Laef Stori

Oltaem Jeova i Lukaotgud Long Yumi

ENELESI MZANGA I TALEM STORI YA

Samting ya i hapen long 1972. Ten yangfala man blong Youth League blong Malawi, oli brekem doa blong haos blong mifala, oli holem mi, mo oli pulum mi mi go long wan garen blong sugaken klosap long haos. Nao, oli kilim mi gogo oli ting se mi ded, mo oli lego mi mi stap long ples ya. Plante Witnes blong Jeova long Malawi oli bin safa from raf fasin blong ol man we oli agensem olgeta olsemia. ?From wanem ol man oli agensem ol Witnes? ?Wanem i givhan long ol Witnes blong oli stanap strong? Sipos yu wantem save, plis ridim stori blong famle blong mi.

MI MI bon long Disemba 31, 1921, long wan famle we i strong long saed blong skul. Papa blong mi i wan pasta long Sentrol Presbiterian Jos blong Afrika. Mi gruap long Nkhoma, wan smol taon klosap long Lilongwe, hemia kaptel blong Malawi. Taem mi gat 15 yia blong mi, mi maredem Emmas Mzanga.

Wan dei, wan fren blong papa blong mi we hem tu i wan pasta, i kam luk mifala. Hem i luk we i gat plante Witnes blong Jeova oli stap laef klosap long haos blong mifala, mo hem i givim woning long mifala se mifala i no mas joen wetem olgeta. Hem i talem long mifala se ol devel oli stap long ol Witnes mo hem i talem se sipos mifala i no lukaotgud bambae ol devel oli kam long mifala tu. Woning ya i mekem mifala i fraet bigwan, ale, mifala i muv i go long wan narafala vilej, mo long vilej ya Emmas i wok olsem man blong lukaot long stoa. !Be kwiktaem nomo, mifala i luk we klosap long niufala haos blong mifala, i gat plante Witnes blong Jeova tu!

Emmas i laekem Baebol tumas, taswe i no longtaem i pas ale hem i toktok wetem wan Witnes blong Jeova. Witnes ya i ansa gud long olgeta kwestin we Emmas i askem long hem, taswe Emmas i  agri blong stadi long Baebol wetem hem. Fastaem, Emmas i stap mekem Baebol stadi blong hem long stoa, be biaen, hem i mekem stadi blong hem long haos evri wik. Taem ol Witnes blong Jeova oli kam long haos, mi mi ronwe from we mi fraet long olgeta. Nating se i olsem, Emmas i gohed blong stadi long Baebol. Klosap sikis manis i pas, nao long Eprel 1951, Emmas i tekem baptaes. Be hem i no talem long mi se hem i baptaes, from we hem i wari se bambae mi lego hem sipos mi save samting ya.

Emmas i Fesem Hadtaem Blong Tri Wik

Nating se i olsem, wan dei, fren blong mi we nem blong hem Ellen Kadzalero, i talem long mi se hasban blong mi i baptaes finis long skul blong ol Witnes blong Jeova. !Man, mi kros we mi kros taem mi harem nius ya! Stat long taem ya, mi no moa toktok wetem Emmas mo mi no moa rerem kakae blong hem. Mo tu, mi no moa go karem wota mo boelem wota ya blong hem i save swim​—hemia wan wok we long kastom blong mifala, hem i wok blong waef.

Emmas i fesem hadtaem ya blong tri wik, mo biaen, wetem kaen fasin, hem i askem mi sipos mi glad blong storian wetem hem. Hem i eksplenem long mi from wanem hem i bin tekem disisen ya blong kam wan Witnes. Hem i ridim mo i eksplenem plante vas long mi, olsem 1 Korin 9:16. Tok blong hem i tajem hat blong mi, mo mi harem se mi tu mi mas joen long wok blong talemaot gud nius. Taswe mi tekem disisen blong stadi long Baebol wetem ol Witnes blong Jeova. Long semfala naet ya long sapa, hasban blong mi i haremgud tumas from we mi rerem wan gudfala kakae blong hem.

Talemaot Trutok Long Famle Mo Ol Fren

Taem papa mama blong mitufala oli harem nius ya se mifala i joen wetem ol Witnes blong Jeova, oli strong blong agensem mifala. Famle blong mi i sanem wan leta i kam long mifala, mo oli talem se mifala i no mas go luk olgeta bakegen. Fasin blong olgeta i mekem mifala i harem nogud, be mifala i bilif long promes ya blong Jisas se bambae mifala i gat plante brata sista, mo papa mama long saed blong spirit.​—Matiu 19:29.

Mi gohedgud long stadi blong Baebol mo mi baptaes long Ogis 1951, tri manis haf nomo afta we hasban blong mi i baptaes. Mi harem se mi mas talemaot trutok long fren blong mi, Ellen. Mi glad tumas taem hem i agri blong stadi long Baebol wetem mi. Long Mei 1952, Ellen i tekem baptaes mo hem i kam wan sista blong mi long saed blong spirit, mo samting ya i mekem fasin fren blong mitufala i kam strong moa. Tede yet, mitufala i besfren.

Long 1954, oli putumap Emmas olsem seket elda blong i visitim ol kongregesen. Long taem ya mitufala i gat sikis pikinini finis. Bifo, ol seket elda we oli gat woman mo pikinini oli mas spenem wan wik blong visitim wan kongregesen, mo nekis wik oli mas go stap wetem famle blong olgeta. Be, taem Emmas i go visitim ol kongregesen oltaem hem i meksua we bambae mi mekem famle Baebol stadi. Mifala i traem mekem ol pikinini oli glad blong stadi long Baebol. Mo tu, taem mifala i tokbaot lav we mifala i gat long Jeova mo long trutok blong Baebol, mifala i toktok wetem fulhat blong mifala, mo mifala i prij tugeta olsem wan famle. Trening ya long saed blong spirit i mekem bilif blong ol pikinini i kam strong moa, mo tu, i rerem olgeta blong fesem ol bigfala traem we oli stap kam.

Oli Stat Agensem Mifala From Bilif Blong Mifala

Long 1964, Malawi i kam independen. Taem ol haeman blong politik pati ya we i stap lidim kantri oli harem se mifala i no tekpat long politik, oli traem fosem mifala blong pem ol kad blong joen long pati. * Mi wetem Emmas, mitufala i no wantem pem kad ya, taswe ol memba blong Youth League oli spolem garen blong ol kon blong mifala​—garen ya nao we i mas fidim mifala long yia we i kam. Taem ol memba blong Youth League oli katkatem ol kon, oli stap singsing se: “Olgeta ya we oli no wantem  pem kad blong [Presiden Banda] Kamuzu, bambae ol waet anis oli kakae grin kon blong olgeta mo bambae ol man ya oli krae from.” Nating se mifala i lusum kakae ya, tingting blong mifala i no foldaon olgeta. Mifala i harem se Jeova i lukaotgud long mifala. Wetem lav, Hem i givim paoa long mifala.​—Filipae 4:​12, 13.

Let long naet, long Ogis 1964, mi stap mi wan long haos wetem ol pikinini. Mifala i stap slip, be noes blong sam man we oli stap singsing longwe lelebet, i wekemap mi. Ol man ya, hemia ol Gulewamkulu. Oli wan grup blong man we oli gat save long ol kastom danis mo oli stap wok haed. Ol man oli fraet long olgeta ya. Ol Gulewamkulu oli stap kilim ol man mo oli giaman se oli ol spirit blong ol bubu we oli ded finis. Youth League nao i bin sanem ol Gulewamkulu blong oli kam kilim mifala. Kwiktaem nomo mi wekemap ol pikinini, mo mifala i resis i go long bus bifo we ol rabis man ya oli kasem haos.

Mifala i stap haed long bus, nao mifala i luk wan bigfala laet. Ol Gulewamkulu oli putum faea long ruf natanggura blong haos blong mifala. Faea ya i kakae ful haos, wetem olting blong mifala tu. Taem ol nogud man ya oli gowe long haos blong mifala we i brobrok nogud mo smok i kamaot long hem, mifala i harem olgeta oli talem se, “Yumi mekem wan naesfala faea blong Witnes ya i save hot gud long hem.” !Mifala i tangkiu tumas long Jeova we mifala i save ronwe mo mifala i stap sef! I tru, ol Gulewamkulu oli spolemgud olting blong mifala, be oli no spolem strong tingting we mifala i gat blong trastem moa Jeova i bitim ol man.​—Ol Sam 118:8.

Mifala i harem se ol Gulewamkulu oli bin mekem ol semfala rabis fasin long faefala narafala famle blong ol Witnes blong Jeova we oli laef long eria blong mifala. !Mifala i glad mo i tangkiu tumas taem ol brata blong ol kongregesen raonabaot long mifala oli kam blong halpem mifala! Oli bildim ol haos blong mifala bakegen mo oli givim kakae long mifala blong plante wik.

Fasin Agens i Kam Antap Bigwan

Long Septemba 1967, ol man oli mekem wan kampen long ful kantri blong hivimap olgeta Witnes blong Jeova wanples. Blong mekem olsem, oli sanem ol yangfala man we oli raf bitim mak​—hemia ol memba blong Youth League mo Malawi Young Pioneers. Ol yangfala ya oli wokbaot wetem busnaef blong olgeta, oli go long ol haos wanwan blong faenem ol Witnes. Taem oli faenem ol Witnes, ol man ya oli traem salem kad blong pati long olgeta.

Taem oli kasem haos blong mifala oli askem long mifala sipos mifala i gat finis wan kad blong pati. Mi talem se: “No, mi no bin pem kad ya. Be bambae mi no save pem wan kad naoia, mo mi no save pem wan long fiuja tu.” Ale oli holem mi wetem hasban blong mi, mo oli tekem mitufala i go long polis stesen blong vilej. Oli no letem mifala i tekem wan samting wetem mifala. Taem ol pikinini blong mitufala oli kambak long skul, oli no luk mitufala mo oli wari tumas. Laki se Daniel, fasbon blong mifala, hem i kambak long haos smoltaem nomo biaen, nao wan man we i stap klosap long haos blong mifala i talem long hem wanem i bin hapen. Wantaem nomo, Daniel i tekem ol smol brata sista blong hem mo oli go long polis stesen. Oli kasem ples ya stret long taem ya we polis i putum mifala long ol bigfala trak blong karem mifala i go long Lilongwe. Ale ol pikinini oli kam wetem mifala.

Long Lilongwe, oli holem wan miting blong jajem mifala long polis hedkwota. Miting ya i no laenap nating wetem loa. Polis ofisa i askem long mifala se, “?Bambae yufala i stap olsem Witnes blong Jeova?” Mifala i ansa se, “!Yes!” nating se ansa ya i minim se bambae mifala i mas spenem seven yia long kalabus. Olgeta ya we oli “lidim” ogenaesesen blong ol Witnes, oli mas kalabus 14 yia.

Afta long naet ya we mifala i no kakae mo i no slip, polis i karem mifala i go kalabus long Maula. !Long ples ya, ol rum blong kalabus oli fulap gogo mifala i no save faenem wan smol ples blong ledaon long floa! Toelet blong mifala hem i wan baket nomo we oli putum long wanwan rum blong kalabus ya we i fasfas gud long man. Kakae i smol nomo mo i nogud tu. Tu wik i pas, nao ol haeman blong kalabus oli luksave se mifala i kwaet man nomo, ale oli letem mifala i go wokbaot long smol yad insaed long kalabus. Mifala plante Witnes i stap tugeta, taswe evri dei mifala i gat janis blong leftemap tingting blong mifala evriwan, mo mifala i gat janis blong prij long ol narafala presina. Mifala i sek we, afta we mifala i spenem tri manis long kalabus, oli letem mifala i gofri bakegen, from we olgeta kantri long fulwol oli komplen long gavman blong Malawi from ol rabis samting we i stap hapen long kantri.

 Ol polis ofisa oli talem se mifala i save gobak hom, be tu, oli talem long mifala se gavman i putum tabu long wok blong ol Witnes blong Jeova long Malawi. Wok ya, oli putum tabu long hem stat long Oktoba 20, 1967, kam kasem Ogis 12, 1993​—klosap 26 yia. Taem ya i had we i had tumas, be Jeova i sapotem mifala taswe mifala i naf blong holem strong disisen ya blong mifala blong no joen long faet mo long politik.

Oli Ronem Mifala Olsem Ol Anamol Nomo

Long Oktoba 1972, wan loa blong gavman i makem stat blong wan niufala fasin agens we i raf tumas. Loa ya i talem se oli mas sakemaot olgeta Witnes blong Jeova long wok blong olgeta, mo oli mas putumaot ol Witnes long ol vilej we oli laef long hem. Oli ronem ol Witnes olsem ol anamol nomo.

Long taem ya, wan yangfala Kristin brata i kam luk mifala long haos mo i gat wan mesej blong givim long Emmas se, ‘Youth League i plan blong katemaot hed blong yu, putum hed blong yu long wan pos, mo karem hem i go long ol jif blong vilej.’ Kwiktaem nomo Emmas i mas ronwe, be fastaem, hem i mekem plan blong bambae mifala i save go stap wetem hem. Mi hareap blong sanem ol pikinini oli go. Ale, taem mi mi stap rere blong lego haos tu, ten man blong Youth League oli kam, oli stap lukaotem Emmas. Oli brekem doa blong haos blong mifala be oli luk we Emmas i go finis. Oli kros tumas, ale oli pulum mi mi go long wan garen blong sugaken klosap long haos blong mifala, mo long ples ya oli kikim mi mo oli kilim mi wetem ol sugaken. Oli ting se mi ded finis, nao oli lego mi mi stap. Taem mi wekap bakegen, mi wokbaot fo leg i go kasem haos.

Long naet ya, taem ples i tudak finis, Emmas i kambak long haos blong lukaot mi. Hem i mekem olsem, nating se hem i save ded from. Taem Emmas i faenem mi wetem ol kil ya long mi, hem wetem wan fren we i gat wan trak, tufala i putum mi insaed long trak ya. Ale, mifala i go long haos blong wan brata long Lilongwe. Long ples ya mi stat kam gud sloslo mo Emmas i stat mekem plan blong mifala i ronwe long kantri.

Ol Refuji We Oli No Gat Ples Blong Go Long Hem

Gel blong mifala Dinesi, wetem hasban blong hem, tufala i gat wan bigfala kameong. Wan draeva i wok blong olgeta, we man ya bifo hem i wan memba blong Malawi Young Pioneers, be biaen hem i sore long mifala. Hem i wantem halpem mifala wetem ol narafala Witnes tu. Blong plante naet, draeva ya i pikimap ol Witnes we oli stap wet long hem long ol ples haed. Ale, hem i putum yunifom blong hem blong ol Malawi Young Pioneers nao i draevem bigfala kameong ya we i fulapgud, i pastru long plante ples we polis i blokem rod. Hem i save we i denja tumas blong halpem ol handred Witnes blong gokros long boda i go long Sambia, be nating se i olsem, hem i halpem mifala.

Afta sam manis nomo, gavman blong Sambia i sanem mifala i gobak long Malawi, be mifala i no save gobak long vilej blong mifala. Olting blong mifala we mifala i lego long vilej, ol man oli stilim olgeta evriwan. Oli karemaot ol kapa blong ruf  blong mifala tu. I no gat wan sefples we mifala i save go long hem, taswe mifala i ronwe i go long Mosambik mo mifala i stap long refuji kamp blong Mlangeni blong tu yia haf. Be long Jun 1975, niufala gavman blong Mosambik i klosem kamp ya mo i fosem mifala blong gobak long Malawi. Be laef blong ol Witnes blong Jeova i had tumas yet long Malawi. Ale, mifala i mas ronwe i go long Sambia bakegen. Long ples ya mifala i stap long refuji kamp blong Chigumukire.

Tu manis biaen, plante bas wetem ol kameong blong ami oli stop long big rod, nao plante handred soldia blong Sambia we oli holem ol tul blong faet oli kam insaed long kamp. Oli talem long mifala se oli bin wokem ol naesfala haos blong mifala, mo se olgeta nao oli kam blong karem mifala i go long ol haos ya. Mifala i save finis se ol soldia ya oli stap giaman. Ol soldia oli stat pusum ol man i go insaed long ol kameong mo ol bas, samting ya i mekem ol man oli fraet mo oli ronron krangke olbaot. Ale, ol soldia oli stat sutum masket blong olgeta i go antap long skae, mo plante taosen brata sista blong mifala oli seraot i go wanwan olbaot.

Ol hip man ya we oli stap ronron olbaot oli olsem krangke nomo, ale oli no lukaotgud, oli pusum Emmas i go foldaon long graon mo ol man oli stap wokbaot antap long hem. Be wan long ol brata i halpem hem blong i stanap bakegen. Mifala i ting se hemia stat blong bigfala trabol stret. Olgeta refuji oli stat resis blong gobak long Malawi. Taem mifala i stap yet long Sambia, mifala i stap wokbaot i go from Malawi, mifala i kasem wan reva. Ale, ol brata oli holholem han blong olgeta blong mekem olsem wan jen we ol man oli save holem hem blong gokros long reva, mo stap sef. Be narasaed long reva, ol soldia blong Sambia oli raonem mifala mo oli fosem mifala blong gobak long Malawi.

Mifala i stap long Malawi bakegen, be i no gat wan ples we mifala i save go long hem. Mifala i harem se long ol miting blong politik mo long ol niuspepa, oli givim woning long ol man se oli mas lukaot long ol “niufala fes” we oli kam long vilej. Oli stap minim ol Witnes blong Jeova ya. Taswe mifala i tekem disisen blong muv i go long kaptel, from we long taon ya bambae ol man oli no save makemgud mifala olsem long ol smol vilej. Mifala i naf blong rentem wan smol haos, mo Emmas i mekem wok blong seket elda long fasin haed bakegen.

Mifala i Stap Go Long Ol Miting Blong Kongregesen

?Wanem i givhan long mifala blong mifala i stap tru long Jeova? !Ol miting blong kongregesen! Long ol refuji kamp long Mosambik mo long Sambia, mifala i fri blong go long ol miting long ol haos natanggura, we mifala i yusum olsem Haos Kingdom. I denja mo i no isi blong joen tugeta long ol miting long Malawi​—be nating se i olsem mifala i haremgud taem mifala i go long ol miting ya. Mifala i no wantem se ol man blong gavman oli faenem mifala, taswe plante taem mifala i holem ol miting let long naet mo long ol ples we i no gat tumas man i laef long hem. Mo tu, mifala i no wantem we ol man oli harem mifala, taswe mifala i no klaphan blong talem tangkiu long en blong wan tok, be mifala wanwan i jes ravem tufala han blong mifala tugeta.

Mifala i mekem ol baptaes let long naet tu. Boe blong mitufala, Abiyudi, hem i baptaes olsemia nao. Afta long tok blong baptaes, ol brata oli tekem hem wetem ol narafala we oli wantem baptaes i go long tudak long wan ples blong sofmad nomo, we oli bin digim wan hol long hem. Ale, oli baptaes long ples ya.

Smol Haos Blong Mifala i Wan Sefples

Long ol laswan yia we gavman i putum tabu long wok blong ol Witnes, ol brata oli yusum haos blong mifala long Lilongwe olsem wan sefples. Long fasin haed, ol brata oli karem ol leta mo ol buk we oli kamaot long branj ofis long Sambia mo haedem i stap long haos blong mifala. Ol brata we oli raed long baskel oli kam long haos blong mifala blong pikimap ol buk mo leta we oli kamaot long Sambia, mo biaen oli go seremaot ol buk ya long olgeta ples long Malawi. Ol Wajtaoa we mifala i seremaot oli tintin from we oli prentem ol magasin ya long ol pepa we oli yusum blong prentem Baebol. Olsemia, ol brata we oli karem ol buk oli save dabolem namba blong ol buk we oli karem, from we ol buk ya oli laet mo oli tintin moa, bitim ol buk we oli prentem wetem ol narafala pepa. Mo tu, ol brata oli seremaot ol Wajtaoa we oli kolem ol mini-magasin from we oli gat stadi atikol nomo long olgeta. I isi nomo blong haedem ol mini-magasin ya long poket blong wan sot, from we oli gat wan pej nomo.

Ol brata ya we oli karem ol buk oli putum laef blong olgeta long denja taem oli ron long bus  wetem ol baskel blong olgeta, samtaem long let naet, wetem plante katon we oli fulap long ol buk we gavman i putum tabu long hem. Nomata se polis i blokem ol rod no sam narafala trabol bakegen i kamaot, ol brata ya oli ronron plante handred kilometa long baskel blong olgeta blong givimaot kakae long saed blong spirit long ol brata blong olgeta. !Ol gudfala brata ya we oli givimaot ol buk oli rili gat strong tingting mo fasin no fraet!

Jeova i Lukaotgud Long Ol Wido

Long Disemba 1992, taem Emmas i stap mekem wok blong hem olsem seket elda mo i stap givim wan tok long wan kongregesen, hem i kasem wan strok. Afta long strok ya, hem i no moa save toktok. Samtaem biaen, hem i kasem wan narafala strok mekem se haf bodi blong hem i ded. Emmas i faenem i had blong laef wetem wan sik olsem, be kongregesen blong mitufala i sapotem mitufala wetem lav, mekem se mi no harem nogud bitim mak. Mi lukaot long hasban blong mi long haos blong mifala go kasem taem we hem i ded long Novemba 1994. Long taem ya Emmas i gat 76 yia blong hem. Mitufala i bin mared 57 yia, mo Emmas i luk taem we gavman i karemaot tabu long wok blong ol Witnes blong Jeova long Malawi. Kam kasem naoia, mi harem nogud yet from we mi lusum hasban blong mi we i bin stap tru long Jeova.

Afta we man blong mi i ded, hasban blong gel blong mi, we i lukaot finis long waef blong hem wetem ol faef pikinini blong tufala, hem i tekem disisen blong lukaot long mi tu. Sore tumas, hem tu i kasem wan sik, mo i ded long Ogis 2000. ?Olsem wanem bambae gel blong mi i save faenem kakae mo wan haos blong mifala? Bakegen, mi luk we Jeova i lukaotgud long yumi mo hem “i stap lukaot long ol pikinini we papa blong olgeta i ded, mo i stap mekem i gud long ol wido.” (Ol Sam 68:5) Jeova i yusum ol man blong hem long wol blong givim wan naesfala niufala haos long mifala. ?Samting ya i hapen olsem wanem? !Taem ol brata sista long kongregesen blong mifala oli luk ol hadtaem blong mifala, oli bildim wan haos blong mifala long faef wik taem nomo! Sam brata blong sam narafala kongregesen we oli mekem wok blong putum brikis, oli kam halpem olgeta. Lav mo kaen fasin we olgeta Witnes ya oli soemaot i mekem mifala i haremgud tumas, from we haos ya we oli bildim i moagud i bitim ol haos we olgeta wanwan oli stap long hem. Lav we kongregesen i soem long mifala i givim wan gudfala witnes long ol man raonabaot. !Taem mi go slip long naet, mi harem olsem se mi stap long Paradaes finis! Yes, naesfala haos blong mifala, oli wokem long brikis mo simen, be tru, olsem plante man oli talem finis, haos ya oli wokem long lav.​—Galesia 6:10.

Jeova i Lukaotgud Long Mifala Oltaem

Samtaem mi bin harem olsem se tingting blong mi bambae i foldaon olgeta, be nating se i olsem, oltaem Jeova i lukaotgud long mi. Long ol naen pikinini blong mi, seven i laef yet, mo tede mi gat 123 memba long famle blong mi. !Mi tangkiu tumas from we bighaf blong olgeta i stap tru long wok blong Jeova!

Tede, mi gat 82 yia blong mi, mo mi haremgud tumas taem mi luk ol samting we spirit blong God i bin mekem long Malawi. Long ol fofala yia we i jes pas, mi luk namba blong ol Haos Kingdom i go antap i bitim 600 haos. Mo tu, tede mifala i gat wan branj ofis long Lilongwe, mo i no moa gat wan samting i blokem ol kakae long saed blong spirit blong kam kasem mifala. Yes, mi harem olsem se promes ya we God i mekem long Aesea 54:17 (NW ) i kamtru finis se: “Eni tul blong faet we bambae ol man oli stanemap agensem yu bambae oli no save win.” Mi mekem wok blong Jeova bitim 50 yia, mo mi sua fulwan se, nomata wanem traem we yumi fesem be, oltaem Jeova i lukaotgud long yumi.

[Futnot]

[Tok blong pija long pej 24]

Hasban blong mi, Emmas, i baptaes long Eprel 1951

[Tok blong pija long pej 26]

Wan grup blong brata we oli wok strong blong karem ol buk

[Tok blong pija long pej 28]

Haos ya we ol brata oli wokem wetem lav