Oli Mekem i Stret Be Ol Man Oli Mekem i Nogud Long Olgeta

“Olgeta we ol man oli stap mekem i nogud long olgeta, from we oli stap mekem ol samting we God i wantem, oli save harem gud.”​—MATIU 5:​10.

1. ?From wanem Jisas i stanap fored long Ponjes Paelat, mo Jisas i talem wanem?

 “MI MI bon, mo mi kam long wol ya blong wan samting nomo, blong mi witnes long trutok.” (Jon 18:​37, NW ) Jisas i talem tok ya taem hem i stanap fored long Ponjes Paelat, man Rom we i Hedgavman blong Judia. Jisas i no jusum blong kam luk Paelat, mo Paelat i no singaot hem i kam tu. Jisas i stap long ples ya from we ol lida blong skul blong ol man Jiu oli talem ol giaman tok agens long hem, se hem i man nogud mo se i stret we hem i mas ded.​—Jon 18:​29-​31.

2. ?Jisas i mekem wanem long fored blong Paelat, mo wanem i kamaot from?

² Jisas i savegud se Paelat i gat paoa blong letem hem i gofri mo i gat paoa blong givim panis blong ded long hem. (Jon 19:10) Be samting ya i no mekem hem i fraet. Hem i talemaot klia long Paelat ol tok long saed blong Kingdom. Nating se Jisas i save lusum laef blong hem, be hem i tekem janis blong givim witnes long man ya we i hae moa long ol narafala man blong gavman long ples ya. Be witnes we Jisas i givim i no jenisim tingting blong Paelat. Hem i jajem Jisas se i mas ded, nao oli nilim Jisas long pos blong i harem i soa bitim mak gogo hem i ded. Yes, Jisas i ded from bilif blong hem.​—Matiu 27:​24-​26; Mak 15:15; Luk 23:​24, 25; Jon 19:​13-​16.

?Wan Witnes No Wan Man We i Ded From Bilif Blong Hem?

3. ?Long taem blong Baebol, wanem mining blong Grik tok ya we yumi tanem i kam “man we i ded from bilif blong hem,” be tok ya i minim wanem tede?

³ Long tingting blong plante man tede, wan man we i ded from bilif blong hem, i wan krangke man we i bitim mak long skul blong hem. Ol man we oli rere blong ded from bilif blong olgeta, antap moa, bilif long saed blong skul, ol narafala oli no trastem olgeta, maet oli ting se olgeta oli teroris no ol man we oli save mekem trabol long ol narafala. Be long taem blong Baebol, Grik tok ya (marʹtys) we yumi tanem i kam man we i ded from bilif blong hem, i minim “wan witnes,” no wan man we i talemaot samting we hem i bilif se i tru, maet long fored blong kot. Biaen nomo, tok ya i karem mining ya se “man we i ded from we hem i witnes,” no man we i ded blong givim witnes.

4. ?Olsem wanem Jisas i wan man we i ded from bilif blong hem?

⁴ Jisas i man we i ded from bilif blong hem, folem faswan mining blong tok ya. Olsem hem i talem long Paelat, hem i kam blong i “witnes long trutok.” Ol man oli soemaot ol defdefren fasin taem hem i witnes long olgeta. Samfala oli bilif long hem from we ol samting we hem i talem mo mekem oli tajem hat  blong olgeta. (Jon 2:​23; 8:​30) Ol narafala man mo ol lida blong skul oli soemaot tingting blong olgeta tu long saed blong wok blong Jisas. Be i klia se oli no gat gudfala tingting. Jisas i talem long ol famle blong hem we oli no gat bilif se: “Ol man long wol ya oli no save agens long yufala. Be oli stap agens long mi, from we mi mi stap soemaot long olgeta we fasin blong olgeta i no stret.” (Jon 7:7) From we Jisas i witnes long trutok, ol lida blong nesen ya oli kros long hem, mo biaen oli kilim hem i ded. Yes, hem i ‘wan witnes blong God we i tru (marʹtys).’​—Revelesen 3:​14, Nyutesteman wetem Ol Sam long Bislama.

“Bambae Olgeta Man Oli No Laekem Yufala Nating”

5. ?Smoltaem afta we Jisas i statem wok blong hem long wol, hem i talem wanem long saed blong fasin agens?

⁵ I no Jisas nomo we ol man oli agensem hem strong. Hem i givim woning long ol man blong hem se samting ya i mas hapen long olgeta tu. I no longtaem afta we Jisas i statem wok blong hem long wol, hem i toktok long ol man antap long wan hil, nao hem i talem long olgeta se: “Olgeta we ol man oli stap mekem i nogud long olgeta, from we oli stap mekem ol samting we God i wantem, oli save harem gud, from we God i King blong olgeta. Yufala we ol man oli stap spolem nem blong yufala, mo oli stap mekem i nogud long yufala, mo oli stap giaman, oli stap talem ol rabis tok agens long yufala from we yufala i man blong mi, yufala i save harem gud. Yufala i mas harem gud yufala i glad, from we i gat bigfala pei blong yufala i stap long heven.”​—Matiu 5:​10-​12.

6. ?Taem Jisas i sanem ol 12 aposol blong hem oli go prij, hem i givim wanem woning long olgeta?

⁶ Biaen, Jisas i sanem ol 12 aposol blong hem oli go prij, mo hem i talem long olgeta se: “Yufala i mas lukaot gud. Bambae ol man oli save mekem yufala i pas long ol kaonsel blong olgeta, blong ol kaonsel ya oli jajem yufala. Bambae oli save wipim yufala insaed long haos blong prea blong olgeta. Mo from we yufala i man blong mi, bambae oli save pulum yufala i go stanap long fes blong ol haeman blong gavman, mo long fes blong ol king. Be sipos oli mekem olsem, bambae yufala i gat janis blong talemaot gud nius blong mi [“witnes,” NW ] long fes blong olgeta, mo long fes blong ol hiten man.” Be i no ol lida blong skul nomo we oli mekem i nogud long ol disaepol blong Jisas. Jisas i talem tu se: “Bambae man i save letem stret brata blong hem i go long han blong olgeta ya, blong oli  kilim hem i ded. Mo bambae man i save letem stret pikinini blong hem i go, blong oli kilim hem i ded. Mo ol pikinini tu bambae oli save girap, oli agens long papa mo mama blong olgeta, oli save letem tufala i go ded olsem. Bambae olgeta man oli no laekem yufala nating, oli agens long yufala, from we yufala i holem nem blong mi. Be man we i stanap strong gogo kasem en blong hem, bambae God i sevem hem.” (Matiu 10:​17, 18, 21, 22) Ol trabol we ol faswan Kristin oli kasem i soem se ol tok ya i tru.

Oli Stanap Strong

7. ?Wanem i hapen blong mekem se oli kilim Steven i ded from bilif blong hem?

⁷ Smoltaem afta we Jisas i ded, Steven i ded tu from we hem i witnes long trutok. Hem i faswan Kristin we i ded from bilif blong hem. Steven i “wan man we God i stap givim paoa long hem, mo i stap givhan long hem long gladhat blong hem. Nao hem i stap mekem ol merikel mo ol samting blong sapraes, long fes blong ol man. Tabu Spirit i stap mekem Steven i waes tumas,” taswe ol man blong skul we oli agensem hem “oli no save winim tok blong hem.” (Ol Wok 6:​8, 10) From samting ya, oli jalus, nao oli pulum Steven i go long hae kot blong ol man Jiu we nem blong hem Sanhedrin. Long ples ya, Steven i no fraet long ol man we oli talem ol giaman tok agens long hem, mo hem i givim wan witnes we i gat paoa. Be, ol enemi ya oli kilim i ded gudfala witnes ya Steven.​—Ol Wok 7:​59, 60.

8. ?Afta we Steven i ded, ol disaepol long Jerusalem we ol man oli agensem olgeta, oli mekem wanem?

⁸ Afta we ol enemi ya oli kilim Steven i ded, “oli girap, oli stap mekem i strong tumas long ol man blong [kongregesen] long Jerusalem. Oli ronemaot olgeta oli go stap long ol ples olbaot long Judia mo Sameria, ol aposol nomo oli stap long Jerusalem.” (Ol Wok 8:1) ?Fasin agens ya i stopem ol Kristin blong oli no moa givim witnes? Nogat. Baebol i talem se ol Kristin we ol man “oli ronem olgeta oli go wanwan, oli goaot long evri ples, oli stap talemaot gud nius blong Jisas.” (Ol Wok 8:4) Ating oli gat sem filing olsem aposol Pita we hem i talem bifo finis se: “Mifala i mas obei long God, mifala i no save obei long man.” (Ol Wok 5:​29) Long taem ya blong bigfala fasin agens, ol disaepol we oli gat bilif mo oli no fraet, oli gohed nomo blong witnes long trutok, nating we oli save se strong tingting blong olgeta bambae i mekem we ol man oli agensem olgeta moa.​—Ol Wok 11:​19-​21.

9. ?Olsem wanem ol man oli gohed blong mekem i nogud long ol man blong Jisas?

⁹ Yes, ol trabol we ol man oli mekem long ol disaepol, i no finis. Sol i wajem ol man we oli stonem Steven i ded, mo hem i glad nomo long samting ya. Nao “Sol i stap tok strong yet, i stap mekem promes blong kilim ol man blong Masta blong yumi oli ded. Nao hem i girap, i go luk hae pris, i askem long hem blong i raetem sam leta blong talemaot hem insaed long ol haos blong prea blong ol laen blong Isrel long Damaskes. Ol leta ya i givim raet long Sol, se sipos hem i faenem sam man we oli stap folem Rod blong Masta blong yumi, bambae hem i save holem olgeta. Nating we ol man no ol woman, be hem i gat raet blong pulum olgeta evriwan oli kam long Jerusalem.” (Ol Wok 9:​1, 2) Biaen bakegen, long yia 44 K.T., * “King Herod i stat mekem i strong tumas long sam man blong [kongregesen]. Hem i talem long ol man blong hem blong oli go holem Jemes, brata blong Jon, oli katemaot hed blong hem.”​—Ol Wok 12:​1, 2.

10. ?Wanem ol stori we yumi faenem long buk blong Ol Wok mo Revelesen long saed blong trabol we ol man oli mekem long ol gudfala man blong God?

¹⁰ Buk blong Ol Wok i gohed blong tokbaot klia ol traem we ol gudfala man blong God oli kasem, mo olsem wanem ol man oli mekem i nogud long olgeta mo sakem olgeta long kalabus. Wan we i kasem trabol olsem, hemia Pol. Fastaem hem i mekem i nogud long ol Kristin, be biaen, hem i kam wan aposol. Samwe long yia 65 K.T., ating Empera Nero blong Rom nao i kilim hem i ded from bilif blong hem. (2 Korin 11:​23-​27; 2 Timoti 4:​6-8) Klosap long yia 100 K.T., aposol Jon i raetem buk blong Revelesen. Long buk ya, hem i talem se hem tu i stap kalabus long aelan blong Patmos from we hem i “stap talemaot tok blong God mo trutok we Jisas i witnes long hem se i tru.” Mo tu, Revelesen i tokbaot ‘Antipas, tru witnes ya blong Jisas, we oli kilim hem i ded’ long taon ya Pegamam.​—Revelesen 1:​9, Nyutesteman wetem Ol Sam long Bislama; 2:​13, Nyutesteman wetem Ol Sam long Bislama.

11. ?Olsem wanem laef blong ol faswan Kristin i pruvum tok blong Jisas se ol man bambae oli mekem trabol long olgeta?

 ¹¹ Ol samting ya i pruvum ol tok we Jisas i talem long ol disaepol blong hem. Hem i se: “From we ol man blong wol ya oli stap mekem i nogud tumas long mi, i klia gud we bambae oli save mekem sem fasin nomo long yufala.” (Jon 15:20) Sam long ol faswan Kristin oli ded taem ol man oli mekem olgeta oli harem nogud long bodi blong olgeta no taem oli sakem olgeta oli go long ol wael anamol, no long wan narafala rod bakegen. Be oli rere blong fesem traem ya we i bigwan olgeta, hemia ded, blong oli save finisim wok we Masta Jisas Kraes i givim. Hem i talem se: “Bambae yufala i mas go talemaot mi [“witnes,” NW ] long Jerusalem, mo long olgeta ples long Judia mo Sameria, gogo yufala i finisim olgeta ples long wol.”​—Ol Wok 1:8.

12. ?From wanem i no long taem bifo nomo we ol man oli mekem i nogud long ol Kristin?

¹² Man we i ting se strong fasin agens i kasem ol man blong Jisas bifo nomo, hem i rong olgeta. Pol, we yumi luk se plante man oli agensem hem, i raetem se: “Olgeta man we oli wantem joen long Jisas Kraes blong mekem laef blong olgeta i stret long fes blong God, bambae ol man oli save mekem i nogud tumas long olgeta.” (2 Timoti 3:​12) Long saed blong fasin agens, Pita i talem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:​21) Kam kasem “ol las dei” blong wol naoia, ol man oli stap agensem ol man blong Jeova mo oli stap mekem i nogud long olgeta. (2 Timoti 3:​1, NW ) Long taem blong yumi, long sam kantri we wan man nomo i rul long olgeta long strong fasin, mo long sam kantri we ol man oli vot blong putumap gavman blong olgeta, long plante defren fasin ol man oli mekem i nogud long fulwan grup blong ol Witnes blong Jeova no long sam Witnes nomo.

?From Wanem Oli Mekem i Nogud Long Ol Witnes?

13. ?Ol man blong Jeova tede oli mas tingbaot wanem long saed blong fasin agens?

¹³ I tru se bighaf blong yumi tede, yumi fri blong prij mo blong mekem ol miting blong yumi long pis. Be yumi mas tinghevi long tok blong Baebol se “fasin blong wol ya i stap jenis.” (1 Korin 7:​31, NW ) Ol samting i save jenis hareap, mo sipos yumi no rere long tingting blong yumi, long filing blong yumi, mo long saed blong spirit, bambae i isi blong yumi foldaon. ?Yumi save mekem wanem blong no foldaon? Wan gudfala samting se, yumi mas kasem save klia long tingting blong yumi, from wanem ol man oli no laekem nating ol Kristin mo from wanem oli mekem i nogud long ol Kristin ya we oli laekem pis mo oli obei long loa.

14. ?Folem tok blong Pita, from wanem ol man oli mekem i nogud long ol Kristin?

¹⁴ Aposol Pita i tokbaot samting ya long faswan leta we hem i raetem samwe long yia 62-​64 K.T. Long taem ya, ol Kristin long ol ples we Rom i rul long olgeta, oli stap kasem ol traem mo ol man oli stap mekem i nogud long olgeta. Pita i talem se: “Ol fren. I nogud yufala i sapraes long ol strong samting ya we oli kam blong traem bilif blong yufala. Ol samting olsem, i no yufala nomo i kasem, be plante narafala Kristin man tu oli kasem.” Pita i talemaot wanem i stap long tingting blong hem, i se: “Man we i kilim man, no i stil no i brekem loa, no i stap go insaed long ol bisnes blong narafala man, hem bambae i kasem panis. Be i no stret sipos wan long yufala i kasem panis from ol fasin olsem. Be sipos yufala i stap kasem panis from we yufala i man blong Kraes, hemia i no samting blong sem. Yufala i mas presem God from we nem blong Kraes i stap long yufala olsem.” Pita i soem se ol man oli stap agensem olgeta from we oli Kristin man, i no from we oli mekem samting nogud. Sipos oli olsem ol man raonabaot long olgeta we oli “no tingbaot wan samting, oli jes gohed nomo,” bambae ol man oli glad long olgeta. Be oli stap agensem olgeta from we olgeta oli traehad blong folem ol fasin we ol man blong Kraes oli mas mekem. Semfala samting i stap hapen long ol trufala Kristin tede.​—1 Pita 4:​4, 12, 15, 16.

15. ?Wanem tu defren fasin we ol man oli mekem long ol Witnes blong Jeova tede?

¹⁵ Long plante ples blong wol, ol man oli talemaot ol tok i klia nomo blong presem ol Witnes blong Jeova, se oli joengud mo oli wokgud tugeta long ol asembli mo long wok blong bildim ol haos miting blong olgeta. Oli toktokgud long olgeta tu from we oli no giaman mo stil, oli wokhad, oli mekem ol gudfala fasin, oli traehad blong mekem famle blong olgeta i joengud oltaem, mo ol klos mo fasin blong olgeta wanwan oli stret. * Nating se i olsem, long bitim 28 kantri finis, gavman i putum tabu long wok blong ol Witnes, no oli blokem sam samting long saed blong wosip blong olgeta. Mo oli mekem plante Witnes oli harem nogud long bodi blong olgeta no oli mekem se  oli lusum plante samting from bilif blong olgeta. ?From wanem oli presem ol Witnes from gudfala fasin blong olgeta be long semtaem oli putum tabu long olgeta mo mekem i nogud long olgeta? ?From wanem God i letem samting ya i hapen?

16. ?Wanem bigfala risen blong God i letem ol man oli mekem i nogud long ol man blong hem?

¹⁶ Fastaem, yumi mas tingbaot tok blong Ol Proveb 27:11: “Pikinini blong mi, yu yu mas kam waes. Sipos yu kam waes, bambae mi glad we mi glad, mo sipos man i faerap long mi, be bambae mi gat ansa blong givim long hem.” Yes, tok ya i joen wetem kwestin we i stanap longtaem finis, long saed blong hu i gat raet blong rul long heven mo wol. Long ol handred yia we oli pas finis, ol man we oli stap tru long Jeova oli givim fulap pruf finis se Jeova i beswan rula. Nating se i olsem, Setan i gohed nomo blong sakem ol nogud tok long Jeova, olsem we hem i mekem long taem blong stret man ya Job. (Job 1:​9-​11; 2:​4, 5) Naoia long laswan traehad blong Setan, i sua se hem i wantem pruvum moa ol tok blong hem, from we Kingdom blong God i stanap finis, mo ol man we oli obei long Kingdom ya mo talemaot hem, oli stap long evri ples blong wol. ?Bambae ol man blong God oli stap tru long Hem nomata wanem trabol ol man oli mekem long olgeta? Hemia kwestin we ol man blong Jeova wanwan oli mas ansa long hem.​—Revelesen 12:​12, 17.

17. ?Wanem mining blong tok blong Jisas se: ‘Hemia bambae i taem blong yufala i witnes long fes blong olgeta’?

¹⁷ Taem Jisas i talem long ol disaepol blong hem ol samting we bambae oli kamaot klosap long taem we “wol ya i finis,” hem i talem wan narafala risen from wanem Jeova i letem ol man oli mekem i nogud long ol man blong hem. Hem i se: “Bambae oli save mekem yufala i stanap long fes blong ol king, mo long fes blong ol haeman blong gavman, from we nem blong mi i stap long yufala. Hemia bambae i taem blong yufala i talemaot gud nius [“witnes,” NW ] long fes blong olgeta.” (Matiu 24:​3, 9; Luk 21:​12, 13) Jisas hem wan i witnes long fes blong Herod mo Ponjes Paelat. Aposol Pol tu i “stanap long fes blong ol king, mo long fes blong ol haeman blong gavman.” !Masta Jisas Kraes i pulum Pol blong i wantem givim witnes long rula we i hae moa long ol narafala rula long taem blong hem, taswe Pol i talem se: “!Mi mi wantem go talemaot bisnes ya blong mi long fes blong Sisa!” (Ol Wok 23:11; 25:​8-​12) Tede tu, plante trabol we i kamaot i mekem rod blong ol Kristin oli save givim wan gudfala witnes long ol haeman blong gavman mo ol narafala man. *

18, 19. (a) ?Sipos yumi stanap strong taem yumi kasem traem, olsem wanem samting ya i save mekem i gud long yumi? (b) ?Wanem tufala kwestin we bambae yumi tokbaot long nekis stadi?

¹⁸ Laswan samting se, taem yumi kasem traem mo fasin agens, samting ya i save mekem i gud long yumi. ?Olsem wanem? Disaepol Jemes i talem long ol Kristin se: “Ol brata mo sista. Taem plante samting oli stap kam blong traem yufala, bambae yufala i save luk olgeta olsem samting blong harem gud, from we yufala i save se taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.” Yes, taem ol man oli agensem yumi, samting ya i save mekem bilif blong yumi i strong mo mekem yumi kam strong moa blong stanap longtaem. From samting ya, yumi no fraet blong kasem fasin agens, mo yumi no traem blong faenem wan rod we Baebol i no agri long hem, blong finisim no ronwe long fasin agens. Defren olgeta, yumi folem advaes ya blong Jemes se: “Yufala i mas stanap strong olwe gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.”​—Jemes 1:​2-4.

¹⁹ Tok blong God i givhan long yumi blong kasem save from wanem ol man oli mekem i nogud long ol gudfala man blong God mo from wanem Jeova i letem olgeta oli mekem trabol ya. Be save ya i no mekem i isi blong haremgud taem ol man oli agensem yumi. ?Olsem wanem yumi save kam strong moa mo mekem tingting blong yumi i longfala taem oli mekem trabol long yumi? ?Yumi save mekem wanem taem ol man oli mekem i nogud long yumi? Bambae yumi luk ansa long tufala impoten kwestin ya long nekis stadi.

[Ol Futnot]

?Yu Yu Save Eksplenem?

• ?Long saed blong Jisas, wanem mining blong tok ya ‘man we i ded from bilif blong hem’?

• ?Fasin agens i mekem wanem long ol faswan Kristin?

• ?Folem tok blong Pita, from wanem ol man oli mekem i nogud long ol faswan Kristin?

• ?From wanem Jeova i letem ol man oli mekem i nogud long ol man blong hem?

[Kwestin]

[Tok blong pija long pej 10]

Ol man oli mekem i nogud long ol faswan Kristin from we oli Kristin, i no from we oli mekem nogud fasin

POL

JEMES

JON

ANTIPAS

STEVEN