Wan Kwestin

Long plante ples long wol, hem i wan kastom blong givim presen long taem blong wan mared. ?Wanem sam rul long Baebol we yumi mas tingbaot taem yumi givim no kasem ol presen olsem?

Baebol i agri long fasin ya blong givim presen long taem we wan samting i hapen mo taem wan gud tingting i pusum yumi blong mekem olsem. Baebol i leftemap tingting blong ol Kristin blong mekem olsem Jeova, we i glad blong givim ol samting. (Jemes 1:​17) Aposol Pol i pulum ol Kristin se: “Yufala i no mas foget blong mekem ol gudfala fasin, mo blong seraot olting blong yufala wetem ol narafala, from we ol kaen sakrefaes ya, God i harem gud long olgeta.” Taswe i gud we ol Kristin oli gat fasin ya blong givim samting.​—Hibrus 13:16; Luk 6:​38.

Long Yunaeted Stet, plante man we oli mared oli folem fasin ya blong raetem long wan buk olgeta presen we oli wantem man i pem blong olgeta. Long Inglan oli kolem samting ya se wan lis blong mared. Hemia i min se, tufala we i rere blong mared, tufala i go long wan stoa blong lukluk samting we tufala i wantem, ale tufala i raetem wan lis blong ol samting ya we oli wantem kasem olsem presen blong mared. Ol famle mo fren blong tufala we bambae i mared, oli save go long stoa ya we tufala i jusum finis, nao oli pem wanem we tufala ya i raetem long buk. Wan gud samting long fasin ya blong gat buk blong ol presen, i mekem se hemia we i givim presen hem i no spenem tumas taem blong faenem wan presen, mo tufala we i kasem presen bambae i no wari blong karem presen ya i gobak long stoa ya from we tufala i no wantem presen ya.

Nating se tufala we i mared i wantem blong yusum wan buk blong ol presen no nogat, hem i jus blong tufala. Be, wan Kristin bambae i lukaot se wanem we hem i mekem i no go agens long ol rul blong Baebol. Wan eksampol: ?Olsem wanem sipos tufala ya we bambae i mared, tufala i raetem wan lis blong ol presen we oli sas tumas? Long taem olsem, olgeta we oli no gat plante mane bambae oli no naf blong givim presen, no oli harem olsem se i moa gud oli no go long mared ya, from we maet oli harem nogud blong karem wan presen we i no sas tumas. Wan Kristin woman i talem se: “Naoia i hadwok blong givim ol presen, from we mi traem blong soem kaen fasin, be i luk olsem se glad we mi mi gat long fasin ya blong givim samting i no moa gat.” !Taswe yumi sore tumas sipos wan mared i mekem tingting blong samfala i foldaon!

Taswe, tufala we bambae i mared, tufala i no mas mekem ol man oli harem se oli mas pem presen long stoa ya nomo we tufala i jusum, no givim presen we praes blong hem i antap olsem wanem. Nogat. Jisas Kraes i talem se samting we i moa impoten long ae blong God hem i samting we i kamaot long gladhat blong wan man, i no long praes blong wan presen. (Luk 21:​1-4) Long sem fasin, taem aposol Pol i tokbaot ol presen blong givim long ol puaman, hem i raetem se: “Nao evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.”​—2 Korin 9:7.

Folem wanem we Baebol i talem, i stret nomo blong soemaot se yu yu givim presen ya taem yu putum wan toktok long pepa wetem presen we yu givim. Be, long sam kantri, ol man oli gat kastom ya blong poenemaot long olgeta we oli hivap se hu man we i givim wanem presen. Kastom ya i save pulum sam problem i kam. Maet olgeta we oli givim presen oli no wantem we ol man oli save wanem samting oli givim. Olgeta ya oli wantem folem rul we Jisas i talem long Matiu 6:3: “Be sipos yu givim samting long puaman blong givhan long hem, yu mas mekem, olsem we lef han blong yu i no save samting we raet han blong yu i mekem.” Sam narafala oli harem se fasin blong givim presen i wan samting blong hemia we i givim mo hemia we i kasem nomo. Mo tu, fasin ya blong poenemaot man we i givim presen i save mekem we ol man oli stat skelem ol presen blong olgeta wetem narafala, ale oli “traem agensem ol narafala blong winim olgeta long sam samting.” (Galesia 5:​26, NW ) Ol Kristin oli wantem stap longwe long fasin ya blong mekem man i harem nogud, taem oli talemaot long fored blong ol man wanem we oli givim olsem presen.​—1 Pita 3:8.

Yes, taem yumi mekem ol samting we i laenap wetem ol rul long Tok blong God, fasin ya blong givim presen bambae i givim glad.​—Ol Wok 20:35.