?From Wanem Yumi Mas Prea Oltaem?
?From Wanem Yumi Mas Prea Oltaem?
“Oltaem yufala i mas prea. Mo long olgeta samting we oli stap kamtru long yufala, yufala i mas talem tangkiu long God.”—1 TESALONAEKA 5:17, 18.
1, 2. ?Olsem wanem Daniel i soem se hem i tinghae long prea, mo samting ya i mekem wanem long fasin fren we hem i gat wetem God?
PROFET Daniel i prea long God tri taem evri dei. Long rum blong hem we i stap antap long wan stori haos, hem i nildaon long fored blong windo we i lukluk i go long taon ya Jerusalem, nao hem i prea. (1 King 8:46-49; Daniel 6:10) Wan dei, King Darias blong Midia i putum wan loa se i tabu long ol man blong oli prea long narafala god no man, oli mas askem long hem nomo. Be Daniel i no jenisim fasin blong hem. Nating se hem i save lusum laef blong hem, be hem i gohed blong toktok long Jeova oltaem from we hem i tinghae long prea.
2 ?Wanem tingting blong Jeova long saed blong Daniel? Taem enjel Gabriel i kamtru blong ansa long wan prea blong profet Daniel, hem i talem se God i ‘lavem Daniel tumas.’ (Daniel 9:20-23) Long profet tok blong Esikel, Jeova i talem se Daniel i wan man blong stret fasin. (Esikel 14:14, 20) I klia se taem ol yia oli pas, fasin blong Daniel blong prea oltaem i mekem se hem i frengud wetem God. King Darias tu i luksave samting ya.—Daniel 6:16.
3. ?Stori blong wan misinari i soem se prea i save givhan long yumi olsem wanem blong yumi holemstrong long Jeova?
3 Tede tu, fasin blong prea oltaem i save givhan long yumi taem yumi kasem ol strong traem. Tingbaot wan misinari long Jaena, nem blong hem Harold King. Kot i jajem hem se i mas stap faef yia long presin, long wan rum we hem wan nomo i stap long hem. Brata King i tingtingbak long taem ya i se: “Maet oli bin lokem mi long wan rum longwe long ol narafala man, be oli no save mekem mi mi stap longwe long God. . . . Taswe, mi folem fasin blong Daniel long Baebol. Tri taem evri dei, mi nildaon long rum blong mi, mo mi prea wetem bigfala voes, nating se ol man we oli pas oli save luk mi. . . . Long ol taem ya, i olsem we tabu spirit blong God i lidim tingting blong mi i go long ol samting we oli save givhan gud long mi, mo i mekem tingting blong mi i kwaet. !Tru ya, fasin blong prea i rili givim paoa long mi mo i mekem mi mi haremgud!”
4. ?Long stadi ya, wanem ol kwestin we bambae yumi tokbaot long saed blong prea?
4 Baebol i talem se: “Oltaem yufala i mas prea. Mo long olgeta samting we oli stap kamtru long yufala, yufala i mas talem tangkiu long God.” (1 Tesalonaeka 5:17, 18) From samting ya, i gud we yumi traem faenem ansa long ol kwestin ya: ?From wanem yumi mas jekemgud ol prea blong yumi? ?From wanem yumi nidim blong prea long Jeova oltaem? ?Mo yumi mas mekem wanem sipos yumi harem se yumi no naf blong prea long God from we yumi gat sam slak fasin no yumi mekem sam mastik?
Prea Blong Frengud Wetem God
5. ?Wanem spesel fasin fren i save kamaot from prea?
5 ?Yu yu wantem se Jeova i tingbaot yu olsem fren blong hem? Hem i talem se Ebraham i fren blong hem. (Aesea 41:8; Jemes 2:23) Yes, Jeova i wantem se yumi frengud wetem hem. Hem i singaot yumi blong yumi kam klosap long hem. (Jemes 4:8) Ol tok ya blong hem i mas mekem yumi tingting gud long spesel blesing ya blong prea. Sipos yumi wantem toktok long wan haeman blong gavman, bambae i hadwok blong hem i faenem smol taem blong toktok long yumi. !Ating neva yumi save gat janis blong fren wetem wan haeman olsem! Be, Man we i Wokem heven mo wol i talem se yumi save prea long hem enitaem we yumi wantem mo enitaem we yumi nidim blong toktok long hem. (Ol Sam 37:5) Sipos yumi prea oltaem, bambae yumi kam klosap long Jeova mo fren wetem hem.
6. ?Olsem wanem Jisas i soem se yumi mas ‘prea oltaem’?
6 !Be i isi blong fogetem blong prea! I gat plante wok mo wari we oli tekem taem blong yumi evri dei, mekem se maet yumi no tektaem blong toktok wetem God. Be Jisas i talem long ol disaepol blong hem se oli mas ‘prea oltaem,’ mo hem tu i folem fasin ya. (Matiu 26:41) Hem i bisi oltaem, stat long moning go kasem sapa. Be nating, hem i tektaem blong toktok long Papa blong hem long heven. Sam samtaem, Jisas i girap “long eli moning, taem we i no brok delaet yet,” blong hem i save prea. (Mak 1:35) Long sam narafala dei, klosap long tudak, Jisas i wokbaot i go long wan ples we i no gat man long hem, ale hem i toktok long Jeova. (Matiu 14:23) Oltaem Jisas i tektaem blong prea, mo yumi mas folem fasin ya blong hem.—1 Pita 2:21.
7. ?Wanem sam janis we yumi gat evri dei blong toktok long Papa blong yumi long heven?
7 Yumi wanwan i gat plante janis blong prea evri dei, olsem, taem yumi fesem trabol, taem wan samting i pulum no traem yumi, mo taem yumi tekem ol disisen. (Efesas 6:18) Taem yumi lukaot God blong hem i lidim yumi long evri samting long laef, yumi fren moa wetem hem. Taem tu fren i fesem trabol tugeta, tufala i fren moa. (Ol Proveb 17:17) Sem samting ya i save hapen taem yumi dipen long Jeova nao yumi luksave se hem i stap givhan long yumi.—2 Kronikel 14:11.
8. ?Eksampol blong Nehemaea, Jisas, mo Hana, i soem se ol prea blong yumi wanwan oli mas longfala olsem wanem?
8 !Yumi glad tumas we God i no talem se ol prea blong yumi oli mas longfala olsem wanem, mo i no putum wan mak long hamas taem we yumi save prea long hem evri dei! Taem Nehemaea i rere blong askem wan samting long king blong Pesia, hem i mekem wan sot prea i go long Jeova. (Nehemaea 2:4, 5) Jisas tu i mekem wan sot prea blong askem long Jeova blong givim paoa long hem blong mekem Lasaros i laef bakegen. (Jon 11:41, 42) Be Hana i ‘mekem wan longfala prea’ long Jeova, mo hem i talemaot evri samting we i stap long hat blong hem. (1 Samuel 1:12, 15, 16) Ol prea blong yumi wanwan oli save sot no oli save longfala, folem samting we yumi stap askem mo ples we yumi stap long hem taem yumi prea.
9. ?Long ol prea blong yumi, from wanem yumi mas presem Jeova mo talem tangkiu long hem from ol samting we hem i mekem long yumi?
9 Baebol i tokbaot plante man we oli prea blong talemaot bigfala tangkiu we oli gat long hat blong olgeta from haenem blong Jeova mo from ol nambawan wok blong hem. (Eksodas 15:1-19; 1 Kronikel 16:7-36; Ol Sam 145) Long wan vison, aposol Jon i luk 24 elda—hemia fulnamba blong ol tabu Kristin long stret ples blong olgeta long heven. Olgeta ya oli stap presem Jeova, se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” (Revelesen 4:10, 11) Yumi tu, yumi gat stret risen oltaem blong presem Man we i Wokem yumi. !Ol papa mama oli glad tumas taem pikinini blong olgeta i talem tangkiu long olgeta wetem fulhat blong hem from wan samting we oli bin mekem long hem! Sipos yumi tingting gud long kaen fasin blong Jeova mo yumi talemaot tangkiu we i stap long hat blong yumi from, hemia nao wan gudfala rod blong mekem ol prea blong yumi oli kamgud moa.
“Prea Oltaem”—?From Wanem?
10. ?Olsem wanem prea i save mekem bilif blong yumi i kam strong moa?
10 Blong gat strong bilif, yumi nidim blong prea oltaem. Jisas i talem wan parabol blong soem long ol man from wanem “oli mas prea oltaem, we oli no letem tingting blong olgeta i foldaon.” Biaen, hem i askem se: “?Be taem mi, mi Pikinini blong Man, mi kambak long wol ya bakegen, bambae mi save faenem plante man we oli bilif long mi, no nogat?” (Luk 18:1-8) Ol prea we yumi tingting dip long olgeta mo oli kamaot long hat blong yumi, oli mekem bilif blong yumi i strong. Taem Ebraham i kam olfala be i no gat pikinini yet, hem i tokbaot samting ya long God. Blong ansa, Jeova i talem long hem blong lukluk i go antap long skae mo traem kaontem ol sta. Nao biaen, God i talem bakegen promes blong hem long Ebraham, se: “Ol pikinini we bambae oli kamaot biaen long yu, bambae oli plante olsem ol sta ya.” ?Samting ya i mekem wanem long Ebraham? Ebraham i “bilif strong long Hae God, mo from we hem i bilif olsem, Hae God i luk hem se hem i wan stret man long fes blong hem.” (Jenesis 15:5, 6) Sipos yumi prea long Jeova mo talemaot olgeta samting we i stap long hat blong yumi, mo sipos yumi bilif long ol promes blong hem long Baebol mo obei long hem, bambae hem i mekem bilif blong yumi i kam strong moa.
11. ?Olsem wanem prea i save givhan long yumi blong winim ol trabol?
11 Prea i save givhan long yumi blong winim trabol tu. ?Yu yu stap fesem plante trabol we i mekem laef blong yu i had? Baebol i talem se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.” (Ol Sam 55:22) Taem yumi mas mekem ol strong disisen, yumi save folem eksampol blong Jisas. Bifo we hem i jusum ol 12 aposol blong hem, hem i prea blong wan fulnaet. (Luk 6:12-16) Mo long naet bifo we Jisas i ded, hem i prea strong bitim mak, we “swet blong hem i stap folfoldaon long graon olsem blad nomo.” (Luk 22:44) ?Wanem risal blong samting ya? “From we hem i fraetgud long God, God i harem hem.” (Hibrus 5:7, NW ) Sipos yumi prea oltaem, mo yumi prea wetem fulhat blong yumi, samting ya bambae i givhan long yumi blong winim ol wari mo strong traem.
12. ?Olsem wanem fasin blong prea i soemaot se Jeova i stap tingbaot yumi wanwan?
12 I gat wan narafala risen from wanem yumi mas prea long Jeova oltaem. Taem yumi kam klosap long hem, hem i kam klosap long yumi. (Jemes 4:8) Taem yumi prea long Jeova mo talemaot evri samting we i stap long hat blong yumi, yumi haremsave se hem i tingbaot ol nid blong yumi mo i kea long yumi. Yumi haremsave se God i lavem yumi mo i intres long prapa laef blong yumi. Jeova i no talem long wan narafala man blong lesin long ol prea blong yumi. Hem wan i lesin long evri prea we olgeta man blong hem oli mekem i go long hem olsem Papa blong olgeta long heven. (Ol Sam 66:19, 20; Luk 11:2) Mo hem i singaot yumi blong ‘yumi putum ol trabol blong yumi long han blong hem, from we oltaem hem i stap tingbaot yumi.’—1 Pita 5:6, 7.
13, 14. ?Wanem sam risen blong prea oltaem?
13 Fasin blong prea i save mekem yumi kam strong moa long wok blong prij. Taem samfala oli agensem yumi no oli no wantem lesin long yumi, maet yumi harem se i moagud blong stop. Be prea i save mekem tingting blong yumi i strong blong gohed nomo. (Ol Wok 4:23-31) Mo tu, prea i save givhan long yumi blong blokem ‘ol giaman trik blong Setan.’ (Efesas 6:11, 17, 18) Taem yumi stap traehad blong winim ol traem blong laef evri dei, yumi save askem long God blong mekem yumi strong. Taem Jisas i tijim ol man blong hem long fasin blong prea, hem i talem long olgeta blong askem Jeova blong ‘blokem Setan i no kam spolem olgeta.’—Matiu 6:13.
14 Yumi mas prea oltaem long Jeova blong i halpem yumi blong blokem ol tingting mo filing we oli kamaot from sin. Sipos yumi mekem olsemia, bambae yumi haremsave se hem i stap givhan long yumi. Baebol i talem se: “God i stap holem promes blong hem, mo hem i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya.” (1 Korin 10:13) Aposol Pol i haremsave paoa blong Jeova we i mekem hem i strong blong winim plante trabol long prapa laef blong hem. Hem i se: “Mi mi naf blong mekem evri samting long paoa blong Hemia we i stap givim paoa long mi.”—Filipae 4:13, NW; 2 Korin 11:23-29.
Prea Oltaem Nating Se Yumi Gat Sam Slak Fasin
15. ?Wanem i save hapen taem yumi mekem wan samting we yumi save se God i no laekem?
15 Blong mekem se Jeova i glad long ol prea blong yumi, yumi mas glad blong folem ol advaes long Tok blong hem. Aposol Jon i raetem se: “Sipos yumi askem sam samting long hem, bambae yumi save kasem, from we yumi stap folem ol tok blong hem, mo yumi stap mekem ol fasin, we hem i glad long hem.” (1 Jon 3:22) ?Be wanem i save hapen taem yumi mekem samting we i no stret long ae blong God? Afta we Adam mo Iv i mekem sin long garen blong Iden, tufala i haed. Yumi tu, maet yumi harem se yumi wantem haed, ‘blong Jeova i no luk yumi.’ Taswe, maet yumi no moa prea. (Jenesis 3:8) Wan Kristin elda we i spenem plante yia long wok blong visitim ol kongregesen, nem blong hem Klaus, i talem se: “Oltaem, mi luk se faswan mastik blong olgeta we oli kam slak mo lego Jeova mo ogenaesesen blong hem, hemia se oli no moa prea.” (Hibrus 2:1) Samting ya i hapen long Kristin man ya José Ángel. Hem i talem se: “Klosap eit yia, mi no moa prea long Jeova, maet wanwan taem nomo. Mi tingbaot hem yet olsem Papa blong mi long heven, be mi harem se mi sem blong toktok long hem.”
16, 17. Talem sam eksampol blong soem se yumi save kam strong bakegen long saed blong spirit sipos yumi prea oltaem.
16 Samfala oli harem se oli sem blong prea, from we oli slak long saed blong spirit, no from we oli bin mekem wan samting we i rong long ae blong God. Be hemia nao taem we yumi nidim moa blong prea. Jona i ronwe long wok we Jeova i givim long hem. Be, ‘taem Jona i stap long trabol, hem i krae long Jeova, nao Jeova i lesin long hem mo i ansa long hem. Jona i harem se i stap finis long Hom blong ol Dedman, be hem i prea long Jeova blong i givhan long hem, nao Jeova i harem hem.’ (Jona 2:2) Jona i prea, Jeova i ansa long prea blong hem, mo Jona i kam strong bakegen long saed blong spirit.
17 José Ángel tu i prea wetem fulhat blong hem blong askem Jeova blong givhan long hem. Hem i tingtingbak long taem ya i se: “Mi talemaot evri samting we i stap long hat blong mi mo mi krae long Jeova blong hem i fogivim mi. Mo i tru se hem i rili givhan long mi. Sipos mi no bin prea plante, ating i had long mi blong kambak long trutok. Naoia, mi prea plante taem evri dei, mo mi haremgud blong spenem taem ya blong prea long Jeova.” Yumi no mas fraet blong talemaot evri samting long Jeova long saed blong ol mastik we yumi mekem, mo blong askem wetem tingting daon blong hem i fogivim yumi. Taem King Deved i talemaot ol sin blong hem, Jeova i fogivim hem. (Ol Sam 32:3-5) Jeova i wantem givhan long yumi, i no blong jajem yumi. (1 Jon 3:19, 20) Mo tu, prea blong ol elda blong kongregesen i save givhan long yumi long saed blong spirit, from we ol prea blong olgeta oli “gat paoa.”—Jemes 5:13-16.
18. ?Ol man blong God oli save sua long wanem samting, sipos oli mekem wan bigfala sin samtaem?
18 Traem tingbaot wan pikinini we i mekem wan bigfala mastik, nao i kam wetem tingting daon blong askem papa blong hem blong halpem hem mo givim advaes long hem. ?Yu ting se papa ya i save tanem baksaed long pikinini blong hem? Nogat. Parabol blong boe we i lusum rod i soem se, wan man i save gowe long Papa blong hem long heven mo mekem samting we i nogud tumas. Be parabol ya i soem tu se Jeova i glad tumas taem man ya i kambak long hem. (Luk 15:21, 22, 32) Jeova i talem long olgeta we oli mekem wan mastik blong oli prea long hem, from we “hem i kwik blong fogivim yumi.” (Aesea 55:6, 7) Deved i mekem sam bigfala sin, be biaen, hem i prea long Jeova se: “God, plis yu harem prea blong mi. Sipos mi krae long yu, plis yu no tanem baksaed long mi.” Hem i talem tu se: “Long moning mo long medel dei mo long naet, ol tok mo ol krae blong mi bambae oli stap go antap long [Jeova], mo bambae hem i harem voes blong mi.” (Ol Sam 55:1, 17) !Tok ya i mekem yumi harem gud tumas!
19. ?Sipos i luk olsem we God i no ansa long prea blong yu, from wanem yu no mas hareap blong ting se hem i no glad long yu?
19 ?Olsem wanem sipos Jeova i no ansa hareap long prea blong yumi? Yumi mas meksua se samting we yumi stap askem long Jeova i stret long wil blong hem, mo se yumi stap askem long nem blong Jisas. (Jon 16:23; 1 Jon 5:14) Disaepol Jemes i tokbaot sam Kristin we oli no kasem ansa blong ol prea blong olgeta from we taem oli askem samting long God, ‘tingting blong olgeta i no stret.’ (Jemes 4:3) Be sipos i luk olsem we God i no ansa long prea blong yu, yu no mas hareap blong ting se hem i no glad long yu. Jeova i save letem ol gudfala man blong hem oli prea bakegen mo bakegen from wan samting, bifo we ansa blong hem i kam klia. Jisas i talem se: “Sipos yufala i wantem samting, yufala i mas gohed blong askem, nao bambae yufala i save kasem.” (Matiu 7:7) Taswe, yumi mas “prea oltaem.”—Rom 12:12.
Prea Oltaem
20, 21. (a) ?Long ‘ol las dei ya,’ from wanem yumi nidim blong prea oltaem? (b) ?Bambae yumi kasem wanem sipos evri dei yumi kam long fes blong Jeova we i stap givhan long yumi long gladhat blong hem?
20 Long ‘ol las dei ya we laef i strong tumas,’ ol trabol mo traem oli stap kam antap moa. (2 Timoti 3:1) Mo yumi save kam olsem we yumi stap tingting nomo long ol traem mo trabol ya. Sipos yumi prea oltaem, samting ya bambae i givhan long yumi blong tingting long ol samting long saed blong spirit, nating se yumi gat plante trabol mo traem we oli save daonem tingting blong yumi. Fasin blong prea evri dei long Jeova i save givim help we yumi nidim.
21 Man blong “ansa long ol prea,” Jeova, hem i neva bisi tumas blong lesin long yumi. (Ol Sam 65:2) Yumi tu, yumi no mas bisi tumas blong toktok long hem. Fasin fren we yumi gat wetem God, i sas moa i bitim olgeta narafala samting we yumi gat. Yumi no mas ting nating long fasin fren ya. “From samting ya, i gud yumi mekem tingting blong yumi i strong, nao yumi kam long fes blong God we hem i stap givhan long yumi long gladhat blong hem. Nao hem bambae i sore long yumi, mo long gladhat blong hem, hem bambae i givhan long yumi, stret long taem we yumi trabol.”—Hibrus 4:16.
?Bambae Yu Yu Ansa Olsem Wanem?
• ?Olsem wanem profet Daniel i soem se prea i impoten tumas?
• ?Olsem wanem blong fren moa wetem Jeova?
• ?From wanem yumi mas prea oltaem?
• ?From wanem yumi no mas letem fasin sem i blokem yumi blong yumi no prea?
[Kwestin]
[Tok blong pija long pej 16]
Bifo we Nehemaea i toktok wetem king, hem i mekem wan sot prea long tingting blong hem
[Tok blong pija long pej 17]
Hana i ‘mekem wan longfala prea’ long Jeova
[Tok blong pija long pej 18]
Jisas i prea wan fulnaet bifo we hem i jusum ol 12 aposol blong hem
[Tok blong pija long pej 20]
Plante taem evri dei, i gat janis blong prea