Ripot Long Wok Blong Kingdom

“!Hemia i Nambawan!”

DOROTA, wan fultaem Kristin minista blong ol Witnes blong Jeova long Polan, i tekem pikinini boe blong hem, we i gat 14 yia, i go pas long dispenseri blong skul. Taem dokta, we nem blong hem Janina, * i stap jekemap pikinini ya, hem i askem long Dorota wanem ol wok we pikinini i stap mekem long haos.

Dorota i ansa se: “Sipos mi no gat taem blong kuk, boe blong mi nao i rerem kakae blong mifala sikis long famle. Mo tu, hem i givhan blong klinim haos mo blong fiksimap ol samting long haos. Hem i laekem rid mo hem i wan gudfala studen long skul.”

Janina i talem se: “I had long mi blong bilivim samting ya. Mi mi wok 12 yia finis long dispenseri ya, mo mi neva harem wan stori olsem.”

Dorota i luksave se hem i gat janis blong prij, ale hem i eksplenem se: “Tede, plante papa mama oli no trenemgud pikinini blong olgeta. Taswe, plante taem ol pikinini oli no gat respek long olgeta wan.”

Nao Janina i askem se: “?Olsem wanem yu yu save samting ya? Bighaf blong ol papa mama oli no gat save nating long ol samting olsem.”

Dorota i ansa se: “Baebol i stamba blong ol save ya. Olsem eksampol, Dutronome 6:​6-9 i soemaot se sipos yumi wantem tijim pikinini blong yumi, yumi mas tijim yumi wan fastaem. !Bifo we yumi save tijim ol gudfala fasin long ol pikinini blong yumi, yumi mas putum ol fasin ya oli stap long hat mo tingting blong yumi fastaem!”

Janina i talem bakegen mo bakegen se, “I had long mi blong bilivim samting ya.” Biaen, hem i askem long Dorota olsem wanem Baebol i halpem hem blong trenem mo tijim ol pikinini blong hem.

Dorota i eksplenem se: “Evri wik, mifala i stadi Baebol wetem ol pikinini blong mifala. Mifala i yusum wan buk we nem blong hem Questions Young People Ask​—Answers That Work.” * Dorota i gohed i tokbaot buk ya mo sam long ol poen insaed long hem.

Janina i singaot se: “!Hemia i nambawan! ?Mi save luk buk ya?”

Wan aoa biaen, Dorota i kambak wetem buk ya.

Taem Janina i stap luklukgud buk ya hem i askem se: “?Wanem skul blong yu?”

“Mi mi wan Witnes blong Jeova.”

“?Ol Witnes blong Jeova oli soem wanem fasin long ol man blong narafala skul?”

Dorota i ansa se: “Oli mekem olsem we mi mekem long yu​—mifala i soem respek.” Mo hem i gohed i se: “Mifala i wantem tumas we olgeta tu oli kasem save long trutok blong Baebol.”

Janina i talemaot se: “Mi mi stat blong haremgud finis.”

Long en blong storian blong tufala, Dorota i pulum Janina blong ridim Baebol, hem i se: “[Baebol] bambae i givim mining long laef blong yu mo bambae i givhan long wok blong yu.”

Janina i talem stret se: “Ol tok blong yu i rili pusum mi blong wantem mekem olsem.”

Yes, wetem kaen fasin mo strong tingting, Dorota i tekem janis taem hem i pas long dokta, blong givim wan gudfala witnes.​—1 Pita 3:​15.

[Ol Futnot]