Presem Jeova “Long Medel Blong Kongregesen”
Presem Jeova “Long Medel Blong Kongregesen”
JEOVA i stanemap ol miting blong mekem ol man blong hem oli stap strong long saed blong spirit. Taem yumi go long ol miting oltaem, yumi soem tangkiu long plan ya we Jeova i stanemap. Mo antap long samting ya, yumi naf blong ‘givhan long ol brata blong yumi blong oli lavem ol man, mo oli mekem ol gudfala fasin.’ (Hibrus 10:24; Jon 13:35) ?Be olsem wanem yumi save givhan long ol brata blong yumi long ol miting?
Talemaot Bilif Blong Yumi Long Fes Blong Olgeta Man
King Deved i tokbaot hem wan i se: “Nao mi bambae mi talemaot long ol man blong mi ol samting ya we yu bin mekem. Bambae mi mi presem yu long fes blong olgeta [no “long medel blong kongregesen,” NW ]. Nao bambae mi mi presem yu long fes blong olgeta man blong yu.” “Bambae mi talem tangkiu long yu long fes blong olgeta man blong yu bambae mi presem yu long fes blong olgeta evriwan.” “Long fes blong olgeta man blong yu, mi mi talemaot gud nius ya we yu yu sevem mifala. Mo yu yu save we oltaem nomo, bambae mi stap talemaot samting ya, we neva bambae mi spel.”—Ol Sam 22:22, 25; 35:18; 40:9.
Long taem blong aposol Pol, taem ol Kristin oli joen tugeta blong wosipim God, olgeta tu oli talemaot bilif blong olgeta long fes blong olgeta man, mo oli presem Jeova from paoa blong hem. Taem oli mekem olsem, oli leftemap tingting blong olgeta mo oli givgivhan long olgeta blong oli strong blong lavem ol man mo blong mekem ol gudfala fasin. Long taem blong yumi, plante Hibrus 10:24, 25, NW ) Klosap nao bambae wol blong Setan i lus, mo ol problem oli gohed blong kam antap bigwan. Tede ya bitim ol narafala taem bifo, yumi nidim blong “stanap strong oltaem.” (Hibrus 10:36, NW ) ?Mo hu nomo i naf blong leftemap tingting blong yumi, blong yumi stanap strong? Ol brata blong yumi.
handred yia afta long taem blong Deved mo Pol, yumi rili “luk we dei ya [blong Jeova] i kam klosap finis.” (Tede, olsem bifo, evri man we i bilif long God i gat janis blong talemaot bilif blong hem “long medel blong kongregesen.” Wan janis we evriwan i save tekem blong talemaot bilif blong hem, hemia blong givim ansa long ol miting blong kongregesen. Yumi no mas ting nating long ol gudfala frut we ol ansa oli save karem. Eksampol, ol ansa we yumi givim blong eksplenem olsem wanem blong blokem no winim wan problem, oli save mekem tingting blong ol brata blong yumi i kam strong moa blong folem ol stamba trutok blong Baebol. Taem yumi givim ansa blong eksplenem wan vas blong Baebol we oli no raetem toktok blong hem i stap, no taem yumi tokbaot sam poen we yumi bin faenem taem yumi mekem moa risej, ol ansa ya oli save pulum ol narafala brata blong kam gud moa long fasin blong stadi olgeta wan.
Taem yumi luksave se ol ansa blong yumi oli save givhan long yumi mo long ol narafala tu, samting ya i mas pulum yumi evriwan, we yumi Witnes blong Jeova, blong winim fasin sem no fraet we maet i blokem yumi. I impoten tumas we ol elda mo ol man blong givhan oli givim ansa long ol miting, from we olgeta nao oli mas givim eksampol long ol narafala long fasin blong givim ansa mo fasin blong go long ol miting. ?Nao olsem wanem wan man i save kam gud moa long fasin ya blong givim ansa, sipos hem i harem se Kristin wok ya i hadwok lelebet long hem?
Sam Advaes Blong Folem Mo Kam Gud Moa
Rimemba se hemia wan haf blong wosip we yumi mekem long Jeova. Wan Kristin sista we i laef long Jemani i eksplenem tingting blong hem long saed blong fasin ya blong givim ansa i se: “Hemia i olsem prapa ansa blong mi we mi givim i go long Setan we i stap traem blokem ol man blong God blong oli no talemaot bilif blong olgeta.” Wan brata we i jes baptaes mo i go long ol miting long semfala kongregesen wetem sista ya i talem se: “Mi prea plante long Jeova blong mi save givim ansa.”
Reregud. Sipos yu no reregud buk blong yu fastaem, bambae yu faenem i had blong givim wan ansa, mo ansa blong yu bambae i no gat plante paoa. Buk ya Benefit From Theocratic Ministry School Education, pej 70 (Franis mo Inglis) i givim sam advaes long fasin blong givim ansa long ol miting blong kongregesen. *
Putum mak ya blong givim wan ansa long evri miting. Hemia i min se yu mas rerem plante ansa, from we sipos yu leftemap han plante taem, bambae yu gat plante moa janis blong brata i jusum yu blong givim ansa. Maet bambae yu glad blong talem long brata we i lidim stadi ya weswan kwestin nao we yu rerem ansa blong hem finis, ale, long taem blong stadi brata ya i save askem wan long ol kwestin ya long yu. Fasin ya bambae i givhan plante long yu, speseli sipos yu stat nomo blong givim ansa. Maet yu fraet blong leftemap han mo givim ansa “long medel blong kongregesen,” be taem yu save se hemia paragraf blong yu mo se brata ya we i lidim miting bambae i lukaotem han blong yu,
bambae samting ya i pusum yu blong givim ansa.Givim ansa long stat blong miting. Sipos i gat wan wok we yu faenem i had blong mekem, be bambae wok ya i no save kam isi moa sipos yu wet longtaem bifo we yu mekem. Sipos yu givim wan ansa long stat blong miting bambae samting ya i givhan long yu. Bambae yu sapraes blong luk se i isi moa blong ansa wan seken taem, no wan namba tri taem, from we yu pastru finis long hadwok ya blong givim faswan ansa blong yu.
Jusum wan ples we brata i save luk yu. Sam man oli faenem i isi moa blong givim ansa taem oli sidaon long ol jea long fored blong Haos Kingdom. Long ples ya i no gat tumas samting i save mekem tingting blong olgeta i flae olbaot, mo brata we i lidim miting i no save mestem olgeta taem oli leftemap han. Sipos yu mekem olsem, rimemba se yu mas toktok wetem wan bigfala voes blong evri man i harem ansa blong yu, speseli sipos i no gat maekrofon long kongregesen blong yu.
Lesingud. Olsemia bambae yu no talem bakegen wan ansa we wan narafala i jes bin talem. Mo tu, taem yu lesin long ol ansa blong ol narafala, maet bambae yu rimemba wan vas no wan poen we yu save ademap long ansa we narafala i jes talem. Wanwan taem, yu save talem wan sotfala ekspiriens blong makemgud wan poen. Olkaen ansa olsemia oli givhan plante.
Lanem blong givim ansa long prapa tok blong yu. Taem yu ridim ful ansa blong yu olsem i stap finis insaed long buk we yu stadi, i min se yu bin faenem stret ansa long haf ya, mo i gud blong mekem olsem taem yu stat blong givim ansa. Be sipos yu go moa mo yu ansa wetem ol prapa tok blong yu, nao yu soem we yu kasem save poen we i stap long haf ya. Yumi no nid blong talem bakegen evri wanwan tok we i gat long buk blong yumi. Ol Witnes blong Jeova oli no ol nasiviru we oli ripitim evri samting we i stap long ol buk blong olgeta.
Ansa i mas laenap wetem stamba tok. Ol ansa we oli no laenap wetem stamba tok no oli pulum tingting blong man i go longwe tumas long ol stamba tingting blong stadi, oli no stret nating. Ol ansa blong yu oli mas laenap wetem stamba poen ya we yumi stap tokbaot long miting. Bambae oli mekem storian ya i kam rij moa mo i leftemap tingting blong ol man long saed blong spirit.
Ansa blong leftemap tingting blong narafala. Wan stamba risen we i pulum yumi blong ansa, hem i blong leftemap tingting blong narafala. Taswe yumi mas lukaot we ol ansa blong yumi oli no daonem tingting blong olgeta. Mo tu, i no gud blong talem evri poen we i gat long paragraf mekem se biaen ol narafala oli no save ademap wan samting. Ol longfala ansa we oli tokbaot plante tumas samting oli mekem i had long narafala blong oli kasem save mining blong hem. Ol sotfala ansa blong yu oli save gat paoa, mo bambae yu pulum ol niuwan blong oli givim ol sotfala ansa tu.
Wok Blong Ol Brata We Oli Lidim Ol Miting
Long saed blong fasin ya blong leftemap tingting blong narafala, brata we i stap lidim miting i gat wan bigfala wok blong mekem. Hem i soem trufala intres long evri ansa sipos hem i lesingud mo i lukluk man we i givim ansa, i bitim we hem i stap bisi long wan narafala samting taem man ya i stap ansa. !I nogud sipos brata ya i no lesingud, nao hem i talem bakegen semfala ansa we wan man i jes givim, no i askem wan kwestin we ol man oli ansa finis long hem!
Wan narafala samting we i save mekem tingting blong man i foldaon, hemia taem brata we i lidim miting i talem bakegen, semfala ansa we ol man oli jes givim, be hem i yusum sam tok we oli defren lelebet, olsem we hem i minim se ansa we oli bin givim i no stret gud. Defren olgeta, hem i save
leftemap tingting blong man sipos hem i askem sam kwestin we oli pulum ol man blong go dip moa blong eksplenem wan impoten poen. Maet brata we i lidim miting i save askem ol kwestin olsem: ‘?Olsem wanem poen ya i save givhan long kongregesen blong yumi?’ no, ‘?Wanem vas blong Baebol insaed long paragraf ya we i sapotem ansa ya we yumi jes harem?’ Hemia nao ol kwestin we oli pulum ol man blong givim ol gudfala ansa, mo oli mekem stadi i kam dip moa.I stret blong talem sam gudfala tok long ol man we oli givim ansa, speseli ol niuwan no ol man we oli sem. Blong mekem olsem, maet i moa gud sipos brata we i lidim miting i go luk wanwan long olgeta ya afta long miting. Ale bambae olgeta oli no sem, mo brata i save tekem janis ya blong givim sam advaes long olgeta sipos oli nidim.
Long laef blong evri dei, yumi no intres blong storian wetem wan man we hem nomo i stap toktok oltaem. Ol man we oli lesin long hem oli harem se oli no nid blong talem wan samting. Oli stap nomo be oli no lesingud, no maet oli no lesin nating. Semfala samting i save hapen taem brata we i lidim miting i stap toktok oltaem nomo, from we hem i talem tumas samting. I tru se wanwan taem, brata we i lidim miting i save askem wan moa kwestin blong pulum tingting blong man blong oli givim ansa. Be hem i mas mekem samting ya sam samtaem nomo.
Brata we i lidim miting i no nid blong askem faswan man we i leftemap han nao blong i givim ansa. Sipos hem i mekem olsem, bambae olgeta ya we oli nidim moa taem blong mekemap tingting blong olgeta, oli save harem nogud. Sipos brata we i lidim miting i wet smol, bambae hem i givim janis long wan man we i no ansa yet blong hem i givim ansa. Mo tu i gud we hem i soem fasin luksave taem hem i no jusum wan smol pikinini blong givim ansa long ol kwestin we oli blong tokbaot wan poen we hem i no naf yet blong kasem save long hem.
?Olsem wanem sipos wan ansa i no stret? I nogud we brata we i lidim miting i mekem man ya we i givim ansa i harem nogud. Plante taem, nating se wan ansa i no stretgud olgeta, be i gat sam samting we i tru long hem. Taswe brata i save soem fasin luksave mo pikimap ol tok we oli tru long ansa ya, no maet hem i save jusum sam defren tok blong talem semfala kwestin bakegen, no maet hem i save askem wan moa kwestin blong kliarem poen ya. Olsemia, bambae hem i pulum ol man blong givim wan ansa we i stretgud, mo i no mekem man ya we i ansa fastaem i sem.
Blong pulum ol man blong givim ansa, i moa gud sipos brata ya we i lidim miting i no askem ol kwestin olsem, ‘?I gat sam narafala we oli wantem givim wan ansa?’ No ‘?Hu i no givim ansa yet? !Hemia laswan janis blong yu!’ Maet brata i ting se ol kwestin ya bambae oli pulum man blong ansa, be i no tru. I no gud blong givim tingting ya long ol brata se oli gat fol from we oli no givim ansa yet. Defren olgeta, brata we i lidim miting i mas leftemap tingting blong ol man blong oli serem save blong olgeta wetem ol narafala, from we fasin ya i soem lav blong olgeta. Mo tu, taem brata we i lidim miting i jusum wan man blong i ansa, i moagud hem i no talem se: “Afta long hem, bambae yumi lesin long ansa blong Brata Hemia, mo biaen, long Sista Hemia.” I moagud sipos brata we i lidim miting i lesin long faswan ansa, ale biaen hem i luksave sipos i nidim sam moa ansa.
Givim Ansa Hem i Wan Blesing
Yumi mas go long ol Kristin miting blong haremgud long saed blong spirit mo taem yumi givim ansa long ol miting ya, hem i wan blesing. Taem yumi yusum nambawan janis ya blong presem Jeova “long medel blong kongregesen,” nao, yumi stap folem eksampol blong Deved, mo yumi tinghevi long advaes blong Pol. Taem yumi givim ansa long ol miting, yumi pruvum we yumi lavem ol brata blong yumi, mo we yumi memba blong bigfala kongregesen blong Jeova. Yes, taem yumi “luk we dei ya i kam klosap finis,” i no gat wan narafala ples we yumi wantem stap long hem we i moagud i bitim ol Kristin miting.—Hibrus 10:25, NW.
[Futnot]
^ Ol Witnes blong Jeova oli wokem buk ya.
[Tok blong pija long pej 20]
I impoten blong lesin mo ansa long ol Kristin miting
[Tok blong pija long pej 21]
Brata we i lidim stadi i mas intres long evri ansa we man i givim