul olsem we yumi minim tede taem yumi tokbaot Katolik jos.” ?From wanem? Buk ya i ansa se, “from wan risen nomo se, long taem ya bifo, i no bin gat wan bigfala grup blong man olsemia we oli stap long evri ples blong wol mo we oli wok folem sam spesel rul.”

Ating ol man oli agri se faswan Kristin kongregesen i no sem mak nating long ol bigfala jos we yumi luk long wol tede. Be, kongregesen ya i wok folem plan. Ol wanwan kongregesen oli wok tugeta, mo olgeta evriwan oli luksave se hed kampani long Jerusalem i gat raet blong lidim olgeta. Hed kampani ya, hemia ol aposol mo elda long kongregesen blong Jerusalem. Hem i givhan blong holem fasin joengud insaed long kongregesen we i olsem “wan bodi nomo” blong Kraes.​—Efesas 4:4, 11-​16; Ol Wok 15:​22-​31; 16:​4, 5.

 ?Olsem wanem long trufala kongregesen ya? ?Hem nao i kam bigfala Katolik Jos? ?Hem nao i stamba blong olgeta Protestan jos ya we oli seraot long plante smosmol jos tede? ?No i gat wan narafala samting we i bin hapen long kongregesen ya?

“Gudfala Sid” Mo “Rabis Gras”

Blong faenem ansa long ol kwestin ya, bambae yumi lukluk wanem we Jisas Kraes i talem se bambae i hapen long kongregesen ya. Maet yu sapraes blong lanem se Jisas i save finis we kongregesen blong hem bambae i lus blong smoltaem. Mo hem i gat tingting blong letem samting ya i gohed blong sam handred yia.

Jisas i tokbaot kongregesen blong hem we i laenap wetem “kingdom blong heven,” taem hem i se: “[“Kingdom blong heven,” NW ], i olsem. I gat wan masta we hem i go planem ol gudfala sid long garen blong hem. Be long naet, taem ol man oli slip, wan enemi blong hem i kam, i planem ol sid blong wan rabis gras long garen ya, nao i gowe. Nao ol gudfala sid ya oli gru, oli kam bigwan, oli gat kakae, be long semtaem tu, ol rabis gras ya oli gru, oli kam bigwan. Nao ol man blong wok blong masta ya oli kam luk hem, oli askem long hem se, ‘?Masta, olsem wanem? Ol sid ya we yu planem long garen blong yu, oli gudfala sid nomo. ?Be rabis gras ya i kam olsem wanem?’ Hem i talem long olgeta se, ‘No, hemia wan enemi ya we i mekem samting ya.’ Nao ol man blong hem oli askem long hem se, ‘?Be olsem wanem? ?Yu wantem mifala i go pulumaot olgeta?’ Be hem i talem se, ‘No, livim. Sipos yufala i go pulumaot ol rabis gras ya, maet bambae yufala i pulumaot ol kakae ya tu, wetem ol rabis gras ya. Tufala i save gru wantaem gogo kasem taem blong tekemaot ol kakae long garen. Long taem ya, bambae mi save talem long ol man we oli go blong tekemaot ol gudfala kakae ya, blong oli go katem ol rabis gras ya fastaem, oli fasem long bandel blong sakem i go long faea. Biaen, oli save go tekemaot ol gudfala kakae blong karem i kam long haos.’ ”​—Matiu 13:​24-​30.

Jisas i eksplenem se hem nao i man blong “planem ol gudfala sid.” “Ol gudfala sid ya” hemia ol trufala disaepol blong hem. “Enemi ya” hemia Devel Setan. “Ol rabis gras” hemia ol giaman Kristin we sloslo oli kam insaed long faswan Kristin kongregesen. Jisas i talem se bambae hem i livim “ol gudfala sid” i gru wantaem wetem “ol rabis gras” gogo kasem “taem blong tekem kakae i kam,” we hemia “en blong wol ya.” (Matiu 13:​37-​43) ?Wanem mining blong ol samting ya?

Kruked Fasin i Kam Insaed Long Kristin Kongregesen

I no longtaem afta long ded blong ol aposol, ol giaman tija we oli bin kam insaed long kongregesen, oli girap, oli bos antap long kongregesen. Ol tija ya oli “giaman nomo blong lidim ol man blong Jisas oli biaen long olgeta, oli go krangke.” (Ol Wok  20:​29, 30) From samting ya, plante Kristin ‘oli lego fasin blong bilif long God.’ Oli “go lesin long ol kastom stori ya we oli no tru.”​—1 Timoti 4:​1-3; 2 Timoti 4:​3, 4.

Wan buk, (The New Dictionary of Theology) i talem se long ol yia 300 K.T., * “gavman i putumap Kristin Katolik [Skul] olsem . . . stamba skul blong Gavman blong Rom.” Ale “ol lida blong jos mo ol man blong gavman oli stat wok wanples”​—fasin ya we Jos mo Gavman i joen wanples i go agensem ol bilif blong ol faswan Kristin. (Jon 17:16; Jemes 4:4) Buk ya i gohed blong i talem se sloslo, olgeta samting long saed blong jos, mo plante long ol stamba tijing blong hem tu, oli jenis olgeta. “Oli miksimap [Oltesteman] wetem waes blong Plato mo ol narafala waes blong wol, oli stap folem wan tingting we i had blong kasem save long hem mo we i spolem bilif.” Olsem we Jisas Kraes i bin talemaot, ol giaman Kristin oli kam plante, ale i luk olsem se ol trufala disaepol blong hem oli lus blong smoltaem.

Long taem blong Jisas, i gat wan posen gras we oli kolem bearded darnel. Taem gras ya i stap gru, hem i luk olsem gru blong wit. Ol man we oli lesin long pijatok ya blong Jisas oli kasem save se i had blong luksave weswan nao gru blong gudfala sid mo weswan i rabis gras. Taswe pijatok blong Jisas i soemaot se blong smol taem, bambae i had blong luksave hu nao i trufala Kristin mo hu nao i giaman Kristin. Hemia i no min se Kristin kongregesen i lus olgeta, from we Jisas i bin promes se bambae hem i gohed blong lidim ol brata blong hem “oltaem, gogo kasem wol ya i finis.” (Matiu 28:20) Jisas i talem se gudfala sid bambae i gohed blong gru. I sua se, taem ol yia oli pas, ol trufala Kristin we oli stap​—wanwan no tugeta olsem wan grup​—oli traem bes blong olgeta blong fasgud long ol tijing blong Kraes. Be oli no moa stap olsem wan ogenaesesen, no wan grup we ol man oli save luk, mo we oli save makemaot klia. Nating se i olsem, oli defren olgeta long ol bigbigfala skul ya we oli lego trufala wosip finis. Ol giaman skul ya oli karem sem nomo long nem blong Jisas Kraes mo oli spolem nem ya.​—2 Pita 2:​1, 2.

‘Man Blong Brekem Loa i Mas Kamtru Fastaem’

Aposol Pol i talemaot wan samting bakegen we bambae i makemaot ol giaman skul. Hem i se: “Bambae yufala i no letem ol man oli giaman long yufala olsem. Taem we dei ya [blong Jeova] klosap i kamtru, be fastaem ol man bambae oli girap, oli agens long God, we hemia bambae i lastaem blong ol man oli save mekem olsem. Mo man ya we nem blong hem Man blong Brekem Loa, . . . hem bambae i mas kamtru fastaem.” (2 Tesalonaeka 2:​2-4) “Man blong brekem loa” hemia ol lida blong skul we oli leftemap olgeta wan bakegen olsem ol bos long “Kristin” kongregesen. *

Fasin ya blong lego trufala bilif i stat finis long taem blong aposol Pol. Be i kam antap moa, taem ol aposol oli ded mo oli no moa stap blong blokem fasin ya. Pol i talem se bambae yumi luksave man ya blong brekem loa from we “hem i kamtru long paoa blong Setan, mo hem bambae i wokem ol naranarafala merikel mo giaman saen mo ol samting blong sapraes. Hem bambae i yusum evri kaen trik we oli no stret, blong i giaman long ol man ya we oli blong lus.” (2 Tesalonaeka 2:​6-​12) !Histri i soemaot se, tok ya i stret nomo long ol wok we plante lida blong skul oli stap mekem!

Blong sapotem tingting ya se Katolik Jos nomo i trufala skul, ol lida blong Katolik oli talem se ol bisop blong olgeta oli “kasem wok blong olgeta stret long han blong ol faswan aposol, i stat long taem [we Kristin skul i stanap], ol aposol oli bin pasem wok ya i go long narafala man kam kasem tede.” Be, blong talem stret, i no gat pruf long histri mo long Baebol blong sapotem tingting ya se ol bisop oli karem wok blong ol aposol. Mo tu, i no gat pruf blong soem se tabu spirit blong God nao i lidim skul ya we i stanap afta long ded blong ol aposol blong Jisas.​—Rom 8:9; Galesia 5:​19-​21.

?Olsem wanem long ol narafala skul we oli kamaot afta long taem blong Refomesen? ?Olgeta ya oli gobak folem eksampol blong faswan Kristin kongregesen? ?Oli mekem jos i kam klin olsem faswan Kristin kongregesen? I tru se, afta long Refomesen, ol man oli save ridim Baebol long prapa lanwis blong olgeta. Be, histri i soemaot se ol jos oli gohed nomo blong tijim ol giaman tijing. *​—Matiu 15:​7-9.

 Be makem poen ya. Jisas Kraes i talem se taem en blong wol ya i kam klosap, trufala kongregesen ya blong hem bambae i stanap bakegen. (Matiu 13:​30, 39) Ol profet tok we oli stap kamtru tede oli soem se yumi stap laef long taem ya. (Matiu 24:​3-​35) From we samting ya i tru, yumi wanwan i mas askem se, ‘?Trufala jos ya i stap wea?’ Moa we taem bambae i pas, moa we bambae i isi nomo blong makemaot trufala jos ya.

Maet yu ting se yu yu faenem jos ya, no kongregesen ya, finis. I impoten tumas we yu meksua long samting ya. ?From wanem? From we, olsem long ol faswan handred yia, tede tu i mas gat wan jos nomo we i tru. ?Yu yu tekem taem blong jekemap sipos jos blong yu i folemgud eksampol blong Kristin kongregesen blong faswan handred yia mo sipos jos ya i holemfas long ol tijing blong Jisas Kraes? ?From wanem yu no tekem disisen naoia blong jekemap jos blong yu? Ol Witnes blong Jeova bambae oli glad blong givhan long yu blong mekem samting ya.​—Ol Wok 17:11.

[Ol Futnot]

[Tok blong pija long pej 5]

?Pijatok blong Jisas long saed blong ol gudfala sid mo ol rabis gras i tijim yumi wanem long saed blong trufala kongregesen?

[Tok blong pija long pej 7]

?Jos blong yu i folem eksampol blong ol faswan Kristin long wok blong prij mo stadi?