Taem We Ol Promes Bambae Oli Sua Blong Kamtru

HISTRI i fulap long ol promes we oli no kamtru. Plante taem, ol kantri long wol oli mestem blong kipim wan promes we oli saenem long wan kontrak we oli agri long hem. Samting ya i pulum ol man blong faet long ol nogud wo. Wan man we nem blong hem Napoleon i talem se: “Ol gavman oli holem promes blong olgeta nomo, sipos sam narafala oli fosem olgeta, no sipos bambae oli kasem gud samting from.”

?Olsem wanem long ol promes we wanwan man i mekem? !Tingting blong yu i foldaon taem wan man i no mekem wanem we hem i promes blong mekem! Hemia i tru moa sipos hem i wan man we yu savegud hem mo yu trastem hem. I tru, samtaem ol man oli no naf no maet oli no glad tumas blong mekem promes we oli talem i kamtru.

!Ol promes we ol man oli talemaot i defren olgeta long ol promes we God i talemaot! Yumi save dipen fulwan long ol promes blong God mo yumi save trastem olgeta. Yumi save sua gud long eni promes we Jeova God i talemaot. Yes ol promes ya oli sua fulwan blong kamtru. Long Tok blong God we i tru oltaem, Aesea 55:11 i se: “Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”

?Sipos i olsem, yumi mas tingting wanem long ol promes blong God we oli stap insaed long Baebol? Yumi save putum tras blong yumi long olgeta. Wan eksampol, aposol Jon i raetem se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.” (Revelesen 21:​3, 4) Yu save harem gud long ol blesing ya sipos yu wok folem ol tok ya blong Jisas: “Hemia laef ya we i no save finis, we man i stap kasem save long yu, we yu nomo yu trufala God, mo long hemia we yu sanem i kam, Jisas Kraes.”​—Jon 17:​3, NW.