Wan Samting We i Rili Givhan Long Ol Puaman

TAEM Jisas Kraes, Pikinini blong God, i laef long wol ya, hem i rili wantem halpem ol puaman. Wan man we i laef long taem we Jisas i mekem minista wok blong hem, i tokbaot samting we hem i luk i se: “Ol blaenman, naoia oli save lukluk, mo ol man we leg blong olgeta i nogud, naoia oli save wokbaot gud. Mo ol man we oli gat rabis sik blong skin, naoia bodi blong olgeta i klin, mo ol man we sora blong olgeta i fas, naoia sora blong olgeta i open. Ol dedman, naoia oli laef bakegen, mo ol puaman, naoia i gat man i stap talemaot gud nius long olgeta.” (Matiu 11:5) ?Be, olsem wanem long plante milian man tede we oli pua? ?Oli no gat wan gud nius blong olgeta? !Si, oli gat wan mesej blong hop!

Nating se plante taem ol man long wol oli fogetem mo oli no tingbaot ol puaman be Tok blong God, Baebol, i promes se: “Ol man we oli no gat man blong givhan long olgeta, bambae oli no save trabol oltaem, [God] bambae i givhan long olgeta. Ol puaman, tingting blong olgeta bambae i no save foldaon olgeta, hem bambae i leftemap olgeta.” (Ol Sam 9:​18) Ol tok ya we oli leftemap tingting blong man bambae oli kamtru nomo taem Kingdom blong God we i wan prapa gavman long heven, i tekem ples long rul blong ol man. (Daniel 2:​44) Jisas we i King long gavman ya long heven, “bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”​—Ol Sam 72:​13, 14.

?Olsem wanem long laef long wol ya taem Kraes bambae i rul? Ol man we bambae oli laef aninit long rul blong Kraes long wol, bambae oli harem gud long ol hadwok blong olgeta. Baebol i talem long Maeka 4:​3, 4 se: “Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet. Hae God i gat olgeta paoa, mo hemia tok blong hem.” Kingdom blong God bambae i naf tu blong winim ol problem long saed blong sik mo ded. (Aesea 25:8) !Wol bambae i defren olgeta! Yumi save gat strong bilif long ol promes blong Baebol, from we oli kamaot long tabu spirit blong God hem wan.

Baebol i no givim mesej blong hop nomo, be hem i givhan tu blong yumi dil wetem ol traem we yumi fesem evri dei. Eksampol, Baebol i save givhan blong winim filing ya we man i no moa respektem hem wan, we maet i kamaot from we man ya i pua. Tru long stadi blong hem long Baebol, wan Kristin we i gat nid i save se hem i sas long ae blong God sem mak olsem Kristin ya we i gat plante mane. Buk blong Job long Baebol i lukluk gud long poen ya se God “hem i no save givhan long ol rijman blong oli agens long ol puaman, from we hem nomo i mekem olgeta evriwan.” (Job 34:19) God i lavem tufala i sem mak nomo.​—Ol Wok 10:​34, 35.