?Yu Yu Tinghae Long Ol Olfala Kristin Brata Mo Sista?

TAEM ol man Isrel bifo oli stap yet aninit long kontrak blong Loa wetem God, oli mas folem loa ya se: “Long fored blong wan man we i gat waet hea yu mas stanap, yu mas soem respek long wan olfala man, mo yu mas fraet gud long God blong yu.” (Levitikas 19:32, NW ) Taswe, fasin blong respektem ol olfala i wan haf blong wosip blong olgeta, hem i soemaot se oli ona long God. I tru se ol Kristin tede oli no moa stap aninit long Loa blong Moses. Be Loa ya i mekem yumi tingbaot se long lukluk blong Jeova, ol olfala we oli mekem wok blong hem oli sas tumas. (Ol Proveb 16:31; Hibrus 7:18) ?Yumi gat tingting olsem Jeova? ?Yumi tinghae long ol olfala Kristin brata mo sista blong yumi?

Elisa i Tinghae Long Olfala Fren Blong Hem

Wan stori blong Baebol we i soemaot fasin ya blong respektem ol olfala, i stap long buk blong Seken King. Stori ya i eksplenem olsem wanem yangfala profet Elisa i tekem ples blong profet Elaeja. Tingbaot samting we i hapen long laswan dei we Elaeja i wok olsem profet long ol ten laen blong Isrel.

Long dei ya, Jeova i lidim olfala profet ya i aot long Gilgal blong go long Betel, nao i aot long Betel i go long Jeriko, mo biaen i aot bakegen long Jeriko blong go long Jodan Reva. (2 King 2:1, 2, 4, 6) Long trip ya we i longfala olsem 50 kilometa, Elaeja i talem tri taem long Elisa se hem i no moa biaenem hem. Be Elisa i no wantem. Hem i mekem olsem yangfala Rut i mekem plante handred yia bifo, taem hem i no wantem lego Nomi. (Rut 1:16, 17) Long trifala taem ya Elisa i talem se: “Hae God i laef, i stap we i stap, mo long fes blong hem, mo long fes blong yu tu, mi mi talem tru long yu, se bambae mi no save livim yu.” (2 King 2:2, 4, 6) Elisa i bin wok samting olsem sikis yia finis wetem Elaeja. Be hem i wantem gohed yet blong wok wetem Elaeja gogo kasem en. Mo hemia wanem we i hapen, from we stori ya i gohed i se: “Tufala i stap wokbaot i go, tufala i stap toktok, nao . . . Profet Elaeja i go antap long heven.” (Vas 11) Elaeja mo Elisa tufala i stap stori tugeta gogo kasem laswan menet we Elaeja i finisim wok blong hem long nesen blong Isrel. I klia se yangfala profet ya i wantem tumas blong kasem plante toktok mo advaes mo ol tok blong leftemap tingting long olfala profet ya we i gat plante save finis. Yes, Elisa i rili tinghae tumas long olfala fren blong hem.

‘Olsem Stret Papa Mo Stret Mama Blong Yumi’

I no hadwok tumas blong luk from wanem Elisa i lavem olfala profet ya olsem fren blong hem. Hem i luk olfala ya olsem Papa blong hem long saed blong spirit. (2 King 2:12) Jes bifo we Elaeja i finisim  wok blong hem long Isrel, hem i talem long Elisa se: “Pikinini blong mi, i no longtaem, Hae God bambae i tekemaot mi mi go antap. Sipos i gat sam samting we yu wantem blong mi mekem long yu fastaem, i gud yu talemaot long mi.” (Vas 9) Yes, go kasem en blong laef blong hem, Elaeja i soem se hem i kea long Elisa, i wantem se Elisa i stap strong long saed blong spirit blong tekem ples blong hem mo gohed long wok blong God.

Tede, yumi glad tumas blong luk sem fasin ya we ol olfala Kristin brata sista blong yumi oli soem long yumi. Oli olsem ol papa mo mama blong yumi we oli glad nomo blong serem save mo waes blong olgeta wetem ol yangfala. Tingbaot eksampol blong olgeta ya we oli wok longtaem finis long ol branj ofis blong ol Witnes blong Jeova. Oli rere oltaem blong halpem ol niufala memba blong ol Betel famle blong oli lanem gud wok blong olgeta. Long sem fasin, ol elda we oli wokbaot blong visitim ol kongregesen, maet oli mekem wok ya plante yia wetem ol woman blong olgeta. Olgeta tu oli hapi nomo blong serem ekspiriens blong olgeta wetem ol narafala we maet oli jes statem wok ya. Mo tu, long evri kongregesen blong ol Witnes blong Jeova raon long wol i gat ol olfala brata mo sista we oli gohed strong long wok blong Jeova plante yia finis. Olgeta ya tu oli glad blong serem save blong olgeta mo ekspiriens blong olgeta wetem ol niuwan we oli joen long kongregesen.​—Ol Proveb 2:7; Filipae 3:17; Taetas 2:​3-5.

Ol gudfala olfala Kristin ya oli soem se oli rili kea long narafala. Fasin blong olgeta i mekem we yumi glad nomo blong gat respek long olgeta. Taswe, yumi wantem folem eksampol blong Elisa, yumi wantem tinghae bigwan long ol olfala Kristin brata mo sista blong yumi. Olsem aposol Pol i talem long yumi se, yumi mas gohed blong ‘tok . . . long man we i olfala . . . olsem we hem i stret papa blong yumi. Mo yumi . . . mas toktok gud long woman we i olfala, olsem we hem i stret mama blong yumi.’ (1 Timoti 5:​1, 2) Yes, taem yumi mekem olsem, yumi givhan long Kristin kongregesen raon long wol from we yumi mekem se hem i wokgud mo i gru moa.

[Tok blong pija long pej 30]

Elisa i wantem wok wetem Elaeja gogo kasem en

[Tok blong pija long pej 31]

Ol yangfala oli save lanem plante samting from ol olfala Kristin