?Olsem Wanem Yu Save Mekem Ol Disisen We Oli Waes?

SOLOMON, we i King blong Isrel bifo, i talem se: “Man we i waes, bambae hem i lesin long ol tok we oli save tijim hem, mo i holem gud olgeta.” Sam samtaem, plante long yumi i no bin mekem ol waes disisen jes from we yumi no wantem lesin long ol advaes blong narafala.​—Ol Proveb 1:5.

Oli raetemdaon ol tok ya blong Solomon long Baebol, wetem ol narafala “tri taosen waes tok” we hem i bin talem. (1 King 4:32) ?Ol waes tok ya oli save karem frut long laef blong yumi sipos yumi gat save long olgeta mo yumi folem olgeta? Yes. Oli halpem yumi “blong mekem yumi waes, blong yumi save folem ol gudfala advaes, mo yumi save haremsave ol tok we mining blong olgeta i dip.” (Ol Proveb 1:​2, 3) I gud yumi tokbaot faef advaes we oli kamaot long Baebol mo we oli save givhan long yumi blong mekem ol waes disisen.

Tingbaot Frut We Bambae i Kamaot Long Fiuja

Sam disisen bambae oli gat bigfala paoa long laef blong yu. Taswe, bifo we yu mekem wan disisen, i gud yu traem luksave fastaem wanem frut i save kamaot biaen. Lukaot se yu no tingting nomo long ol gudfala samting we yu save kasem jes afta long disisen ya, from we maet samting ya i blokem yu blong yu no luk ol nogud frut tu we disisen ya bambae i karem long fiuja. Ol Proveb 22:3 i givim woning ya se: “Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.”

Wan samting we i save givhan long yu, hemia sipos yu raetemdaon wan lis blong ol frut we oli save kamaot kwiktaem biaen, mo wan lis blong ol frut we oli save kamaot long fiuja. Eksampol, taem yu gat tingting blong jusum wan wok, wan gudfala frut we i save kamaot kwiktaem biaen, maet hemia wan gudfala pei mo wan wok we yu laekem. ?Be olsem wanem long fiuja? ?Bambae yu stap mekem wok ya nomo we yu neva kasem wan gudfala samting moa? ?Maet wok ya i mekem we yu mas muv i go long wan narafala ples, longwe long ol fren mo long famle blong yu? ?Maet wok ya i mekem we yu mas wok wetem sam man we fasin blong olgeta i nogud, no maet yu no moa intres nating long wok ya nao yu stat les long hem? I impoten blong tingting gud fastaem long ol gud saed mo ol nogud saed blong wan disisen. Afta, yu mas jusum samting we i impoten moa.

Tekem Naf Taem

Taem wan man i hareap blong mekem wan disisen, i isi blong mekem wan disisen we i no waes. Ol Proveb 21:5 i givim woning ya se: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” Eksampol, tu yangfala we tufala i lavlavem tufala, tufala i no mas hareap blong mekem disisen blong mared. Sipos no, bambae tufala i luksave se ol tok ya blong William Congreve, wan man Inglan blong raetem stori long ol yia 17 handred, i tru nomo taem hem i se: “Man we i hareap blong mared, bambae hem i gat plante taem blong stap sore long disisen blong hem.”

Nao taem yumi talem se yumi mas tekem naf taem, i no min se yumi mas letem plante tumas taem i pas  bifo we yumi mekem wan disisen. Sam disisen oli impoten tumas, taswe bambae yumi soem se yumi waes sipos yumi no westem taem mo sipos yumi mekem wan stret disisen kwiktaem. Sipos yumi wet longtaem tumas blong mekem wan disisen, maet ol narafala, no yumi wan, bambae i save harem nogud from. Fasin ya blong tektaem blong mekem wan disisen, hem i min se maet yumi mekem wan disisen finis​—mo samtaem disisen ya i no waes.

Rere Blong Lesin Long Advaes

Taem tu man oli fesem sem kaen problem, maet tufala bambae i no mekem semfala disisen blong stretem problem ya from we laef blong tufala i defren. Nating se i olsem, i gud blong save olsem wanem ol narafala oli bin stretem wan problem we i sem mak olsem problem blong yumi. Askem long olgeta se oli ting wanem naoia long disisen we oli bin mekem. Eksampol, bifo we yu jusum blong mekem wan wok blong winim mane, i gud yu askem long olgeta we oli joen finis long kaen wok olsem se wanem ol gudfala saed mo ol nogud saed blong bisnes ya. ?Disisen we oli bin tekem i karem wanem gudfala frut mo wanem nogud frut, mo wanem denja i save kamaot from?

Baebol i givim woning ya long yumi se: “Olgeta plan blong man oli save foldaon sipos oli no toktok gud tugeta fastaem. Be taem i gat fulap man blong givim advaes, bambae ol plan oli kamtru.” (Ol Proveb 15:​22, NW ) Nating se i olsem, taem yumi askem advaes mo yumi traem lanem samting from save blong narafala, yumi mas luksave se bambae yumi nomo yumi mas tekem disisen blong yumi wan mo karem frut blong disisen ya.​—Galesia 6:​4, 5.

Lesingud Long Tingting We i Jajem Yu

Tingting we i jajem yumi i save halpem yumi blong tekem ol disisen we oli laenap wetem ol stampa rul we yumi bin jusum blong folem. Long lukluk blong wan Kristin, i min se hem i mas trenem tingting we i jajem hem, blong tingting ya i laenap wetem samting we God i wantem. (Rom 2:​14, 15) Baebol i talem long yumi se: “Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Ol Proveb 3:6) Be i tru se, taem tu man tufala i mas mekem disisen long semfala bisnes, maet samting we wan i jusum bambae i defren long narawan​—nating sipos tingting blong tufala tugeta i wokgud folem Baebol.

Be i klia se sipos tingting blong wan man i wokgud folem Baebol neva bambae man ya i save jusum wan rod we i go stret agensem wanem we Tok blong God i talem. Eksampol, wan man mo wan woman we tufala i no trenem tingting blong tufala blong folem ol rul blong Baebol, tufala i save ting se i stret nomo blong laef tugeta bifo mared, blong meksua se bambae tufala i fit tugeta. Maet tufala i ting se disisen ya i waes, from we long rod ya bambae tufala i no hareap blong mared we biaen tufala i sore from. Maet tingting blong tufala i no jajem tufala se tufala i mekem wan rong. Be, wan man we i folem tingting blong God long saed blong seks mo mared, hem i no save agri wetem rabis fasin ya blong laef tugeta bifo mared.​—1 Korin 6:​18; 7:​1, 2; Hibrus 13:4.

Tingbaot Narafala Bifo We Yu Mekem Disisen

Plante taem, ol disisen we yu mekem oli save gat paoa long narafala. Taswe, neva mekem wan disisen we i no waes​—no we maet i krangke stret​—mo i save spolem fasin fren blong yu wetem ol fren mo famle no, antap moa, wetem God. Ol Proveb 10:1 i talem se: “Pikinini we i waes, hem i stap mekem papa mo mama blong hem, tufala i glad long hem, be pikinini we i no gat hed, hem i stap mekem tufala i harem nogud nomo.”

Yu mas luksave we samtaem bambae yu mas jusum blong lego sam fren blong yu. Eksampol, maet yu mas mekem disisen blong sakemaot sam strong bilif we yu gat bifo, from we naoia yu save se ol bilif ya oli no laenap wetem tijing blong Baebol. No maet yu tekem disisen blong mekem sam bigfala jenis long ol fasin blong yu from we yu wantem se laef blong yu i laenap wetem ol rul blong God we yu akseptem finis. Ale, maet sam fren no sam famle blong  yu bambae oli no glad long disisen blong yu. Be yu mas tingbaot se, sipos disisen blong yu i mekem God i glad, hemia i min se disisen ya i waes.

Soem Waes Fasin Blong Mekem Disisen Ya We i Impoten Moa

Plante man oli no save samting ya, be tede yumi evriwan i gat wan bigfala disisen blong mekem. Disisen ya se, yumi wantem laef no yumi wantem ded. Ol man Isrel bifo oli mas mekem semfala disisen taem oli stap long boda blong Promes Lan long 1473 B.K.T. * Moses i toktok blong talemaot tingting blong God i se: “Naoia mi mi talem stret long yufala se yufala nomo i mas jusumaot. ?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef! Hae God [Jeova] i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, bambae yufala wetem ol pikinini blong yufala mo olgeta we bambae oli kamaot biaen long yufala, bambae yufala evriwan i laef, mo bambae yufala i save stap longtaem long kantri ya we hem i promes long trifala bubu ya blong yumi bifo, Ebraham, mo Aesak, mo Jekob, se bambae i givim long yumi.”​—Dutronome 30:​19, 20.

Ol profet tok mo ol yia we Baebol i tokbaot oli soem se yumi stap laef long wan taem we “i raf bitim mak, i strong tumas long ol man” mo i soem tu se “fasin blong wol ya i stap jenis.” (2 Timoti 3:1, NW; 1 Korin 7:​31, NW ) Jenis ya bambae i kamtru taem niufala wol blong God, we stret fasin nomo i stap long hem, bambae i tekem ples blong olfala wol ya we bambae i lus.

I olsem we yumi stap stanap stret long doa blong niufala wol ya. ?Bambae yu yu go insaed long niufala wol ya blong kasem laef we i no save finis aninit long rul blong Kingdom blong God? ?No bambae yu lus wetem wol blong Setan? (Ol Sam 37:​9-​11; Ol Proveb 2:​21, 22) I stap long yu nao blong jusum weswan rod blong folem. Maet yu laef no maet yu ded, hemia bambae i dipen long disisen we yu mekem. ?Olsem wanem? ?Yu yu glad sipos narafala i halpem yu blong mekem gudfala disisen we i waes?

Sipos yu jusum se yu wantem laef, i min se fastaem yu mas lanem ol samting we God i wantem yu blong mekem. Bighaf blong ol jos oli mestem mo oli no talem ol samting we God i wantem man blong mekem. Plante taem, ol lida blong jos oli lidim ol man oli gorong taem oli pulum olgeta blong bilif long sam giaman tijing mo blong mekem ol samting we God i no laekem. Oli no eksplenem long ol man se i impoten tumas we oli mekem prapa disisen blong olgeta blong wosipim God “long spirit mo trutok.” (Jon 4:​24, NW ) Taswe, plante man oli no wosipim God long fasin ya. Be makemgud samting we Jisas i bin talem: “Man we i no biaen long mi, hem i agens long mi. Mo man we i no joen long mi blong tekem ol man oli kam wanples, hem i stap ronem ol man oli go wanwan.”​—Matiu 12:30.

Ol Witnes blong Jeova oli glad blong halpem ol man blong oli kasem moa save long Baebol. Oltaem oli stadi Baebol wetem ol man wanwan no wetem sam grup blong man, long wan taem mo ples we i stret long ol man ya. Olgeta we oli intres long ol stadi olsem oli save singaot ol Witnes long ples blong olgeta no oli save raet long olgeta we i wokem Wajtaoa ya blong askem wan stadi.

Ating sam man oli gat sam save finis long saed blong ol samting we God i wantem. Maet oli sua fulwan se Baebol i talem trutok mo se ol man oli save trastem hem. Nating se i olsem, plante long ol man ya oli no tekem disisen yet blong givim laef blong olgeta i go long God. ?From wanem? I gat plante defren risen.

Maet oli no save se i rili impoten blong tekem disisen ya. Jisas i talem klia se: “I no olgeta man evriwan we oli stap singaot mi se ‘Masta, Masta’ we bambae oli save go insaed long niufala wol ya we God i king long hem. Man we i stap mekem ol samting we Papa blong mi long heven i wantem, hem nomo bambae i save go insaed.” (Matiu 7:21) Save long saed blong Baebol i no naf. Yu mas joenem save ya wetem ol wok. Ol faswan Kristin oli soem eksampol long saed ya. Baebol i tokbaot sam Kristin blong faswan handred yia i se: “Be taem olgeta ya oli harem tok blong Filip, we hem i stap talemaot gud nius blong Jisas Kraes, mo fasin we God i kam King blong ol man blong hem, oli bilif long tok ya. Mo ol man mo ol woman we oli bilif, Filip i baptaesem olgeta.” (Ol Wok 2:​41; 8:​12) Taswe, sipos wan man i akseptem trutok blong Baebol finis wetem fulhat blong hem, i bilif long samting we Baebol i talem, mo i mekem laef blong hem i laenap wetem ol rul blong God, nao kwestin i stap se: ?Wanem samting i blokem hem blong i no givim laef blong hem i go long God mo i tekem baptaes? (Ol Wok 8:​34-​38) I klia se sipos hem i wantem we God i glad long hem, hem wan i mas wantem blong mekem disisen ya long gladhat blong hem.​—2 Korin 9:7.

 Maet sam man oli no givim laef blong olgeta long God from we oli harem se oli no gat naf save. Be evri man we i stat folem wan niufala fasin blong laef, bambae hem i gat smol save nomo fastaem. I no gat wan man blong wok we i save talem se, taem hem i statem wok ya plante yia bifo, hem i save finis olgeta samting we hem i save naoia. Taswe, taem wan man i mekem disisen blong mekem wok blong God, hem i mas save ol stampa tijing mo rul blong Baebol, mo hat blong hem i mas pulum hem blong wantem laef folem ol save ya. Hemia nao samting we i impoten fastaem.

Maet sam man oli no mekem disisen ya from we oli fraet se bambae oli no naf blong holem promes long saed ya. I stret blong wari lelebet from we ating evri man oli filim olsemia sipos oli mas mekem wan strong promes long wan narafala man. Tingbaot wan man we i mekem disisen blong mared mo gat pikinini. Maet fastaem hem i wari se bambae hem i no naf. Be taem hem i mekem strong promes insaed long mared, samting ya bambae i pusum hem blong mekem bes blong hem blong holem promes ya. Mo tu, tingbaot, wan yangfala we i jes kasem laesens blong draevem trak. Maet hem i fraet blong gat wan aksiden​—speseli sipos hem i harem ol ripot we oli soem se ol yangfala draeva oli mekem moa aksiden i bitim ol olfala draeva. Nating se i olsem, save ya bambae i pulum hem moa blong lukaotgud taem hem i draevem trak. !I no waes nating sipos hem i no wantem kasem laesens blong draevem trak jes from ol ripot ya!

!Mekem Disisen Blong Laef!

Baebol i soem we wol blong tede wetem politik blong hem, ol big bisnes blong hem, mo ol jos blong hem, mo olgeta man ya we oli sapotem hem, bambae i no longtaem oli lus. Be ol man we oli mekem waes disisen blong laef mo we oli wok folem disisen ya, olgeta bambae oli no save lus. Ol man ya bambae oli mekemap grup blong olgeta ya we oli laef long niufala wol. Bambae oli wok blong mekem wol ya i kam wan paradaes, olsem we God i wantem fastaem. ?Olsem wanem long yu? ?Yu yu glad blong joen long nambawan wok ya aninit long rul blong God?

Sipos yes, yu mas mekem disisen blong stadi long Baebol. Yu mas mekem disisen blong lanem ol samting we God i wantem yu blong mekem. Yu mas mekem disisen blong folem ol samting ya long laef blong yu. Antap moa, yu mas mekem disisen blong laef folem disisen ya go kasem en. !Yes, yu mas mekem disisen blong laef!

[Futnot]

[Tok blong pija long pej 4]

Tekem naf taem blong mekem ol impoten disisen

[Tok blong pija long pej 5]

Lesin long ol advaes bifo we yu jusum wanem wok bambae yu mekem

[Tok blong pija long pej 7]

Olgeta we oli mekem disisen blong wok blong God tede, bambae oli wok blong mekem wol ya i kam wan paradaes