Baebol i Save Givhan Long Mared Blong Yu
Baebol i Save Givhan Long Mared Blong Yu
MARED—long tingting blong sam man, tok ya i karem glad. Be long tingting blong sam narafala, tok ya i mekem hat i soa. Wan waef i krae i se: “Long filing blong mi, mi harem olsem se mitufala i divos finis. Mi harem se man ya i no kea long mi mo mi stap mi wan oltaem nomo.”
?Olsem wanem wan man mo wan woman, we fastaem tufala i promes se bambae tufala i lavlavem mo keagud long tufala, naoia tufala i lusum lav long tufala? Wan risen hemia se bifo we tufala i mared, tufala i no lanem fastaem wanem mining blong mared. Wan man we i raetem ol atikol long saed blong helt long ol niuspepa i talem se: “Yumi no kasem wan trening bifo we yumi mared.”
Smol namba blong man nomo oli gat save long mared, samting ya i tru tumas mo i kamaot klia long wan stadi we The National Marriage Project i bin lidim. Yunivesiti blong Rutgers long New Jersey, Yunaeted Stet, i lidim stadi ya. Ol daerekta blong stadi ya oli talem se: “Bighaf blong ol man we oli insaed long stadi ya oli bin gruap long ol famle we papa mama blong olgeta i no glad long mared blong tufala, no oli divos. Ol man ya oli savegud wanem ya wan nogud mared, be oli no save talem se wan gudfala mared i olsem wanem. Wan samting nomo we oli save talem blong tokbaot wan gudfala mared se, mared ya i ‘defren olgeta long mared blong papa mama blong mi.’ ”
?Olsem wanem long ol Kristin? ?I no gat trabol long mared blong olgeta? Si, i gat. Sam Kristin long faswan handred yia oli nidim sam stret advaes blong oli no “traem brekem mared” blong olgeta. (1 Korin 7:27) From we yumi evriwan i gat sin, i klia se taem yumi mared bambae yumi fesem sam trabol. Be i gat wan samting i stap we i save givhan long yumi. Yes, ol hasban mo waef oli save kam gud moa long fasin fren blong olgeta, sipos oli mekem ol advaes blong Baebol i wok long laef blong olgeta.
I tru, Baebol i no wan spesel buk we oli wokem jes blong givim advaes long saed blong mared. Be Baebol i kamaot long God ya we i Stamba blong mared, taswe ol advaes we yumi faenem long hem oli save givhan. Tru long profet Aesea, Jeova God i talem se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem. Sipos yufala i bin obei long ol tok blong mi, ol gudgudfala samting we mi mi save mekem long yufala, bambae oli save kam long yufala, olsem wan gudfala reva we stap ron. Bambae mi save mekem we yufala i win oltaem nomo, olsem solwota we i stap brok long sanbij mo rif, we neva i save spel.”—Aesea 48:17, 18.
?Olsem wanem? ?Lav we fastaem i stap long mared blong yutufala, naoia i no moa strong? ?Yu harem se yu kalabus long wan mared we i no gat lav long hem? Wan waef we i gat 26 yia blong hem i talem se: “I no isi blong eksplenem soa we mi harem long hat blong mi, from we mared blong mi i no hapi. Soa ya i stap oltaem nomo mo i luk olsem se bambae i neva lus.” Sipos yu yu harem nogud long mared blong yu, i nogud blong gat tingting ya se, yu mas agri nomo se mared blong yu i nogud from we i no gat rod blong jenisim samting ya. Nogat. Yu mas tekem wan strong disisen blong stretem problem ya. Haf we i kam biaen bambae i soem long ol hasban mo waef olsem wanem advaes blong Baebol i save givhan long mared blong olgeta, blong oli holem strong long promes we oli mekem taem oli mared.