?Yu Yu “Stap Kikbak Long Stik”?

LONG taem blong Baebol bifo, man blong lukaot long sipsip i gat wan stik we en blong hem i sap gud. Hem i yusum stik ya blong lidim ol buluk we oli karem ol hevi samting blong oli save wokbaot stret. ?Sipos anamol ya i no wantem go, mo hem i traem blong kikbak long stik ya, wanem bambae i kamaot? Bambae hem i no harem gud be bambae hem i harem i soa moa long bodi blong hem.

Jisas Kraes we i laef bakegen long ded, i tokbaot ol stik ya blong stikim buluk taem hem i kamtru long wan man we nem blong hem Sol, we i stap go blong holem sam long ol disaepol blong Jisas. Sol i harem voes blong Jisas i kamaot long wan bigfala laet we i saen. Voes ya i talem se: “!Sol! !Sol! ?Weswe yu yu stap mekem i nogud long mi olsem? Fasin ya i stap spolem yu nomo. Yu yu olsem buluk we taem man blong hem i stikim long stik we i sap, be i stap kikbak long stik ya, nao stik ya i stikim hem moa.” Taem Sol i stap spolem ol Kristin man ya, i olsem we hem i stap faet agens long God stret, mo hemia wan samting we i spolem hem wan nomo.​—Ol Wok 26:14.

?Yumi tu yumi save kam olsem we yumi stap ‘kikbak agens long stik’? Baebol i talem se “ol tok blong ol waes man” oli olsem stik ya blong buluk we i soem stret rod blong yumi wokbaot long hem. (Prija 12:11) Ol advaes blong God we oli stap long Baebol oli save givhan mo soem stret rod long yumi sipos yumi letem Tok blong hem i lidim yumi. (2 Timoti 3:16) Sipos yumi traem blong agens long hem i olsem we yumi spolem yumi nomo.

Sol i putum ol tok blong Jisas long hat blong hem, hem i jenisim rod we hem i stap folem fastaem, mo hem i kam wan gudfala Kristin man hemia aposol Pol. Fasin blong yumi blong tinghevi long ol advaes long saed blong spirit bambae i karem fulap blesing i kam long yumi blong olwe.​—Ol Proveb 3:​1-6.

[Foto Credit Line blong pija long pej 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers