?Yumi Save Ting Se God Bambae i Blokem Yumi Long Ol Trabol?

LONG ol yia 700 B.K.T., * Hesekia, king blong Juda we i gat 39 yia blong hem, i faenemaot se hem i gat wan sik we hem i mas ded from. Hesekia i harem nogud bitim mak, ale hem i prea long God, i plis long hem blong mekem sik blong hem i kamgud. Profet blong God i talem ansa we God i givim, i se: “Mi mi harem prea blong yu, mo mi luk we yu harem nogud tumas,  yu stap krae. Bambae mi mekem yu yu oraet bakegen, mo bambae yu stap gogo kasem fiftin yia bakegen.”​—Aesea 38:​1-5.

?From wanem God i tekemaot sik blong Hesekia? Plante handred yia bifo, God i promes long gudfala King Deved se: “Olgeta ya we bambae oli stap kamaot biaen long yu, oltaem bambae mi mekem olgeta oli stap gud, mo bambae mi mekem kingdom blong yu i stap oltaem, gogo i no save finis. Mo oltaem, ol king blong yufala bambae oli stap kamaot long olgeta ya we bambae oli stap kamaot biaen long yu.” Mo God i talem tu se Mesaea bambae i kamaot long laen blong Deved. (2 Samuel 7:​16; Ol Sam 89:​20, 26-​29; Aesea 11:1) Taem Hesekia i kasem sik ya, hem i no gat wan pikinini boe blong hem yet. Hem i mas gat wan boe, sipos no, laen blong Deved we ol king oli mas kamaot long hem, bambae i finis. Taswe, God i tekemaot sik blong Hesekia blong mekem se laen blong Mesaea i gohed.

Long ol yia bifo we Kraes i kam long wol, plante taem Jeova i stretem trabol blong ol man blong hem, blong mekem se ol promes blong hem oli kamtru. Moses i tokbaot we God i tekemaot ol man Isrel long wok slef long Ijip, i se: “Hem [Jeova] i lavem yumi, mo hem i wantem mekem promes ya blong hem i kamtru, we hem i bin mekem wetem ol bubu ya blong yumi bifo. Nao from samting ya, hem i sevem yumi long bigfala paoa blong hem.”​—Dutronome 7:8.

Long faswan handred yia, God i mekem merikel we i givhan long stamba plan blong hem blong kamtru. Wan taem we hem i mekem olsem, hemia taem we man Jiu ya Sol i stap wokbaot long rod we i go long Damaskes, nao hem i luk wan vison. Long vison ya, Jisas i talem long Sol blong stop blong ronem mo kilim ol disaepol blong hem. Sol i jenisim fasin blong hem, nao i kam aposol Pol, mo i mekem wan bigfala wok blong talemaot gud nius long ol man we oli no man Isrel.​—Ol Wok 9:​1-​16; Rom 11:13.

 ?Oltaem God i Tekemaot Trabol Blong Ol Man Blong Hem?

?God i tekemaot trabol blong ol man blong hem oltaem, no sam samtaem nomo? Baebol i soem klia se i no oltaem we hem i mekem olsem. God i blokem trifala Hibru boe blong oli no ded long bigfala faea, mo i blokem profet Daniel blong ol laeon oli no kakae hem. Be sam narafala profet oli ded, hem i no blokem olgeta. (2 Kronikel 24:​20, 21; Daniel 3:​21-​27; 6:​16-​22; Hibrus 11:37) King Herod Agripa 2 i sakem Pita long kalabus mo God i mekem wan merikel blong Pita i kamfri bakegen. Be semfala king ya i kilim Jemes i ded, mo God i no blokem samting ya. (Ol Wok 12:​1-​11) God i givim paoa long ol aposol blong oli mekem sikman i gud bakegen mo blong oli mekem samfala oli laef bakegen. Be hem i no tekemaot ‘trabol we i olsem nil blong aranis, we i stap stikim’ aposol Pol. Maet trabol ya i wan sik we hem i gat.​—2 Korin 12:​7-9; Ol Wok 9:​32-​41; 1 Korin 12:28.

God i no blokem bigfala trabol we Empera Nero blong Rom i mekem long ol disaepol blong Kraes. Empera ya i mekem olgeta oli harem nogud tumas long bodi blong olgeta, i bonem samfala long faea, mo i sakem samfala oli go long ol wael anamol blong oli kakae. Ol faswan Kristin oli no sapraes long fasin agens ya, mo oli no lusum bilif blong olgeta long God from. Jisas i givim woning finis long ol disaepol blong hem se bambae oli mas stanap fored long ol jaj long kot, mo se oli mas rere blong safa mo blong ded from bilif blong olgeta.​—Matiu 10:​17-​22.

Long taem bifo, God i naf blong sevem ol man blong hem taem oli fesem denja, mo tede tu, hem i naf blong mekem samting ya. Samfala oli ting se God i sevem olgeta long wan trabol, mo yumi no mas tok agensem olgeta from. Be, yumi no save talem stret se God i bin mekem olsem no nogat. Long taon ya Toulouse, sam gudfala man blong Jeova oli karem kil taem wan faktri i bosta olsem wan bom. Mo tu, plante taosen gudfala Kristin oli ded long ol rabis kalabus blong ol Nasi mo Komunis no long wan narafala rabis rod, be God i no blokem trabol ya. ?From wanem God i no blokem olgeta man evriwan we hem i glad long olgeta?​—Daniel 3:​17, 18.

“Samting We Yumi No Tingbaot”

Taem wan bigfala trabol i kamaot, hem i save kasem eniman, mo i save kasem ol man we oli bilif strong long God tu. Taem faktri ya i bosta long Toulouse, man ya Alain mo woman ya Liliane tufala i no ded. Be 30 narafala man mo woman oli ded, mo plante handred narafala oli karem kil, nating se oli no mekem wan samting blong pulum trabol ya i kam long olgeta. Plante moa man long wol, maet plante taosen, oli stap ded from we narafala i kilim olgeta, oli akseden long trak, no oli ded long ol wo, be yumi no save talem se i fol blong God we trabol ya i kasem olgeta. Baebol i talem se “ol samting we yumi no tingbaot” oli save kasem yumi enitaem.​—Prija 9:​11, NW.

Mo tu, fasin blong yumi ol sinman, hemia se yumi save kam sik, yumi kam olfala mo yumi ded. Maet samfala oli ting se God i bin mekem wan merikel blong sevem laef blong olgeta no blong mekem sik blong olgeta i kamgud, be samtaem biaen, bambae oli mas ded. Stret taem blong tekemaot sik mo ded mo blong ‘ravemaot wota blong ae blong ol man,’ hem i no naoia be long fiuja.​—Revelesen 21:​1-4.

Blong mekem samting ya i kamaot, i no naf we God i tekemaot trabol blong sam man nomo. Baebol i tokbaot wan bigfala samting moa we bambae hem i mekem, hemia ‘Bigfala Dei blong Jeova.’ (Sefanaea 1:​14) Long taem ya, God bambae i tekemaot olgeta trabol long olgeta ples blong wol. Bambae hem i givim janis long olgeta man blong oli kasem laef we i no save finis long wol ya we i kam stretgud olgeta. “Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.” (Aesea 65:17) Tede ol man oli stap ded, be long fiuja, samting we i defren olgeta bambae i hapen. Ol dedman bambae oli laef bakegen. (Jon 5:​28, 29) God we i gat lav mo fasin blong hem i gud tumas, bambae i stretem ol trabol blong ol man blong olwe.

?God i Stap Mekem Wanem Tede?

Hemia i no min se, tede God i stap lukluk ol trabol blong ol man nomo be i no kea long olgeta. Nogat.  God i stap givim janis long olgeta man, blong oli save hem mo blong oli fren wetem hem, nating se oli blong wanem kantri no laen, mo nating se oli haeman no man we i no gat nem. (1 Timoti 2:​3, 4) Jisas i tokbaot samting ya i se: “I no gat man i save kam long mi, sipos Papa blong mi we i sanem mi mi kam, hem i no pulum hem i kam.” (Jon 6:​44) God i yusum ol man blong hem blong talemaot gud nius blong Kingdom long olgeta ples blong wol, mo long rod ya, hem i stap pulum ol man we hat blong olgeta i stret oli kam long hem.

Mo tu, God i save jenisim laef blong ol man we oli wantem se hem i lidim olgeta. God i stap yusum tabu spirit blong hem blong ‘openem tingting blong olgeta,’ blong oli kasem save long samting we hem i wantem mo blong oli mekem ol fasin we hem i glad long olgeta. (Ol Wok 16:14) Yes, God i soemaot se hem i lavem yumi evriwan mo hem i kea long yumi, taem hem i givim janis long yumi wanwan blong savegud hem, Tok blong hem, mo ol stamba tingting blong hem.​—Jon 17:3.

Mo tu, nating se God i no mekem merikel tede blong sevem ol man blong hem, be hem i givim tabu spirit long olgeta, hemia ‘paoa we i bigwan tumas i blong hem nomo.’ Tabu spirit i save halpem olgeta blong stanap strong agensem enikaen trabol we i kasem olgeta. (2 Korin 4:7) Aposol Pol i raetem se: “Mi mi naf blong mekem evri samting long paoa blong Hemia [Jeova God] we i stap givim paoa long mi.”​—Filipae 4:​13, NW.

Taswe, yumi gat plante risen blong talem tangkiu long God evri dei from laef we hem i givim long yumi, mo from janis we yumi gat blong kasem laef we i no save finis long wol ya we bambae i no moa gat fasin safa long hem. Wan man blong raetem Ol Sam i talem se: “Hae God i stap mekem i gud tumas long mi. ?Bambae mi save givim wanem presen long hem? [“Bambae mi dring long kap ya we i save sevem mi, mo bambae mi singaot long Jeova, mi talem nem blong hem,” NW ].” (Ol Sam 116:​12, 13) Sipos yu ridim Wajtaoa oltaem, bambae hem i givhan long yu blong kasem save long ol samting we God i mekem finis, i stap mekem naoia, mo bambae i mekem long fiuja. Ol samting ya oli save mekem yu yu glad naoia mo oli givim wan gudfala tingting long saed blong fiuja.​—1 Timoti 4:8.

[Futnot]

[Tok blong makem poen pija long pej 6]

“Ol samting ya we i hapen bifo, bambae ol man oli no moa save tingbaot stori blong olgeta, bambae i lus olgeta.”—Aesea 65:17

[Tok blong pija long pej 5]

Long taem blong Baebol, Jeova i no blokem ol man we oli stonem Sekaraea . . .

mo i no blokem Herod we i kilim plante gudfala man i ded

[Tok blong pija long pej 7]

Klosap nao, bambae ol man oli no moa safa, mo ol dedman tu bambae oli laef bakegen