!Blong Winim Praes Yu Mas Bos Long Yu Wan!
!Blong Winim Praes Yu Mas Bos Long Yu Wan!
“Evri man we i mekem resis, i mas bos long hem wan long olgeta samting.”—1 KORIN 9:25, NW.
1. ?Folem Efesas 4:22-24, plante milian man oli talem “yes” long Jeova olsem wanem?
SIPOS yu yu baptaes blong kam wan Witnes blong Jeova, yu bin soemaot long olgeta man se naoia yu rere blong tekpat long resis ya we praes blong hem hemia laef we i no save finis. I olsem we yu talem “yes” long Jeova blong mekem wok blong hem. Be, bifo we yumi givim laef i go long Jeova, ating plante long yumi oli bin mekem sam bigfala jenis long laef blong olgeta. Long rod ya nao, yumi mekem we laef blong yumi i sas blong God i save agri long hem. Yumi folem advaes ya we aposol Pol i givim long ol Kristin se: “Yufala i mas finis long olfala laef ya blong yufala bifo, we yufala i stap folem ol fasin blong yufala nomo. Olfala laef ya i stap mekem yufala i wantem tumas ol samting we oli blong giaman nomo, mo we oli stap spolem yufala nomo. . . . Nao bambae yufala i kam niufala man, we God i mekem yufala i kam olsem hem. Nao bambae ol man oli save luksave se laef blong yufala i folem trutok blong hem, mo i stret gud, i tabu, i blong hem nomo.” (Efesas 4:22-24) Hemia i min se bifo we yumi save talem “yes” long wan laef we God i glad long hem, yumi mas talem “no” long olfala laef blong yumi bifo.
2, 3. ?Olsem wanem 1 Korin 6:9-12 i soem se i gat tu kaen samting we man i mas jenisim sipos i wantem we God i glad long hem?
2 Sam haf blong olfala laef ya we man i mas sakemaot sipos hem i wantem kam wan Witnes blong Jeova, oli go stret agensem Tok blong God. Pol i tokbaot sam long ol fasin ya taem hem i raetem leta i go long ol man Korin, i se: “Man we i stap ronem woman, mo man we i stap prea long ol narafala god, bambae oli no save go insaed long niufala wol ya. Man we i stap slip wetem woman blong narafala man mo woman we i stap mekem i krangke wetem narafala man, mo man we i stap slip wetem man, mo woman we i stap slip wetem woman, bambae oli no save go insaed long niufala wol ya. Man we i stap stil, mo man we i wantem plante samting tumas, mo man we i stap dring we i lusum hed, mo man we i stap spolem nem blong narafala man, mo man we i stap mekem ol bisnes blong stilim mane, bambae oli no save go insaed.” Nao, Pol i soem se ol Kristin ya long faswan handred yia oli bin mekem sam jenis long fasin blong olgeta, taem hem i gohed i se: “Bifo, sam long yufala oli olsem nomo.” Makem gud se fastaem sam long ol Kristin ya oli gat ol nogud fasin olsem, be oli jenisim fasin blong olgeta.—1 Korin 6:9-11.
3 Pol i soemaot se i gat sam narafala samting moa blong jenisim, from we hem i gohed blong talem se: “Yumi fri blong mekem evri samting . . . be i no evri samting we oli gud long yumi.” (1 Korin 6:12) Taswe, plante man tede, we oli wantem kam Witnes blong Jeova, oli mas talem “no” long sam samting we, maet i no brekem loa blong God, be i no save mekem i gud tu long olgeta mo i no save stap longtaem. Maet ol samting ya i tekem tumas taem blong olgeta mo i save pulum tingting blong olgeta i gowe long ol samting we oli moa impoten.
4. ?Ol Kristin we oli givim laef blong olgeta i go long Jeova finis, oli agri wetem wanem tok ya blong Pol?
4 Taem man i givim laef blong hem i go long God, hem i mekem long gladhat blong hem. Hem i no mekem olsem we narafala i fosem hem, mo i no harem olsem we ol samting we hem i lego olgeta oli bigwan bitim mak. Ol Kristin we oli givim laef blong olgeta i go long God oli agri wetem tok ya blong Pol, afta we hem i kam wan man blong Kraes, se: “From Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.” (Filipae 3:8) Pol i glad blong talem “no” long ol samting we oli no impoten from we long rod ya nao bambae hem i save holem “yes” we hem i talem long God.
5. ?Wanem kaen resis ya we Pol i tekpat long hem mo i winim, mo olsem wanem yumi save mekem olsem hem?
5 Taem Pol i stap ron long resis ya long saed blong spirit hem i bos long hem wan. Taswe hem i talem tok ya se: “Long laef blong mi we mi mi bilif strong long Kraes, i olsem we mi mi stap resis strong long wan resis, mo naoia mi mi kamtru finis long en blong hem, mo mi mi stap holemstrong yet fasin blong bilif. Mo naoia, praes blong man we i win, i stap rere finis blong Masta blong yumi i givim long mi blong ona long mi. Praes ya, hemia we Masta blong yumi bambae i talem se mi mi wan stret man. Hem i wan Jaj we oltaem hem i stap jajem man long stret fasin, mo long Dei ya we hem bambae i jajem olgeta man, bambae hem i givim praes ya long mi. Mo i no long mi nomo. Bambae hem i givim praes olsem long olgeta man we oli lavem hem, mo oli stap wet, blong hem bambae i kamtru bakegen.” (2 Timoti 4:7, 8) ?Wan dei bambae yumi save talem sem samting long saed blong yumi wan? Yes, bambae yumi save talem olsem, sipos yumi bilif, mo yumi bos long yumi wan, taem yumi ron long Kristin resis ya gogo kasem en blong hem, we yumi no kam slak.
Yumi Mas Bos Long Yumi Wan Blong Mekem Gudfala Wok
6. ?Wanem mining blong bos long yumi wan, mo yumi mas soem fasin ya long wanem tufala rod?
6 Hibru mo Grik wod ya we yumi tanem i kam “bos long yumi wan” long Baebol, i minim stret se wan man i gat paoa long hem wan no i save kontrolem hem wan bakegen. Plante taem, ol man oli yusum tok ya blong tokbaot taem man i blokem hem wan blong i no mekem samting nogud. Be i klia se fasin ya i impoten tu taem yumi wantem yusum bodi blong yumi blong mekem ol gudfala wok. I isi moa long ol sinman blong mekem samting nogud i bitim samting we i gud, taswe, yumi mas faet strong long tufala saed, hemia blong mekem ol gudfala wok mo blong blokem ol samting nogud tu. (Prija 7:29; 8:11) Long semtaem we yumi stap blokem yumi wan blong no mekem samting nogud, yumi mas fosem yumi blong mekem samting we i gud. Tru ya, beswan rod blong blokem yumi blong mekem samting we i nogud, hemia sipos yumi bos strong long bodi blong yumi blong mekem gudfala samting.
7. (a) ?Wanem samting we yumi save prea from, olsem Deved i mekem? (b) ?Wanem samting i save halpem yumi blong yumi strong moa blong bos long tingting blong yumi?
7 I klia se bos long tingting i wan impoten fasin we yumi nidim sipos yumi wantem holem promes blong givim laef i go long God. Yumi mas prea olsem we Deved i bin mekem taem hem i se: “God, plis yu mekem tingting blong mi i klin olgeta. Plis yu mekem we hat blong mi i kam niuwan bakegen, mo i stap strong long yu oltaem.” (Ol Sam 51:10) I gud blong tingting dip long ol gudfala frut we oli save kamaot sipos yumi stap longwe long ol nogud fasin mo ol samting we oli save spolem bodi blong yumi. Tingbaot trabol we maet yumi kasem sipos yumi no stap longwe long ol nogud fasin: maet yumi kasem sam bigfala sik long bodi, maet yumi no moa joengud wetem ol fren no famle blong yumi, no maet yumi pulum ded i kam hareap long yumi. Defren olgeta, tingbaot ol bigbigfala blesing we yumi save kasem sipos yumi strong blong folem fasin blong laef we Jeova i advaesem yumi blong folem. Be yumi no mas fogetem tu, se hat blong yumi i save trikim yumi. (Jeremaea 17:9) Yumi mas mekemap tingting blong yumi se bambae yumi no letem hat blong yumi i pulum yumi blong ting se ol rul blong Jeova oli no rili impoten.
8. ?Wanem trutok we ating plante long yumi i luksave finis? Givim wan eksampol.
8 Ating plante long yumi i luk finis se, plante taem, bodi blong yumi we i slak, i traem daonem tingting blong yumi we i wantem stap strong. Tingbaot wok ya blong talemaot Kingdom. Jeova i glad tumas taem hem i luk we ol man oli wantem mekem wok ya we i blong sevem laef. (Ol Sam 110:3; Matiu 24:14) Bighaf long yumi, yumi bin faenem i had lelebet blong prij. Ating yumi mas bos bigwan long filing blong yumi, mo maet yumi nidim yet blong mekem olsem. Tru ya, ating yumi mas “faetem gud” bodi blong yumi mo yumi mas “bos long hem olsem we hem i wan slef nomo,” from we yumi no wantem we hem i pulum yumi blong folem rod we i isi moa.—1 Korin 9:16, 27, NW; 1 Tesalonaeka 2:2.
“Long Olgeta Samting”
9, 10. ?Blong ‘bos long yumi wan long olgeta samting’ i minim wanem samting moa?
9 Advaes ya blong Baebol se yumi mas ‘bos long yumi wan long olgeta samting’ i soem se i no naf blong blokem kros mo ol rabis fasin nomo. Maet yumi harem se long saed blong tufala samting ya, yumi naf blong bos long tingting, mo sipos i olsem, ale yumi save glad. ?Be olsem wanem nao long sam narafala haf blong laef we maet i no isi blong luksave se yumi nidim blong bos long tingting? Tingbaot sipos yumi laef long wan kantri we i rij, ale i isi nomo blong man i pem eni samting we hem i wantem. ?Yu ting se i waes blong lanem blong talem “no” long fasin blong spenem mane long samting we yumi no rili nidim? Yes i waes. I gud ol papa mama oli tijim pikinini blong olgeta blong oli no pem samting jes from we i stap long stoa, from we i naes, no from we oli gat mane blong pem samting ya. Mo i gud we ol papa mama tu oli soem stret eksampol long saed ya sipos oli wantem we pikinini i folem tijing blong olgeta.—Luk 10:38-42.
10 Sipos yumi lan blong laef we yumi no gat evri samting we yumi wantem, yumi stap mekem tingting blong yumi i strong mo i naf blong talem “no.” Samting ya i save givhan long yumi blong yumi glad tu long wanem samting we yumi gat. Mo bambae yumi harem save filing blong olgeta we oli mas laef wetem smol samting nomo from we oli no gat mane blong pem evri samting we oli wantem. Fasin ya blong laef wetem smol samting nomo, i no isi from we bigfala tingting blong ol man naoia hemia se yu mas mekem i gud long yu wan, no yu mas gat evri samting we yu yu wantem. Yes, ol bigfala toktok long radio mo televisin, no long ol pija long buk, oli blong pulum man blong haremgud naoia nomo. Oli mekem ol toktok ya blong pulum ol man blong pem ol samting, nao oli save winim mane from. Ol samting olsem oli save daonem traehad blong yumi blong bos long tingting. Wan niuspepa blong wan rij kantri long Yurop i talem i no longtaem se: “Olgeta we oli stap harem nogud from we oli laef long ol kantri we oli pua tumas, oli mas bos strong long tingting blong olgeta blong oli no stap wantem samting we oli no save kasem. !Nao, sipos olgeta ya oli mas traehad olsem, ating ol man we oli laef long ol kantri we oli rij mo oli save kasem evri samting isi nomo, oli nidim moa blong bos long tingting blong olgeta!”
11. ?From wanem i gud blong lan blong laef wetem smol samting nomo, mo from wanem i no isi blong mekem olsem?
11 Sipos i hadwok long yumi blong luksave samting we yumi wantem nomo no samting we yumi rili nidim, ale ating i gud yumi yusum sam rod we bambae oli blokem yumi blong no spenem mane olbaot. Eksampol, sipos yumi no save bos long yumi wan, mo i isi nomo blong yumi stap spenem mane, maet i gud yumi blokem yumi blong no mekem ol kaon, mo taem yumi go long stoa i nogud yumi wokbaot wetem bigfala mane tumas. Tingbaot toktok blong Pol we i talem se ‘fasin ya blong bilif mo blong harem gud long wanem samting we yumi gat’ hemia “rod blong man i kasem plante samting.” Pol i mekem yumi tingting se: “Taem yumi bon i kam long wol ya, yumi no karem wan samting, mo taem yumi ded, bambae yumi no karem wan samting i go wetem yumi. Be sipos yumi gat kakae blong yumi mo klos blong yumi, hemia i naf, yumi save harem gud.” (1 Timoti 6:6-8) ?Yumi stap harem gud wetem ol samting we yumi gat? I gud yumi lan blong laef wetem smol samting nomo. Yumi no mas letem fasin blong ronem plante samting we yumi wantem i kam tekem ples blong ol samting we oli moa impoten. Be blong mekem olsem, tingting blong yumi i mas strong blong talem “no” mo yumi mas bos strong long yumi wan. I tru se yumi mas trenem yumi long saed ya, be hemia wan gudfala trening.
12, 13. (a) ?Olsem wanem fasin blong bos long yumi wan i impoten long ol Kristin miting? (b) ?Long wanem narafala samting tu, yumi nidim blong wokem fasin blong bos long tingting?
12 Blong kam long ol Kristin miting mo asembli, yumi nidim tu blong bos long yumi wan. Eksampol, yumi nidim fasin ya sipos yumi no wantem we tingting blong yumi i flae olbaot long taem blong miting. (Ol Proveb 1:5) Sipos yumi no wantem spolem ol narafala we oli stap lesingud, ale yumi nidim blong bos long yumi wan blong putum ful tingting blong yumi i stap long tok, i bitim we yumi storian wetem olgeta we oli sidaon klosap long yumi. Sipos yumi no wantem kam let long ol miting, yumi nidim blong bos long yumi wan bakegen blong yumi naf blong stretem sam samting long laef blong yumi. Mo bakegen, sipos yumi wantem gat taem blong rere from ol miting mo blong tekpat long ol miting ya, yumi nidim blong bos long yumi wan.
13 Taem ol smosmol samting oli kam blong traem yumi be yumi bos long tingting blong yumi, bambae yumi naf tu blong bos long tingting blong yumi taem ol bigfala samting oli kam blong traem yumi. (Luk 16:10) Taswe, i gud tumas we yumi stretem yumi wan blong yumi mas ridim, stadi mo tingting dip long Tok blong God mo ol narafala buk we oli tokbaot Baebol, evri dei. I waes tumas we yumi stretem yumi wan blong yumi no tekem ol wok we i no stret long wan Kristin, no jusum ol fren olbaot, no tekem sam tingting no fasin blong laef we oli save spolem yumi biaen. I waes tu blong stretem yumi wan blong bambae yumi naf blong talem “no” long ol pleplei we oli stap tekem taem we yumi mas spenem long wok blong God. Taem yumi bisi long ol wok blong Jeova, samting ya i save blokem yumi long ol nogud samting ya we oli save pulum yumi, yumi gowe long paradaes long saed blong spirit we i stap long ol kongregesen blong Jeova raon long wol.
Kam Bigman Tru Long Fasin Blong Bos Long Tingting
14. (a) ?Olsem wanem ol pikinini oli lanem blong bos long olgeta wan? (b) ?Wanem gudfala frut i save kamaot long ol yangfala we oli lanem fasin ya taem oli smol pikinini nomo?
14 Wan bebi we i jes bon hem i no save bos long tingting blong hem. Wan smol pepa we sam man blong save oli raetem blong tokbaot fasin blong ol pikinini, i talem se: “Fasin blong bos long tingting i no otomatik mo i no kam wantaem nomo. Ol bebi mo smosmol pikinini oli nidim papa mama blong soemaot rod mo givhan long olgeta blong oli stat lanem fasin blong bos long tingting. . . . Wetem help blong papa mama, ol pikinini oli save lanem fasin ya moa long ol yia we oli stap go long skul.” Wan stadi we oli mekem long ol pikinini we oli gat fo yia, i soem se ol yangfala we oli stat lanem fasin blong bos long tingting taem oli pikinini, “oli kam bigman long tingting blong olgeta, oli gat plante fren, oli no fraet blong mekem samting, oli trastem olgeta wan mo narafala i save dipen long olgeta tu.” Long saed blong ol narafala yangfala we oli no lanem fasin ya, stadi ya i talem se “oli no gat fren, oli save kros kwik mo oli stronghed. Mo tu, taem oli fesem hadtaem oli save foldaon isi nomo mo sipos i gat wan samting we i hadwok lelebet, ale, oli no wantem traem mekem.” Yes, i klia se sipos yumi wantem we pikinini blong yumi i gruap i kam wan man we i naf blong karem ol bigfala wok mo tekem ol gudfala disisen, hem i mas lanem blong bos long tingting.
15. ?Taem man i no bos long tingting blong hem, samting ya i soemaot wanem, mo hemia i defren olgeta long wanem mak we Baebol i talem se yumi mas kasem?
15 Long sem fasin, sipos yumi wantem kam bigman long ol Kristin fasin, yumi mas lanem blong bos long tingting. Sipos yumi sot long fasin ya, hemia i min se yumi bebi yet long saed blong spirit. Baebol i givim advaes ya long yumi se ‘long tingting blong yumi, yumi mas kam olsem we yumi bigman finis.’ (1 Korin 14:20) Mak blong yumi hemia se “yumi evriwan i save kam wan nomo, we yumi bilif long Pikinini blong God, mo yumi savegud hem. Nao long fasin ya, bambae yumi kam olsem we yumi no moa pikinini, yumi bigman finis. Bambae yumi kam olsem Kraes nomo, we hem i bigman tru.” ?From wanem? From we “long fasin ya, bambae yumi no moa stap olsem pikinini. Ol giaman tijing blong ol man ya we oli save wokem ol trik, mo oli save lidim ol man oli go krangke, bambae i no save tantanem yumi i go olbaot olsem wan kenu we solwota i stap sakem i go olbaot, mo win i stap karem i go.” (Efesas 4:13, 14) I klia se fasin blong bos long tingting i impoten tumas blong yumi stap strong long saed blong spirit.
Wokem Fasin Blong Bos Long Yu Wan
16. ?Wanem help we Jeova i givim long yumi?
16 Blong wokem fasin blong bos long yu wan, yu nidim help blong God, mo help ya i stap finis. Tok blong God i olsem wan glas we man i yusum blong lukluk fes blong hem, mo i save soem long yumi wanwan wanem fasin nao we yumi nidim yet blong jenisim, mo i save givim advaes tu blong halpem yumi blong jenisim ol fasin ya. (Jemes 1:22-25) Yumi gat kampani blong ol brata tu we oli lavem yumi mo oli rere blong givhan. Ol Kristin elda oli soem se oli kea long yumi taem oli stap rere blong givhan long yumi stret long nid blong yumi. Mo Jeova hem wan i glad blong givim tabu spirit blong hem long yumi sipos yumi askem long hem tru long prea. (Luk 11:13; Rom 8:26) Taswe, yumi mas glad long ol samting ya we i stap blong halpem yumi mo yumi mas yusum olgeta. Sam gudfala advaes we oli stap long pej 21 maet oli save halpem yumi.
17. ?Wanem tok blong leftemap tingting we i stap long Ol Proveb 24:16?
17 !I gud tumas blong save se Jeova i tinghae long yumi taem yumi traehad blong mekem hem i glad! Samting ya i mas pusum yumi blong traehad moa blong bos long yumi wan. Nomata hamas taem yumi foldaon, yumi mas girap mo traehad bakegen. “Nating we trabol i stap kasem stret man hamas taem, be oltaem hem i save girap bakegen.” (Ol Proveb 24:16) Long evri taem we yumi winim wan traem mo yumi mekem Jeova i glad, ale yumi save glad long yumi wan. Yumi save sua tu se Jeova i glad long yumi. Wan Witnes i talem se bifo we hem i givim laef blong hem long Jeova, hem i mas faet strong blong stopem fasin blong smok. Ale, taem wan ful wik i pas we hem i no smok, hem i pem wan gudfala samting blong hem wan bakegen wetem mane ya we hem i no spenem long sigaret. Yes, fasin blong bos long tingting i givhan long hem blong sevem mane mo yusum long gudfala samting.
18. (a) ?Blong bos long yumi wan, yumi mas mekem wanem? (b) ?Wanem promes we Jeova i givim long yumi?
18 Antap long samting ya, yumi mas rimemba se blong bos long yumi wan yumi mas kontrolem tingting mo filing semtaem. Yumi luksave samting ya long ol tok blong Jisas se: “Man we i luk wan woman, nao i wantem hem tumas, i olsem we hem i slip wetem woman ya finis.” (Matiu 5:28; Jemes 1:14, 15) Man we i lanem blong kontrolem tingting mo filing blong hem, bambae hem i faenem i isi moa blong bos long fulwan bodi blong hem. Taswe, i gud yumi mekem tingting blong yumi i strong moa blong blokem nogud fasin. Be i no hemia nomo. I gud tu blong blokem tingting we i lidim yumi blong mekem nogud fasin. Samtaem ol rong tingting bambae oli kam long hed blong yumi, be yumi mas sakemaot olgeta kwiktaem. Yumi save ronwe long ol samting we i pulum yumi, sipos yumi prea mo yumi putum tingting blong yumi i stap strong long Jisas. (1 Timoti 6:11; 2 Timoti 2:22; Hibrus 4:15, 16) Taem yumi stap traehad long saed ya, yumi stap folem advaes ya long Ol Sam 55:22 we i se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala. Hem i no save letem stret man i lus.”
?Yu Yu Tingbaot?
• ?Long wanem tufala rod nao yumi mas bos long yumi wan?
• ?I minim wanem se yu ‘bos long yu wan long olgeta samting’?
• ?Wanem samting we yu makem long stadi ya we i save halpem yumi blong wokem fasin blong bos long yumi wan?
• ?Fasin blong bos long yu wan i stat wea?
[Kwestin]
[Bokis/Foto blong pija long pej 21]
?Olsem Wanem Yu Save Strong Moa Blong Bos Long Yu Wan?
• Yu mas bos long yu wan nating se i long smol samting nomo
• Tingbaot wanem frut we fasin ya bambae i karem i kam long yu naoia mo long fiuja
• No tingting tumas long evri samting we God i no wantem yu blong mekem be tingbaot wanem gudfala samting we hem i wantem yu blong mekem
• Sakemaot kwiktaem ol tingting we oli nogud
• Fulumap hed blong yu wetem ol tingting we oli save mekem yu yu strong long saed blong spirit
• Letem ol Kristin we oli bigman finis oli halpem yu
• Stap longwe long ol samting we yu save se bambae oli pulum yu
• Prea long God blong i halpem yu long taem blong traem
[Tok blong pija long pej 19]
Fasin blong bos long yumi wan i save pulum yumi blong mekem i gud